Kontribushonnan Ku Ta Agradá Dios

E RELATO no ta unu agradabel. Reina Atalía a poderá di e trono di Huda mediante engaño i asesinato. Ekibokadamente el a asumí ku nan a mata tur e herederonan natural, i pues el a instalá su mes komo reina. Un otro señora, prensès Josaba, kende tabata stima Yehova i su Lei masha hopi, ku kurashi a skonde un desendiente real, e beibi Joas. Josaba ku su kasá, e Sumo Saserdote Joiada, a skonde e heredero seis aña largu den nan lugá di habitashon riba tereno di e tèmpel.—2 Reinan 11:1-3.

Ora ku Joas a hasi shete aña di edat, Sumo Saserdote Joiada tabata kla pa kuminsá ku su plan pa kore ku e reina ku a usa mala maña pa usurpá e trono. Joiada a revelá e mucha hòmber ku e tabatin skondí i a koron’é komo e heredero legítimo di e reino. Anto e ora ei guardianan real a saka e reina malbado Atalía pafó di e tereno di e tèmpel i a ehekut’é. Esei a trese hopi alivio i alegria pa e pueblo. Joiada i Josaba mediante nan akshonnan a duna un gran kontribushon na e restorashon di adorashon berdadero den e tera di Huda. Pero mas importante, nan a kontribuí na e kontinuashon di e liña real di David ku lo a hiba na e Mesias.—2 Reinan 11:4-21.

E rei resien instalá tambe a hasi despues un kontribushon ku a agradá Dios. E kas di Yehova mester a wòrdu drechá urgentemente. Atalía su ambishon deskontrolá p’e ta e úniko gobernante di Huda no solamente a pone ku hende a neglishá e tèmpel sino tambe ku nan a plùnder e. P’esei Joas tabata determiná pa rekonstruí i drecha e tèmpel. Sin tarda, el a saka un dekreto pa rekohé e fondonan nesesario pa renobá e kas di Yehova. El a bisa: “Tur e plaka di e artíkulonan santu ku nan ta trese den e kas di SEÑOR, na plaka koriente, tantu e plaka ku ta stipulá pa kada hende, komo tur e plaka ku kada hende ta proponé den su kurason pa trese den e kas di SEÑOR, laga e saserdotenan tuma esaki pa nan mes, kada un for di su konosínan; i laga nan drecha e dañonan na e kas, na unda ku nan haña kualke daño.”—2 Reinan 12:4, 5.

E pueblo a kontribuí di buena gana. Sin embargo, e saserdotenan no tabata kumpli di henter kurason ku nan deber di drecha e tèmpel. P’esei e rei a disidí di tuma e asuntu den su mes man i a ordená pa tur kontribushon bai direktamente den un kaha spesial. El a pone Joiada na enkargo di esei, i e relato ta bisa: “Ma saserdote Joiada a kohe un kaha i a bora un buraku den su tapa, i a pone esaki banda di e altar, na banda drechi ora bo ta drenta e kas di SEÑOR; i e saserdotenan ku tabata tene warda na e drèmpel tabata pone tur e plaka ku a wòrdu tresí den e kas di SEÑOR den dje. I ora nan a mira ku tabatin hopi plaka den e kaha, e eskriba di rei i e sumo saserdote a bin mara esaki den sakunan i a konta e plaka ku a wòrdu hañá den e kas di  SEÑOR. I nan a entregá e plaka ku nan a pisa den man di esnan ku tabata hasi e trabou, esnan ku tabatin enkargo di e kas di SEÑOR; i kuné nan tabata paga e karpinténan i e trahadónan ku tabata traha riba e kas di SEÑOR, i e mètslanan i e kapdónan di piedra, i pa kumpra palu i piedra gekap pa drecha e dañonan na e kas di SEÑOR, i pa tur e otro gastunan ku tabatin pa drecha e kas.”—2 Reinan 12:9-12.

E reakshon di e pueblo tabata di henter kurason. Yehova su kas di adorashon a keda drechá di manera ku su adorashon por a sigui ku dignidat. Pues, tur e fondonan kontribuí a keda usá na un manera apropiá. Rei Joas a hasi sigur di esei!

Awe, Yehova su organisashon visibel ta sòru kuidadosamente pa tur fondo kontribuí ser usá korektamente pa adelanto di e adorashon di Yehova, i kristiannan berdadero a reakshoná meskos ku e israelitanan di antigwedat: di henter nan kurason. Podisé abo ta entre esnan ku a kontribuí pa adelanto di interesnan di Reino durante e último aña di sirbishi. Laga nos tuma nota di algun di e maneranan ku a hasi uso di bo kontribushon.

