Lo Bo Kana ku Dios?
Lo Bo Kana ku Dios?
“Kana humildemente ku bo Dios.”—Mikeas 6:8.
1, 2. Kon nos por kompará Yehova su sintimentunan pa nos ku esnan di un mayor ku ta siña un yu kana?
UN BEIBI, ta para lenchi i ta dal su promé pasonan den direkshon di e brasanan habrí di su mayor. Esei por parse un kos chikí, pero pa e mama ku e tata, e ta un logro importante, un momentu yen di promesa pa futuro. E mayornan ansiosamente ta antisipá kon nan lo kana ku nan yu, man tené, den e lunanan i añanan binidero. Nan ta spera ku den hopi manera nan por sigui duna e yu guia i sosten leu den futuro.
2 Yehova Dios tin sintimentunan similar pa ku su yunan terenal. Un biaha el a bisa relashoná ku su pueblo Israel, òf Efrain: “Ami ta Esun ku a siña Efrain kana, mi a kohe nan den mi brasa . . . Mi a guia nan ku kordonnan di hende, ku lasonan di amor.” (Oseas 11:3, 4) Aki Yehova ta deskribí su mes komo un mayor amoroso kende ku pasenshi ta siña un yu kana, kisas tumand’e den Su brasa ora e kai. Yehova, e mihó Mayor ku tin, ta ansioso pa siña nos kon pa kana. Tambe e tin plaser den kompañá nos segun ku nos ta sigui hasi progreso. Manera nos teksto sentral ta mustra, nos por kana ku Dios! (Mikeas 6:8) Pero kiko kana ku Dios ta nifiká? Pakiko nos tin ku hasi esei? Kon esei ta posibel? I ki bendishonnan nos ta haña dor di kana ku Dios? Laga nos konsiderá e kuater preguntanan aki un pa un.
Kiko Kana ku Dios Ta Nifiká?
3, 4. (a) Kiko ta remarkabel tokante e deskripshon di kana ku Dios? (b) Kiko kana ku Dios ta nifiká?
3 Ta mas ku klaru ku un hende di karni i sanger no por bai kana literalmente ku Yehova, un ser spiritual. (Eksodo 33:20; Juan 4:24) Pues ora Beibel ta papia di hende su kanamentu ku Dios, ta den sentido figurativo. De fakto e ta deskribí un kuadro mental remarkabel, unu ku ta surpasá bareranan nashonal i kultural i ku ta aplikabel na kualke periodo di tempu. De echo, ta hende di kua lugá òf era lo no por komprondé e konsepto di un persona ku ta kana den kompania di un otro? E deskripshon aki ta duna e idea di un relashon kordial i íntimo, no ta asina? E sintimentunan ei ta duna nos un bista mas profundo den loke ta nifiká kana ku Dios. Pero laga nos ta mas spesífiko.
4 Kòrda riba e hòmbernan fiel Enok i Noe. Dikon nan a ser deskribí kanando ku Dios? (Génesis 5:24; 6:9) Den Beibel, e ekspreshon “kana” hopi bes ta nifiká sigui un sierto proseder òf forma di aktua. Enok i Noe a skohe un rumbo den bida ku tabata na armonia ku e boluntat di Yehova Dios. Distinto for di e hendenan den e mundu rònt di nan, nan sí a akudí na Yehova pa haña guia i a obedesé su instrukshon. Nan a konfia den Yehova. Akaso esaki a nifiká ku ta Yehova tabata tuma desishon pa nan? Nò. Yehova a duna hende boluntat liber, i e ke pa nos usa e don ei huntu ku nos propio “fakultat di rasoná.” (Romanonan 12:1, NW) Sin embargo, segun ku nos ta tuma desishonnan, nos ta permití humildemente pa nos fakultat di rasoná ser guiá pa Yehova su mente infinitamente superior. (Proverbionan 3:5, 6; Isaias 55:8, 9) De echo, segun ku nos ta kana den bida, nos ta hasi e biahe ei den estrecho kompania ku Yehova.
