Awor Ta Tempu pa Tuma Akshon Desisivo
Awor Ta Tempu pa Tuma Akshon Desisivo
“Kuantu tempu mas boso ta keda duda entre dos opinion?”—1 REINAN 18:21.
1. Kiko ta hasi nos tempu asina diferente for di pasado?
ABO ta kere ku Yehova ta e úniko Dios berdadero? Bo ta kere tambe ku profesianan bíbliko ta señalá nos tempu komo “e último dianan” di e mundu malbado di Satanas? (2 Timoteo 3:1) Si ta asina, lo bo ta di akuerdo sin duda ku awor, mas ku nunka, ta nesesario pa aktua na un manera desisivo. Nunka promé den historia humano tabatin asina tantu bida na peliger.
2. Kiko a pasa den e reino di dies tribu di Israel durante reinado di Rei Akab?
2 Den siglo 10 promé ku nos era, e nashon di Israel tabatin ku tuma algun desishon hopi serio. Ken nan lo sirbi? Rei Akab, bou di influensia di su esposa pagano, Jezabel, a promové adorashon di Baal den e reino di dies tribu di Israel. Baal tabata un dios di fertilidat ku supuestamente lo mester a perkurá áwaseru i kosecha abundante. Hopi adoradó di Baal probablemente tabata tira sunchi òf bùig dilanti di un imágen di nan dios. Baal su adoradónan a partisipá den orgianan seksual ku prostitutanan di tèmpel pa asina persuadí e dios pa bendishoná nan kosecha i bestianan di krio. Nan tabatin tambe e kustumber di kòrta nan kurpa pa laga sanger basha.—1 Reinan 18:28.
3. Ki efekto adorashon di Baal tabatin riba Dios su pueblo?
3 Un restu di mas o ménos 7.000 israelita a nenga di tuma parti den e forma di adorashon idólatra, inmoral i violento aki. (1 Reinan 19:18) Nan a pega fielmente na nan relashon ku Yehova Dios basá riba e aliansa ku nan tabatin kuné, i pa motibu di esaki nan a ser persiguí. Por ehèmpel, Reina Jezabel a asesiná hopi profeta di Yehova. (1 Reinan 18:4, 13) Debí na e kondishonnan difísil aki, mayoria israelita a praktiká union di fe dor di purba agradá tantu Yehova komo Baal. Pero ora un israelita kita for di Yehova i bai adorá un dios falsu, el a kometé apostasia. Yehova a primintí di bendishoná e israelitanan si nan a stim’é i a obedesé su mandamentunan. Sin embargo, el a spièrta nan ku si nan no dun’é “deboshon eksklusivo,” nan lo a ser destruí.—Deuteronomio 5:6-10, NW; 28:15, 63.
4. Hesus i su apòstelnan a profetisá ku lo sosodé kiko entre kristiannan, i kon esaki a kumpli?
4 Un situashon similar ta eksistí awe den kristiandat. Miembronan di iglesia ta pretendé di ta kristian, pero nan dianan di fiesta, komportashon i kreensianan ta na konflikto ku e siñansanan di Beibel. Klero di kristiandat, meskos ku Jezabel, ta enkabesá e persekushon di Testigunan di Yehova. Klero di kristiandat tin tambe un registro largu di ta apoyá guera i pues nan ta responsabel pa e morto di miónes di miembro di iglesia. Beibel ta identifiká e apoyo ei ku religion ta duna gobièrnunan di mundu komo fornikashon òf inmoralidat spiritual. (Revelashon 18:2, 3) Ademas kristiandat mas i mas ta tolerá fornikashon literal, asta entre su klero. Hesukristu i su apòstelnan a profetisá e gran apostasia aki. (Mateo 13:36-43; Echonan 20:29, 30; 2 Pedro 2:1, 2) Kiko lo ta e resultado final pa mas ku mil mion siguidó di kristiandat? I ki responsabilidat berdadero adoradónan di Yehova tin pa ku e hendenan aki i pa ku tur otro ku a ser engañá dor di religion falsu? Nos ta haña un kontesta bon kla riba e preguntanan ei dor di analisá e susesonan dramátiko ku a hiba na e ‘eliminashon di Baal for di Israel.’—2 Reinan 10:28.
