Buska Hustisia Lo Protehá Nos

“Ma buska promé . . . [Dios] su hustisia.”—MATEO 6:33.

1, 2. Ki desishon un hóben kristian a tuma, i dikon el a tuma e desishon ei?

UN MUCHA muhé kristian na Asia tabata traha komo sekretaria na un ofisina di gobièrnu. E tabata tuma su trabou na serio, sòru di yega trempan i no tabata taha palu. Sin embargo, komo ku e no tabata vast, a yega momento ku mester a evaluá su posishon. Hefe di e departamento a bisa e mucha muhé ku lo e tum’é vast i asta dun’é un posishon mas haltu, basta ku e drenta den un relashon inmoral kuné. E mucha muhé a nenga redondamente, maske esei a nifiká ku e ta pèrdè su trabou.

² E mucha muhé kristian aki tabata irealístiko? Nò. Ta e siguiente palabranan di Hesus el a sigui kuidadosamente: “Ma buska promé . . . [Dios] su hustisia.” (Mateo 6:33) P’e, tabata hopi mas importante pa sigui prinsipionan hustu ku bai dilanti materialmente dor di kometé inmoralidat seksual.—1 Korintionan 6:18.

E Importansia di Hustisia

3. Kiko ta hustisia?

³ “Hustisia” ta indiká un estado di integridat moral i onestidat. Den Beibel, e palabranan griego i hebreo ta transmití e idea di “rektitut” òf di ta stret. E no ta nifiká ser hustu den bo mes bista, esta, husgando bo mes a base di bo propio normanan. (Lukas 16:15) E ta rektitut segun e normanan di Yehova. E ta referí na Dios su hustisia.—Romanonan 1:17; 3:21.

4. Dikon hustisia ta importante pa un kristian?

⁴ Dikon hustisia ta importante? Pasobra Yehova, e “Dios hustu,” ta trata su pueblo ku fabor ora nan ta praktiká hustisia. (Salmo 4:1, NW; Proverbionan 2:20-22; Habakuk 1:13) Ken ku ta obra inhustisia no por tin un relashon íntimo kuné. (Proverbionan 15:8) Ta p’esei apòstel Pablo a urgi Timoteo: “Hui pa e pashonnan di hubentut, i buska hustisia,” huntu ku otro kualidatnan sumamente importante. (2 Timoteo 2:22) Ta p’esei tambe Pablo a inkluí “e korasa di hustisia” ora el a menshoná e vários partinan di nos armadura spiritual.—Efesionan 6:14.

5. Kon kriaturanan imperfekto por buska hustisia?

⁵ Klaru ku ningun hende no ta hustu den e sentido apsoluto di e palabra. Tur hende a heredá imperfekshon for di Adam, i tur ta pekaminoso—inhustu—for di ora nan a nase. Sin embargo, Hesus a bisa ku nos mester buska hustisia. Kon esei ta posibel? E ta posibel dor ku Hesus a entregá su bida perfekto komo un reskate pa nos, i si nos ehersé fe den e sakrifisio ei, Yehova ta dispuesto pa pordoná nos pikánan. (Mateo 20:28; Juan 3:16; Romanonan 5:8, 9, 12, 18) Riba e base ei Yehova ta aseptá nos adorashon, miéntras ku nos ta siña su normanan hustu i ta hasi nos bèst pa kumpli ku nan, i ta pidi yudansa den orashon pa vense nos debilidatnan. (Salmo 1:6; Romanonan 7:19-25; Revelashon 7:9, 14) Ki un gran konsuelo esei ta!

Hustu den un Mundu Inhustu

6. Dikon mundu tabata un lugá peligroso pa e kristiannan di promé siglo?

⁶ Ora e disipelnan di Hesus a haña e enkargo pa ta su testigunan “te na e parti mas alehá di mundu,” nan tabatin un situashon difísil nan dilanti. (Echonan 1:8) Henter e teritorio asigná na nan tabata “bou di kontròl di e  malbado,” Satanas. (1 Juan 5:19) Mundu tabata infektá ku e aktitut di maldat ku Satanas a fomentá, i kristiannan lo a ser eksponé na su influensia ku por a kontaminá nan. (Efesionan 2:2) E mundu tabata un lugá peligroso pa nan. Ta solamente dor di buska promé Dios su hustisia nan lo por a perseverá i mantené nan integridat intakto. Mayoria di nan a perseverá tambe, pero un par a ser desviá for di “e kaminda di hustisia.”—Proverbionan 12:28; 2 Timoteo 4:10.

