Yehova Ta Nos Wardadó

“SEÑOR ta mi wardadó, lo mi no tin falta di nada.”—Salmo 23:1.

1-3. Dikon no ta un sorpresa ku David a kompará Yehova ku un wardadó di karné?

SI UN hende pidi bo deskribí e manera ku Yehova ta perkurá pa su pueblo, kon lo bo a hasié? Ku kiko lo bo kompará e kuido tierno ku e ta duna su fiel sirbidónan? Mas ku 3.000 aña pasá, Rei David a skirbi den un salmo un bunita deskripshon di Yehova, usando un komparashon basá riba e okupashon ku David tabatin den su hubentut.

² Komo hóben, David tabata un wardadó di karné, pues e tabatin konosementu di kuidamentu di karné. E tabata sa ku si laga karné pa nan kuenta, fásilmente nan lo a dual i bira víktima di ladron òf bestia salbahe. (1 Samuel 17:34-36) Sin un wardadó ku ta kla pa kuida nan, nan lo no por haña lugánan kaminda tin sufisiente yerba pa nan kome. Mas despues den su bida, David sin duda tabatin grato rekuerdo di e tantísimo oranan ku el a pasa ta guia, protehá i alimentá karné.

³ No ta un sorpresa anto ku David a kòrda riba e trabou di un wardadó di karné ora el a ser inspirá pa deskribí e kuido ku Yehova ta demostrá na su pueblo. Salmo 23, skirbí dor di David, ta kuminsá ku e palabranan: “[Yehova] ta mi Wardadó, lo mi no tin falta di nada.” Laga nos konsiderá dikon e deklarashon aki ta na su lugá. Anto kaba, ku yudansa di Salmo 23 nos lo mira den ki maneranan Yehova ta kuida su adoradónan meskos ku un wardadó ta kuida su karnénan.—1 Pedro 2:25.

Un Komparashon Apropiá

4, 5. Kon Beibel ta deskribí e karakterístikanan di karné?

⁴ Yehova tin hopi título den e Skritura, pero esun di “Wardadó” ta un di esnan ku ta transmití mas ternura. (Salmo 80:1) Pa nos por komprondé mihó dikon ta na su lugá ku Beibel ta yama Yehova un Wardadó, ta útil pa nos sa dos kos: di promé, e karakterístikanan di karné i di dos, e debernan i kualidatnan di un bon wardadó.

⁵ Hopi bes Beibel ta referí indirektamente na e karakterístikanan di karné dor di deskribí ku nan ta kla pa reakshoná riba e kariño di un wardadó (2 Samuel 12:3), ku nan no ta agresivo (Isaias 53:7) i ku nan ta indefenso. (Mikeas 5:8) Un eskritor ku a kria karné pa vários aña a  komentá: “Karné no ta ‘djis sòru pa nan mes’ manera algun hende kisas ta kere. Mas ku kualke otro sorto di bestia di krio, nan ta rekerí atenshon kontinuo i kuido minusioso.” Pa sobrebibí, e kriaturanan indefenso aki tin mester di un wardadó ku ta kla pa kuida nan.—Ezekiel 34:5.

6. Kon un dikshonario bíbliko ta deskribí un dia normal den bida di un wardadó di karné di antigwedat?

⁶ Kon un dia normal pa e wardadó di karné di antigwedat tabata? Un dikshonario bíbliko ta splika: “Mainta trempan el a saka e tou for di kurá, kanando na kabes di e tou i a hiba nan kaminda nan lo mester kome yerba. Einan el a vigilá nan henter dia, hasiendo sigur ku ningun karné a dual, i si kualke un temporalmente a pèrdè for di su bista i a kana bai for di e restu di e tou, el a busk’é diligentemente te ora el a hañ’é i tres’é bèk. . . . Anochi el a trese e tou bèk den kurá, i a konta nan segun ku nan tabata pasa bou di e bara na e porta pa e hasi sigur ku no tabata falta ningun. . . . Hopi bes e tabatin ku protehá e kurá durante anochi kontra di e atakenan di bestia salbahe, òf di e intentonan tramposo di ladronnan ku a slùip rònt.” *

