‘E Amor di Boso Ta Bira Mas i Mas Grandi’

UN KANTIDAT di desaster natural a asotá Hapon durante aña 2004. Entre nan tabatin horkan, inundashon i temblor. Nan a afektá bida di hopi hende drástikamente, inkluso di Testigunan di Yehova. (Eklesiastés 9:11, NW) Sin embargo, e atversidatnan aki a duna e Testigunan oportunidat di demostrá nan amor di ruman pa otro.—1 Pedro 1:22.

Por ehèmpel, áwaseru pisá ku a kai den yüli a pone un riu den e parti sentral di Hapon desbordá. Inundashon a daña mas ku 20 kas di Testigunan di Yehova. Den un Salòn di Reino, awa a subi un meter for di flur. Mesora, Testigunan di e kongregashonnan bisiña a bin duna un man. Sentenáres di boluntario a limpia e kasnan yen di lodo. Nan a limpia i drecha e Salòn di Reino kompletamente den apénas dos siman.

Dia 23 di òktober, un temblor ku a midi 6,8 riba e eskala di Richter a asotá e mesun área. Por lo ménos 40 hende a pèrdè nan bida, i mester a evakuá mas ku 100.000 persona for di nan kas. No tabatin awa, gas ni koriente. Ounke e episentro di e temblor tabata apénas 50 kilometer leu, e Salòn di Reino ku nan a kaba di renobá no a sufri daño. Mesora e salòn a bira un sentro temporal pa kordiná yudansa. Superintendentenan kristian rápidamente a chèk pa wak si nan rumannan den fe tabata sano i salvo, i nan a sinti un alivio ora nan a haña sa ku niun no a sufri leshon ni pèrdè nan bida. E siguiente mainta trempan, seis Testigu ku tabata víktima di e inundashon den yüli a presentá na e sentro, ansioso pa bai entregá kuminda i awa na e área afektá. Un par di ora despues di e temblor, ya tabatin artíkulonan di promé nesesidat ku a ser poné disponibel.

Un superintendente a deklará: “E rumannan ku tabata víktima di e inundashonnan a konsiderá e trabounan di duna yudansa na esnan afektá dor di e temblor komo un oportunidat pa ekspresá nan apresio p’e yudansa ku nan mes a risibí. Nan a traha duru for di mainta trempan te anochi lat. Anto nan karanan tabata bria di felisidat!”

Ni inundashon ni temblor ta forma un menasa pa e laso di amor ku ta uni e hermandat kristian di Testigunan di Yehova. Al kontrario, ora desasternan asina tuma lugá, kristiannan ta eksperensiá loke apòstel Pablo a bisa su rumannan den fe na Tesalónika: “E amor di kada un di boso pa otro ta bira mas i mas grandi.”—2 Tesalonisensenan 1:3.