E Dianan di Fiesta Lo Kumpli ku Bo Ekspektativanan?

“Peter [e Grandi] a duna òrdu pa tene un sirbishi spesial di Aña Nobo den tur misa dia 1 di yanüari. Ademas, el a duna instrukshon pa usa taki di mata semper bèrdè pa dekorá kozeinnan parti paden di kas. El a manda tambe pa tur siudadano di Moskú ‘manifestá nan felisidat dor di deseá otro tur kos bon na bos haltu’ riba e dia di Aña Nobo.”—Peter the Great—His Life and World.

KIKO ta bo ekspektativanan pa loke hopi hende ta yama dianan di fiesta? Rònt mundu nan ta bisa ku e temporada aki ta enfoká riba Pasku, e dia tradishonal di nasementu di Kristu, pero e ta inkluí tambe e selebrashon di Aña Nobo. Pues ta trata aki di un periodo festivo di hopi dia. Den e dianan ei kisas tantu mayornan komo yunan tin fakansi, p’esei e ta parse di ta un okashon ideal pa famianan por ta huntu. Pero otronan ta referí na e dianan ei komo “e temporada di Pasku di Nasementu,” ya ku nan ta rekordá Kristu su nasementu i ta deseá di onr’é rònt di e tempu di aña aki. Tal bes bo tambe ta haña ku esaki ta e aspekto di mas importante di e temporada ei.

Sea ta pa onra Kristu, pa pasa ratunan ameno ku famia, òf ámbos, rònt mundu miónes di esposo, esposa i yu ta spera riba e tempu aki ku gran ekspektativa. Kiko di e aña aki? Lo e resultá di ta e tempu spesial ei pa e famia, i e ta spesial pa Dios? Si bo famia ta bini huntu, lo e kumpli ku bo ekspektativanan, òf lo bo keda desapuntá?

Hopi hende ku ta spera di mira e aspekto religioso den e selebrashonnan di tantu Pasku komo Aña Nobo ta ripará ku mayoria biaha esakinan no ta reflehá ètòl e spiritu di Kristu. Mas bien, e dianan di fiesta ta bira djis un tempu pa haña regalo, un kapa pa hasi fiesta kaminda tin kondukta ku ta juist desonrá Kristu, òf prinsipalmente un motibu pa e famia bini huntu. Hopi bes, kos ta daña na e okashonnan ei ora un òf mas miembro di famia kome i bebe di mas, lokual ta kousa pleitunan ku hopi biaha ta hiba na violensia doméstiko. Kisas bo a yega di opservá esei, òf kisas bo mes a pasa den algu asina.

Si ta asina, aparentemente kasi nada no a kambia anto desde e tempu di e tsar ruso Peter e Grandi, menshoná den e introdukshon. Awe, hopi hende ta preokupá ku e tendensia aktual. P’esei nan ta deseá pa e dianan di fiesta por ta un tempu di reflekshon religioso profundo i pa famianan por ta den kompania di otro na un manera sano. Algun asta ta boga pa un kambio, i nan ta usa lemanan manera “Jesus is the reason for the season,” pa rekordá hende ku ta pa motibu di Hesus tin e dianan di fiesta. Pero por bin un kambio den esaki? I si e bin mes, lo e realmente trese onor pa Kristu? Tin motibu pa haña un otro punto di bista di e dianan di fiesta?

Pa haña kontestanan satisfaktorio, laga nos mira e situashon for di e punto di bista di un nashon ku lo mester tin motibu spesial pa apresiá e temporada di aña aki.