Dios Su Amor pa Su Pueblo Rebelde
5. Kon Yehova a demostrá interes amoroso den su pueblo rebelde?
5 Yehova Dios no tin plaser den kastigá hende ku bira infiel na dje. Komo un Tata amoroso, e ta deseá pa malbadonan repentí i bolbe bèk na dje. (Ezekiel 18:32; 2 Pedro 3:9) Prueba di esaki ta ku Yehova a usa hopi profeta den e dianan di Akab i Jezabel pa spièrta Su pueblo di e konsekuensianan di adorashon di Baal. Elias tabata un di e profetanan ei. Despues di un sekura devastador, ku a keda anunsiá di antemano, Elias a bisa Rei Akab pa reuní e israelitanan i profetanan di Baal huntu riba Seru Karmelo.—1 Reinan 18:1, 19.
6, 7. (a) Kon Elias a saka na kla e kousa básiko di Israel su apostasia? (b) Kiko e profetanan di Baal a hasi? (c) Kiko Elias a hasi?
6 E reunion a tuma lugá kaminda tabatin un altar di Yehova ku a ser “bashá abou,” probablemente pa agradá Jezabel. (1 Reinan 18:30) Lamentablemente, e israelitanan presente no tabata sa sigur ta ken—Yehova òf Baal—tabata den mihó posishon pa produsí e áwaseru tan nesesario. Baal a keda representá pa 450 profeta, miéntras ku Elias tabata e úniko profeta ku a representá Yehova. Elias a bai na rais di nan problema, i a puntra e pueblo: “Kuantu tempu mas boso ta keda duda entre dos opinion?” Anto ku palabranan mas kla ainda, el a pone e kuestion dilanti nan: “Si Yehova ta e Dios berdadero, bai siguié; pero si ta Baal, bai siguié.” [NW] Pa motivá e israelitanan indesiso pa rindi deboshon eksklusivo na Yehova, Elias a proponé un tèst ku lo duna prueba ken ta e Dios berdadero. Nan mester a mata dos buey òf toro komo sakrifisio, un pa Yehova i e otro pa Baal. E Dios berdadero lo a konsumí su sakrifisio ku kandela. E profetanan di Baal a prepará nan sakrifisio, anto despues pa oranan largu nan a keda grita: “O Baal, kontestá nos.” Ora Elias a kuminsá hasi bofon di nan, nan a kòrta nan kurpa te ora sanger tabata basha, i nan tabata grita na bos haltu. Ma no tabatin ningun kontesta.—1 Reinan 18:21, 26-29.
7 Awor tabata Elias su bùrt. Promé, el a drecha e altar di Yehova i a pone e pidanan di e buey yòn riba dje. Kaba el a duna òrdu pa basha kuater tinashi grandi di awa riba e sakrifisio. Nan a hasi esaki tres biaha te ora ku e roi rònt di e altar a yena ku awa. E ora ei Elias a pidi den orashon: “O SEÑOR, e Dios di Abraham, Isaak i Israel, laga ta konosí awe ku ta abo ta Dios na Israel, i ku ami ta bo sirbidó i ku mi a hasi tur e kosnan aki konforme bo palabra. Kontestá mi, o SEÑOR, kontestá mi, pa e pueblo aki sa ku ta abo, [o Yehova], ta Dios, i ku ta abo a hasi nan kurason bolbe atrobe.”—1 Reinan 18:30-37.
