E Arte di Skucha ku Amor

“DANKI pa a skucha mi.” Bo a haña un remarke asina resientemente? Esei ta un kòmplimènt pa bo! Kasi tur hende ta apresiá un bon skuchadó. Dor di skucha ku atenshon, nos por ta un fuente di animashon pa hende afligí òf kargá ku problema. I e echo ku nos ta un bon skuchadó no ta yuda nos apresiá otro hende? Den e kongregashon kristian, un manera prinsipal pa “stimulá otro pa stima i hasi bon obra” ta dor di skucha ku amor.—Hebreonan 10:24.

Sin embargo, hopi hende no ta bon skuchadó. Nan ta gusta duna konseho, konta nan mes eksperensianan òf duna nan punto di bista en bes di skucha loke otro hende tin di bisa. Skuchamentu realmente ta un arte. Kon nos por siña skucha ku amor?

Un Faktor Importante

Yehova ta nos Magnífiko “Maestro.” (Isaias 30:20, BPK) E por siña nos hopi kos tokante skuchamentu. Wak kon Yehova a yuda profeta Elias. E menasanan di Reina Jezabel a spanta Elias i pon’é hui bai den desierto i pidi pa muri. Ei e angel di Dios a papia kuné. Segun ku e profeta tabata splika su temornan, Yehova a skuch’é i despues a demostrá Su gran poder. Ku ki resultado? Elias no tabatin miedu mas i el a bolbe bèk na su asignashon. (1 Reinan 19:2-15) Pakiko Yehova ta tuma tempu pa skucha e preokupashonnan di su sirbidónan? Pasobra e ta interesá den nan. (1 Pedro 5:7) Esaki ta un faktor klave pa ser un bon skuchadó: Bo mester ta sinseramente interesá den otro hende i demostrá esei.

Ora un hòmber na Bolivia a kometé un malecho serio, el a apresiá e interes sinsero ei ku un kompañero di fe a mustra den dje. E hòmber a splika: “E tempu ei mi tabata den un di e etapanan mas miserabel di mi bida. Si no tabata pa un ruman hòmber ku a tuma su tempu pa skucha mi, fásilmente lo mi por a stòp di hasi esfuerso pa sirbi Yehova. E no a papia mashá, pero sabiendo ku e tabata berdaderamente interesá pa skucha mi a ègt fortalesé mi. Mi no tabatin mester di un solushon; mi tabata sa kiko mi mester a hasi. Djis mi kier a sa ku tin un hende interesá den kon mi ta sinti. E echo ku el a skucha mi a pone ku desesperashon no a kaba ku mi.”

Un gran Ehèmpel di e arte di skucha ku amor ta Hesukristu. Djis despues di Hesus su morto, dos di su disipelnan tabata kanando di Yerusalèm pa un pueblo ku tabata keda mas o ménos 11 kilometer leu. Sin duda nan tabata desanimá. Pues, Hesukristu resusitá a kuminsá kana huntu ku nan. El a hasi nan algun pregunta bon formulá pa saka afó kiko tabata nan preokupashon, i e disipelnan a respondé. Nan a ekspresá e speransanan ku nan tabatin i kon desilushoná i konfundí nan a keda awor. Hesus tabata interesá den nan, i e echo ku el a skucha ku amor a prepará e dos disipelnan pa skucha. E ora ei Hesus “a splika nan e kosnan tokante di su mes den tur e Skrituranan.”—Lukas 24:13-27.

 Un manera amoroso pa pone otro hende skucha nos ta ora nos ta skucha nan promé. Un señora di Bolivia a konta: “Mi mayornan i mi suegronan a kuminsá reklamá e manera ku mi tabata kria mi yunan. Nan komentarionan a molestia mi, pero di otro banda, mi no tabata sigur di mes komo mayor. Rònt di e tempu ei mi a haña bishita di un Testigu di Yehova. El a papia ku mi tokante e promesanan di Dios. Pero ta e manera ku el a puntra mi mi opinion a pone mi realisá ku e persona aki tabata dispuesto pa skucha. Mi a invit’é pa drenta, i djis despues mi a kuminsá splik’é mi problema. El a skucha mi ku pasenshi. Despues el a puntra mi kiko mi a deseá pa mi yunan i kiko mi esposo a pensa di esei. Tabata un alivio pa haña un persona ku tabata dispuesto pa purba komprondé mi. Ora el a kuminsá mustra mi kiko Beibel ta bisa tokante bida di famia, mi tabata sa ku mi tabata papiando ku un persona ku tabata interesá den mi situashon.”

Beibel ta bisa: “Amor . . . no ta buska su propio interes.” (1 Korintionan 13:4, 5) Pues, skucha ku amor ta enserá sakrifiká nos mes interesnan. Kisas esaki ta nifiká paga televishon, pone korant un banda òf paga telefòn selular ora otro hende ta papia ku nos tokante un asuntu serio. Skucha ku amor ta nifiká mustra interes profundo den loke e otro persona ta pensa. Konsekuentemente nos lo evitá di kuminsá papia tokante nos mes dor di bisa por ehèmpel: “Esei ta pone mi kòrda loke a pasa mi algun tempu pasá.” Ounke tal interkambio di idea ta aseptabel den un kòmbersashon amigabel, ora un persona ta papia di un problema serio ku nos, nos tin ku pone nos interesnan personal un banda. Pero tin un manera mas ku nos por manifestá berdadero interes den otro hende.

