Armagedón​—Un Fin Katastrófiko?

ARMAGEDÓN! Riba kiko e palabra aki ta pone bo pensa? Riba un destrukshon masal òf un kataklismo grandi den kua tur kos den universo ta kaba na kandela? Den hopi parti di mundu, “Armagedón” ta un di e poko palabranan di Beibel ku tur dia ta den boka di pueblo. Por lo general, nan ta us’é pa deskribí e futuro skur ku tin dilanti hende. Pelíkulanan a yena hende su imaginashon ku esenanan spantoso di un binidero “Armagedón.” E palabra ta rondoná pa misterio i konseptonan eróneo. Ounke tin hopi idea enkuanto su nifikashon, mayoria di nan no ta kuadra ku loke Beibel—e fuente di e ekspreshon—ta siña tokante Armagedón.

Siendo ku Beibel ta konektá Armagedón ku “fin di mundu,” bo no ta di akuerdo ku ta sumamente importante pa nos komprondé bon kla kiko e palabra ta nifiká realmente? (Mateo 24:3, E Tèstamènt Nobo) I lo no ta lógiko pa akudí na e fuente supremo di e bèrdat, e Palabra di Dios, pa haña sa kiko ta Armagedón i kiko lo e nifiká pa abo i bo famia?

E análisis ei lo laga bo mira ku en bes di trese un fin katastrófiko, Armagedón lo introdusí un komienso felis pa hende ku ta deseá di biba i gosa di bida den un hustu mundu nobo. Ora bo sigui e konsiderashon den e siguiente artíkulo enkuanto e berdadero nifikashon di Armagedón, lo bo wòrdu rekompensá ku un komprondementu kla di e bèrdat bíbliko importante aki.

[Kuadro/Plachi na página 3]

KIKO BO TA KERE ARMAGEDÓN TA?

• Un destrukshon nuklear

• Un desaster di medio ambiente

• Un choke entre un kuerpo selestial ku tera

• Destrukshon di e malbadonan na man di Dios