PUBLIKASHON

Mundialmente, a imprimí i distribuí e siguiente publikashonnan aki:

• Buki: 47.490.247

• Foyeto chikí: 6.834.740

• Foyeto grandi: 167.854.462

• Kalènder: 5.405.955

• Revista: 1.179.266.348

• Tratado: 440.995.740

• Vidio: 3.168.611

Trabou di imprenta ta ser hasí na Afrika, Nort- i Suramérika, Amérika Sentral, Asia, Europa i islanan di Oséano Pasífiko, un total di 19 pais.

“Mi nòmber ta Katelyn May. Mi tin ocho aña. Mi tin $28, i mi ke pa boso hañ’é pa yuda paga pa e mashinnan di drùk. Boso ruman chikí, Katelyn.”

“Nos a tene un reunion di famia relashoná ku e mashinnan di drùk nobo. Nos yunan, di 11 i 9 aña, a disidí di saka plaka for di nan sparpòt i duna nan parti. Nos ta kontentu di por manda nan kontribushon huntu ku esun di nos.”

 KONSTRUKSHON

Aki ta sigui algun di e proyektonan di konstrukshon ku a tuma lugá pa apoyá e aktividatnan di Testigunan di Yehova:

• Salòn di Reino den paisnan di poko rekurso: 2.180

• Salòn di Asamblea: 15

• Sukursal: 10

• Boluntario internashonal den sirbishi di tempu kompletu: 2.342

“E fin di siman aki nos tabatin e promé reunion den nos Salòn di Reino nobo. Nos ta masha felis di por tin un lugá apropiá pa duna alabansa na nos Tata, Yehova Dios. Nos ta gradisí Yehova i boso pa a duna atenshon na nos nesesidatnan dor di traha mas Salòn di Reino. De echo, nos Salòn di Reino ta duna realse na e bisindario.”—Chile.

“E rumannan ta apresiá masha hopi e yudansa ku Yehova su organisashon a duna. Te ku awe, nos ta papia ketu bai di e tempu maravioso ku nos a pasa ku e tim di konstrukshon.”—Moldova.

“Ami ku mi esposa resientemente a selebrá nos di 35 aniversario matrimonial. Nos tabata purba disidí kiko nos lo regalá otro pa e okashon, i nos a disidí di duna algu bèk na Yehova i na su organisashon, pasobra sin nan yudansa, nos probablemente lo no tabatin éksito den nos matrimonio. Nos ke pa usa e plaka ku nos ta manda huntu ku e karta aki pa yuda den konstrukshon di un Salòn di Reino den un di e paisnan ménos privilegiá.”

“Resientemente mi a haña un herensia. Pero komo ku e kosnan ku mi ke ta poko i e kosnan ku mi mester ta asta ménos, mi ke pa boso haña e plaka ku mi ta manda huntu ku e karta aki pa yuda traha Salònnan di Reino, lokual hopi pais tin tantu mester di dje.”

 YUDANSA ORA DI DESASTER

Den e último dianan aki, desasternan ta tuma lugá sin ningun spièrtamentu. Hopi Testigu di Yehova ta duna èkstra kontribushon di manera ku por yuda nan rumannan den áreanan asotá. Un rekordatorio: kontribushonnan pa yuda ora di desaster ta ser atministrá komo parti di e obra mundial. Aki ta sigui algun di e lugánan kaminda Testigunan di Yehova a yuda víktimanan di desaster:

• Afrika

• Asia

• Region di Caribe

• Islanan di Oséano Pasífiko

“Ami ku mi esposo lo ke gradisí boso masha hopi pa e materialnan ku boso a manda pa yuda ku e daño kousá durante e horkannan. Esei a hasi posibel ku nos por a pone un dak nobo riba nos kas. Nos a ègt apresiá ku boso a reakshoná asina lihé.”

Mi nòmber ta Connor, i mi tin 11 aña. Ora mi a mira loke e tsunami a hasi, mi kier a yuda. Mi ta spera ku esaki lo yuda mi rumannan.”

 SIRBIDÓNAN SPESIAL DI TEMPU KOMPLETU

Un kantidat di kristian ta sirbi tempu kompletu den e trabou di prediká òf den kasnan di Bètel. Un parti di e boluntarionan di tempu kompletu ta ser sostené dor di kontribushonnan boluntario. Entre nan tin lo siguiente:

• Misionero: 2.635

• Superintendente biahero: 5.325

• Bètelita: 20.092

“Komo ku mi no por sirbi na Bètel awor [mucha hòmber di sinku aña], mi ke manda e kontribushon aki ku hopi amor. Ora mi bira grandi, mi ta bai Bètel pa traha duru.”

