Bo Ta Kòrda?

Bo a disfrutá di e edishonnan resien di E Toren di Vigilansia? Wèl, wak si bo por kontestá e siguiente preguntanan:

• Dikon por kompará e promé piká, esta, e desobedensia di Adam, ku un enfermedat hereditario?

E ta manera un enfermedat pasobra Adam a pasa piká pa su yunan. Pues nos a heredá e defekto di piká, meskos ku tin yu ta heredá un enfermedat for di nan mayornan.—15/8, página 5.

• Kiko ta e kousanan básiko di e kresiente ola di violensia djawendia?

Satanas ta purba alehá hende for di Yehova dor di sembra un spiritu di violensia den nan kurason, por ehèmpel mediante pelíkula, músika i weganan di kòmpiuter ku ta laga e hungadónan imaginá nan kon nan ta kometé brutalidat i matansa. Violensia ku medionan di komunikashon ta presentá a kontribuí na hopi akto di violensia.—1/9, página 29.

• Ken Ponsio Pilato tabata?

E tabata un romano di e klase noble di rango mas abou kende probablemente a sirbi den ehérsito. Emperador romano Tiberio a nombra Pilato komo gobernadó di e provinsia di Hudea na aña 26 di nos era. Durante e huisio di Hesus, Pilato a tende e akusashonnan ku e lidernan hudiu a presentá. Pa komplasé e multitut, el a aprobá e ehekushon di Hesus.—15/9, página 10-12.

• Kiko ta “e señal” menshoná na Mateo 24:3?

E señal ta konsistí di vários rasgo ku huntu ta identifiká e tempu di Hesus su presensia. E señal ta inkluí guera, hamber, pèst i temblor, i lo a yuda Hesus su siguidónan rekonosé su “presensia” [NW] i tambe “e fin di tempu.”—1/10, página 4-5.

• Kiko tabata e Diáspora, i na unda tabata haña nan?

E palabra “Diáspora” ta referí na e hudiunan ku a biba pafó di Palestina. Den promé siglo, e sentronan prinsipal di hudiu tabata na Siria, Asia Menor, Babilonia i Egipto, i tabatin tambe komunidatnan mas chikitu den e parti europeo di e Imperio Romano.—15/10, página 12.

• Un kristian por keda ku un bon konsenshi si e aseptá un empleo ku e mester karga arma?

Aseptá un trabou ku ta rekerí pa bo karga un arma di kandela òf kualke otro arma ta un desishon personal. Pero e tipo di empleonan ei ta eksponé bo na e posibilidat di bira kulpabel di sanger si bo usa bo arma i tambe na e peliger di ser heridá òf matá durante un atake òf komo represaya. Un kristian ku ta karga tal arma lo no bin na remarke pa haña privilegio spesial den e kongregashon. (1 Timoteo 3:3, 10)—1/11, página 31.

• Akaso e bataya di Armagedón lo ser bringá na un seru den Medio Oriente ya ku e palabra “Armagedón” ta bin di e ekspreshon “Seru di Meguido”?

Nò. No ta eksistí un Seru di Meguido, solamente un seritu ku ta un tiki mas haltu ku e sabana pegá kuné den Israel. E área ei lo no por kontené tur “e reinan di tera i nan ehérsitonan.” E guera grandi di Dios lo ser bringá rònt mundu, i lo pone fin na tur guera. (Revelashon 16:14, 16; 19:19; Salmo 46:8, 9)—1/12, página 4-7.