7. Ki responsabilidatnan kristiannan tin ku ta pone ku nan mester resistí influensianan dañino?

⁷ Mundu ta mas safe pa kristiannan djawe? Niun ora so! E ta asta mas korumpí ku den promé siglo. Ademas, Satanas a ser bentá abou riba tera i e ta hibando un guera feros kontra kristiannan ungí, esta, “e restu di [e muhé] su desendientenan, kendenan ta warda e mandamentunan di Dios i tin e [trabou di duna] testimonio di Hesukristu.” (Revelashon 12:12, 17) Tambe Satanas ta ataká ken ku sostené e “desendientenan” ei. Sin embargo, kristiannan no por skonde pa e mundu. Ounke nan no ta parti di mundu, nan tin ku biba den dje. (Juan 17:15, 16) I nan tin ku prediká den dje pa buska hende ku tin e disposishon korekto i siña nan bira disipel di Kristu. (Mateo 24:14; 28:19, 20) P’esei, komo ku kristiannan no por evitá kompletamente e influensianan dañino ku tin den e mundu aki, nan tin ku resistí esakinan. Laga nos konsiderá kuater di e influensianan ei.

E Trampa di Inmoralidat

8. Dikon e israelitanan a bai adorá e diosnan di e moabitanan?

⁸ Kasi na final di e israelitanan su biahe trabahoso di 40 aña dor di desierto, un kantidat grandi di nan a bandoná e kaminda di hustisia. Nan tabata testigu di e tantísimo aktonan di liberashon ku Yehova a hasi, i lo no a tarda hopi pa nan a drenta e Tera Primintí. Sin embargo, na e tempu krusial ei, nan a bai sirbi e diosnan di e moabitanan. Dikon? Nan a kai pa “e deseo di karni.” (1 Juan 2:16) E registro ta bisa: “E pueblo a kuminsá kometé fornikashon ku e yu muhénan di Moab.”—Numbernan 25:1.

9, 10. Ki situashon awe ta pone ku ta masha importante pa semper tene na mente kon dañino mal deseonan karnal ta?

⁹ E suseso ei ta demostrá e manera ku mal deseonan karnal por korumpí personanan ku no ta alerta. Ta bon pa nos siña for di esei, spesialmente komo ku hopi kaminda hende a kuminsá mira inmoralidat komo un estilo di bida aseptabel. (1 Korintionan 10:6, 8) Un informe di Merka ta bisa: “Promé ku 1970, biba kompañá tabata ilegal den tur estado merikano. Awor, e ta masha komun. Mas ku mitar di tur e hendenan ku ta bai kasa pa promé bes a biba kompañá promé ku nan kasa.” Esaki i otro práktikanan inmoral paresido no ta limitá na un solo pais. Nos ta haña nan rònt mundu, i lamentablemente, algun kristian a sigui e tendensia aki, i asta a pèrdè nan posishon den e kongregashon kristian.—1 Korintionan 5:11.

¹⁰ Ademas, ta parse ku tur kaminda bo ta  haña propaganda ku ta promové inmoralidat. Pelíkula- i programanan di televishon ta duna e idea ku no ta nada malu pa hóbennan hasi sèks promé ku matrimonio. Nan ta presentá relashonnan homoseksual komo normal. I hopi di nan ta mustra aktonan seksual ku mas i mas luho di detaye. Riba Internet tambe ta masha fásil pa haña akseso na potrètnan detayá di aktonan seksual. Por ehèmpel, un kolumnista di un korant a informá ku su yu hòmber di shete aña a bin kas for di skol i tur entusiasmá el a konta su tata ku un amigu di skol a haña un website riba Internet ku ta mustra hende muhé sunú ta hasi aktonan seksual. E tata a keda di shòk, pero kuantu mucha no a topa e tipo di websitenan ei sin ku nan a konta nan mayornan? Ademas, kuantu mayor sa kiko ta e kontenido di e weganan di vidio ku nan yunan ta hunga? Hopi wega popular ta kontené inmoralidat repugnante, i tambe demonismo i violensia.