Pa Promové Edukashon Bíbliko

Hesukristu a duna su siguidónan e tarea pa “hasi tur e nashonnan disipel.” (Mateo 28:19) Obedesiendo su palabranan, Testigunan di Yehova ta drùk bezig ta prediká i siña hende e mensahe di Beibel den 235 pais. Nan ta publiká i distribuí literatura bíbliko na 413 idioma.

De echo, e kontribushon di mas balioso ku un kristian por duna pa yuda mas hende siña tokante Dios i Su propósitonan ta su tempu. Testigunan di Yehova a duna abundantemente di nan tempu i energia pa yuda nan próhimo. Tambe nan a kontribuí generosamente den sentido finansiero, i tur nan kontribushonnan, duná den un òf otro forma, a yuda hasi Yehova su nòmber i su propósitonan konosí rònt mundu. Ku Yehova sigui bendishoná e esfuersonan aki pa yuda otro hende siña mas tokante dje. (Proverbionan 19:17) E aktitut dispuesto pa yuda ei ta agradá Yehova!—Hebreonan 13:15, 16.

[Kuadro na página 28-30]

Maneranan Ku Algun Hende Ta Skohe pa Duna

KONTRIBUSHON PA E OBRA MUNDIAL

Hopi hende ta apartá, òf hinka den nan presupuesto, un montante pa nan pone den e kahanan di kontribushon marká: “Kontribushon pa e Obra Mundial—Mateo 24:14.”

Tur luna kongregashonnan ta manda e montantenan aki pa e sukursal di Testigunan di Yehova ku ta sirbi nan respektivo pais. Tambe por manda donashon boluntario di plaka direktamente na Watch Tower Bible and Tract Society of Pennsylvania, Attention Treasurer’s Office, 25 Columbia Heights, Brooklyn, New York 11201-2483, òf n’e ofisina di sukursal ku ta sirbi bo pais. Si manda chèk, e mester ta na nòmber di “Watch Tower.” Tambe por hasi donashon di prenda òf otro kos di balor. Un karta breve ku ta deklará ku esakinan ta un regalo inkondishonal mester kompañá e kontribushonnan aki.

AREGLO DI DONASHON KONDISHONAL

Por hasi donashon di plaka via un areglo spesial den kua, riba petishon di e dunadó, lo por debolbé e donashon na dje. Pa mas informashon, por fabor, tuma kontakto ku e Treasurer’s Office na e adrès ya menshoná.

DONASHON PLANIÁ

Ademas di regalo inkondishonal di plaka, tin otro métodonan di duna na benefisio di e sirbishi di Reino mundial. Esakinan ta inkluí:

Seguro: Por nombra Watch Tower komo benefisiario di un pólisa di seguro di bida òf di un areglo di penshon.

Kuenta di Banko: Por duna Watch Tower derecho di usa kuenta di banko, ‘time deposit’ òf kuenta di penshon personal, òf derecho di kobra nan despues di morto di nan doño, na armonia ku rekisitonan bankario lokal.

Akshon i Bono: Por hasi donashon di akshon i bono na Watch Tower komo un regalo inkondishonal.

Propiedat: Por hasi donashon di propiedat ku por ser bendé, sea komo regalo inkondishonal òf bou di e kondishon ku e dunadó por sigui biba den dje te na su morto. Tuma kontakto ku e ofisina di sukursal di bo pais promé ku traha e akta pa traspasá kualke propiedat.

Tèstamènt i ‘Trust’: Por nombra Watch Tower komo heredero di propiedat òf plaka via un tèstamènt legal, òf por nombra Watch Tower komo benefisiario di un areglo di trust. Un trust ku ta benefisiá un organisashon religioso por duna sierto benefisionan fiskal.

Pa mas informashon, bo por tuma kontakto ku Sosiedat Watch Tower, via karta òf telefòn, na e adrès indiká aki bou, òf na e ofisina di Testigunan di Yehova ku ta sirbi bo pais.

Sosiedat Watch Tower

P.O. Box 4708 (Seroe Loraweg 142A)

Curaçao, N.A.

Telefòn: (599-9) 461-7528

[Rekonosementu pa Potrèt na página 27]

Vidio Fiel: Stalin: U.S. Army photo