7. Dikon un wardadó tin biaha mester a mustra èkstra pasenshi i ternura?

⁷ Tabatin okashonnan ku karné, spesialmente e hembranan na estado i e lamchinan, a rekerí èkstra pasenshi i ternura. (Génesis 33:13) Un buki di referensia bíbliko ta deklará: “Hopi bes nasementu di yu den un tou a tuma lugá leu ayá na barika di seru. E wardadó atentamente ta protehá e mama durante su momentunan indefenso i ta hisa e lamchi i karg’é hiba kurá. Durante un par di dia, te ora ku e lamchi por kana, kisas e ta karg’é den su brasa òf den e ploinan di su mantel.” (Isaias 40:10, 11) Ta bisto anto ku un bon wardadó mester tabatin un kombinashon di forsa i ternura.

8. Menshoná e tres motibunan ku David a sita pa su konfiansa den Yehova.

⁸ ‘Yehova ta mi Wardadó.’ Akaso esei no ta un bon deskripshon di nos Tata selestial? Segun ku nos ta analisá Salmo 23, nos lo mira kon Dios ta kuida nos ku e forsa i ternura di un wardadó di karné. Den versíkulo 1, David a ekspresá su konfiansa ku Dios lo hasi tur e areglonan nesesario pa Su karnénan, di manera ku nan lo no tin “falta di nada.” Den e versíkulonan ku ta sigui, David a sita tres motibu pa e konfiansa aki: Yehova ta guia, protehá i alimentá Su karnénan. Laga nos trata e motibunan aki un pa un.

“E Ta Guia Mi”

9. Ki esena pasífiko David a deskribí, i kon karné lo a haña nan mes den un ambiente asina?

⁹ Na promé lugá,Yehova ta guia su pueblo. David a skirbi: “E ta pone mi drumi den lugánan di yerba bèrdè; e ta hiba mi kantu di awanan ketu. E ta restorá mi alma; e ta guia mi den e kamindanan di hustisia pa motibu di su nòmber.” (Salmo 23:2, 3) Un tou drumí abou den trankilidat meimei di abundansia. Ku e palabranan aki David a deskribí un esena di karnénan satisfecho, refreská i den siguridat. E palabra hebreo tradusí “lugánan di yerba bèrdè” por nifiká “lugá agradabel.” E karnénan riba nan mes probablemente lo no a haña un lugá refreskante pa kai drumi na pas. Ta nan wardadó tin ku guia nan na un “lugá agradabel” asina.

10. Kon Dios ta demostrá su konfiansa den nos?

¹⁰ Kon Yehova ta guia nos awe? Un manera ku e ta hasi esei ta pa medio di su ehèmpel. Su Palabra ta urgi nos pa bira “imitadónan di Dios.” (Efesionan 5:1) E konteksto di e palabranan ei ta menshoná kariño, pordon i amor. (Efesionan 4:32; 5:2) Un kos ta sigur, Yehova ta pone e mihó ehèmpel den desplegá e kualidatnan atraktivo ei. Akaso ta irealista di su parti pa pidi nos imit’é? Nò. Bon mirá, e konseho inspirá ei ta un ekspreshon maravioso di su konfiansa den nos. Kon asina? Nos ta  trahá den Dios su imágen, lokual ta nifiká ku nos ta kreá ku kualidatnan moral i e kapasidat pa spiritualidat. (Génesis 1:26) Pues, Yehova sa ku apesar di nos imperfekshonnan, nos tin den nos e potensial pa kultivá e mesun kualidatnan ku e mes ta desplegá komo un ehèmpel. Djis pensa, nos Dios amoroso tin e konfiansa ku nos por ta meskos kuné. Si nos sigui su ehèmpel, lo e guia nos, na moda di papia, na un ‘lugá agradabel.’ Meimei di e mundu violento aki, nos lo “biba den siguridat” i eksperensiá e pas ku ta bin dor ku nos sa ku nos tin Dios su aprobashon.—Salmo 4:8; 29:11.

