Pregunta di Lektor

Un kristian por keda ku un bon konsenshi si e aseptá un empleo ku ta enserá ku e mester karga arma?

Testigunan di Yehova rònt mundu ta tuma na serio e responsabilidat ku Dios a duna nan di perkurá materialmente pa nan famia. (1 Timoteo 5:8) Sin embargo, sierto tipo di empleo klaramente ta violá prinsipionan bíbliko i mester ser evitá. Esakinan ta enserá empleo konektá ku gèmbelmentu, mal uso di sanger òf ku ta promové produktonan di tabako. (Isaias 65:11; Echonan 15:29; 2 Korintionan 7:1; Kolosensenan 3:5) Otro tipo di trabou, ounke Beibel no ta kondená nan direktamente, lo por violá un persona su konsenshi òf e konsenshi di otro hende.

Aseptá un trabou ku ta rekerí pa bo karga un arma di kandela òf kualke otro arma ta un desishon personal. Sin embargo, e tipo di empleonan ei ta eksponé bo na e posibilidat di bira kulpabel di sanger si situashon presentá ku bo tin ku usa bo arma. Pues, un kristian tin ku pensa bon i hasi orashon tokante e asuntu pa wak si e ta dispuesto pa aseptá e peso di mester tuma un desishon rápido den kua bida di hende ta enbolbí. Tambe kargamentu di arma ta eksponé un persona na e peliger di ser heridá òf matá durante un atake òf komo represaya.

Bo desishon lo por afektá otro hende tambe. Por ehèmpel, un kristian su responsabilidat prinsipal ta di prediká e bon nobo di e Reino di Dios. (Mateo 24:14) Ta posibel pa siña otronan pa ta “na pas ku tur hende,” miéntras ku na mesun tempu bo ta gana bo pan dor di karga arma? (Romanonan 12:18) Kiko di bo yunan òf otro miembronan di famia? E echo ku tin un arma di kandela den kas lo por pone nan bida na peliger? Ademas, ta posibel ku otro hende ta trompeká dor di e posishon ku abo a tuma relashoná ku e asuntu?—Romanonan 14:21.

Den e “último dianan” aki, mas i mas hende ta feros òf “grosero, odiadó di loke ta bon.” (2 Timoteo 3:1, 3) Akaso un persona sabiendo esaki lo por keda liber di akusashon òf “sin reproche” si e mester skohe un empleo di karga arma ku lo por tres’é den konflikto ku e tipo di hendenan ei? (1 Timoteo 3:10) Sigur ku nò. Pa e motibu aki, e kongregashon lo no konsiderá e persona ei komo “sin reproche” si e sigui karga arma despues ku bondadosamente a dun’é konseho bíbliko. (1 Timoteo 3:2; Tito 1:5, 6) Pues, tal hende hòmber òf muhé lo no bin na remarke pa ningun privilegio spesial den e kongregashon.

Hesus a sigurá su disipelnan ku si nan pone interesnan di Reino na promé lugá den nan bida, nan no tin nodi ta demasiado preokupá tokante kon pa haña e nesesidatnan di bida. (Mateo 6:25, 33) En bèrdat, si nos pone nos pleno konfiansa den Yehova, “e lo sostené [nos]; nunka e lo no permití pa e hustu wòrdu moví.”—Salmo 55:22.