Temporada di Pasku—Riba Kiko E Ta Enfoká?

PA MIÓNES di hende e dianan di fiesta ta un tempu pa pasa ku famia i amigu, un tempu pa renobá lasonan di kariño i di amistat. Hopi otro hende ta konsiderá e dianan aki komo un tempu pa meditá riba e nasementu di Hesukristu i e papel ku e ta hunga den e salbashon di humanidat. Na Rusia, distinto for di hopi otro pais, no ta semper e pueblo tabata liber pa selebrá Pasku. Ounke pa hopi siglo miembronan di Iglesia Òrtodòks di Rusia a selebrá Pasku abiertamente, pa gran parti di siglo 20 nan no tabatin mag di hasi esei. Kiko tabata e motibu?

Djis despues di e revolushon komunista Bolshevik di aña 1917, outoridatnan soviétiko a start un polítika agresivo pa hasi henter e nashon ateo. Nan tabata kontra henter e temporada di fiesta di Pasku ku su implikashonnan religioso. Estado a kuminsá un kampaña kontra tantu e selebrashon di Pasku komo di Aña Nobo. Asta nan a kondená abiertamente e símbolonan lokal di e temporada, ku ta e palu di Pasku i Ded Moroz, òf Opa Fròs, e ekivalente ruso di Santa Claus.

Na 1935 a bin un kambio grandi den e manera ku e rusonan a selebrá e dianan di fiesta. E soviétikonan a restablesé Opa Fròs, e palu di temporada i e selebrashon di Aña Nobo, pero ku un gran diferensia. Nan a bisa ku Opa Fròs lo a trese regalo, no riba dia di Pasku, sino Aña Nobo. Meskos tambe, lo no tabatin un palu di Pasku mas, sino un palu di Aña Nobo! Pues, tabatin un kambio grandi di enfoke na Union Soviétiko. Básikamente, e selebrashon di Aña Nobo a remplasá Pasku.

Ofisialmente, e temporada di Pasku a bira un temporada di fiesta ku no tabatin ningun nifikashon religioso mas. E hendenan tabata dekorá e palu di Aña Nobo ku kosnan ku no tabatin nada di haber ku religion, sino ku kosnan ku a ilustrá e progreso di Union Soviétiko. E revista ruso Vokrug Sveta (Rònt Mundu) a splika: “Nos por haña sa kon un sosiedat komunista a forma for di su orígen a base di e dekorashonnan di e palu di Aña Nobo atraves di vários aña di e era soviétiko. Huntu ku e dekorashonnan komun den forma di konènchi, gota di eis i pan rondó, tabata traha dekorashonnan den forma di machete, martin i traktor. Despues a remplasá esakinan ku figuranan di minero i kosmonouta, boortoren, rakèt i vehíkulo pa kore riba luna.”

Kiko di e dia di Pasku mes? Definitivamente, no tabata rekonosé komo tal. Mas bien, outoridatnan soviétiko a hasié djis un dia normal di trabou. Hende ku a deseá di sigui ku e selebrashon religioso di Pasku por a hasi esei solamente den un forma masha skondí, koriendo e riesgo di pèrdè fabor di Estado i sufri konsekuensianan desagradabel. Sí, den e Rusia di siglo 20 tabatin un kambio di enfoke di e dianan di fiesta. El a kambia for di un selebrashon religioso pa unu ku no tabatin nada di haber ku religion.

Un Kambio Mas Resien

Na 1991 Union Soviétiko a kai, lokual a resultá den mas libertat pa e pueblo. A bin un fin na e polítika estatal  di ateismo. Vários estado soberano resien formá tabata básikamente seglar, sin orientashon religioso, ku un separashon entre Iglesia ku Estado. Hopi hende ku tabatin inklinashon religioso a haña ku awor nan por a praktiká nan konvikshonnan religioso. Nan a rasoná ku un manera ku nan lo por a hasi esaki ta dor di selebrá e fiesta religioso di Pasku. Sin embargo, hopi di e hendenan ei a bin haña nan ku un gran desepshon. Pakiko?

Den transkurso di añanan e fiesta a bin haña un toke mas i mas komersial. Sí, meskos ku den e mundu oksidental, e temporada di Pasku a bira un di e mihó maneranan pa fabrikantenan, mayoristanan i komersiantenan traha plaka. Vitrinanan di negoshi ta tur na dekorashonnan di Pasku. Pakusnan ta toka músika i kantikanan di Pasku di e mundu oksidental, algu ku anteriormente tabata deskonosí na Rusia. Bendedónan ta kana ku tas grandi yen di pida-pida kos di Pasku pa bende den trein i otro medionan di transporte públiko. Esei ta loke bo ta haña awor.

