Ken Abo Ta Obedesé, Dios òf Hende?

“Nos mester obedesé Dios mas ku hende.”—ECHONAN 5:29.

1. (a) Kua ta e teksto sentral pa e estudio aki? (b) Dikon nan a arestá e apòstelnan?

E HUESNAN di e korte supremo hudiu lo mester tabata furioso. E prezunan a disparsé. Nan tabata apòstel di Hesukristu, un hòmber ku algun siman promé e korte supremo a kondená na morto. Awor e korte tabata kla pa atendé ku su siguidónan di mas íntimo. Pero ora e guardianan a bai buska nan, nan a haña e sèlnan bashí, ounke e portanan tabata na lòk. Djis despues e guardianan a tende ku e apòstelnan tabata na e tèmpel na Yerusalèm i ku sin miedu nan tabata siña e hendenan tokante Hesukristu. Figura bo, hasiendo e mesun aktividat pa kua nan a ser arestá! E guardianan a bai stret na e tèmpel, bolbe arestá e apòstelnan i trese nan dilanti di e korte.—Echonan 5:17-27.

2. Un angel a manda e apòstelnan hasi kiko?

² Ta un angel a libra e apòstelnan for di prizon. Akaso esaki tabata pa spar nan di mas persekushon? Nò. Tabata pa e habitantenan di Yerusalèm tende e bon nobo tokante Hesukristu. E angel su instrukshon na e apòstelnan tabata pa nan sigui “papia ku e pueblo tur e palabranan di e bida aki.” (Echonan 5:19, 20) Ta p’esei ora ku e guardianan di tèmpel a topa nan, nan a haña e apòstelnan ta kumpli obedientemente ku e mandamentu ei.

3, 4. (a) Ora ku a ordená Pedro ku Juan pa stòp di prediká, kon nan a reakshoná? (b) Kon e otro apòstelnan a reakshoná?

 ³ Dos di e predikadónan tenas ei, apòstel Pedro i apòstel Juan, ya tabata un biaha kaba dilanti korte, manera e presidente di e korte supremo, Hosé Kaifas, a rekordá nan severamente. El a bisa: “Nos a taha boso estriktamente pa no sigui siña den e nòmber [di Hesus], i mira, boso a yena Yerusalèm ku boso siñansa.” (Echonan 5:28) Kaifas lo no mester tabata sorprendí di mira Pedro ku Juan atrobe dilanti korte. Ora a taha nan e promé biaha pa no prediká, e dos apòstelnan a kontestá: “Boso husga si ta korekto den bista di Dios pa skucha na boso mas ku na Dios; pasobra nos no por laga di papia loke nos a mira i tende.” Meskos ku profeta Jeremias di pasado, Pedro ku Juan no por a keda sin kumpli ku nan enkargo di prediká.—Echonan 4:18-20; Jeremias 20:9.

⁴ Pero awor, no tabata Pedro ku Juan so, sino tur e apòstelnan—inkluso Matias ku nan a skohe resientemente—tabatin e oportunidat di deklará públikamente nan posishon pa ku e òrdu di e korte. (Echonan 1:21-26) Ora a ordená nan pa stòp di prediká, nan tambe a kontestá ku kurashi: “Nos mester obedesé Dios mas ku hende.”—Echonan 5:29.

Obedesé Dios òf Hende?

5, 6. Dikon e apòstelnan no a obedesé e òrdu di e korte?

⁵ E apòstelnan tabata hòmbernan ku ta respetá lei i ku normalmente lo no a desobedesé un òrdu di korte. Sin embargo, ningun hende, sin importá kon poderoso e ta, tin e outoridat pa ordená un otro hende desobedesé un di Dios su mandamentunan. Yehova ta “e Haltísimo riba henter tera.” (Salmo 83:18) No solamente e ta “e Hues di henter mundu” sino tambe ku e ta e Dunadó di Lei òf Legisladó Supremo i ademas Rei di eternidat. Desde Dios su punto di bista, kualke òrdu di korte ku ta purba anulá un di Su mandamentunan ta inválido.—Génesis 18:25; Isaias 33:22.

⁶ Algun di e mihó ekspertonan legal a yega di konfirmá e echo aki. Por ehèmpel, e hurista renombrá di siglo 18, William Blackstone, a skirbi ku no mester permití ningun lei humano kontradisí “e lei revelá” manera ta ser hañá den Beibel. Pues e Konsilio, òf korte supremo hudiu, a surpasá su outoridat ora ku el a ordená e apòstelnan pa stòp di prediká. E apòstelnan simplemente no por a obedesé e òrdu ei.