11. Kon un famia por ser protehá di e inmoralidat di e mundu?

¹¹ Kon un famia por resistí tal “entretenimentu” degradá? Dor di buska promé Dios su hustisia, i nenga di bira enbolbí den kualke kos inmoral. (2 Korintionan 6:14; Efesionan 5:3) Mayornan ku apropiadamente ta supervisá e aktividatnan di nan yunan i ta inkulká den nan yunan un amor pa Yehova i pa su leinan hustu ta fortifiká nan kontra pornografia, weganan di vidio pornográfiko, pelíkulanan inmoral i otro tentashonnan inhustu.—Deuteronomio 6:4-9. *

E Peliger di Preshon di Komunidat

12. Ki problema a surgi den promé siglo?

¹² Ora ku Pablo tabata na Listra den Asia Menor, el a kura un hòmber milagrosamente. E relato ta bisa: “Ora ku e multitutnan a mira loke Pablo a hasi, nan a halsa nan bos i a bisa na lenga likaónika: ‘E diosnan a haña forma di hende i a baha bin serka nos.’ I nan a yama Barnabas Júpiter, i Pablo nan a yama Merkurio, pasobra e tabata esun ku ta hiba palabra.” (Echonan 14:11, 12) Poko despues e mesun multitutnan ei kier a mata Pablo ku Barnabas. (Echonan 14:19) Ta bisto ku preshon di komunidat a influensiá e hendenan ei fásilmente. Parse ku ora algun hende di e region ei a bira kristian, nan a keda tene na nan tendensianan superstisioso. Den su karta na e kristiannan na Kolosas, Pablo a duna spièrtamentu kontra “adorashon di angelnan.”—Kolosensenan 2:18.

13. Kua ta algun kustumber ku un kristian mester evitá, i kon e por haña e fortalesa pa hasi esei?

¹³ Awe, kristiannan berdadero tambe tin ku evitá kustumbernan popularmente aseptá ku ta basá riba ideanan religioso falsu ku ta violá prinsipionan kristian. Por ehèmpel, den algun pais hopi seremonia ku hende tin kustumber di hasi relashoná ku nasementu i morto ta basá riba e mentira ku nos tin un  spiritu ku ta keda na bida ora nos muri. (Eklesiastés 9:5, 10) Tin paisnan kaminda ta kustumber pa someté mucha muhé chikí na mutilashon genital femenino. * Esaki ta un práktika kruel i innesesario ku no ta kuadra ku e kuido amoroso ku mayornan kristian debe nan yunan. (Deuteronomio 6:6, 7; Efesionan 6:4) Kon kristiannan por resistí preshon di komunidat i bandoná tal tipo di práktika? Dor di tin pleno konfiansa den Yehova. (Salmo 31:6) E Dios hustu lo fortalesé i kuida esnan ku di kurason ta bis’é: “[Bo ta] mi refugio i mi fòrti, mi Dios, den kende mi ta konfia!”—Salmo 91:2; Proverbionan 29:25.

No Lubidá Yehova

14. Ki spièrtamentu Yehova a duna e israelitanan djis promé ku nan a drenta e Tera Primintí?

¹⁴ Djis promé ku e israelitanan a drenta e Tera Primintí, Yehova a spièrta nan pa nan no lubid’é. El a bisa: “Tene kuidou pa bo no lubidá SEÑOR bo Dios dor di keda sin warda su mandamentunan, su ordenansanan i su statutonan ku mi ta ordená bo awe, pa ora bo a kome i a keda satisfecho i a traha bon kasnan i a biba den nan, i ora bo krionan di baka i bo tounan di bestia chikitu multipliká, i bo plata i oro multipliká, i tur loke bo tin multipliká, bo kurason no bira orguyoso i bo lubidá SEÑOR bo Dios.”—Deuteronomio 8:11-14.

15. Kon nos por ta sigur ku nos no ta lubidando Yehova?

¹⁵ Algu similar lo por pasa awe? Sí, den kaso ku nos tin e prioridatnan robes. Sin embargo, si nos ta buska promé Dios su hustisia, adorashon puru lo ta e kos di mas importante den nos bida. Manera apòstel Pablo a animá nos pa hasi, nos lo ‘kumpra e tempu oportuno’ i nos lo tin un sentido di urgensia den nos ministerio. (Kolosensenan 4:5, NW; 2 Timoteo 4:2) Pero, si asistensia na reunion i sirbishi di vèlt ta ménos importante pa nos ku rekreo òf buskamentu di plaser, nos lo por lubidá Yehova den e sentido ku nos ta mira Yehova komo sekundario den nos bida. Pablo a bisa ku den e último dianan, hende lo ta ‘stimadó di plaser mas bien ku stimadó di Dios.’ (2 Timoteo 3:4) Kristiannan sinsero ta saminá nan mes regularmente pa hasi sigur ku nan no ta ser influensiá pa e manera di pensa ei.—2 Korintionan 13:5.

