Bira Ministernan Progresivo i Adaptabel
Bira Ministernan Progresivo i Adaptabel
“Mi a bira tur kos pa tur hende, pa di tur manera mi por salba algun.”—1 KORINTIONAN 9:22.
1, 2. (a) Den ki maneranan apòstel Pablo tabata un minister efektivo? (b) Kon Pablo mes a deskribí su aktitut pa ku su asignashon?
E TABATA sinti su mes kómodo serka intelektualnan sofistiká i serka trahadónan humilde di tènt. Su manera di papia a konvensé dignatarionan romano i tambe kampesinonan di Frigia. Su kartanan a motivá griegonan liberal i hudiunan konservativo. Su lógika tabata irefutabel i su manera di papia tabatin un atrakshon emoshonal poderoso. El a purba haña puntonan en komun ku tur hende di manera ku lo e por a yuda algun di nan pone fe den Kristu.—Echonan 20:21.
2 E hòmber ei tabata apòstel Pablo, kende sin duda tabata un minister efektivo i progresivo. (1 Timoteo 1:12) El a haña di Hesus e enkargo pa “hiba [Kristu su] nòmber na e paganonan i reinan i e yunan di Israel.” (Echonan 9:15) Ki aktitut e tabatin pa ku su asignashon? El a deklará: “Mi a bira tur kos pa tur hende, pa di tur manera mi por salba algun. I mi ta hasi tur kos pa kousa di evangelio, pa mi por tuma parti den dje.” (1 Korintionan 9:19-23) Kiko nos por siña for di e ehèmpel di Pablo ku por yuda nos ser mas efektivo den nos trabou di prediká i siña hende?
Un Hòmber Transformá Tabatin Éksito den un Asignashon Difísil
3. Kiko tabata Pablo su sintimentu pa e kristiannan promé ku el a kombertí?
3 Ta semper Pablo tabata un persona bondadoso, ku gran pasenshi, apto pa e asignashon ku el a haña? Definitivamente ku nò! Fanatismo religioso a hasi Saulo (manera Pablo tabata konosí anteriormente) un persiguidó violento di e siguidónan di Kristu. Komo hóben, el a aprobá e asesinato di Esteban. Mas despues, Pablo a persiguí e kristiannan sin miserikòrdia. (Echonan 7:58; 8:1, 3; 1 Timoteo 1:13) El a sigui ta “yen di amenasa i gustu pa mata e disipelnan di Señor.” Siendo ku e no a keda satisfecho ku persiguí solamente e kreyentenan na Yerusalèm, el a kuminsá plama su kampaña di odio i a yega te den parti nort na Damasko.—Echonan 9:1, 2.
4. Ki ahustenan Pablo tabatin ku hasi pa kumpli ku su asignashon?
4 E kousa básiko di Pablo su odio intenso pa kristianismo probablemente tabata e konvikshon ku e fe nobo aki lo a korumpí hudaismo dor di meskl’é ku ideanan djafó indeseabel. De echo, Pablo tabata “un fariseo,” i e nòmber ei mes ta nifiká “esun separá.” (Echonan 23:6) Nos por imaginá kon di shòk Pablo lo mester a keda ora ku el a haña sa ku Dios a skohe é pa prediká Kristu na nèt e hendenan no-hudiu! (Echonan 22:14, 15; 26:16-18) Figurá bo ku fariseonan a nenga di asta kome ku hende ku nan a konsiderá di ta pekadó! (Lukas 7:36-39) Sin duda Pablo lo mester a hasi gran esfuerso pa reevaluá su punto di bista i pon’é na armonia ku e boluntat di Dios, kende su boluntat ta ku tur klase di hende mester ser salbá.—Galationan 1:13-17.
5. Kon nos por imitá Pablo den nos ministerio?
5 Kisas nos tambe mester hasi meskos. Segun ku nos ta topa ku un variedat kada bes mas grandi di hende di diferente pais i di otro idioma den nos teritorionan, nos tin ku hasi un esfuerso konsiente pa analisá nos aktitut i kita kualke prehuisio ku nos lo por tin. (Efesionan 4:22-24) Sea ku nos ta realisá esei òf nò, nos ta ser formá dor di nos edukashon sosial i eskolar. Eseinan por inkulká den nos puntonan di bista i aktitutnan ku ta basá riba prehuisio i ku ta infleksibel. Nos tin ku vense tal sintimentunan pa nos por tin éksito den haña i yuda hende mansu manera karné. (Romanonan 15:7) Esei ta loke Pablo a hasi. El a aseptá e reto di ekspandé su ministerio. Motivá pa amor, el a desaroyá abilidatnan di siña hende ku ta digno di imitashon. De echo, un análisis di e ministerio di e “apòstel di e paganonan” ta mustra ku den e trabou di prediká i siña hende, Pablo tabata atento, adaptabel i ingenioso. *—Romanonan 11:13.
