“Proklamá Libertat na e Prezunan”

NA KUMINSAMENTU di su ministerio, Hesus a deklará ku parti di su enkargo tabata pa “proklamá libertat na e prezunan.” (Lukas 4:18) Siguiendo e ehèmpel di nan Shon, kristiannan berdadero ta prediká e bon nobo di Reino na “tur klase di hende,” i di e manera ei ta trese liberashon pa nan for di sklabitut spiritual i ta yuda nan mehorá nan bida.—1 Timoteo 2:4, NW.

Awe, e obra aki ta enserá prediká na prezunan literal, esta, hende ku ta será den prizon pa vários krímen i ku ta duna balor na un liberashon spiritual. Disfrutá di e informe alentador aki tokante e aktividat di prediká di Testigunan di Yehova den e prizonnan di Ukrania i otro parti di Europa.

Di Drogadikto pa Kristian

Di e 38 añanan di bida ku Serhii * tin, el a pasa 20 tras di trali. El a asta kaba skol den prizon. El a bisa: “Hopi aña pasá, mi a kai será pa motibu di asesinato i ainda mi tin hopi tempu mas pa bai. Den prizon mi tabata komportá mi mes manera un tirano, i otro prezunan tabatin miedu di mi.” Esaki a laga Serhii sinti su mes liber? Nò. Pa hopi aña, e tabata sklabisá na droga, alkohòl i tabako.

Riba un bon dia un otro prezu a papia kuné tokante e bèrdat di Beibel. Esei tabata manera un rayo di lus den skuridat. Den un par di luna, el a libra su mes di su adikshonnan, el a bira un predikadó di e bon nobo i a batisá. Awor Serhii ta hopi aktivo den prizon, sirbiendo komo un sirbidó di Yehova di tempu kompletu. El a yuda shete kriminal kambia nan bida i bira su rumannan spiritual. Seis di nan a sali liber, pero Serhii sí ainda ta tras di trali. E no ta amargá pa motibu di esaki pasobra e ta kontentu ku e por yuda otro hende haña liberashon for di sklabitut spiritual.—Echonan 20:35.

Un di Serhii su studiantenan den prizon tabata Victor, kende ántes tabata un adikto i diler den droga. Despues ku Victor a sali for di prizon, el a sigui progresá spiritualmente i ku tempu el a gradua for di e Skol di  Entrenamentu Ministerial na Ukrania. Awor e ta sirbi komo pionero spesial na Moldova. Victor a bisa: “Mi a kuminsá huma sigaria tempu mi tabatin 8 aña, usa alkohòl tempu mi tabatin 12 aña i usa droga tempu mi tabatin 14 aña. Mi kier a kambia mi bida, pero tur mi intentonan a frakasá. Anto na 1995, nèt tempu ami ku mi kasá tabata plania pa muda bai for di mi mal amigunan, un asesino maniátiko a hink’é mata. Esei a kibra mi kompletamente. Mi a keda puntra mi mes sin por a haña kontesta: ‘Unda mi kasá ta awor? Kiko ta pasa ora un persona muri?’ Mi tabata usa mas i mas droga pa por a yena e bashí. Outoridatnan a arestá mi pa bendementu di droga i nan a sentensiá mi na sinku aña. Den prizon, Serhii a yuda mi haña e kontestanan. Vários biaha mi a yega di purba libra mi mes di droga, pero ta ku yudansa di Beibel so mi a bin logra. E Palabra di Dios ta hopi poderoso!”—Hebreonan 4:12.

Kriminal sin Heful Ta Kambia

Vasyl nunka no a usa droga, pero tòg el a kai será. El a konta: “Mi adikshon tabata ‘kick-boxing.’ Mi tabata train pa bati hende sin laga niun marka.” Vasyl a usa violensia pa hòrta hende. “Mi a kai será tres biaha. Esei a pone mi esposa divorsiá for di mi. Durante e último sentensia di sinku aña, mi a kuminsá lesa e literatura di Testigunan di Yehova. Esaki a motivá mi pa lesa Beibel, pero ainda mi tabata enbolbí den loke mi tabata stima mes: kick-boxing, bringa sin regla.

Sin embargo, despues ku mi a lesa Beibel seis luna largu, algu a kambia den mi. Ganamentu di un pelea ya no tabata duna mi e satisfakshon ku un tempu mi tabata haña. Pues mi a kuminsá analisá mi bida den lus di loke Isaias 2:4 ta bisa i a realisá ku si mi no kambia mi manera di pensa, lo mi pasa e restu di mi bida den prizon. P’esei mi a deshasí di tur mi ekipo di bringa i a kuminsá traha riba mi personalidat. No tabata fásil, pero gradualmente meditashon i orashon a yuda mi stòp ku mi mal hábitonan. Tin biaha ku awa na wowo mi tabata roga Yehova p’e duna mi e fortalesa pa mi libra mi mes di mi adikshon. Finalmente, mi a logra.

