Un Testimonio di Amor, Fe i Obedensia
Un Testimonio di Amor, Fe i Obedensia
E MAINTA di 16 di mei 2005 tabatin un temperatura agradabel i un solo briante na Watchtower Farms na Wallkill, New York. E yerbanan nèchi kòrtá i e kamanan di flor tabata lombra di e áwaseru ku a kai den mardugá. Un patu ku su ocho yunan tabata landa trankil di nan na rant di un vijver. Bishitantenan a atmirá e bunita bista. Nan tabata papia ku un tono suave, komo si fuera pa no kibra e trankilidat di mainta.
E bishitantenan tabata Testigunan di Yehova ku a bini for di 48 pais rònt mundu. Pero no ta paisahe bunita nan a bin atmirá. Nan tabata interesá den loke tabata tumando lugá den un edifisio espasioso trahá di klenku, ku ta e ekstenshon mas resien di e kompleho di Bètel di Merka na Wallkill. Ora nan a drenta den e edifisio ei nan a keda un biaha mas impreshoná, ounke e esena sí no tabata nada ketu ni trankil.
For di un balkon e bishitantenan por a kontemplá abou un área tur na mashin. Sinku mashin di imprenta grandísimo ta okupá un flur di semènt bon di pòlish, mas grandi ku 6 vèlt di futbòl. Aki ta kaminda ta imprimí Beibel, buki i revista. Ròlnan inmenso di papel, di kua kada un ta pisa 1.700 kilo, ta drei manera wil di un trùk ku ta kore na gran velosidat. Kada ròl di papel ta 23 kilometer largu i e papel ta pasa dor di e imprenta den apénas 25 minüt. Durante e tempu ei, e mashin ta apliká e enk i sek’é, kaba e ta fria e papel pa esaki por wòrdu doblá den forma di revista ku ta pasa na gran velosidat riba fahanan di transporte ku ta kore na laira pa wòrdu hinká den kaha i mandá n’e kongregashonnan. Otro mashinnan ta imprimí sekshonnan di buki, kuanan ta wòrdu transportá rápidamente pa un depósito ku ta
okupá henter un área di flur te plafòn. Despues ta manda nan pa e departamentu di enkuaderná, òf di ‘bind’ buki. Henter e operashon ta ser dirigí pa kòmpiuter ku un presishon armonioso.Despues ku e bishitantenan a sali for di e drùkerei, nan a pasa pa e departamentu di enkuaderná buki. Aki mashinnan ta produsí buki ku kaft duru i Beibel di luho. Nan por produsí te ku 50.000 pa dia. Ta pega e sekshonnan di buki den e órden korekto, kose nan i kòrta e rantnan. Despues ta pega e kaftnan, kaba hinka nan den kaha di karton. Anto ta seya e kahanan, pone etikèt riba nan i stapel nan riba palèt. Henter e sistema aki ta outomatisá. Banda di tur esaki tin un liña di produkshon ku ta traha i paketá un 100.000 buki ku kaft moli pa dia. Esaki tambe ta konsistí di tur tipo di mashin—masha hopi motor, faha di transporte, gear, wil i fambèl—i tur ta moviendo na un velosidat asombroso pa produsí literatura bíbliko.
E drùkerei ku su ekipo supermoderno, di alta velosidat i ku ta traha ku e presishon di un oloshi bon diseñá ta un maravia di teknologia avansá. Manera nos lo mira, e ta a la bes un testimonio di e amor, fe i obedensia di e pueblo di Dios. Ma dikon a muda e drùkerei for di Brooklyn, New York, pa Wallkill?
Un motibu prinsipal tabata pa simplifiká e trabounan di imprenta i mandamentu di karga dor di sentralisá tur kos na un solo sitio. Pa hopi aña tabata imprimí i manda buki for di Brooklyn, i tabata imprimí i manda revista for di Wallkill. Dor di kombiná e operashonnan ei por a redusí personal i hasi mihó uso di fondonan di kontribushon. Ademas, ya ku e mashinnan di imprenta na Brooklyn tabata birando bieu, a manda buska dos mashin di imprenta nobo marka MAN Roland Lithoman for di Alemania. E mashinnan aki tabata muchu grandi pa pas den e drùkerei na Brooklyn.