5. Dikon Hesus a papia di agregá un kodo na e durashon di un hende su bida?
5 Beibel hopi bes ta kompará bida ku un biahe òf un kaminata. Den algun kaso e komparashon ei ta direkto, pero den otro kasonan e ta indirekto. Por ehèmpel, Hesus a bisa: “Kua di boso, dor di ta anshá, por agregá un kodo na e durashon di su bida?” (Mateo 6:27, NW) Podisé un parti di e palabranan ei por ta difísil pa bo komprondé. Dikon Hesus lo a papia di agregá “un kodo,” ku ta un midí di distansia, na un persona su ‘durashon di bida,’ ku ta ser midí na tempu? * Hesus evidentemente a presentá bida manera un biahe. De echo, el a siña hende ku preokupashon lo no yuda bo agregá ni sikiera un stap chikí na e biahe ei di bida. Pero nos mester konkluí anto ku no tin nada ku nos por hasi tokante e durashon di nos kaminata ku Dios? Al kontrario! Esei ta trese nos na nos di dos pregunta: Pakiko nos tin ku kana ku Dios?
Pakiko Nos Tin ku Kana ku Dios?
6, 7. Hende imperfekto tin mester di kiko urgentemente, i dikon nos ta hasi bon di akudí na Yehova pa satisfasé e nesesidat ei?
6 Jeremias 10:23 ta splika un motibu pakiko nos tin ku kana ku Yehova Dios: “O SEÑOR, mi sa ku e kaminda di hende no ta di dje mes; tampoko no ta keda na hende pa dirigí su pasonan.” Pues nos komo hende no tin e abilidat ni e derecho di dirigí nos propio rumbo di bida. Nos tin mester di guia urgentemente. Hende ku ta insistí di sigui nan propio kaminda, independiente di Dios, ta kometé e mesun eror ku Adam ku Eva a kometé. E promé pareha a tuma e derecho di determiná pa nan mes loke ta bon i loke ta malu. (Génesis 3:1-6) E derecho ei simplemente “no ta di” nos.
7 Abo no ta sinti e nesesidat di tin guia durante e biahe di bida? Tur dia, nos tin ku tuma desishonnan grandi i chikí. Tin di nan ta difísil i por afektá nos futuro, i tambe futuro di nos sernan kerí. Pero kòrda ku tin un persona infinitamente mas bieu i mas sabí ku nos ku gustosamente ke duna nos guia amoroso pa tuma e desishonnan ei! Lamentablemente, mayoria hende awe ta preferá di konfia riba nan propio huisio i guia nan propio pasonan. Nan ta pasa por haltu di e bèrdat ku Proverbionan 28:26 ta deklará: “Esun ku konfia den su mes kurason ta un bobo, ma esun ku kana ku sabiduria lo wòrdu librá.” Yehova ke spar nos di e desasternan ku ta resultá dor di konfia den e kurason humano engañoso. (Jeremias 17:9) E ke pa nos kana den sabiduria, dor di konfi’é komo nos Guia i Instruktor sabí. Ora nos hasi esei, nos kaminata den bida ta duna nos siguridat, satisfakshon i un sintimentu di logro.
8. Piká i imperfekshon di mes ta hiba hende na ki destinashon, pero kiko Yehova ke pa nos?
8 Un otro motibu pakiko nos tin ku kana ku Dios tin keber ku e largura di e kaminda ku nos ke kana. Beibel ta deklará un bèrdat tristu. Den un sentido, tur hende imperfekto ta kanando den direkshon di e mesun destinashon. Deskribiendo e pruebanan ku ta kompañá edat avansá, Eklesiastés 12:5 ta bisa: “Hende ta bai na su kas eterno, miéntras ku yoradónan di morto ta kana rònt den kaya.” Kiko ta e “kas eterno” aki? Nos graf, kaminda piká i imperfekshon di mes ta hiba nos. (Romanonan 6:23) Sin embargo, Yehova ke mas pa nos ku djis un kaminata kòrtiku i yen di problema di nos wig pa nos graf. (Jòb 14:1) Solamente dor di kana ku Dios nos por tin e speransa di kana mesun largura ku tabata su intenshon pa nos kana, esta, pa semper. No ta esei ta loke bo ke? Ta bisto anto ku bo tin ku kana ku bo Tata.
