Un Mundu Inhustu

KEN por nenga ku nos ta bibando den un mundu inhustu? Echo ta ku maske kuantu talento nos tin i maske kon sabí nos plania nos bida, nos no tin ningun garantia ku nos lo haña prosperidat, éksito òf kuminda. Hopi bes ta sosodé manera Salomon, e rei sabí di antigwedat, a bisa: “Pan no ta pa hende sabí, rikesa no ta pa hende inteligente, i éksito no ta pa hende ábil.” Kon bin? Pasobra, manera Salomon a agregá, “tur hende ta dependé di tempu i kasualidat.”—Eklesiastés 9:11, The New English Bible.

‘Ora Tempu Malu Bini Diripiente’

Sí, “tempu i kasualidat”—lokual hopi bes ta nifiká ku bo ta n’e lugá robes n’e momentu robes—hopi biaha ta frustra nos plannan bon prepará i e mihó ekspektativanan. Segun Salomon, ‘ora tempu malu bini diripiente,’ nos ta ‘manera piská kohé den reda, i para kohé den trampa.’ (Eklesiastés 9:12) Por ehèmpel, miónes di hende ta traha inkansablemente pa kultivá nan tereno pa haña kuminda pa nan famia. Pero diripiente nan ta haña nan den “un tempu malu” ora áwaseru no kai i sekura kaba ku tur loke nan a planta.

Otronan ta purba yuda, pero hopi bes asta e yudansa ku e restu di mundu ta duna pa víktimanan di “un tempu malu” ta parse inhustu. Por ehèmpel, den e lucha kontra skarsedat di kuminda, den un aña resien, “henter e kontinente [di Afrika] a risibí na yudansa un suma ku ta igual na un kinta parti so di e plaka ku a ser aloká pa e guera di Golfo,” segun un organisashon prinsipal di yudansa. Tabata hustu ku e paisnan ku tin e rekursonan a gasta sinku biaha mas tantu plaka pa bringa un guera den un pais ku nan a gasta pa aliviá e doló i sufrimentu kousá pa skarsedat di kuminda den henter un kontinente? I ta hustu ku den un tempu kaminda hopi hende tin prosperidat material, 1 di kada 4 habitante di tera ainda ta biba den miseria kompletu, òf ku miónes di mucha ta muri tur aña di enfermedatnan ku por wòrdu prevení? Klaru ku nò!

Klaru ku ‘ora tempu malu bini diripiente,’ esei no ta debí na solamente “tempu i kasualidat.” Aktonan di violensia kompletamente fuera di nos kontròl tambe ta dominá nos  bida i pone nos pasa den sierto kosnan. Esei ta loke a sosodé na Beslan, Alania, den e hèrfst di 2004, ora sientos di hende, di kua hopi mucha chikitu riba nan promé dia di skol, a pèrdè nan bida den un konflikto violento entre teroristanan i forsanan di siguridat. Ken eksaktamente a muri i ken a sobrebibí e tragedia ei tabata un asuntu di puru kasualidat. Pero e kousa fundamental di e “tempu malu” ei tabata konflikto humano.

Semper Lo Ta Asina?

Ora algun hende ta papia di inhustisia, nan ta bisa: “Pero ta asina bida ta. Semper tabata asina, i semper lo keda asina tambe.” Segun nan, semper esnan fuerte lo oprimí e débilnan, i semper e rikunan lo abusá di e pobernan. Nan ta bisa ku esei, kombiná ku “tempu i kasualidat,” lo sigui afektá nos tanten ku e famia humano ta eksistí.

Pero ta asina kosnan mester ta realmente? Lo yega e dia ku esnan ku ta usa nan abilidatnan di un manera inteligente i sabí lo por haña un rekompensa hustu pa tur nan trabou duru? Tin un persona ku por hasi algu pa trese un kambio permanente i duradero na un mundu inhustu? Wak kiko e siguiente artíkulo ta bisa riba e tema aki.

 [Rekonosementu pa Potrèt na página 2]

PORTADA: Hòmber ku un mucha: UN PHOTO 148426/McCurry/Stockbower

[Rekonosementu pa Potrèt na página 3]

MAXIM MARMUR/AFP/Getty Images