Yehova Ta Respaldá e Obra
E meta di e trabou di imprimí semper tabata pa plama e bon nobo di e Reino di Dios. For di kuminsamentu kaba tabata bisto ku e bendishon di Yehova tabata riba e trabounan aki. Di aña 1879 pa 1922 a imprimí e bukinan na drùkereinan komersial. Na 1922 a hür un edifisio di seis piso na Concord Street 18, Brooklyn, i a kumpra ekipo pa imprimí buki. E tempu ei algun persona tabata duda si e rumannan por a hasi e trabou.
Un di nan tabata e direktor di e kompania ku tabata imprimí mayoria di nos bukinan. Ora el a bishitá Concord Street, el a bisa: “Aki boso tin un fasilidat di imprenta di primera klase, i no tin niun hende den e lugá aki ku sa kiko pa hasi kuné. Den seis luna henter e kos aki lo ta un monton di heru bieu; i boso lo bin mira ku e hendenan ku mester imprimí pa boso ta esnan ku semper a hasié i ku ta den e negoshi di imprenta.”
E superintendente di e drùkerei di e tempu ei, Robert J. Martin, a remarká: “Esei a zona basta lógiko, pero e no a tene kuenta ku Señor; i semper Señor tabata ku nos. . . . No a dura muchu ku nos a kuminsá produsí buki.” Durante e 80 añanan ku a sigui, Testigunan di Yehova a imprimí míles di miónes di literatura ku nan propio mashinnan di imprenta.
Anto dia 5 di òktober 2002, na e reunion anual di Watch Tower Bible and Tract Society of Pennsylvania, a anunsiá ku e Kuerpo Gobernante a aprobá pa muda e aktividatnan di imprenta di e sukursal di Merka pa Wallkill. A bestèl dos mashin di imprenta nobo ku lo a ser entregá na febrüari 2004. E rumannan lo mester a diseñá i amplia e drùkerei i prepará tur kos
pa den 15 luna risibí e mashinnan nobo. Anto despues, den 9 luna lo mester a kompletá instalashon di e departamentu nobo di enkuaderná buki i e operashonnan di distribushon. Kisas algun persona tabatin nan dudanan ora nan a tende den kuantu tempu tur kos lo mester tabata kla—un tarea ku a parse kasi imposibel. Pero e rumannan tabata sa ku nan lo a alkans’é ku Yehova su bendishon.“Un Dushi Spiritu di Koperashon”
Sabiendo ku Yehova su sirbidónan lo a ofresé nan mes boluntariamente, e rumannan a kuminsá e proyekto. (Salmo 110:3) Su magnitut a rekerí mas trahadó ku tabatin disponibel den Bètel su departamentunan di konstrukshon. For di Merka i Canada mas ku 1.000 ruman hòmber i muhé ku tin fishi di konstrukshon a ofresé pa sirbi entre un siman pa tres luna komo parti di un programa di boluntario temporal. Otronan ku ta forma parti di e programanan di sirbidó i boluntario internashonal a ser invitá pa partisipá den e proyekto. Komiténan Regional di Konstrukshon tambe a kontribuí grandemente.
Hopi ruman ku a bin traha komo boluntario riba e proyekto di Wallkill a hasi gastu grandi pa biaha i mester a tuma dia liber di trabou. Pero nan a hasi e sakrifisionan aki ku goso. E esfuersonan pa hospedá i alimentá e gran kantidat di boluntarionan adishonal aki a duna e famia di Bètel oportunidat pa apoyá e proyekto. Mas ku 535 miembro di e famia di Bètel di Brooklyn, Patterson i Wallkill a ofresé pa traha riba e proyekto riba djasabra, banda di nan asignashonnan normal di den siman. E apoyo formidabel ku e pueblo di Dios a duna e proyekto históriko aki tabata posibel únikamente pasobra Yehova tabata tras di dje.