7. Dikon e predikashon a hasi e saserdotenan prinsipal furioso?

⁷ E apòstelnan su determinashon pa sigui prediká a hasi e saserdotenan prinsipal furioso. Sierto miembronan di e saserdosio, inkluso Kaifas mes, tabata saduseo, i nan no a kere den resurekshon. (Echonan 4:1, 2; 5:17) Sin embargo, e apòstelnan tabata insistí ku Hesus a resusitá for di morto. Ademas, algun di e saserdotenan prinsipal a hasi hopi esfuerso pa gana fabor di e outoridatnan romano. Durante Hesus su huisio, ora a ofresé e saserdotenan prinsipal e oportunidat di aseptá Hesus komo nan rei, nan a bai te asina leu di grita: “Nos no tin otro rei, sino solamente Cesar.” (Juan 19:15) * E apòstelnan no solamente tabata afirmá ku Hesus a resusitá sino tambe ku nan tabata siña hende ku fuera di e nòmber di Hesus, “no tin bou di shelu ningun otro nòmber ku a wòrdu duná na hende, pa medio di kual nos mester wòrdu salbá.” (Echonan 2:36; 4:12) E saserdotenan tabatin miedu ku si e pueblo kuminsá mira Hesus resusitá komo nan Lider, e romanonan lo por bin i e lidernan hudiunan lo por pèrdè ‘tantu nan lugá komo nan nashon.’—Juan 11:48.

8. Ki konseho sabí Gamaliel a duna e korte supremo?

⁸ Futuro tabata pinta skur pa e apòstelnan di Hesukristu. E huesnan di e korte supremo  tabata determiná pa mata nan. (Echonan 5:33) Sin embargo, e situashon a kue un rumbo inesperá. Gamaliel, un eksperto di e Lei, a lanta para i a spièrta su koleganan pa nan no aktua purá. El a hasi e siguiente opservashon sabí: “Si e plan òf trabou aki ta di hende, e lo wòrdu destruí, ma si ta di Dios e ta, boso lo no por tumba nan.” Anto el a agregá e punto importante aki: “Asta boso por haña boso ta bringa kontra Dios.”—Echonan 5:34, 38, 39.

9. Kiko ta duna prueba ku e trabou di e apòstelnan tabata di Dios?

⁹ Sorprendentemente, e korte a aseptá Gamaliel su konseho. Nan a “yama e apòstelnan bin paden, nan a suta nan i a taha nan pa no papia mas den e nòmber di Hesus, i a pone nan den libertat.” Pero en bes di ser intimidá, e apòstelnan tabata determiná pa obedesé e mandamentu di e angel pa prediká. P’esei, despues ku nan a sali liber, “tur dia, den tèmpel i di kas pa kas, [e apòstelnan] tabata sigui siña hende i prediká Hesus komo e Kristu.” (Echonan 5:40, 42) Yehova a bendishoná nan esfuerso. Te na ki grado? “E palabra di Dios a sigui plama; i e kantidat di disipel a sigui oumentá masha hopi mes na Yerusalèm.” De echo, “un kantidat grandi di e saserdotenan tabata bira obedesidu na e fe.” (Echonan 6:7) Ki devastador esei lo mester tabata pa e saserdotenan prinsipal! Evidensia tabata akumulá: E trabou di e apòstelnan tabata en bèrdat di Dios!

Hende Ku Ta Bringa Kontra Dios No Por Tin Éksito

10. Desde un punto di bista humano, dikon Kaifas kisas a sintié sigur den su posishon, pero dikon su konfiansa tabata ekiboká?

¹⁰ Den promé siglo, ta outoridatnan romano tabata nombra e sumo saserdotenan hudiu. Hosé Kaifas, kende tabata un hòmber riku, a keda nombrá dor di Valerio Grato, i el a keda den e puesto ei pa mas tantu tempu ku hopi di su predesesornan. Kaifas probablemente a atribuí e logro aki na su abilidat komo diplomátiko i na su amistat personal ku Pilato mas bien ku na Dios su intervenshon.  En todo kaso, su konfiansa den hende a resultá di ta ekiboká. Apénas tres aña despues ku e apòstelnan a presentá dilanti di e korte supremo, Kaifas a pèrdè aprobashon di outoridatnan romano i nan a kit’é for di e puesto di sumo saserdote.