Un otro karakterístika alarmante di e temporada aki ku ta molestiá asta esnan ku no ta mira nada malu den e komersialismo abierto aki, ta e mal uso di alkohòl ku tur su konsekuensianan negativo. Un dòkter di sala di emergensia den un hospital na Moskú a splika: “Pa dòkternan, ta un echo establesí ku e selebrashon di Aña Nobo ta trese kuné gran kantidat di hende ku bòlòbònchi i leshon, i tambe ku herida di kuchú i arma di kandela. Mayoria di nan ta kousá pa violensia doméstiko, pelea entre hende burachi i aksidente di outo.” Un sientífiko prominente di un sukursal di e Akademia Ruso di Siensia a bisa: “E kantidat di morto relashoná ku uso di alkohòl a oumentá drástikamente. Foral den aña 2000 e tabata haltu. E kantidat di suisidio i asesinato tambe a oumentá barbaramente.”

Lamentablemente, tin un otro faktor ku ta empeorá tur e tipo di komportashonnan ei durante e dianan di fiesta na Rusia. Bou di e titular “Rusonan Ta Selebrá Pasku Dos Biaha,” e korant Izvestiya ta informá: “Kasi 1 di kada 10 ruso ta selebrá Pasku dos biaha. Manera e enkuesta di e sentro di kontròl di ROMIR a demostrá, 8 porshento di e personanan entrevistá a atmití ku nan ta selebrá Pasku tantu dia 25 di desèmber, segun e Pasku di e kalènder katóliko, komo dia 7 di yanüari, segun esun òrtodòks . . . Pa algun hende, opviamente e nifikashon religioso di Pasku no ta dje importante ei; loke ta konta mas ta e oportunidat pa selebrá.” *

 E Forma Aktual di Selebrá e Dianan di Fiesta di Bèrdat Ta Onra Kristu?

Ta bisto ku e dianan di fiesta ta bai kompañá ku hopi mal komportashon. Ounke e situashon aki ta molestiá hopi hende, algun di nan kisas ta haña ku nan mester selebrá Pasku tòg debí na nan rèspèt pa Dios i pa Kristu. Nan deseo di agradá Dios ta algu di aploudí. Pero e temporada di Pasku realmente ta agradá Dios i Kristu? Laga nos wak di unda el a originá.

Por ehèmpel, sea loke sea ta bo punto di bista riba kon e soviétikonan ta mira Pasku, lo ta difísil pa kuestioná e siguiente datonan históriko ku e Great Soviet Encyclopedia ta trese dilanti: “A derivá Pasku . . . for di e adorashon pre-kristian di diosnan ku tabata ‘muri i lanta for di morto,’ lokual tabata masha komun foral bou di e pueblonan ku tabata biba di agrikultura kendenan, den un periodo generalmente limitá na e solstisio di wenter di 21 pa 25 di desèmber, tabata selebrá anualmente e ‘nasementu’ di e Dios-Salbadó, ku ta duna bida nobo na naturalesa.”

Kisas bo ta haña relevante loke e ensiklopedia ei a bisa korektamente: “Kristianismo di e promé siglonan no a konosé e selebrashon di Pasku. . . . For di meimei di siglo 4, kristianismo a tuma e selebrashon di e solstisio di wenter over for di e adorashon di Mitra, i a kambia esaki den e selebrashon di Pasku. E proménan ku a selebrá Pasku tabata e komunidatnan religioso di Roma. Den siglo 10, Pasku, huntu ku kristianismo, a plama bai Rusia, kaminda el a bin meskla ku e selebrashon di wenter di e eslavonan di antigwedat, dunando onor na e spiritunan di e antepasadonan.”

Kisas bo ta puntra: ‘Kiko Beibel, e Palabra di Dios, ta bisa tokante Hesus su nasementu dia 25 di desèmber?’ Ta bon pa bo sa ku Beibel no ta menshoná fecha di Hesus su nasementu, i ningun kaminda no tin pará tampoko ku Hesus mes a papia di dje, te p’e manda pa e wòrdu selebrá. Di otro banda, Beibel ta yuda nos determiná sí den ki tempu di aña Hesus a nase.

Segun e Evangelio di Mateo, kapítulo 26 i 27, Hesus a ser ehekutá dia 14 di nisan, lat riba e dia di Pasku Hudiu ku a kuminsá dia 31 mart di aña 33 di nos era. E Evangelio di Lukas ta mustra ku Hesus tabatin rònt di 30 aña ora el a batisá i kuminsá ku su ministerio. (Lukas 3:21-23) E ministerio ei a dura tres aña i mei. P’esei, Hesus tabatin rònt di 33 aña i mei dia el a muri. Lo el a hasi 34 rònt di 1 di òktober di aña 33 di nos era. Lukas ta konta ku tempu Hesus a nase, e wardadónan tabata “keda den e sabananan, i ku anochi [nan] tabata tene warda riba nan tou di karné.” (Lukas 2:8) E wardadónan lo no tabata pafó ku nan tounan den e frialdat di desèmber, dianan ku asta sneu por tabata kai den e área di Bètlehèm. Pero nan lo por tabata pafó ku nan tounan sí rònt di 1 di òktober, ku segun evidensia ta e tempu ku Hesus a nase.