Otronan a kontribuí finansieramente. Por ehèmpel, e rumannan a risibí un karta di Abby di nuebe aña di edat. E hobensita aki a skirbi: “Mi ta masha gradisidu pa tur e trabou ku boso ta hasi, pa tur e bunita bukinan ku boso ta traha. Por ta lo mi bishitá boso pronto. Mi tata a bisa mi otro aña! Lo mi bisti un badge pa boso sa ken mi ta. Ata 20 dòler aki pa e mashinnan nobo! Ta mi zakgeld, pero mi ke duna boso.”
Un ruman muhé a skirbi: “Por fabor aseptá mi mùtsnan di hak komo regalo ku mi a traha ku mi dos mannan humilde. Mi ke pa boso entregá e mùtsnan aki na e rumannan ku ta trahando riba e proyekto di Wallkill. Un almanak a bisa ku lo bai tin un wenter hopi friu. Mi no sa si ta bèrdat, pero loke sí mi sa ta ku gran parti di e trabou na Wallkill lo tuma lugá pafó, i mi ke hasi sigur ku mi rumannan por tene nan kabes kayente. Mi no tin niun di e fishinan ku e rumannan ta buskando, pero mi por hak sí, p’esei mi a disidí di usa e abilidat aki pa kontribuí ku loke mi tabata por.” Huntu ku e karta tabatin 106 mùts di hak!
E rumannan a kompletá e drùkerei segun e skema di tempu. John Larson, superintendente di e drùkerei, a bisa: “Tabatin un dushi spiritu di koperashon. Ken por duda ku Yehova a bendishoná e obra? Kosnan a kana lihé. Mi ta kòrda kon na mei 2003 mi tabata pará den lodo ta wak e rumannan basha e fundeshi di e edifisio. Ménos ku un aña despues, mi tabata pará na e mesun lugá ta wak un mashin di imprenta funshoná.”
Programa di Dedikashon
E programa pa dediká e drùkerei nobo, huntu ku tres edifisio di residensia, a ser tené na Wallkill riba djaluna 16 di mei 2005. E komplehonan di Bètel na Patterson i Brooklyn, i tambe Bètel di Canada tabata konektá pa mira i skucha e programa via e sistema di vidio. Na tur, 6.049 persona a disfrutá di e programa. Theodore Jaracz, miembro di e Kuerpo Gobernante di Testigunan di Yehova, a sirbi komo presidente i a repasá brevemente e historia di e trabounan di imprenta. Pa medio di entrevista- i presentashonnan di vidio, e miembronan di Komité di Sukursal John Larson i John Kikot a repasá e historia di tantu e proyekto di konstrukshon komo e trabounan di imprenta na Merka. John Barr di e Kuerpo Gobernante a duna e diskurso final, dedikando e drùkerei nobo i tres kompleho di residensia na Yehova Dios.
Den e siman ku a sigui e bètelitanan di Patterson i Brooklyn a haña chèns di bishitá e fasilidatnan nobo. Na tur, 5.920 di nan a probechá di e oportunidat ei.
Kon Nos Ta Mira e Drùkerei?
Den e diskurso di dedikashon, Ruman Barr a rekordá su oyentenan ku pa impreshonante ku e drùkerei por ta, no ta mashin ta e kos di mas importante. Ta hende ta importante. E literatura ku nos ta imprimí tin un impakto profundo riba bida di hende.
Kada un di e mashinnan di imprenta nobo por imprimí un mion tratado den poko mas ku un ora! Sin embargo, un solo tratado por tin un efekto duradero riba bida di un persona. Por ehèmpel, na 1921 un grupo di hòmber enkargá ku mantenshon di spoorban na Suráfrika tabata traha riba parti di un spoorban. Un di nan, yamá Christiaan, a mira un pida papel pegá bou di un rail. Tabata un di nos tratadonan. Christiaan a les’é ku sumo interes. Despues el a kore bai serka su suegro i a bis’é ku un tono emoshoná: “Awe mi a haña e bèrdat!” Poko despues, nan a skirbi pa pidi mas informashon. E sukursal di Suráfrika a manda mas literatura bíbliko. E dos hòmbernan aki a studia Beibel, batisá i kompartí e bèrdat bíbliko ku otro hende. Komo resultado, hopi ta esnan ku a aseptá e bèrdat. De echo, pa kuminsamentu di añanan ’90, mas ku shen di nan desendientenan tabata Testigu di Yehova—tur esei komo resultado di un simpel tratado ku un hòmber a deskubrí riba un spoorban!
