Bon Ta Rondoná pa Loke Ta Malu

DEN e mundu djawe, por parse ku masha poko hende ta dispuesto pa duna di nan mes. Sin embargo, ainda tin hende ku ta deseá di “hasi un diferensia,” esta, pa den un òf otro manera hasi bon na otro hende. Tur aña hopi hende ta duna míles di miónes di florin na loke pa nan ta un bon kousa. Por ehèmpel, na Gran Bretaña, donashonnan pa obranan di karidat a alkansá un sifra rèkòrt di 23 mil mion florin na 2002. Desde 1999, dies filántropo generoso a duna òf primintí di duna mas ku 64 mil mion florin pa yuda hende den nesesidat.

Algun di e obranan di karidat ta inkluí paga gastunan médiko di famianan ku tin poko entrada, duna guia na yunan di mayornan soltero, finansiá programanan di vakunashon den paisnan den desaroyo, duna muchanan nan promé buki, duna kunukeronan den paisnan pober animalnan pa kuminsá krio di bestia i entregá suministro di yudansa na víktimanan di desasternan natural.

E echonan aki ta mustra ku hende tin e kapasidat pa hasi bon na otro. Pero lamentablemente, tin hende tambe ku ta kometé kosnan sumamente teribel.

Maldat Ta Oumentando

Desde fin di Segundo Guera Mundial, tabatin kasi 50 insidente registrá di genosidio i matansa masal pa motibunan polítiko. Segun e revista American Political Science Review, “e susesonan aki a kosta bida di por lo ménos 12 mion kombatiente i 22 mion sivil. Esaki ta mas tantu ku tur víktima di guera sivil i guera internashonal huntu desde 1945.”

Durante e di dos mitar di siglo 20, rònt di 2,2 mion hende a ser matá na Cambodia pa motibunan polítiko. Odio entre diferente grupo étniko na Ruanda a kousa morto di mas ku 800.000 hòmber, muhé i mucha. Asesinatonan pa motibunan religioso i polítiko na Bosnia a resultá den mas ku 200.000 morto.

Refiriendo na aktonan mas resien di maldat, e sekretario general di Nashonnan Uní a bisa na 2004: “Na Irak, nan ta masakrá sivilnan ku sanger friu, miéntras esnan ku ta duna yudansa, periodistanan i otro personanan ku no tin nada di haber ku e kombatenan ta ser sekuestrá i matá den e formanan di mas kruel. Na mesun tempu, prezunan irakí a ser maltratá di un forma bergonsoso. Na Darfur,  poblashonnan kompletu ta haña nan fòrsá ta hui for di nan lugá, nan kasnan ta ser destruí i nan ta bira víktima di e táktika di violashon seksual. Na parti nort di Uganda, muchanan ta ser mutilá i fòrsá pa partisipá den aktonan sumamente horendo. Na Beslan, muchanan a ser sekuestrá i brutalmente masakrá.”

Asta den e asina yamá paisnan desaroyá, ta parse ku krímennan pa motibu di odio ta oumentando. Por ehèmpel na 2004, Independent News a informá ku na Gran Bretaña tabatin “un oumento di diesun biaha mas tantu víktima di atake òf maltrato pa motibunan rasial durante e último dékada.”

Pakiko hende ku tin e kapasidat pa hasi asina tantu bon ta kometé e tipo di maldatnan ei? Lo bini un fin na maldat un dia? Manera e siguiente artíkulo ta mustra, Beibel ta duna kontestanan satisfaktorio riba e preguntanan tolondradó aki.

 [Rekonosementu pa Potrèt na página 2]

KAFT: Mark Edwards/Still Plachinan/Peter Arnold, Inc.