Tin un Persona Ku di Bèrdat Por Kambia Mundu?

“Hende pober ta bisa nos ku, na promé lugá, nan ke pas i siguridat—i na di dos lugá, oportunidat pa bai dilanti den bida. Nan tin gana di mira un polítika nashonal i internashonal hustu ku no ta permití e podernan dominante di paisnan riku ni kompanianan riku frustra nan esfuersonan.”

ASINA e direktor di un organisashon di yudansa internashonal a deskribí e speransa- i aspirashonnan di hende pober. De echo, su palabranan lo por ta un bon deskripshon di loke tur víktima di e tragedia- i inhustisianan di e mundu aki ta deseá. Nan tur ta anhelá un mundu di berdadero pas i siguridat. E mundu ei lo bira realidat un dia? Tin un persona ku di bèrdat tin e poder i tambe e abilidat pa kambia loke ta básikamente un mundu inhustu?

 Esfuersonan pa Trese Kambio

Hopi ta esnan ku a purba. Por ehèmpel, Florence Nightingale, un señora britániko di siglo 19, a dediká su bida na e kousa di perkurá un kuido limpi i kompasivo pa hende enfermo. Den su tempu—promé ku tabatin produktonan antiséptiko i antibiótika—kuido den hospital no tabata loke nos lo spera awe. Segun un buki, “enfermeronan no tabata hende eduká ni higiéniko; i nan tabata notorio pa nan buracheria i inmoralidat.” Florence Nightingale tabatin éksito den su esfuersonan pa trese kambio den e mundu di enfermeria? Sí, definitivamente. Meskos tambe, hopi otro hende, motivá pa nan amor i bondat, tabatin éksito riba vários tereno, manera den área di alfabetisashon, edukashon, medisina, bibienda, alimentashon, djis pa menshoná algun. Komo resultado, kambionan signifikativo a tuma lugá den e kalidat di bida di miónes di hende ménos pudiente.

Tòg nos no por ignorá e realidat kruel aki: Ainda sientos di miónes di hende ta sufriendo e konsekuensianan di guera, krímen, enfermedat, hamber i otro kalamidatnan. Segun e organisashon irlandes di yudansa Concern, “tur dia 30.000 hende ta muri di pobresa.” Asta sklabitut, e kousa di asina tantu reforma den transkurso di siglonan, ta eksistí ainda. “Awe tin mas esklabo na bida ku tur e hendenan hòrtá for di Afrika den e tempu di e negoshi transatlántiko di sklabitut,” segun Disposable People—New Slavery in the Global Economy.

Kiko a stroba e esfuersonan di hende pa trese kambio kompletu i duradero? Esei ta simplemente e forsa dominante di hende riku i di esnan ku tin poder, òf tin mas kos tras di e asuntu aki?

Loke Ta Opstakulisá Kambio

Segun e Palabra di Dios, e opstákulo di mas grandi ku ta stroba kualke esfuerso humano pa produsí un mundu berdaderamente hustu ta Satanas e Diabel. Apòstel Juan ta bisa nos ku “henter mundu ta bou di kontròl di e malbado.” (1 Juan 5:19) Echo ta ku aworakí mes Satanas ta ‘gañando henter mundu.’ (Revelashon 12:9) Miéntras ku no eliminá su influensia malbado, ketu bai lo tin víktima di maldat i inhustisia. Kiko a kousa e situashon lamentabel aki?

Nos promé mayornan, Adam ku Eva, a haña un tera ku tabata diseñá pa ta un paradeis, un hogar perfekto pa henter e famia humano—un mundu ku tabata “masha bon.” (Génesis 1:31) Ken a trese kambio den esaki? Esei tabata Satanas. El a kuestioná e derecho di Dios pa establesé regla ku hòmber i muhé mester a tene nan mes na dje. El a insinuá ku Dios su manera di goberná tabata inhustu. El a tenta Adam ku Eva pa skohe e kaminda di independensia pa nan mes por a disidí kiko ta bon i kiko ta malu. (Génesis 3:1-6) Esaki a resultá den e di dos opstákulo kontra esfuerso humano pa produsí un mundu hustu: piká i imperfekshon.—Romanonan 5:12.

 Pakiko Dios A Permitié?

Algun hende lo puntra: ‘Pero pakiko Dios a laga piká i imperfekshon desaroyá? Pakiko e no a usa su poder sin límite pa eliminá e rebeldenan i kuminsá di nobo?’ Esei ta zona masha simpel. Pero uso di poder ta lanta pregunta serio. Akaso no ta mal uso di poder ta un di e kousanan prinsipal di sufrimentu di hende pober i oprimí aki na mundu? Ora un diktadó usa poder pa eliminá ken ku no ta di akuerdo ku su polítika, esei no ta lanta pregunta den mente di hende di kurason rekto?

Pa garantisá hende di kurason onrado ku E no ta manera un diktadó ku ta hasi mal uso di su poder, Dios a laga Satanas i hende rebelde aktua independientemente di su lei- i prinsipionan—solamente pa un periodo di tempu limitá. Tempu lo a demostrá ku Dios su manera di goberná ta e úniko manera korekto, i ku kualke restrikshon ku e pone riba nos ta pa nos mes bon. De echo, e resultadonan trágiko di rebelion kontra e gobernashon di Dios a demostrá esei kaba. I esakinan a demostrá ku Dios tin tur rason pa na su debido tempu usa su gran poder pa eliminá maldat kompletamente. Esei lo ta masha pronto.—Génesis 18:23-32; Deuteronomio 32:4; Salmo 37:9, 10, 38.