11. Segun ku Yehova ta guia su karnénan, kiko e ta tene kuenta kuné, i kon esaki ta keda reflehá den loke e ta pidi di nos?

¹¹ Segun ku Yehova ta guia nos, e ta desplegá ternura i pasenshi. Un wardadó ta tene kuenta ku e limitashonnan di su karnénan, p’esei e ta guia nan segun nan ritmo, “segun e bestianan por.” (Génesis 33:14, BPK) Yehova di igual manera ta guia su karnénan ‘segun ku nan por.’ E ta tuma na kuenta nos abilidat- i sirkunstansianan. De echo, e ta ahustá e ritmo, i nunka ta pidi mas di loke nos por duna. Loke sí e ta pidi ta pa nos duna di henter alma. (Kolosensenan 3:23) Pero kiko si bo ta un hende di edat i no por hasi loke bo tabatin kustumber di hasi? Òf kiko si bo tin un malesa grave ku ta limitá bo? Ta spesialmente den e sirkunstansianan ei ku e rekisito pa duna di henter alma ta masha bunita. No tin dos hende presis meskos. Sirbi di henter alma ta nifiká usa tur bo forsa i energia den Dios su sirbishi te na e grado mas kompletu ku ta posibel pa abo. Apesar di e debilidatnan ku kisas ta afektá nos ritmo, Yehova ta duna balor na nos adorashon di henter kurason.—Marko 12:29, 30.

12. Ki ehèmpel for di e Lei di Moisés ta ilustrá kon Yehova ta guia su karnénan ‘segun ku nan por’?

¹² Pa ilustrá kon Yehova ta guia su karnénan ‘segun ku nan por,’ wak kiko e Lei di Moisés a bisa tokante sierto ofrendanan pa kulpa. Yehova tabata ke ofrendanan ekselente, motivá pa kurasonnan gradisidu. Na mesun tempu, e ofrendanan a ser klasifiká segun e kapasidat di e persona ku a ofresé nan. E Lei a bisa: “Si e no por duna un lamchi, e ora ei e mester hiba . . . dos tòrteldùif òf dos pichon.” I kiko si e no por a afòrt ni sikiera dos pichon? E ora ei lo e por a trese poko “hariña fini.” (Levítiko 5:7, 11) Esaki ta mustra ku Dios no a eksigí di e persona ku a hasi e ofrenda algu ku tabata fuera di su alkanse. Siendo ku Dios no ta kambia, ta un konsuelo pa nos di sa ku nunka e ta pidi mas di loke nos por duna; mas bien, gustosamente e ta aseptá loke ta na nos alkanse. (Malakias 3:6) Ki un plaser di ser guiá pa un Wardadó asina komprensivo!

“Mi No Tin Miedu di Maldat, Pasobra Abo Ta ku Mi”

13. Kon David a kuminsá papia mas íntimamente na Salmo 23:4, i dikon esaki no ta un sorpresa?

¹³ David a duna un di dos motibu pa su konfiansa: Yehova ta protehá su karnénan. Nos ta lesa: “Maske mi kana den e vaye di sombra di morto, mi no tin miedu di maldat, pasobra abo ta ku mi; bo bara i bo garoti ta konsolá  mi.” (Salmo 23:4) David a kuminsá papia awor mas íntimamente, dirigiendo su mes na Yehova ku e pronòmber “abo.” Esaki no ta un sorpresa, pasobra David tabata papia tokante e manera ku Dios a yud’é soportá atversidat. David a pasa dor di hopi vaye skur, esta, okashonnan ku su propio bida tabata na peliger. Pero e no a laga miedu domin’é, pasobra el a sinti ku Dios—ku Su “bara” i “garoti” kla pa aktua—tabata kuné. Siendo konsiente di e protekshon aki, David a sinti un konsuelo i esei sin duda a hal’é mas serka Yehova. *

