Hasi Meditashon Algu Agradabel

ALGUN hende por haña ku ta difísil pa meditá. Tal bes nan ta mira esei komo algu ku ta eksigí un konsentrashon profundo. Kisas e personanan ei por sinti nan kulpabel tambe dor ku nan no ta meditá, spesialmente ora nan lesa kon importante esei ta. (Filipensenan 4:8) Sin embargo, no tin nada mas agradabel ku e momentonan ku nos ta pasa reflekshonando den silensio riba e bèrdatnan ku nos a siña tokante Yehova, su kualidatnan presioso, su hazañanan asombroso, su rekisitonan i su propósito glorioso. Dikon nos por bisa esei?

Yehova Dios ta e Gobernante Supremo di universo i ta trahando riba realisashon di su gran propósito. (Juan 5:17) Pero esei no ta kita ku e ta interesá den e pensamentunan di kada un di su adoradónan. E salmista David tabata sa esaki i a skirbi bou di inspirashon divino: “O SEÑOR, bo a saminá mi i bo konosé mi. Bo sa ki ora mi ta sinta i ki ora mi ta lanta; bo ta komprondé mi pensamentunan djaleu.”—Salmo 139:1, 2.

Na promé instante, kisas un hende ta mira e palabranan ei for di un punto di bista negativo. Tal bes e ta rasoná: ‘Ounke Dios Todopoderoso ta “leu,” e ta tuma nota di kada mal pensamentu ku drenta mi mente.’ Klaru ku ta bon pa nos ta konsiente di esei. Lo e por yuda nos lucha kontra mal pensamentu i, ora nos haña e pensamentunan ei, konfesá nan na Dios, ku e konfiansa ku lo e pordoná nos a base di nos fe den e sakrifisio di reskate di Hesus. (1 Juan 1:8, 9; 2:1, 2) Sin embargo, na mes momento, nos mester kòrda ku Yehova ta eksaminá su adoradónan na un manera positivo. E ta presta atenshon ora nos ta pensa riba dje ku un kurason gradisidu.

Kisas bo ta puntra: “Di bèrdat Yehova ta tuma nota di tur bon pensamentu di su miónes di adoradónan?” Sí, sin duda. Hesus a enfatisá e interes ku Yehova tin den nos ora el a bisa ku Yehova ta tuma nota di asta un mòfi chikitu, i despues a agregá: “Boso bal mas ku un kantidat di mòfi.” (Lukas 12:6, 7) Mòfi no por pensa riba Yehova. Pues si Dios ta interesá den nan, kuantu mas lo e ta interesá den nos i haña deleite den e pensamentunan deboto di kada un di nos! Sí, meskos ku David, nos por pidi Dios ku konfiansa: “Laga e . . . meditashon di mi kurason ta aseptabel [“agradabel,” NW] den bo bista, o SEÑOR, mi baranka i mi Redentor.”—Salmo 19:14.

Otro prueba ku en bèrdat Yehova ta interesá den e meditashon di su adoradónan leal ta ser hañá den e palabranan inspirá di profeta Malakias. Papiando di nos tempu, el a profetisá: “N’e tempu ei, esnan den temor di Yehova a papia un ku otro, kada un ku su kompañero, i Yehova a sigui presta atenshon i skucha. I un buki di rekuerdo a kuminsá ser skirbí dilanti dje pa esnan den temor di Yehova i pa esnan ku ta pensa riba su nòmber.” (Malakias 3:16, NW) Ora nos kòrda nos mes ku Yehova ta sigui “presta atenshon” na momento ku nos ta pensa riba dje, esei en bèrdat por hasi meditashon riba dje algu agradabel. P’esei, laga nos ripití e palabranan di e salmista kende a skirbi: “Lo mi meditá riba tur bo obranan, i keda pensa riba bo echonan.”—Salmo 77:12.