Un Minister Progresivo den Akshon
6. Kon Pablo a pone atenshon na e background di su oyentenan, i ku ki resultado?
6 Pablo tabata atento na e kreensianan i background di su oyentenan. Papiando ku Rei Agripa II, Pablo a rekonosé ku e rei tabata “un eksperto den tur kustumber i kuestion ku tin den e hudiunan.” Anto Pablo ábilmente a usa loke e tabata sa di Agripa su kreensianan i a papia kuné tokante asuntunan ku e rei a komprondé hopi bon. Pablo su rasonamentu tabata asina kla i konvinsente ku Agripa a bisa: “Kasi bo ta konvensé mi pa bira kristian.”—Echonan 26:2, 3, 27, 28.
7. Kon Pablo a demostrá di ta adaptabel ora el a prediká na un multitut na Listra?
7 Tambe Pablo tabata adaptabel òf fleksibel. Tuma nota kon el a usa kompletamente un otro método ora el a purba deskurashá un multitut den e stat di Listra di adorá e ku Barnabas komo dios. A yega di ser bisá di e hendenan aki, ku a papia e idioma likaónika, ku nan tabata entre esnan ménos eduká i mas superstisioso di e poblashon. Segun Echonan 14:14-18, Pablo a señalá na e kreashon i su abundansia di provishonnan natural komo prueba di e superioridat di e Dios berdadero. E argumentu ei tabata fásil pa komprondé, i aparentemente esei a “stòp e multitutnan di ofresé sakrifisio” na Pablo i Barnabas.
8. Den ki maneranan Pablo a mustra ku e tabata adaptabel apesar di e sintimentunan fuerte ku tin biaha e tabatin?
8 Klaru ku Pablo no tabata perfekto, i tabatin biaha ku e tabatin sintimentunan fuerte kontra sierto kosnan. Por ehèmpel, na un okashon ora ku nan a atak’é na un manera humiante i inhustu, el a habri afó kontra un hudiu ku yama Ananias. Pero ora nan a bisa Pablo ku inkonsientemente el a insultá e sumo saserdote, el a pidi despensa mesora. (Echonan 23:1-5) Na Atenas, e tabata na promé instante “perturbá [òf, “iritá,” NW] ora ku el a mira e stat yen di ídolo.” Sin embargo, den su diskurso riba Areópago, Pablo no a demostrá ku e tabata iritá. En bes di esei, el a papia ku e hendenan di Atenas den nan foro, i a usa un punto en komun pa rasoná ku nan dor di referí na nan altar dediká “Na un Dios Deskonosí” i dor di sita un di nan poëtanan.—Echonan 17:16-28.
9. Kon Pablo a demostrá di ta ingenioso ora di trata ku diferente ouditorio?
9 Ora di trata ku diferente ouditorio, Pablo a demostrá di ta masha ingenioso. El a tene kuenta ku e kultura i ambiente ku a forma e mentalidat di su ouditorio. Ora el a skirbi e kristiannan na Roma, e tabata bon konsiente di e echo ku nan a biba den e kapital di e poder polítiko di mas grandi di e tempu ei. Un punto prinsipal di Pablo su karta pa e kristiannan na Roma tabata ku e poder di korumpí di Adam su piká ta ser konkistá dor di Kristu su poder di reskatá. El a papia ku e kristiannan romano i esnan rònt di nan den un manera ku lo a toka nan kurason.—Romanonan 1:4; 5:14, 15.
10, 11. Kon Pablo a adaptá su komparashonnan na su oyentenan? (Wak tambe e nota na pia di página.)
10 Kiko Pablo a hasi ora ku e kier a splika bèrdatnan bíbliko profundo na su oyentenan? E apòstel tabata eksperto den usa komparashonnan komun i fásil pa komprondé pa klarifiká ideanan spiritual kompliká. Por ehèmpel, Pablo tabata sa ku e hendenan na Roma tabata familiarisá ku e sistema di sklabitut ku tabatin den henter e Imperio Romano. De echo, hopi di e personanan ku el a skirbi probablemente tabata katibu. P’esei Pablo a usa e komparashon di sklabitut pa reforsá su argumentu poderoso tokante e eskoho ku un persona ta hasi pa someté su mes sea na piká òf na hustisia.—Romanonan 6:16-20.