8. Kon Dios a reakshoná riba e orashon di Elias, i ki akshon e profeta a tuma?
8 E Dios berdadero a reakshoná dor di konsumí tantu e sakrifisio komo e altar ku kandela ku a baha for di shelu. E kandela ei a konsumí asta e awa den e roi rònt di e altar! Imaginá ki efekto esei tabatin riba e israelitanan. “Nan a tira nan kurpa abou ku nan kara te na suela; i nan a bisa: ‘Yehova ta e Dios berdadero! Yehova ta e Dios berdadero!’” [NW] E ora ei Elias a dal mas pasonan desisivo, ordenando e israelitanan: “Gara e profetanan di Baal; no laga ni un di nan skapa.” Tur e 450 profetanan di Baal a keda ehekutá na pia di Seru Karmelo.—1 Reinan 18:38-40.
9. Kon adoradónan berdadero a bolbe ser poné na prueba?
9 Riba e mesun dia inolvidabel ei, Yehova a laga áwaseru kai riba e tera pa promé biaha den tres aña i mei! (Santiago 5:17, 18) Bo por imaginá kuantu papiamentu lo tabatin entre e israelitanan segun ku nan a regresá nan kas; Yehova a vindiká su mes komo e Dios berdadero. Sin embargo, e adoradónan di Baal no a entregá. Jezabel a sigui ku su kampaña di persiguí e sirbidónan di Yehova. (1 Reinan 19:1, 2; 21:11-16) Pues e integridat di Dios su pueblo a bolbe ser poné na prueba. Nan lo ta dunando deboshon eksklusivo na Yehova ora ku su dia di huisio kontra e adoradónan di Baal yega?
Aktua na un Manera Desisivo Awor
10. (a) Den tempu moderno, kiko kristiannan ungí a bin ta hasi? (b) Obedesé e mandamentu ku tin na Revelashon 18:4 ta enserá kiko?
10 Den tempu moderno, kristiannan ungí a hasi un trabou paresido na esun di Elias. Ku boka i mediante página imprimí, nan a spièrta hende di tur nashon paden i pafó di kristiandat di e peliger di religion falsu. Komo resultado, miónes di hende a aktua na manera desisivo pa stòp di ta miembro di religion falsu. Nan a dediká nan bida na Yehova i a bira disipelnan batisá di Hesukristu. Sí, nan a hasi kaso di Dios su apelashon urgente relashoná ku religion falsu: “Sali for di dje, mi pueblo, pa bo no partisipá den su pikánan i pa bo no risibí di su plaganan.”—Revelashon 18:4.
11. Kiko ta nesesario pa un hende tin Yehova su aprobashon?
11 Ademas tin miónes di hende ku ta gusta e mensahe basá riba Beibel ku Testigunan di Yehova ta plama, pero tòg nan no sa sigur kiko nan lo mester hasi. Tin di nan ta asistí de bes en kuando na reunionnan kristian, manera na konmemorashon di e Sena di Señor òf na algun seshon di un kongreso di distrito. Nos ta urgi tur e personanan ei pa konsiderá ku sumo atenshon e palabranan aki di Elias: “Kuantu tempu mas boso ta keda bula djaki p’aya?” (1 Reinan 18:21, BPK) En bes di tarda, nan tin ku tuma akshon desisivo awor i traha ku selo pa alkansá e meta di bira adoradónan dediká i batisá di Yehova. Nan prospekto di bida eterno ta den wega!—2 Tesalonisensenan 1:6-9.
12. Den ki kondishon peligroso algun kristian batisá a kai, i kiko nan lo mester hasi?
12 Lamentablemente, tin algun kristian batisá ku a bira iregular òf inaktivo den nan adorashon. (Hebreonan 10:23-25; 13:15, 16) Tin di nan a pèrdè nan selo debí na miedu di persekushon, debí na e preokupashonnan pa gana nan pan di kada dia, debí na esfuersonan pa bira riku òf debí na korementu tras di plasernan egoista. Hesus a spièrta ku e kosnan aki lo trompeká, hoga i kue algun di su siguidónan den trampa. (Mateo 10:28-33; 13:20-22; Lukas 12:22-31; 21:34-36) En bes di “duda entre dos opinion,” na moda di papia, e personanan ei mester ta “ferviente i repentí” dor di tuma akshon desisivo pa kumpli ku nan dedikashon na Dios.—Revelashon 3:15-19.