Kon Nos Por Kana ku Dios?
9. Dikon tabatin biaha ku Yehova tabata skondí pa su pueblo, pero ki siguransa el a duna segun Isaias 30:20?
9 E di tres pregunta den nos konsiderashon ta meresé nos pleno atenshon. E ta: Kon nos por kana ku Dios? Nos ta haña e kontesta na Isaias 30:20 i 21: “Bo Siñadó, lo no skonde su mes mas, ma bo wowonan lo mira bo Siñadó. Bo orea lo tende un palabra tras di bo ta bisa: ‘Esaki ta e kaminda, kana den dje,’ ki ora ku boso bira na man drechi òf na man robes.” Den e pasashi alentador aki, e palabranan di Yehova ku tin pará skirbí na versíkulo 20 kisas a rekordá su pueblo ku ora nan a rebeldiá kontra dje, Yehova de echo tabata skondí for di nan. (Isaias 1:15; 59:2) Pero aki e versíkulo ta presentá Yehova, no skondí, sino pará abiertamente dilanti di su pueblo fiel. Nos lo por pensa riba un instruktor pará dilanti di su studiantenan, demostrando nan kiko e ke pa nan siña.
10. Den ki sentido bo por “tende un palabra tras di bo” for di bo Magnífiko Siñadó?
10 Versíkulo 21, ta pinta un otro kuadro mental. E ta deskribí Yehova komo si fuera kanando tras di su pueblo, dunando nan instrukshon kua ta e kaminda korekto pa kana. Ekspertonan bíbliko a komentá ku e ekspreshon aki lo por ta basá riba e manera ku un wardadó tin biaha ta kana tras di su karnénan, i na bos haltu e ta guia nan i ta sòru pa nan no bai den e kaminda robes. Kon e deskripshon aki ta apliká na nos? Wèl, ora nos ta akudí na e Palabra di Dios pa haña guia, nos ta lesando palabranan ku a keda registrá míles di aña pasá. Ta komo si fuera nan ta biniendo for di nos tras den e koriente di tempu. Sin embargo, nan ta mesun al kaso awe ku nan tabata dia ku a skirbi nan. Konseho bíbliko por guia nos den nos desishonnan diario i por yuda nos plania e rumbo di nos bida pa e añanan den futuro. (Salmo 119:105) Ora ku nos sinseramente ta buska tal konseho i ta aplik’é, Yehova e ora ei ta nos Guia. Nos ta kanando ku Dios.
11. Segun Jeremias 6:16, ki kuadro atraktivo Yehova a deskribí pa su pueblo, pero kon nan a reakshoná?
11 Nos realmente ta permití e Palabra di Dios guia nos asina estrechamente? Ta bale la pena pa de bes en kuando nos para ketu un ratu i analisá nos mes onestamente. Konsiderá un versíkulo ku lo yuda nos hasi esei: “Asina SEÑOR ta bisa: ‘Para na e kamindanan i mira, i puntra pa e bereanan antiguo, unda e bon kaminda ta, i kana den dje; i boso lo haña deskanso pa boso alma.’” (Jeremias 6:16) E palabranan aki kisas ta laga nos kòrda riba un biahero ku ta para na un krusada pa puntra ki direkshon e tin ku sigui. Den un sentido spiritual, Yehova su pueblo rebelde na Israel tabatin ku hasi algu similar. Nan tabatin ku buska manera pa bai bèk na “e bereanan antiguo.” E “bon kaminda” tabata e kaminda den kua nan fiel antepasadonan a kana, e kaminda for di kua e nashon a kometé e bobedat di desviá. Lamentablemente, Israel a reakshoná na un manera kabesura riba e rekordatorio amoroso aki for di Yehova. E mesun versíkulo ta sigui bisa: “Ma nan a bisa: ‘Nos no kier kana den dje!’” Pero e pueblo di Dios den tempu moderno sí a reakshoná otro riba tal konseho.