11. Ki resultado final tabatin pa Ponsio Pilato i e sistema di kosnan hudiu, i ki konklushon abo ta saka for di esaki?

¹¹ E òrdu pa kita Kaifas for di su puesto a bin di Pilato su superior, Lucio Vitelio, gobernadó di Siria. Ni Kaifas su amigu íntimo, Pilato, no por a evitá esei. De echo, apénas un aña despues di Kaifas su kaida, Pilato mes a pèrdè su puesto i nan a yam’é bèk na Roma pa e bin duna kuenta i rason relashoná ku algun akusashon serio. Pa loke ta e lidernan hudiu ku a pone nan konfiansa den Cesar, e romanonan a bin i a kita ‘tantu nan lugá komo nan nashon.’ Esaki a sosodé na aña 70 di nos era, ora ku e ehérsito romano a destruí e stat di Yerusalèm kompletamente, inkluso e tèmpel i e sala di e korte supremo. E palabranan di e salmista definitivamente a resultá bèrdat den e kaso aki: “No konfia den prensnan, den yu di hende, den kende no tin salbashon.”—Juan 11:48; Salmo 146:3.

12. Kon e kaso di Hesus ta duna prueba ku obedesé Dios ta e kaminda di sabiduria?

¹² Na kontraste, Dios a nombra Hesukristu resusitá komo Sumo Saserdote di un gran tèmpel spiritual. Ningun hende no por anulá e nombramentu ei. De echo, Hesus no tin susesor, e “ta keda ku su saserdosio permanentemente.” (Hebreonan 2:9; 7:17, 24; 9:11) Tambe Dios a nombra Hesus komo Hues di e bibu- i mortonan. (1 Pedro 4:5) Den e kapasidat ei, ta Hesus lo determiná si Hosé Kaifas i Ponsio Pilato lo tin un chèns di haña bida den futuro.—Mateo 23:33; Echonan 24:15.

Predikadónan di Reino di Tempu Moderno Ku No Tin Miedu

13. Den tempu moderno, kua trabou a resultá di ta di hende, i kua a resultá di ta di Dios? Kon bo por sa?

¹³ Den nos tempu, meskos ku den promé siglo, tabatin hopi hende ku “ta bringa kontra Dios.” (Echonan 5:39) Por ehèmpel, ora ku Testigunan di Yehova na Alemania a nenga di rekonosé Adolf Hitler komo nan Führer, òf Lider, Hitler a hura di eksterminá nan. (Mateo 23:10, NW) Su organisashon efisiente ku tabata manera un mashin destruktivo a parse hopi kapas di logra esei. E nazinan a logra arestá míles di Testigu i a manda nan kamponan di konsentrashon. Nan a asta logra mata algun Testigu. Pero e nazinan no a logra kibra e Testigunan su determinashon pa adorá Dios so, ni nan no a logra eliminá e sirbidónan di Dios komo grupo. E trabou di e kristiannan aki tabata di Dios, no di hende, i hende no por tumba trabou di Dios. Sesenta aña despues, fiel sobrebibientenan di Hitler su kamponan di konsentrashon ainda ta sirbiendo Yehova ‘ku henter nan kurason, alma i mente,’ miéntras ku Hitler i su partido nazi no t’ei mas i ta ser rekordá solamente pa nan aktonan horibel.—Mateo 22:37.

14. (a) Ki esfuerso opositornan a hasi pa kalumniá Dios su sirbidónan, i ku ki resultado? (b) E esfuersonan ei lo trese kualke daño permanente na e pueblo di Dios? (Hebreonan 13:5, 6)

¹⁴ Den e añanan ku a pasa desde e intento di nazismo, tabatin otro hende ku a djòin e bataya pèrdí kontra Yehova i su pueblo. Den vários pais na Europa, astutamente elementonan  religioso i polítiko a hasi esfuerso pa klasifiká Testigunan di Yehova komo un ‘sekta peligroso,’ e mesun akusashon ku nan a lanta kontra kristiannan di promé siglo. (Echonan 28:22) Pero echo ta ku Korte Europeo di Derechonan Humano a rekonosé Testigunan di Yehova komo un religion, i no un sekta. Opositornan mester sa esei, pero tòg nan ta sigui kalumniá e Testigunan. Debí na tal deskripshon engañoso, algun di e kristiannan aki a ser kitá for di trabou. Muchanan Testigu a ser molestiá na skol. Doñonan di lugá ku a haña miedu a kanselá kontraktnan di hür di edifisionan ku e Testigunan tabatin hopi tempu ta usa komo lugánan di reunion. Den algun kaso, agensianan gubernamental asta a nenga siudadania na sierto personanan djis pasobra nan ta Testigu di Yehova! Pero tòg e Testigunan ta sigui padilanti.

15, 16. Kon Testigunan di Yehova na Fransia a reakshoná riba e oposishon kontra nan trabou kristian, i dikon nan ta sigui prediká?