11 Un obra di referensia ta bisa: “Entre e romanonan . . . un doño por a libra un katibu sin ningun kondishon, òf e katibu por a kumpra su libertat dor di paga su doño. Tambe por a hasi areglo pa e katibu haña libertat, si a pasa e katibu over pa un dios.” Un katibu librá por a sigui traha pa su doño pa un salario. Probablemente Pablo a referí na e práktika aki ora el a skirbi tokante e eskoho ku un persona tin enkuanto kua doño lo e obedesé: piká òf hustisia. Kristiannan na Roma a ser librá di piká i awor Dios a bira nan doño. Nan tabata liber pa sirbi Dios, sin embargo ainda nan por a skohe pa sirbi piká—nan eks-doño—si nan a deseá esei. E komparashon simpel ei pero bon konosí lo a motivá e kristiannan na Roma pa puntra nan mes: ‘Ta kua doño ami ta sirbiendo?’ *
Siña for di Pablo Su Ehèmpel
12, 13. (a) Ki esfuerso nos tin ku hasi awe pa por yega na kurason di nos ouditorio ku ta hopi miksto? (b) Kiko abo a haña ta duna bon resultado ora di prediká na hende di diferente background?
12 Meskos ku Pablo, nos mester ta atento, adaptabel i ingenioso pa nos por yega na kurason di nos ouditorio ku ta hopi miksto. Pa yuda
nos oyentenan kapta e sentido di e bon nobo, nos ta deseá di hasi mas ku djis un bishita superfisial, entregá un mensahe prepará òf laga literatura bíbliko. Nos ta hasi esfuerso pa saka afó kiko ta nan nesesidat- i preokupashonnan, loke nan ta gusta i no ta gusta, i nan miedu- i prehuisionan. Ounke esaki ta rekerí ku mester pensa hopi i hasi basta esfuerso, rònt mundu publikadónan di Reino ansiosamente ta hasi esei. Por ehèmpel, e sukursal di Testigunan di Yehova na Hungria ta informá: “E rumannan ta demostrá rèspèt pa e kustumbernan i estilo di bida di hende di otro nashon i nan no ta ferwagt di nan ku nan mester adaptá na kustumbernan lokal.” Testigunan na otro parti ta purba hasi meskos.13 Den un pais na Lehano Oriente, mayoria hende ta preokupá ku salú, edukashon di yu i enseñansa. E publikadónan di Reino einan ta purba enfatisá e tópikonan aki en bes di papia tokante asuntunan manera kondishonnan mundial ku ta empeorá òf problemanan sosial kompliká. Asina tambe, publikadónan den un stat grandi na Merka a ripará ku hende den un sierto bario den nan teritorio tabata preokupá ku asuntunan manera korupshon, tráfiko pegá i kriminalidat. E Testigunan ta usa e tópikonan aki pa kuminsá kòmbersashonnan bíbliko, anto ku éksito. Maestronan di Beibel efektivo ta hasi sigur ku sin importá ki tópiko nan skohe, nan keda positivo i alentador, enfatisando e balor práktiko di apliká prinsipionan bíbliko awor i e prospektonan felis ku Dios ta ofresé pa futuro.—Isaias 48:17, 18; 52:7.
14. Deskribí maneranan den kua nos por adaptá na e diferente nesesidatnan i sirkunstansianan di hende.
14 Ta bon tambe pa nos varia nos manera di abordá hende den e ministerio, siendo ku e hendenan tin background kultural, edukativo i religioso masha distinto. Nos manera di abordá hende ku ta kere den un Kreadó pero no den Beibel lo ta distinto for di e manera ku nos ta papia ku esnan ku no ta kere ku Dios ta eksistí. E presentashon ku nos lo usa ku un hende ku ta haña ku tur literatura religioso ta un instrumento di indoktrinashon lo ta diferente for di esun ku nos ta usa ku un persona ku ta aseptá loke Beibel ta siña. Ta nesesario pa nos ta adaptabel tambe ora di trata ku e variedat grandi di nivel di edukashon di e hendenan ku nos ta papia kuné. Maestronan ábil lo usa rasonamentu i komparashonnan ku ta pas ku e situashon ku nan ta konfrontá.—1 Juan 5:20.
Yudansa pa Ministernan Nobo
15, 16. Dikon tin e nesesidat di entrená ministernan nobo?
15 Pablo no tabata interesá solamente den mehorá su propio métodonan di siña hende. El a mira tambe e nesesidat di entrená i prepará kristiannan di un generashon mas hóben, manera Timoteo i Tito, pa nan bira ministernan efektivo. (2 Timoteo 2:2; 3:10, 14; Tito 1:4) Awe tambe ta meskos, tin un nesesidat urgente pa duna i risibí entrenamentu.