12, 13. (a) Kon Kristu su siguidónan ungí a reakshoná riba e konseho di Jeremias 6:16? (b) Kon nos lo por analisá nos mes relashoná ku e manera ku nos ta kana awe?
12 For di e último parti di siglo 19, Kristu su siguidónan ungí a apliká e konseho di Jeremias 6:16 na nan mes. Komo grupo, nan a hiba delantera den regresá di henter nan kurason na e kaminda òf “bereanan antiguo.” Distinto for di kristiandat apóstata, nan sí a pega fielmente na “e ehèmpel di palabranan sano” ku Hesukristu a establesé i ku su fiel siguidónan di promé siglo a tene na dje. (2 Timoteo 1:13) Te ku awe, e ungínan ta yuda otro i tambe nan kompañeronan di ‘otro karné’ pa sigui e kaminda di bida sano i felis ku kristiandat a bandoná.—Juan 10:16.
13 Dor di perkurá kuminda spiritual na e debido tempu, e grupo di esklabo fiel a yuda miónes di hende haña “e bereanan antiguo” i kana ku Dios. (Mateo 24:45-47) Abo ta un di e miónes ei? Si ta asina, kiko bo por hasi pa bo no drif bai i kuminsá sigui bo propio rumbo? Ta sabí pa bo stòp periódikamente i analisá e manera ku bo ta kana den bida. Si fielmente bo ta lesa Beibel i publikashonnan basá riba Beibel i ta asistí na programanan di instrukshon patrosiná pa e ungínan awe, e ora ei bo ta bezig ta ser entrená pa kana ku Dios. Anto ora ku humildemente bo ta apliká e konseho ku bo ta haña, bo ta kanando en bèrdat ku Dios, siguiendo “e bereanan antiguo.”
Kana Komo si Fuera Nos Ta “Mira Esun Ku Ta Invisibel”
14. Si Yehova ta real pa nos, kon esei lo keda reflehá den e desishonnan personal ku nos ta tuma?
14 Pa nos kana ku Yehova, e mester ta real pa nos. No lubidá ku Yehova a sigurá esnan fiel den antiguo Israel ku e no tabata skondí for di nan. Awe tambe e ta revelá su mes na su pueblo komo nan Magnífiko Siñadó. Yehova ta asina real pa bo ku e ta komo si fuera pará bo dilanti ta instruí bo? Esei ta e klase di fe ku nos tin mester pa nos por kana ku Dios. Moisés tabatin un fe asina, “pasobra el a keda firme, komo si fuera e tabata mira Esun ku ta invisibel.” (Hebreonan 11:27) Si Yehova ta real pa nos, e ora ei nos lo tene kuenta ku su sintimentunan ora nos ta tuma desishon. Por ehèmpel, nos lo no pensa mes di kometé un malecho anto kaba purba skonde nos piká for di ansianonan kristian òf miembronan di famia. Mas bien, nos ta hasi esfuerso pa kana ku Dios asta ora ku ningun otro hende por mira nos. Meskos ku Rei David di pasado, nos ta determiná: “Lo mi kana den mi kas den e integridat di mi kurason.”—Salmo 101:2.
15. Kon asosiashon ku nos rumannan kristian ta yuda nos sinti ku Yehova ta real pa nos?
15 Yehova ta komprondé ku nos ta kriaturanan imperfekto i karnal i ku tin biaha ta un reto pa nos kere den loke nos no por mira. (Salmo 103:14) E ta hasi hopi kos pa yuda nos vense tal debilidat. Por ehèmpel, el a trese huntu “un pueblo pa su nòmber” for di tur nashon di mundu. (Echonan 15:14) Segun ku nos ta sirbi huntu den union, nos un ta haña fortalesa for di otro. Ora nos tende kon Yehova a yuda un ruman spiritual vense un òf otro debilidat òf pasa dor di un prueba difísil, esei ta hasi nos Dios asta mas real ainda pa nos.—1 Pedro 5:9.
