“Ki Bon Ta un Palabra Duná Na Ora!”
“Ki Bon Ta un Palabra Duná Na Ora!”
DURANTE henter un dia di asamblea di Testigunan di Yehova, Kim a hasi su bèst pa skucha i tuma nota miéntras ku a la bes e tabata purba laga su yu muhé di dos aña i mei sinta ketu. Na final di e programa, un ruman muhé kristian sintá den e mesun rei a bin serka Kim i a elogi’é sinseramente pa e manera ku e ku su kasá a atendé ku nan yu muhé durante e programa. E elogio ei a nifiká asina hopi pa Kim ku te awe, añanan despues, e ta bisa: “Ora ku mi ta sinti mi hopi kansá na reunion, mi ta pensa riba loke e ruman muhé ei a bisa mi. Su palabranan bondadoso ainda ta animá mi pa sigui entrená nos yu muhé.” En bèrdat, palabranan papiá na ora por enkurashá un persona. Beibel ta deklará: “Ki bon ta un palabra duná na ora!”—Proverbionan 15:23.
Pero pa algun di nos kisas ta difísil pa elogiá otro hende. Tin biaha esei ta bin dor ku nos ta konsiente di nos propio defisiensianan. Un kristian a bisa: “Pa mi, esei ta manera ora bo ta pará riba tera moli. Mas mi hisa otro hende na haltu [dor di elogiá nan], mas mi ta sinti kon mi ta sak bai abou.” Faktornan manera timides, falta di konfiansa den bo mes òf miedu ku hende lo komprondé bo malu, tambe por pone ku ta difísil pa duna elogio. Ademas, si nos mes personalmente a haña masha tiki òf ningun rekonosementu tempu ku nos tabata lanta komo mucha, lo por ta difísil pa nos elogiá otro hende.
Sin embargo, e echo ku nos sa ku elogio por tin un bon efekto tantu riba esun ku ta dun’é komo esun ku ta risibié lo por motivá nos pa hasi nos bèst pa duna un palabra di elogio na e momento oportuno. (Proverbionan 3:27) Kiko anto ta e efektonan positivo ku ta resultá ora nos hasi esei? Laga nos konsiderá algun brevemente.
Efektonan Positivo
Elogio apropiá por edifiká konfiansa den esun ku hañ’é. Elaine, un esposa kristian, a bisa: “Ora hende elogiá mi, mi ta sinti ku nan tin konfiansa den mi, ku nan ta kere den mi.” Sí, elogiá un persona ku falta konfiansa den su mes por duna e persona ei e kurashi pa trata ku opstákulo, i komo resultado, e ta haña goso. Spesialmente hóbennan por benefisiá di elogio meresí. Un tiner ku a atmití ku e ta ser deskurashá dor di su propio pensamentunan negativo a bisa: “Semper mi ta hasi mi bèst pa agradá Yehova, pero tin biaha mi ta sinti ku maske kiko mi hasi, e no ta sufisiente. Ora un hende elogiá mi, mi ta sinti mi hopi bon.” En bèrdat e proverbio bíbliko aki ta sierto: “Un palabra papiá na ora apropiá ta manera un apel di oro den montura di plata.”—Proverbionan 25:11.
Elogio por motivá i enkurashá un persona. Un sirbidó di tempu kompletu a bisa: “Palabranan di elogio ta animá mi pa traha mas duru i pa mehorá e kalidat di mi sirbishi.” Un mama di dos yu a komentá ku ora su yunan haña palabra di elogio di otro miembronan di e kongregashon pasobra nan a duna komentario na reunion, nan ke duna mas komentario. Sí, elogio por motivá hóbennan pa hasi progreso den e bida kristian. De echo, nos tur tin mester di palabranan ku ta sigurá nos ku nos ta ser apresiá i balorá. E mundu
yen di strès aki kisas ta laga nos keda kansá i deprimí. Un ansiano kristian a bisa: “Tin biaha ora ku mi ta desanimá, elogio ta manera un kontesta riba mi orashonnan.” Asina tambe Elaine a bisa: “Tin bes mi ta sinti ku Yehova ta mustra mi su aprobashon mediante e ekspreshonnan di otro hende.”Ser elogiá por krea un sintimentu di logro i aseptashon. Duna elogio sinsero ta un muestra di konsiderashon i ta edifiká un ambiente di kariño, siguridat i apresio. E ta prueba ku nos realmente ta stima nos rumannan kristian i ta apresiá nan. Josie, un mama, a bisa: “Den pasado, mi mester a tuma mi posishon na fabor di e bèrdat den un famia dividí pa motibu religioso. E tempu ei, e palabranan di apresio ku mi a haña di personanan spiritualmente maduro a fortalesé mi determinashon pa no entregá.” En bèrdat, “nos ta miembro di otro.”—Efesionan 4:25.
E deseo di ke elogiá otro hende ta yuda nos mira e bon den nan. Nos ta wak e bon kualidatnan di otro hende, no nan debilidatnan. Un ansiano kristian ku yama David a bisa: “Ora nos ta gradisidu pa loke otro hende ta hasi, esei lo yuda nos elogiá otro hende ku mas frekuensia.” Teniendo na mente kon generoso Yehova ku su Yu ta den papia bon di hende imperfekto lo motivá nos pa imitá nan den esei.—Mateo 25:21-23; 1 Korintionan 4:5.