16 Na aña 1914, tabatin aproksimadamente 5.000 publikadó di Reino rònt mundu; awe, tur siman rònt di 5.000 persona nobo ta ser batisá! (Isaias 54:2, 3; Echonan 11:21) Ora ku hende nobo kuminsá asosiá ku e kongregashon kristian i ta deseá di partisipá den e ministerio, nan tin mester di entrenamentu i guia. (Galationan 6:6) Ta masha importante pa nos usa e métodonan di e Shon, Hesus, ora di siña i entrená disipelnan. *
17, 18. Kon nos por yuda publikadónan nobo haña konfiansa den e ministerio?
17 Hesus no a djis buska un multitut i bisa su apòstelnan pa kuminsá papia ku nan. Promé, el a enfatisá pakiko e trabou di prediká ta nesesario i a animá nan pa persistí den orashon relashoná ku nan ministerio. Kaba el a perkurá tres kos básiko: un kompañero, un asignashon di teritorio i un mensahe. (Mateo 9:35-38; 10:5-7; Marko 6:7; Lukas 9:2, 6) Nos por hasi meskos. Sea ku nos ta yudando nos propio yu, un studiante nobo òf un persona ku pa un tempu no a partisipá den e aktividat di prediká, ta bon pa nos hasi esfuerso pa perkurá entrenamentu den e manera aki.
18 Publikadónan nobo tin mester di basta yudansa pa nan haña konfiansa den presentá e mensahe di Reino. Abo por yuda nan prepará i praktiká un presentashon simpel i atraktivo? Den vèlt, laga nan siña for di bo ehèmpel segun ku bo ta papia na e promé par di kasnan. Bo por sigui e patronchi di Gideon, kende a bisa su kompañeronan di bataya: “Wak mi i hasi meskos.” (Huesnan 7:17) Kaba duna e persona nobo e oportunidat di partisipá. Elogiá publikadónan nobo kalurosamente pa nan esfuerso, i ora ta apropiá, duna nan sugerensianan kòrtiku kon pa mehorá.
19. Kiko ta bo determinashon segun ku bo ta hasi esfuerso pa “kumpli ku bo ministerio” plenamente?
19 Pa nos por ‘kumpli ku nos ministerio’ plenamente, nos ta determiná pa bira mas adaptabel den nos manera di abordá hende, i nos ke entrená ministernan nobo pa hasi meskos. Ora nos pensa riba e importansia di nos meta, esta, di kompartí e konosementu di Dios ku ta hiba na salbashon, nos ta keda konvensí ku ta bale la pena tur e esfuerso ku nos tin ku hasi pa bira “tur kos pa tur hende, pa di tur manera [nos] por salba algun.”—2 Timoteo 4:5; 1 Korintionan 9:22.
[Nota]
^ par. 5 Pa mira algun ehèmpel di e kualidatnan ei den Pablo su ministerio, konsiderá Echonan 13:9, 16-42; 17:2-4; 18:1-4; 19:11-20; 20:34; Romanonan 10:11-15; 2 Korintionan 6:11-13.
^ par. 11 Asina tambe, ora di splika e relashon nobo entre Dios i su “yunan” ungí pa spiritu santu, Pablo a usa un konsepto legal ku tabata basta konosí pa su lektornan den e Imperio Romano. (Romanonan 8:14-17) Segun e buki St. Paul at Rome (San Pablo na Roma): “Adopshon tabata básikamente un kustumber romano, i tabata estrechamente ligá ku e ideanan romano tokante famia.”
^ par. 16 Aktualmente, e programa Pioneronan Ta Yuda Otro Publikadónan ta disponibel den tur kongregashon di Testigunan di Yehova. E programa ta hasi uso di e eksperensia i entrenamentu di ministernan di tempu kompletu pa yuda publikadónan ménos eksperensiá.
Bo Ta Kòrda?
• Den ki maneranan nos por imitá Pablo den nos ministerio?
• Ki kambionan den nos manera di pensa probablemente ta nesesario?
• Kon nos por mantené nos mensahe positivo?
• Kiko ministernan nobo tin mester pa nan por desaroyá konfiansa?
[Preguntanan di Estudio]
[Komentario na página 29]
Ora di prediká i siña hende, apòstel Pablo tabata atento, adaptabel i ingenioso
[Komentario na página 31]
Hesus a perkurá tres kos básiko pa su disipelnan: un kompañero, un asignashon di teritorio i un mensahe
[Plachinan na página 28]
Pablo a logra yega na kurason di diferente ouditorio dor di ser adaptabel
[Plachi na página 30]
Ministernan efektivo ta tuma na kuenta e background kultural di nan oyentenan
[Plachi na página 31]
Ministernan progresivo ta yuda esnan nobo prepará pa e ministerio