¹⁵ Por ehèmpel na Fransia, hende por lo general ta rasonabel i imparsial. Sin embargo, algun opositor a promové leinan ku tin e meta pa stroba e trabou di Reino. Kon e Testigunan di Yehova na e pais ei a reakshoná? Nan a intensifiká nan aktividat di prediká mas ku nunka promé i ku resultadonan emoshonante. (Santiago 4:7) Figurá bo ku den un periodo di apénas seis luna, e kantidat di estudionan di Beibel kondusí den e pais ei a oumentá ku 33 porshento! Diabel lo mester ta furioso pa mira kon personanan di kurason onrado na Fransia ta reakshoná faborablemente riba e bon nobo. (Revelashon 12:17) Nos rumannan kristian na Fransia tin sigur ku e palabranan di profeta Isaias lo resultá sierto den nan kaso: “Ningun arma ku wòrdu formá kontra bo lo no prosperá; i tur lenga ku lanta kontra bo den husgamentu lo bo kondená.”—Isaias 54:17.

¹⁶ Testigunan di Yehova no ta gusta ser persiguí. Sin embargo, obedesiendo Dios su mandamentu na tur kristian, nan no por i nan lo no stòp di prediká tokante e kosnan ku nan a tende. Nan ta hasi esfuerso pa ta bon siudadano. Pero ora tin un konflikto entre e lei di Dios i e lei di hende, nan tin ku obedesé Dios komo nan gobernante.

No Tene Miedu di Nan

17. (a) Dikon nos no mester tin miedu di nos enemigunan? (b) Kiko mester ta nos aktitut pa ku nos persiguidónan?

¹⁷ Nos enemigunan ta den un posishon masha peligroso. Nan ta bringando kontra Dios. P’esei, na armonia ku e mandamentu di Hesus, nos ta hasi orashon pa esnan ku ta persiguí nos en bes di tene miedu di nan. (Mateo 5:44) Nos ta pidi den orashon pa si kualke un di nan ta oponé Dios debí na ignoransia, meskos ku Saulo di Tarso a hasi, pa Yehova ser asina bon di habri nan wowo pa e bèrdat. (2 Korintionan 4:4) Saulo a bira e apòstel kristian Pablo i a sufri hopi na man di e outoridatnan di su tempu. Pero tòg el a sigui rekordá su rumannan den fe “pa ta sumiso na gobernantenan i na outoridatnan, pa ta obedesidu, i dispuesto pa hasi tur bon obra, pa no kalumniá ningun hende [ni sikiera nan persiguidónan di mas ferviente], pa no ta pleitadó, ma suave, mustrando tur konsiderashon pa tur hende.” (Tito 3:1, 2) Testigunan di Yehova na Fransia i na otro lugá ta hasi esfuerso pa apliká e konseho aki.

18. (a) Den ki maneranan Yehova lo por libra su pueblo? (b) Kiko lo ta e resultado final?

 ¹⁸ Dios a bisa profeta Jeremias: “Ami ta ku bo pa libra bo.” (Jeremias 1:8) Kon Yehova lo por libra nos di persekushon awe? Lo e por lanta un hues imparsial manera Gamaliel. Òf lo e por sòru pa un funshonario korupto òf hostil keda remplasá pa unu mas rasonabel. Pero tin biaha, Yehova por permití e persekushon di su pueblo sigui su rumbo. (2 Timoteo 3:12) Si Dios ta permití pa nos ser persiguí, lo e duna nos semper e fortalesa pa soportá persekushon. (1 Korintionan 10:13) I sin importá kiko Dios permití, nos no tin duda di e resultado final: Hende ku ta bringa kontra e pueblo di Dios ta bringando kontra Dios, i esnan ku ta bringa kontra Dios lo no tin éksito.

19. Kua ta e teksto di aña pa 2006, i dikon e ta apropiá?

¹⁹ Hesus a bisa su disipelnan pa ferwagt tribulashon. (Juan 16:33) En bista di esaki, e palabranan ku tin pará skirbí na Echonan 5:29 ta mas oportuno ku nunka: “Nos mester obedesé Dios mas ku hende.” Pa e motibu ei a skohe e palabranan emoshonante aki komo e teksto di aña di Testigunan di Yehova pa 2006. Laga nos determinashon pa e aña binidero i pa eternidat ta ku nos lo obedesé Dios komo Gobernante a todo kosto!

[Nota]

Bo Por Kontestá?

• Ki ehèmpel animador e apòstelnan a pone pa nos den e manera ku nan a konfrontá oposishon?

• Dikon semper nos mester obedesé Dios mas ku hende?

• Bon mirá, ta kontra ken nos opositornan ta bringando?

• Ki resultado nos por spera pa esnan ku wanta persekushon?

[Preguntanan di Estudio]

[Komentario na página 23]

E teksto di aña pa 2006 lo ta: “Nos mester obedesé Dios mas ku hende.” —Echonan 5:29

[Plachi na página 19]

“Nos mester obedesé Dios mas ku hende”

[Plachi na página 21]

Kaifas a pone su konfiansa den hende en bes di den Dios