E Fin Repentino di Religion Falsu
13. Deskribí e situashon na Israel ora ku Jehú a keda ungí komo rei.
13 E motibu pakiko ta urgente pa hende tuma akshon desisivo awor ta bira bisto debí na loke a pasa na Israel un 18 aña despues ku a disidí e kuestion di ken ta e Dios berdadero riba Seru Karmelo. Yehova su dia di huisio kontra adoradónan di Baal a bin repentinamente i ònferwagt durante e ministerio di Elias su susesor, Eliseo. Joram, yu hòmber di Rei Akab, tabata goberná Israel, i Jezabel ainda tabata na bida komo reina mama. Ketu-ketu Eliseo a manda su sirbidó bai ungí Jehú, e hefe di ehérsito di Israel, komo e rei nobo. E tempu ei Jehú tabata na e banda ost di Riu Hordan na Ramot-galaad, dirigiendo un guera kontra e enemigunan di Israel. Rei Joram tabata na Jezreel den e vaye di yanura serka di Meguido, rekuperando di un herida di bataya.—2 Reinan 8:29–9:4.
14, 15. Ki enkargo Jehú a risibí, i kon el a reakshoná?
14 Esaki ta loke Yehova a manda Jehú hasi: “Bo mester dal e kas di bo shon Akab, pa mi venga e sanger di mi sirbidónan e profetanan, i e sanger di tur e sirbidónan di SEÑOR, kendenan a muri na man di Jezabel. Pasobra henter e kas di Akab lo peresé . . . E kachónan lo kome Jezabel den e teritorio di Jezreel i ningun hende lo no der’é.”—2 Reinan 9:7-10.
15 Jehú tabata un hòmber ku ta aktua na un manera desisivo. Sin tarda, el a subi den su garoshi i a kore bai purá den direkshon di Jezreel. Un guardia na Jezreel a rekonosé e manera di kore garoshi di Jehú i a informá Rei Joram. Joram e ora ei a subi su garoshi i a sali bai kontra su hefe di ehérsito. Ora nan a topa, Joram a puntra: “Ta na pas bo ta bin, Jehú?” Jehú a kontestá: “Kon por tin pas, tanten ku e fornikashonnan di bo mama Jezabel i su bruherianan ta asina hopi?” Anto promé ku Rei Joram por a hui bai, Jehú a span su bog i a mata Joram ku un flecha ku a bora su kurason.—2 Reinan 9:20-24.
16. (a) Ki situashon Jezabel su ofisialnan di palasio a konfrontá diripiente? (b) Kon Yehova su palabra relashoná ku Jezabel a kumpli?
16 Sin pèrdè tempu, Jehú a kore bai purá na e stat den su garoshi. Mirando abou for di un bentana, Jezabel, pintá ku hopi makiahe, a kumindá Jehú ku un menasa serio. Jehú a ignor’é i a yama pidi apoyo: “Ken ta na mi banda? Ken?” E sirbidónan di Jezabel awor tabatin ku aktua na un manera desisivo. Dos òf tres ofisial di palasio a saka nan kabes for di bentana. Mesora, nan lealtat a ser poné na prueba. “Bent’é abou”! Jehú a ordená. E ofisialnan a benta Jezabel abou riba kaya, kaminda e kabainan di Jehú i su garoshi a pasa riba dje. Pues, e instigadó di adorashon di Baal den Israel a haña su fin meresí. Promé ku nan a haña chèns di der’é, kachónan a kome su karni, presis manera a ser profetisá.—2 Reinan 9:30-37.