Tene Kuidou pa un Aktitut Independiente

16. Ki mal aktitut tantu Eva komo algun hende den tempu di Pablo a desplegá?

¹⁶ Den Edén, Satanas a logra apelá na Eva su deseo egoista pa independensia. Eva kier a tuma su propio desishonnan tokante loke ta bon i malu. (Génesis 3:1-6) Den promé siglo, algun hende den e kongregashon di Korinto tabatin mesun aktitut independiente. Nan tabata pensa ku nan sa mihó ku Pablo, i sarkástikamente el a yama nan “super-apòstelnan.”—2 Korintionan 11:3-5; 1 Timoteo 6:3-5.

17. Kon nos por evitá di desaroyá un aktitut independiente?

¹⁷ Den e mundu djawe, hopi hende ta kabesura, “imprudente, sobèrbè,” i algun kristian a ser influensiá dor di e manera di pensa ei.  Tin di nan asta a bira opositor di e bèrdat. (2 Timoteo 3:4; Filipensenan 3:18) Den asuntunan di adorashon berdadero ta masha importante pa nos akudí na Yehova pa haña guia, i pa nos koperá ku “e esklabo fiel i prudente” i e ansianonan di kongregashon. Esei ta un manera pa buska hustisia, i e ta protehá nos pa nos no desaroyá un aktitut independiente. (Mateo 24:45-47; Salmo 25:9, 10; Isaias 30:21) E kongregashon di e ungínan ta un “pilar i sosten di e bèrdat.” Yehova a estables’é pa protehá nos i guia nos. (1 Timoteo 3:15) Ora nos ta rekonosé e papel importante ku e ta hunga, esei lo yuda nos pa “no hasi nada ku un aktitut di egoismo” miéntras ku nos ta someté nos mes humildemente na Yehova su boluntat hustu.—Filipensenan 2:2-4; Proverbionan 3:4-6.

Sea Imitadónan di Hesus

18. Nos ta ser animá pa imitá Hesus den ki maneranan?

¹⁸ Beibel ta bisa profétikamente di Hesus: “Bo a stima hustisia i a odia maldat.” (Salmo 45:7; Hebreonan 1:9) Ki un aktitut ekselente ku nos por imitá! (1 Korintionan 11:1) Hesus no tabata djis konosé Yehova su normanan rekto; el a stima nan. P’esei ora Satanas a tent’é den desierto, Hesus sin vasilá a rechas’é i na un manera firme el a nenga di dual for di “e kaminda di hustisia.”—Proverbionan 8:20; Mateo 4:3-11.

19, 20. Menshoná e bon resultadonan di buska hustisia.

¹⁹ Ta bèrdat ku e deseonan inhustu di e karni por ta fuerte. (Romanonan 7:19, 20) Sin embargo, si hustisia ta algu balioso pa nos, esaki lo fortalesé nos kontra maldat. (Salmo 119:165) Un amor profundo pa hustisia lo protehá nos ora nos ta konfrontá loke ta malu. (Proverbionan 4:4-6) No lubidá ku ki ora ku nos entregá na tentashon, nos ta duna Satanas un viktoria. Ta muchu mas mihó pa resistié i duna Yehova e viktoria!—Proverbionan 27:11; Santiago 4:7, 8.

²⁰ Debí ku kristiannan berdadero ta buska hustisia, nan ta “yená ku e fruta di hustisia ku ta bin dor di Hesukristu, pa e gloria i alabansa di Dios.” (Filipensenan 1:10, 11) Nan ta bisti “e hende nobo [òf, personalidat nobo], ku a wòrdu kreá segun Dios den hustisia i santidat berdadero.” (Efesionan 4:24) Nan ta pertenesé na Yehova i ta biba pa sirbié, no pa agradá nan mes. (Romanonan 14:8; 1 Pedro 4:2) Esei ta loke ta goberná nan manera di pensa i nan akshonnan. Ki kontentu nan ta hasi e kurason di nan Tata selestial!—Proverbionan 23:24.

[Nota]

Bo Por Splika?

• Dikon ta masha importante pa buska hustisia?

• Kon un kristian imperfekto por buska hustisia?

• Kiko ta algun kos den mundu ku un kristian tin ku evitá?

• Kon buska hustisia ta protehá nos?

[Preguntanan di Estudio]

[Plachi na página 26]

Pa siguidónan di Hesus, e mundu tabata un lugá peligroso

[Plachi na página 27]

Yunan ku ser siñá pa stima Yehova lo tin e fortalesa pa resistí inmoralidat

[Plachi na página 28]

Algun israelita a lubidá Yehova despues ku nan a bira riku den e Tera Primintí

[Plachi na página 29]

Meskos ku Hesus, kristiannan ta odia inhustisia