14. Ki siguransa Beibel ta duna nos relashoná ku Yehova su protekshon, pero kiko esaki no ta nifiká?

¹⁴ Kon Yehova ta protehá su karnénan awe? Beibel ta sigurá nos ku ningun opositor—demoño ni humano—hamas lo logra eliminá su karnénan for di riba tera. Yehova lo no permití esei nunka. (Isaias 54:17) Sin embargo, esaki no ta nifiká ku nos Wardadó lo protehá nos di tur kalamidat. Nos ta eksperensiá e pruebanan ku ta komun pa hende, i nos ta konfrontá e oposishon ku tur kristian berdadero ta haña nan kuné. (2 Timoteo 3:12; Santiago 1:2) Tin biaha ku nos lo por haña nos, na moda di papia, ta “kana den e vaye di sombra di morto.” Por ehèmpel, nos por hera di muri debí na persekushon òf un krísis di salú. Òf podisé un ser kerí ta hera di muri òf asta ta muri mes. Durante loke ta parse e momentunan di mas skur, nos Wardadó ta ku nos, i lo e protehá nos. Kon?

15, 16. (a) Den ki maneranan Yehova ta yuda nos trata ku e opstákulonan ku kisas nos ta konfrontá? (b) Konta un eksperensia ku ta mustra kon Yehova ta yuda nos den tempu di prueba.

¹⁵ Yehova no ta primintí intervenshon milagroso. * Pero nos por tin sigur di esaki: Yehova lo yuda nos surpasá kualke opstákulo ku nos ta konfrontá. E por duna nos e sabiduria pa trata ku “diferente pruebanan.” (Santiago 1:2-5) Un wardadó di karné ta usa su bara òf garoti no solamente pa kore ku bestia yagdó sino tambe pa pusha su karnénan suavemente den e direkshon korekto. Yehova por “pusha” nos suavemente—podisé mediante un otro ruman den fe—pa apliká konseho basá riba Beibel ku lo por hasi un diferensia grandi den nos situashon. Es mas, Yehova por duna nos e forsa pa perseverá. (Filipensenan 4:13, NW) Mediante su spiritu santu, e por ekipá nos ku “poder mas ayá di loke ta normal.” (2 Korintionan 4:7, NW) Dios su spiritu por kapasitá nos pa soportá kualke prueba ku Satanas lo por trese riba nos. (1 Korintionan 10:13) No ta un konsuelo pa sa ku Yehova ta semper kla pa yuda nos?

¹⁶ Sí, sin importá ki vaye skur nos por haña nos mes aden, nos no tin nodi kana pasa dor di dje nos so. Nos Wardadó ta ku nos, yudando nos den maneranan ku kisas na promé instante nos no ta kompletamente konsiente di dje. Konsiderá e eksperensia di un ansiano kristian ku a keda diagnostiká ku un tumor maligno den selebro. El a bisa: “Mi tin ku atmití ku na promé instante mi tabata puntra mi mes si ta rabiá Yehova tabata ku mi òf si asta el a stima mi. Pero mi tabata determiná pa no kita for di Yehova. En bes di esei, mi a kont’é mi preokupashonnan. Anto Yehova a yuda mi, hopi bes dor di duna mi konsuelo mediante mi rumannan kristian. Hopi di nan a kompartí ku mi puntonan útil basá riba nan propio eksperensia den trata ku malesa grave. Nan komentarionan balansá a rekordá mi ku loke mi tabata pasa aden no tabata un kos fuera di lo komun. Yudansa práktiko, inkluso algun oferta di bondat masha konmovedor, a sigurá mi ku Yehova no tabata malkontentu ku mi. Klaru ku mi tin ku sigui lucha ku mi malesa, i mi no sa kiko e resultado lo ta. Pero mi ta konvensí ku Yehova ta ku mi i ku lo e sigui yuda mi atraves di e prueba aki.”

