Diabel Ta Eksistí di Bèrdat?

KON bo ta mira Diabel? Bo ta kere ku di bèrdat ta eksistí un persona ku ta hinka hende den tentashon pa hasi malu, òf simplemente e ta un konsepto di maldat? Nos tin ku tene miedu di Diabel òf nos tin ku deskart’é komo un simpel idea superstisioso òf un mito? E palabra “diabel” ta referí na un ke otro forsa destruktivo den universo sin identidat spesífiko? Akaso e ekspreshon por ta simplemente un símbolo di e maldat ku tin den hende, manera hopi teólogo moderno ta pretendé?

No ta nada straño ku e opinionnan riba e identidat di Diabel ta dividí. Imaginá bo kon difísil lo ta pa haña sa e berdadero identidat di un persona ku ta un eksperto den disfrasá su mes, foral ora e ta desididu pa keda skondí tras di un maskarada! Beibel ta deskribí Diabel komo un persona asina. Refiriendo na dje komo Satanas, Beibel ta bisa: “Satanas mes ta disfrasá su mes komo un angel di lus.” (2 Korintionan 11:14) Ounke e ta un malbado, e ta aparentá di ta bon pa e por gaña hende. I si Diabel logra pone hende kere ku e no ta eksistí mes, esei ta kumbinié mas ainda.

Nos por puntra nos mes anto: Ta ken Diabel ta? Ki tempu i kon el a kuminsá eksistí? Kon e ta influensiá hende awe? Tin algu ku nos por hasi pa resistí e influensia ei? Beibel ta konta nos e historia eksakto di Diabel for di tempu ku el a kuminsá i e ta duna nos kontestanan verídiko riba e preguntanan aki.

[Plachi na página 3]

Ta hopi difísil pa identifiká un persona ku ta desididu pa keda skondí tras di un maskarada!