 Pero awor kiko di e selebrashon di Aña Nobo? Manera nos a mira, e ta marká pa libertinahe, es desir komportashon desenfrená i inmoral. Apesar di e esfuersonan pa saka e aspekto religioso for di dje, e tambe tin su orígen kuestionabel.

Ta bon kla anto ku en bista di e echonan rondó di e dianan di fiesta, lemanan ku ta mustra ku ta pa motibu di Hesus tin e temporada ei, ta zona bashí. Si e komersialismo i e mal komportashon durante e temporada di Pasku, i tambe su orígen pagano repugnante,  tin bo molestiá, no desanimá. Tin un manera apropiá den kua nos por mustra e debido rèspèt pa Dios i onra Kristu, i na mesun tempu, fortalesé lasonan familiar.

Un Mihó Manera pa Onra Dios i Kristu

Beibel ta bisa nos ku Hesukristu a bini “pa duna su bida komo preis di reskate pa hopi.” (Mateo 20:28) El a permití su mes wòrdu ehekutá, i a muri boluntariamente pa nos pikánan. Kisas algun hende kier onra Kristu, i nan ta pensa ku nan por hasi esaki durante e temporada di Pasku. Pero manera nos a mira, Pasku i Aña Nobo no tin kasi niun konekshon ku Kristu i nan tin nan orígen den selebrashonnan pagano. Ademas, e temporada di Pasku, pa dushi ku e ta pa algun hende, a haña un toke puramente komersial. Huntu ku esei, nos mester atmití ku e temporada di Pasku ta asosiá ku komportashon bergonsoso ku ta desagradá Dios i Kristu.

Kon un persona ku kier agradá Dios mester reakshoná? En bes di pega na tradishonnan humano ku kisas ta satisfasé sintimentunan religioso pero ku ta bai kontra e Skritura, un persona sinsero lo buska e manera korekto pa onra Dios i Kristu. Kiko e manera korekto ei ta, i kiko nos mester hasi?

Kristu mes ta bisa nos: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.” (Juan 17:3) Sí, e persona ku ta ègt sinsero ta buska e konosementu eksakto aki pa sa kon e mester onra Dios i Kristu. Anto e ta apliká e konosementu aki no solamente durante un sierto tempu di aña, sino den su bida di tur dia. E esfuersonan sinsero ei ta kai mashá na agrado di Dios, i esei por hiba na bida eterno.

Bo ke pa bo famia ta entre e hendenan ku di bèrdat ta onra Dios i Kristu na armonia ku e Skritura? Testigunan di Yehova a yuda miónes di famia rònt mundu haña konosementu importante for di Beibel. Nos ta invitá bo kordialmente pa tuma kontakto ku Testigunan di Yehova den bo área òf pa skirbi nan na e adrès apropiá ku bo por haña na página 2 di e revista aki.

[Nota]

[Kuadro/Plachi na página 7]

Orígen di e Selebrashon di Aña Nobo

Un Mònik Òrtodòks di Georgia Ta Papia ku Kurashi

“E dia di fiesta di Aña Nobo ta originá for di vários fiesta pagano di antiguo Roma. Dia 1 di yanüari tabata un dia di fiesta dediká na e dios pagano Jano, i e nòmber di e luna ta derivá for di su nòmber. E imágennan di Jano tabatin dos kara kontrali na otro, lokual a nifiká ku e tabata mira tantu pasado komo presente. Segun un dicho, ken ku a habri 1 di yanüari kontentu, ku alegria i ku abundansia lo a pasa henter e aña yen di dicha i felisidat. Hopi di nos kompatriotanan ta selebrá aña nobo ku e idea superstisioso ei na mente . . . Durante sierto dianan di fiesta pagano, hende tabata trese sakrifisio direktamente na un dios falsu. Algun dia di fiesta tabata notorio pa orgianan inmoral, adulterio i fornikashon. Na otro okashon, por ehèmpel durante e dia di fiesta di Jano, tabatin ekseso di komementu i bebementu, buracheria i tur sorto di impuresa ku ta kompañá esakinan. Si nos kòrda kon den pasado nos mes a selebrá Aña Nobo, e ora ei nos tin ku atmití ku nos tur a partisipá den e selebrashon pagano aki.”—Un korant di Georgia.

[Plachi na página 6]

Kristiandat a tuma over e adorashon di Mitra

[Rekonosementu]

Museo di Wiesbaden

[Plachi na página 7]

Wardadónan lo no tabata pafó ku nan tounan den e frialdat di desèmber