Miéntras tantu, nos ta atrapá den un mundu inhustu, ‘kehando i sufriendo e dolónan huntu.’ (Romanonan 8:22) Maske kiko nos hasi pa trese kambio, nos no por kaba ku Satanas, ni eliminá e imperfekshon básiko ku ta kousando tur e sufrimentu ku nos ta pasando aden. Simplemente, riba nos mes nos no por kita e efektonan di piká heredá for di Adam.—Salmo 49:7-9.

Hesukristu Lo Trese Kambio Duradero

Esaki ta nifiká ku nos ta den un situashon sin speransa? Klaru ku nò. Un persona muchu mas poderoso ku simpel hende mortal a haña e enkargo pa trese un kambio permanente. Ken e ta? Esei ta Hesukristu. Beibel ta deskribié komo Dios su Prens i Salbadó di e famia humano.—Echonan 5:31.

Aktualmente e ta wardando riba Dios su “tempu” stipulá p’e aktua. (Revelashon 11:18) Kiko eksaktamente lo e hasi? Lo e realisá e “restorashon di tur kos, di kua Dios a papia pa medio di boka di su profetanan santu for di antigwedat.” (Echonan 3:21) Por ehèmpel, Hesus lo “libra esun den nesesidat ora ku e sklama pa yudansa, esun afligí tambe i esun ku no tin ningun hende pa yud’é. . . . E lo reskatá nan bida for di opreshon i violensia.” (Salmo 72:12-16) Pa medio di Hesukristu, Dios ta primintí di “hasi gueranan stòp te na e fin di tera.” (Salmo 46:9) Un otro promesa di dje ta ku “ningun habitante [di su tera hasí limpi] lo no bisa: ‘Mi ta malu.’” Hende siegu, surdu, koho—tur ku ta sufri di enfermedat—lo haña un salú perfekto. (Isaias 33:24; 35:5, 6; Revelashon 21:3, 4) Asta hende ku a muri den pasado lo benefisiá. E ta primintí di trese bèk na bida e víktimanan di inhustisia i opreshon.—Juan 5:28, 29.

E kambio ku Hesukristu lo trese no ta unu parsial òf temporal. Lo e eliminá tur opstákulo pa un mundu berdaderamente hustu. Lo e eliminá piká i imperfekshon i destruí Satanas e Diabel i tur esnan ku ta siguié den su kaminda di rebeldia. (Revelashon 19:19, 20; 20:1-3, 10) E sufrimentu ku Dios a permití pa un tempu limitá “lo no lanta [un di] dos biaha.” (Nahum 1:9) Ta esei Hesus tabatin na mente ora el a siña nos pidi pa e Reino di Dios bini i pa e boluntat di Dios tuma lugá “na tera meskos ku den shelu.”—Mateo 6:10.

Podisé bo ta bisa, ‘pero Hesus mes no a bisa ku “semper nos lo tin e pobernan serka nos”? Esei no ta nifiká ku semper lo tin inhustisia i pobresa?’ (Mateo 26:11) Sí, ta bèrdat ku Hesus a bisa ku semper lo tin hende pober. Ma e konteksto di su palabranan huntu ku e promesanan di e Palabra di Dios ta mustra ku aki e tabata kier men ku tanten ku e sistema di kosnan aki ta eksistí, semper lo tin hende pober.  E tabata sa ku ningun hende lo no por eliminá pobresa ni inhustisia for di mundu. E tabata sa tambe ku ta e mes lo bin trese kambio den tur esei. Pronto lo e trese un sistema di kosnan kompletamente nobo—“shelunan nobo i un tera nobo” den kua doló, enfermedat, pobresa i morto lo no eksistí mas.—2 Pedro 3:13; Revelashon 21:1.

“No Laga di Hasi Bon”

Esaki ta nifiká ku no tin sentido pa hasi tur loke nos por pa yuda otro hende? Di ningun manera. Beibel ta animá nos pa yuda otro personanan ora nan ta pasa den prueba i sirkunstansianan difísil. Rei Salomon di antigwedat a skirbi: “No laga di hasi bon na esnan ku meresé esaki, si ta den bo poder pa hasié.” (Proverbionan 3:27) Apòstel Pablo a urgi: “No laga di hasi bon i di kompartí ku otro.”—Hebreonan 13:16.

Hesukristu mes a animá nos pa hasi tur loke ta na nos alkanse pa yuda otro hende. El a konta e ilustrashon di un samaritano ku a yega serka un hòmber ku a ser maltratá i hòrtá. Hesus a bisa ku e hòmber samaritano a “sinti kompashon” p’e, i dor di esei el a usa su mes rekursonan pa mara e heridanan di e hòmber maltratá i yud’é p’e rekuperá. (Lukas 10:29-37) E samaritano kompasivo ei no a kambia mundu, pero el a hasi un gran diferensia den bida di un otro hende, lokual nos tambe por hasi.

Sin embargo, Hesukristu por hasi mas ku djis yuda algun hende. E por trese un berdadero kambio, i lo e hasi esei masha pronto. Ora yega asina leu, e víktimanan di e kondishonnan inhustu djawe lo por mehorá nan bida i disfrutá di berdadero pas i siguridat.—Salmo 4:8; 37:10, 11.

Miéntras ku nos ta spera pa esei tuma lugá, laga nos nunka vasilá pa hasi tur loke nos por den sentido spiritual i material pa “hasi bon” na tur hende ku ta víktima di un mundu inhustu.—Galationan 6:10.

[Plachinan na página 5]

Florence Nightingale a trese berdadero kambionan den e mundu di enfermeria

[Rekonosementu]

Pa kortesia di National Library of Medicine

[Plachinan na página 7]

Siguidónan di Kristu ta hasi bon pa otro hende

[Rekonosementu pa Potrèt na página 4]

The Star, Johannesburg, S.A.