Ruman Barr a bisa ku e literatura ku nos ta imprimí ta trese hende den e bèrdat, ta tene nan den e bèrdat, ta motivá nan na un selo mas grandi i ta uni e hermandat. I mas importante ku tur kos, e literatura ku nos tur ta yuda distribuí ta glorifiká nos Dios, Yehova!
Kon Yehova Ta Mira e Drùkerei?
Ruman Barr a pidi e presentenan tambe pa pensa riba kon Yehova ta mira e drùkerei. Yehova sigur no ta dependé di dje. Si e ke e por pone piedra mes prediká e bon nobo! (Lukas 19:40) Ademas, ni e komplehidat, tamaño, velosidat òf kapasidat di e mashinnan no ta impreshon’é. Kòrda ku ta é a krea universo! (Salmo 147:10, 11) Yehova konosé sistemanan mas sofistiká pa produsí literatura, sistemanan ku hende no a inventá, ni sikiera imaginá. Kiko Yehova ta mira anto ku di bèrdat tin hopi balor p’e? Sin duda e ta mira den e drùkerei aki e kualidatnan presioso di su pueblo, esta, nan amor, fe i obedensia.
Ruman Barr a ilustrá e aspekto di amor den e siguiente manera. Un hobensita ta traha un bolo pa su mayornan. Probablemente esei lo konmové e mayornan. Sí, maske kon e bolo sali, loke ta konmové e mayornan ta e amor ku nan yu ta demostrá ku su gesto. Meskos tambe, ora Yehova wak e drùkerei nobo aki, e ta mira mas aleu ku e edifisio i mashinnan. Na promé lugá, e ta mir’é komo un muestra di amor pa su nòmber.—Hebreonan 6:10.
Ademas, meskos ku Yehova a mira e arka komo un muestra di e fe di Noe, e ta mira e drùkerei aki komo un prueba palpabel di nos fe. Fe den kiko? Noe tabatin fe ku loke Yehova a profetisá lo kumpli. Nos tin fe ku nos ta bibando den e último dianan, ku e bon nobo ta e mensahe di mas importante ku ta ser proklamá riba tera, i ku ta sumamente importante pa hende tend’é. Nos sa ku e mensahe di Beibel por salba bida.—Romanonan 10:13, 14.
Sin duda, Yehova ta mira den e drùkerei aki tambe un muestra di nos obedensia. Manera nos sa, su boluntat ta pa e bon nobo ser prediká rònt mundu promé ku e fin yega. (Mateo 24:14) E drùkerei aki, huntu ku esnan den otro regionnan di mundu, lo hunga un papel klave den realisashon di e enkargo ei.
Sí, e amor, fe i obedensia demostrá den e finansiamentu, konstrukshon i operashon di e fasilidatnan aki ta ser reflehá tambe den e aktividat seloso di e pueblo di Yehova na tur parti di mundu segun ku nan ta sigui proklamá e bèrdat na tur hende ku ta dispuesto pa skucha.
[Kuadro/Plachinan na página 11]
EKSPANSHON DI E TRABOUNAN DI IMPRENTA NA MERKA
1920: A kuminsá imprimí revista ku e promé ekipo ‘rotary’ na Myrtle Avenue 35, Brooklyn.
1922: A muda e drùkerei pa un edifisio di seis piso na Concord Street 18. A kuminsá imprimí buki tambe.
1927: A muda e drùkerei pa un edifisio nobo konstruí na Adams Street 117.
1949: Un edifisio nobo di nuebe piso a dòbel kapasidat di e drùkerei.
1956: Edifisio nobo konstruí na Sands Street 77 a bolbe dòbel kapasidat di e drùkerei na Adams Street.
1967: A konstruí un edifisio di dies piso i konekt’é ku esnan eksistente; e drùkerei a bira dies biaha mas grandi ku esun ku tabata den e edifisio original.
1973: A konstruí un drùkerei ousiliar na Wallkill, prinsipalmente pa produkshon di revista.
2004: A konsentrá tur trabou di imprenta, enkuadernashon i distribushon na Wallkill.