17. Dios su huisio kontra Jezabel mester fortalesé nos fe den ki suseso binidero?
17 E prostituta simbóliko ku ta karga e nòmber ‘Babilonia e Grandi’ tambe lo tin kasi mesun fin horibel. E prostituta ta representá e religionnan falsu di e mundu di Satanas, kuanan a originá den e stat antiguo di Babilonia. Despues di e fin di religion falsu, Yehova Dios lo dirigí su atenshon na tur sobrá hende ku ta forma parti di e mundu di Satanas. Esakinan tambe lo ser destruí, preparando asina e kaminda pa un hustu mundu nobo.—Revelashon 17:3-6; 19:19-21; 21:1-4.
18. Despues di e morto di Jezabel, kiko a pasa ku adoradónan di Baal den Israel?
18 Despues di e morto di Jezabel, Rei Jehú no a pèrdè tempu pa ehekutá tur desendiente di Akab i nan apoyadónan prinsipal. (2 Reinan 10:11) Pero hopi israelita adoradó di Baal a keda den e pais. Relashoná ku esakinan, Jehú a tuma akshon desisivo pa mustra ku e “no ta tolerá rivalidat pa ku Yehova.” (2 Reinan 10:16, NW) Jehú a hasi komo si fuera e ta un adoradó di Baal i a organisá un fiesta grandi na e tèmpel di Baal ku Akab a laga traha na Samaria. Tur adoradó di Baal den Israel a bin e fiesta. Unabes atrapá paden di e tèmpel, e hòmbernan di Jehú a mata nan tur. Beibel ta konkluí e relato ku e palabranan: “Asina Jehú a eliminá Baal for di Israel.”—2 Reinan 10:18-28.
19. Ki prospekto maravioso ta spera e “multitut grandi” di adoradónan leal di Yehova?
19 Adorashon di Baal a keda kompletamente eliminá for di Israel. Den mesun manera sigur, e religionnan falsu di e mundu aki lo yega na un fin repentino i horibel. Na ken su banda abo lo ta durante e gran dia di huisio ei? Aktua awor na un manera desisivo, i lo bo por tin e privilegio di ta entre e “multitut grandi” di sobrebibientenan humano di “e gran tribulashon.” E ora ei lo bo por wak atras ku goso, i lo bo alabá Dios pa e huisio ku el a ehekutá kontra “e gran prostituta ku tabata korumpí tera ku su inmoralidat.” Uní huntu ku otro adoradónan berdadero, lo bo ta di akuerdo ku e palabranan emoshonante ku bosnan selestial ta kanta: ‘Aleluya! Pasobra Yehova nos Dios Todopoderoso ta reina.’—Revelashon 7:9, 10, 14; 19:1, 2, 6.
Pregunta pa Meditá Ariba
• Kon Israel di antigwedat a bira kulpabel di adorashon di Baal?
• Ki gran apostasia Beibel a profetisá, i kon e profesia ei a kumpli?
• Kon Jehú a eliminá adorashon di Baal?
• Kiko nos tin ku hasi pa nos sobrebibí Dios su dia di huisio?
[Preguntanan di Estudio]
[Mapa na página 25]
(Pa e teksto den su formato kompleto, wak e publikashon)
Soko
Afek
Helkat
Jokneam
Meguido
Taanak
Dotan
SAMARIA
Endor
Sunem
Ofra
Jezreel
Ibleam (Gat-rimon)
Tirsa
Bèt-semes
Bèt-sean (Bèt-san)
Jabes-galaad?
Abel-mehola
Bèt-arbel
Ramot-galaad
Serunan
Seru Karmelo
Seru Tabor
More
Seru Gilboa
[Awanan]
Laman Mediteráneo
Laman di Galilea
[Riu]
Riu Hordan
[Fuente di Awa]
Fuente di Harod
[Rekonosementu]
Basá riba mapanan reprodusí ku pèrmit di Pictorial Archive (Near Eastern History) Est. and Survey of Israel
[Plachinan na página 26]
Partisipashon regular den e predikashon di Reino i asistensia na reunionnan kristian ta aspektonan importante di adorashon berdadero
[Plachi na página 28, 29]
Meskos ku Jehú, tur ku ke sobrebibí e dia di Yehova mester tuma akshon desisivo