16. Kon siña tokante Hesus ta yuda nos kana ku Dios?
16 Mas ku tur kos, Yehova a duna nos e ehèmpel di su Yu. Hesus a bisa: “Ami ta e kaminda, i e bèrdat, i e bida; ni un hende no ta bin serka e Tata, sino pa medio di mi.” (Juan 14:6) Un di e mihó maneranan pa hasi Yehova mas real pa nos ta di studia Hesus su bida riba tera. Tur loke Hesus a bisa òf hasi tabata un refleho perfekto di e personalidat i manera di aktua di su Tata selestial. (Juan 14:9) Segun ku nos ta tuma desishonnan, nos tin ku pensa kuidadosamente riba e manera ku Hesus lo a atendé e asuntu. Ora ku nos desishonnan ta indiká ku nos a tuma tempu pa pensa i hasi orashon kuidadosamente, e ora ei nos ta siguiendo den e pasonan di Kristu. (1 Pedro 2:21) Komo resultado, nos ta kanando ku Dios.
Ki Bendishonnan Nos Lo Haña?
17. Si nos kana den e kaminda di Yehova, ki “deskanso” nos lo haña pa nos alma?
17 Kana ku Yehova Dios ta hiba na un bida bendishoná. Kòrda loke Yehova a primintí su pueblo si nan a buska “e bon kaminda.” El a bisa: “Kana den dje; i boso lo haña deskanso pa boso alma.” (Jeremias 6:16) Kiko e “deskanso” ei ta nifiká? Akaso un bida fásil, ku ta yená ku plaser i luho? Nò. Yehova ta perkurá algu hopi mas mihó, algu ku asta e hendenan di mas riku na mundu rara bes ta haña. Haña deskanso pa bo alma ta nifiká haña pas interno, goso, satisfakshon i ku bo nesesidatnan spiritual ta ser satisfasé. E deskanso ei ta nifiká ku bo por tin sigur ku bo a skohe e mihó kaminda den bida. Tal pas mental ta un bendishon ku masha poko bo ta mira den e mundu yen di problema aki!
18. Ki bendishon Yehova ke duna bo, i kiko ta bo determinashon?
18 Naturalmente bida riba su mes ta un gran bendishon. Asta un kaminata kòrtiku ta mihó ku nada. Sin embargo, nunka tabata Yehova su intenshon pa bo kanamentu konsistí di apénas un biahe kòrtiku for di e vigor di hubentut pa e doló di behes. Nò, Yehova ke pa bo tin e bendishon di mas grandi ku tur. E ke pa bo kana kuné pa semper! Esaki a keda bon ekspresá na Mikeas 4:5: “Maske tur e pueblonan ta kana kada un den e nòmber di su dios, ma pa loke ta nos, nos sí lo kana den e nòmber di [Yehova] nos Dios pa semper i semper.” Abo lo gara e bendishon ei? Abo lo biba loke Yehova atraktivamente ta yama e “bida berdadero”? (1 Timoteo 6:19) Pues anto, sea desididu pa kana ku Yehova awe, mañan i djei padilanti te den eternidat!
[Nota]
^ par. 5 Algun tradukshon di Beibel ta kambia “kodo” den e versíkulo aki pa un midí di tempu, manera por ehèmpel “un momentu” (The Emphatic Diaglott) òf “un solo minüt” (A Translation in the Language of the People, di Charles B. Williams). Sin embargo, e palabra usá den e teksto original definitivamente ta nifiká un kodo, ku tabata mas o ménos 45 centimeter largu.
Kon Lo Bo Kontestá?
• Kiko kana ku Dios ta nifiká?
• Dikon bo ta sinti un nesesidat di kana ku Dios?
• Kiko lo yuda bo kana ku Dios?
• Ki bendishonnan esnan ku kana ku Dios ta haña?
[Preguntanan di Estudio]
[Plachinan na página 23]
Mediante e páginanan di Beibel, nos ta tende Yehova su bos tras di nos ta bisa: “Esaki ta e kaminda”
[Plachi na página 25]
Na reunion, nos ta haña kuminda spiritual na e debido tempu