Despues ku mi a sali liber, mi a bai bèk serka mi famia. Aworakí mi ta traha den un mina di karbon. Esaki ta duna mi sufisiente tempu pa  partisipá den e trabou di prediká huntu ku mi esposa i pa kumpli ku mi responsabilidatnan den e kongregashon.”

Mykola ku su amigunan a hòrta vários banko na Ukrania. Esaki a resultá den un kastigu di dies aña di prizon p’e. Promé ku su enkarselashon, el a yega di bai misa un biaha so; pa wak kon e por a hòrta e misa ei. Su intento a frakasá, pero e bishita ei a pone Mykola kere ku Beibel lo mester ta yen di historia laf tokante pastor òrtodòks, bela i dianan di fiesta religioso. El a bisa: “Mi no sa eksaktamente kon bin, pero mi a kuminsá lesa Beibel. Mi a keda sorprendí ora mi a deskubrí ku e tabata hopi diferente for di loke mi a imaginá!” El a pidi pa un estudio di Beibel i a batisá na 1999. Ora bo wak e aworakí, lo bo no kere ku un tempu e sirbidó ministerial humilde aki tabata un atrakadó di banko malisioso ku tabata kana armá!

Vladimir a haña kastigu di morto. Miéntras ku e tabata warda riba su ehekushon, el a resa na Dios i a primintié ku si nan spar su bida lo e sirbié. Entretantu, e lei a kambia, i na lugá di kastigu di morto el a haña sentensia di bida largu. Pa kumpli ku su promesa, Vladimir a kuminsá buska e religion berdadero. El a kuminsá un kurso di korespondensia i a risibí diploma di un iglesia atventista, pero e no a keda satisfecho.

Sin embargo, despues ku Vladimir a lesa e revistanan Toren di Vigilansia i Spièrta! den e biblioteka di prizon, el a skirbi e sukursal di Testigunan di Yehova na Ukrania, i pidi pa un hende bishit’é. Ora rumannan lokal a bishit’é, e tabata konsiderá su mes un Testigu kaba i tabata prediká den prizon. Nan a yud’é kualifiká komo un publikadó di Reino. Na momento ku a skirbi e artíkulo aki, Vladimir i shete otro persona den e prizon ei tabata wardando riba un chèns di batisá. Pero nan tin un problema. Siendo ku prezunan ku tin sentensia di bida largu ta ser será huntu den sèl segun nan kreensianan religioso, Vladimir ku e otro prezunan di su sèl ta di e mesun religion. Pues na ken nan por prediká? Wèl, nan ta kompartí e bon nobo ku e wardadónan di prezu i tambe ku otro hende pa medio di karta.

Nazar a muda di Ukrania bai Repúblika Cheko, kaminda el a djòin un gèng di ladron. Esaki a hiba na un kastigu di tres aña i mei di prizon. Den prizon, el a aseptá bishita di Testigunan di Yehova di e stat di Karlovy Vary, el a siña e bèrdat i a ser rehabilitá kompletamente. Mirando esaki, un di e guardianan di siguridat a bisa Nazar su kompañeronan di sèl: “Si boso tur bira manera e ukraniano ei, finalmente lo mi por kambia di trabou.” Un otro a bisa: “E Testigunan di Yehova ei sí ta eksperto. Un hende ta drenta prizon komo kriminal; e ta sali komo un persona desente.” Awor Nazar ta bèk na kas. El a siña e fishi di karpinté i a kasa, i e ku su esposa ta den e sirbishi di tempu kompletu. E ta masha gradisidu ku e Testigunan di Yehova a bishit’é den prizon!

Rekonosementu Ofisial

No ta prezunan so ta gradisidu pa e servisio ku Testigunan di Yehova ta perkurá. Miroslaw Kowalski, bosero di un di e prizonnan na Polonia, a bisa: “Nos ta apresiá nan bishitanan masha hopi. Algun prezu a lanta den un ambiente hopi deplorabel. Probablemente nunka nan a haña un trato humano. . . . E yudansa [di e Testigunan] ta hopi balioso pasobra nos tin un skarsedat di personal i edukadó.”

E direktor di un otro prizon na Polonia a skirbi e sukursal di e pais, pidiendo e Testigunan pa oumentá nan aktividat den su prizon. Pakiko? El a splika: “Bishitanan mas frekuente di parti di representantenan di Watchtower por yuda e prezunan desaroyá kualidatnan ku ta hasi nan mas sosial, lokual ta suprimí agreshon entre nan.”