 “Bo Ta Prepará un Mesa Mi Dilanti”

17. Kon David a deskribí Yehova na Salmo 23:5, i dikon esaki no ta kontradisí e komparashon di un wardadó di karné?

¹⁷ Awor David a sita un di tres motibu pa su konfiansa den su Wardadó: Yehova ta alimentá su karnénan, i e ta hasi esei na abundansia. David a skirbi: “Bo ta prepará un mesa mi dilanti den presensia di mi enemigunan; bo ta ungi mi kabes ku zeta; mi kopa ta yen te basha over.” (Salmo 23:5) Den e versíkulo aki, David ta deskribí su Wardadó komo un anfitrion generoso ku ta perkurá kos di kome i di bebe na abundansia. E dos komparashonnan—un wardadó di karné kla pa duna kuido i un anfitrion generoso—no ta kontradiktorio. Bon mirá, un bon wardadó mester sa unda pa haña lugánan ku hopi yerba i sufisiente awa di bebe di manera ku su tou lo “no tin falta di nada.”—Salmo 23:1, 2.

18. Kiko ta mustra ku Yehova ta un anfitrion generoso?

¹⁸ Nos Wardadó tambe ta un anfitrion generoso? No tin duda di esei! Djis pensa riba e kalidat, kantidat i variedat di kuminda spiritual ku nos ta disfrutá di dje aktualmente. Mediante e esklabo fiel i prudente, Yehova a perkurá publikashonnan práktiko pa nos i tambe programanan instruktivo na reunion-, asamblea- i kongresonan; anto nan tur ta satisfasé nos nesesidatnan spiritual. (Mateo 24:45-47) Definitivamente no tin skarsedat di kuminda spiritual. “E esklabo fiel i prudente” a produsí miónes di Beibel i publikashon pa yuda hende studia Beibel, i eseinan ta disponibel awor na 413 idioma. Yehova a perkurá e kuminda spiritual aki na gran variedat: for di “lechi,” siñansanan bíbliko básiko, te na “kuminda sólido,” informashon spiritual mas profundo. (Hebreonan 5:11-14) Komo resultado, ora nos ta konfrontá problema òf tin ku tuma desishon, nos por haña generalmente presis loke nos tin mester. Unda nos lo tabata sin tal kuminda spiritual? Nos Wardadó di bèrdat ta perkurá na un manera masha generoso pa nos!—Isaias 25:6; 65:13.

‘Lo Mi Biba den e Kas di Yehova’

19, 20. (a) Ki konfiansa David a ekspresá na Salmo 23:6, i kon nos por tin e mesun konfiansa ei? (b) Kiko nos lo trata den e siguiente artíkulo?

¹⁹ Despues ku David a kontemplá e manera di trata di su Wardadó i Perkuradó, el a konkluí: “Siguramente bondat i miserikòrdia lo sigui mi tur e dianan di mi bida, i lo mi biba den e kas di SEÑOR pa semper.” (Salmo 23:6) David a papia for di un kurason yen di gratitut i fe; gratitut ora ku el a rekordá pasado i fe ora el a wak den futuro. E eks-wardadó di karné aki a sintié sigur, sabiendo ku tanten ku e keda serka di su Wardadó selestial, komo si fuera bibando den Su kas, lo e risibí semper Yehova su kuido amoroso.

²⁰ Nos por ta realmente gradisidu pa e bunita palabranan ku tin pará skirbí na Salmo 23! David no por a haña un manera mas apropiá pa deskribí e manera ku Yehova ta guia, protehá i alimentá su karnénan. David su ekspreshonnan kaluroso a keda konserbá pa duna nos e konfiansa di ku nos tambe por akudí na Yehova komo nos Wardadó. Sí, tanten ku nos keda serka Yehova, lo e kuida nos manera un Wardadó amoroso “pa semper.” Sin embargo, komo su karnénan, nos tin e responsabilidat di kana ku nos gran Wardadó, Yehova. Den e siguiente artíkulo nos lo trata kiko esaki ta enserá.

[Nota]

Bo Ta Kòrda?

• Dikon tabata na su lugá ku David a kompará Yehova ku un wardadó di karné?

• Kon Yehova ta guia nos ku komprenshon?

• Den ki maneranan Yehova ta yuda nos soportá prueba?

• Kiko ta mustra ku Yehova ta un anfitrion generoso?

[Preguntanan di Estudio]

[Plachi na página 18]

Meskos ku un wardadó di karné na Israel, Yehova ta guia Su karnénan