Skucha pa Komprondé Loke Otro Ta Sinti

E kompañeronan di e hòmber Jòb a tende por lo ménos dies di su diskursonan. Tòg Jòb a sklama: “Ai, mare mi tabatin un hende pa skucha mi!” (Jòb 31:35, BPK) Pakiko? Pasobra nan manera di skucha no tabata un konsuelo pa Jòb. Nan no tabata interesá den dje ni kier a komprondé su sintimentunan. Nan sigur no a sinti p’e, manera hende ku ta skucha ku kompashon. Pero apòstel Pedro ta konsehá: “Boso tur sea di akuerdo ku otro, teniendo kompashon ku otro, stimando manera ruman, i sea miserikòrdioso i humilde den spiritu.” (1 Pedro 3:8) Kon nos por mustra kompashon òf empatia? Nos por hasi esei dor di mustra interes den e sintimentunan di e otro persona i purba komprondé nan. Un manera pa demostrá nos interes ta dor di bisa den un forma kompasivo: “esei lo mester a traha riba bo” òf “lo bo mester a sinti ku nan no ta komprondé bo.” Un otro manera ta pa ripití loke e persona a bisa nos den nos mes palabranan, mustrando asina ku nos a komprondé loke el a bisa. Skucha ku amor ta nifiká presta atenshon no solamente na e palabranan sino tambe na e emoshonnan ekspresá indirektamente.

Robert, * kende ta un Testigu di Yehova ku pa hopi aña a sirbi tempu kompletu, a konta: “Na un dado momentu mi a kuminsá sinti mi frustrá ku mi sirbishi. P’esei mi a pidi pa papia  ku e superintendente biahero. El a ègt skucha mi i a purba komprondé mi sintimentunan. Aparentemente, el a asta komprondé e miedu ku mi tabatin di ku lo el a kritiká mi pa mi aktitut. E ruman a sigurá mi ku e por a komprondé pa mi pasobra un tempu e mes tabatin e sintimentunan ei. Esaki a ègt yuda mi sigui padilanti.”

Nos por skucha sin ku nos mester ta di akuerdo ku loke ta ser bisá? Nos por bisa un persona ku nos ta apresiá ku el a bisa nos kiko e ta sinti? Sí. Komo mayor, kiko lo bo hasi si bo yu hòmber chikitu bringa na skol òf si bo yu muhé teenager yega kas i bisa bo ku e ta ‘verliefd’? No ta mihó bo skucha i trata na komprondé kiko ta biba den mente di e hóben promé ku bo splik’é kiko ta komportashon apropiá i kiko no ta?

Proverbionan 20:5 ta bisa: “Plan [“konseho,” NW] den kurason di un hende ta manera awa hundu, ma un hende di komprondementu ta saka esaki afó.” Si un persona prudente i ku tin eksperensia no ta inkliná pa duna konseho sin ku a pidié, nos lo tin ku pidié su konseho. Meskos ta konta ora nos ta skucha ku amor. Nos mester usa disernimentu pa saka afó kiko ta biba den un persona. Ta bon pa hasi pregunta, pero nos mester tene kuidou pa nos preguntanan no mete den nan asuntunan privá. Kisas ta bon pa sugerí esun ku ta papia pa é kuminsá menshoná kosnan ku e ta sinti su mes kómodo kuné. Por ehèmpel, un esposa ku ke papia tokante problema den su matrimonio por haña ku ta mas fásil pa kuminsá papia tokante kon el a konosé su kasá i kon nan a kasa. Un persona ku a bira inaktivo den e sirbishi kristian por haña ku ta mas fásil pa kuminsá splika kon el a haña e bèrdat.

Ta un Reto pa Skucha ku Amor

Por ta un reto pa skucha ora un persona ta rabiá ku nos pasobra nos inklinashon natural ta pa defendé nos mes. Kon nos por enfrentá e reto aki? Proverbionan 15:1 ta bisa: “Un kontesta suave ta kita rabia.” Algu ku por yuda nos respondé ku suavedat ta di invitá e persona bondadosamente pa papia anto skucha ku pasenshi segun ku e ta ekspresá loke ta molesti’é.

Hopi bes dos persona ku ta diskutí fuertemente ta djis ripití loke nan a bisa kaba. Kada un ta haña ku e otro no ta skucha. Lo ta bon si un di nan por stòp di papia i ègt skucha! Klaru ku ta importante pa ehersé dominio propio i ekspresá nos mes den un manera diskreto i amoroso. Beibel ta bisa nos: “Esun ku frena su lepnan ta sabí.”—Proverbionan 10:19.

E kapasidat pa skucha ku amor no ta bini di mes. Sin embargo, e ta un arte ku nos por siña ku esfuerso i disiplina. Sin duda, ta bale la pena pa dominá e arte aki. Ta un muestra di amor pa ègt skucha ora otro hende ta papia. Esaki ta kontribuí tambe na nos felisidat. Ta sabí anto pa kultivá e arte di skucha ku amor!

[Nota]

[Plachi na página 11]

Ora nos ta skucha nos tin ku pone nos mes interesnan un banda

[Plachi na página 12]

Por ta un reto pa skucha ora un persona ta rabiá