Un korant ukraniano a duna informe di un prezu deprimí ku a trata na kometé suisidio pero ku despues a risibí yudansa di Testigunan di Yehova. E informe ta bisa: “Aktualmente e hòmber aki ta rekuperando emoshonalmente. E ta someté su mes na e reglanan di prizon i e ta un ehèmpel pa otro prezu.”

 Benefisionan Ta Ekstendé Pafó di e Portanan di Prizon

E benefisionan di e obra di Testigunan di Yehova no ta limitá na den prizon so. E prezunan ta sigui haña benefisio despues ku nan sali liber. Pa algun aña kaba dos kristian, Brigitte i Renate, ta yudando eks-prezunan femenino den e manera aki. Un korant aleman, Main-Echo Aschaffenburg, a bisa di nan: “Nan ta sigui bishitá e prezunan tres pa sinku luna despues ku nan sali liber, pa animá nan pa haña un propósito den bida. . . . Nan ta ser rekonosé ofisialmente komo funshonario di reclassering ku ta traha a base boluntario. . . . Ademas, nan kontakto ku e personal di prizon ta konstruktivo i positivo.” Vários eks-prezu a dediká nan bida na Yehova komo resultado di e tipo di yudansa aki.

Asta funshonarionan di prizon ta benefisiá di e obra di edukashon bíbliko di Testigunan di Yehova. Por ehèmpel, Roman tabatin e rango militar di mayor i e tabata un sikólogo den un prizon na Ukrania. Ora e Testigunan a bishitá su kas, el a aseptá un estudio di Beibel. Anto el a haña sa ku kaminda e tabata traha e Testigunan no tabatin mag di bishitá e prezunan. P’esei el a pidi e direktor pèrmit p’e usa Beibel den su trabou ku e prezunan. E direktor a bai di akuerdo, i rònt di dies prezu a mustra interes. Segun ku Roman mes tabata siña mas di Beibel, e tabata kompartí esaki regularmente ku e prezunan aki, i su esfuerso a duna bon resultado. Algun di nan, despues ku nan a sali liber, a sigui progresá i a batisá komo kristian. Mirando e poder di e Palabra di Dios, Roman a tuma su estudio mas na serio. El a bandoná servisio militar i a sigui den su aktividatnan di edukashon bíbliko. Awor e ta partisipá den e trabou di prediká huntu ku un eks-prezu.

Un prezu a skirbi: “Akiden nos ta biba di Beibel, di e publikashonnan di Beibel i di estudio di Beibel.” E palabranan aki ta duna un bon idea di e nesesidat ku ta eksistí den algun prizon pa literatura di Beibel. Un kongregashon na Ukrania a skirbi tokante e trabou den un prizon lokal: “Gerensia ta masha gradisidu pa e literatura ku nos ta perkurá. Nos ta duna nan 60 ehemplar di kada edishon di E Toren di Vigilansia i Spièrta!” Un otro kongregashon a skirbi: “Nos ta perkurá pa un instituto di korekshon ku tin 20 biblioteka chikitu. Nos a duna kada biblioteka nos publikashonnan prinsipal. Na tur, tabata trata aki di 20 kaha di literatura.” Den un prizon, e wardadónan ta mantené un fail di nos revistanan den e biblioteka pa e prezunan por benefisiá di kada edishon.

Na 2002 e sukursal na Ukrania a lanta un Departamento di Prizon. Te asina leu e departamento aki a tuma kontakto ku rònt di 120 instituto di korekshon i a asigná kongregashonnan pa perkurá pa nan. Tur luna e departamento ta risibí rònt di 50 karta for di prezunan, mayoria di nan pa pidi literatura òf pa un estudio di Beibel. Sukursal ta manda buki, revista i foyeto pa nan te ora e rumannan di den e área ei por bishitá nan.

Apòstel Pablo a skirbi su kompañeronan kristian: “Kòrda riba e prezunan.” (Hebreonan 13:3) E tabata refiriendo na esnan ku tabata enkarselá pa motibu di nan fe. Awe, Testigunan di Yehova ta kòrda riba esnan ku ta enkarselá, ta bishitá prizonnan i ta “proklamá libertat na e prezunan.”—Lukas 4:18.

[Nota]

[Plachi na página 9]

Muraya di prizon, L’viv, Ukrania

[Plachi na página 10]

Mykola

[Plachi na página 10]

Vasyl huntu ku su esposa, Iryna

[Plachi na página 10]

Victor