Personanan Ku Ta Meresé Elogio
Yehova Dios, komo e Kreadó, ta Esun prinsipal entre esnan ku meresé elogio. (Revelashon 4:11) Ounke e no tin mester di nos pa stimulá su konfiansa òf motiv’é, ora nos ta alabá Yehova pa su grandesa i su bondat amoroso, e ta hala serka nos i nos ta desaroyá un relashon kuné. Tambe dunamentu di elogio òf alabansa na Dios ta yuda nos desaroyá un opinion sano i modesto di nos propio logronan i ta pone nos atribuí nos éksitonan na Yehova. (Jeremias 9:23, 24) Yehova ta ofresé na tur hende meresedor e speransa di bida eterno, i esei ta un motibu mas pa stimulá nos pa alab’é. (Revelashon 21:3, 4) Rei David di pasado tabata ansioso pa “alabá e nòmber di Dios” i “engrandes’é ku gradisimentu.” (Salmo 69:30) Laga esei ta nos deseo tambe.
Nos kompañeronan di adorashon ta meresé elogio apropiá. Ora nos ta duna nan esei, nos ta aktua na armonia ku e mandamentu divino pa “konsiderá kon pa stimulá otro pa stima i hasi bon obra.” (Hebreonan 10:24) Un bon ehèmpel di esaki tabata apòstel Pablo. El a skirbi e kongregashon na Roma: “Na promé lugá mi ta gradisí mi Dios pa medio di Hesukristu pa boso tur, pasobra boso fe ta wòrdu proklamá den henter mundu.” (Romanonan 1:8) Asina tambe apòstel Juan a duna rekonosementu na su kompañero kristian Gayo pa su ehèmpel ekselente di “kana den e bèrdat.”—3 Juan 1-4.
Awe, nos tin un ekselente oportunidat pa ekspresá nos apresio na un ruman kristian ora ku e desplegá den un manera ehemplar un kualidat semehante di Kristu, ora ku e presentá un parti bon prepará den reunion òf ora ku e duna un komentario sinsero durante un reunion. Tambe nos por elogiá un mucha ora ku e ta hasi su bèst pa buska e tekstonan di Beibel durante reunionnan di kongregashon. Elaine, menshoná anteriormente, a bisa: “Nos kada un tin talento diferente. Dor di tuma nota di loke un otro hende ta hasi, nos ta mustra nos apresio pa e variedat di talentonan ku tin den e pueblo di Dios.”
Duna Elogio den e Sírkulo di Famia
Kiko di ekspresá apresio na miembronan di nos propio famia? Pa un esposo i esposa perkurá sosten spiritual, emoshonal i material pa nan famia ta rekerí hopi tempu, esfuerso i atenshon amoroso. Definitivamente nan ta meresé di tende palabranan di elogio di otro i di nan yunan. (Efesionan 5:33) Por ehèmpel, e Palabra di Dios ta bisa relashoná ku un esposa kapas: “Su yunan ta lanta i ta yam’é bendishoná; su esposo tambe, i e ta gab’é.”—Proverbionan 31:10, 28.
Muchanan tambe meresé elogio. Lamentablemente, algun mayor ta masha lihé pa bisa nan yunan kiko nan ta ferwagt di nan, pero masha poko bes nan ta elogiá nan yunan pa e esfuerso ku nan ta hasi pa ta respetuoso i obediente. (Lukas 3:22) Dunamentu di elogio den e promé añanan di un mucha su desaroyo ta kontribuí hopi bes na laga e mucha sinti su mes stimá i mas sigur.
Ta bèrdat ku dunamentu di elogio ta rekerí esfuerso, pero nos ta kosechá hopi benefisio ora nos hasié. De echo, mas diligente nos ta den elogiá personanan ku meresé esei, mas grandi nos felisidat lo ta.—Echonan 20:35.
Aseptá i Duna Elogio ku e Aktitut Korekto
Sin embargo, hañamentu di elogio por ta un tèst pa algun hende. (Proverbionan 27:21) Por ehèmpel, esei por fomentá sintimentunan di superioridat den personanan ku tin e tendensia di ta orguyoso. (Proverbionan 16:18) P’esei, ta nesesario pa nos ta balansá. Apòstel Pablo a duna e konseho práktiko aki: “Mi ta bisa kada un di boso pa no pensa mas haltu di su mes ku e mester pensa; ma pa mas bien pensa di su mes ku sano huisio, di akuerdo ku e midí di fe ku Dios a duna bo.” (Romanonan 12:3) Pa yuda hende pa nan no kai den e trampa di pensa muchu haltu di nan mes, kisas ta sabí pa no konsentrá riba kosnan manera hopi inteligensia òf bon aparensia. Mas bien, nos mester elogiá hende pa nan obranan ekselente.
Ora duna i aseptá palabranan di elogio ku e aktitut korekto, nan por tin un efekto positivo riba nos. Nos por sinti nos konmoví pa rekonosé ku nos mester ta gradisidu na Yehova pa tur kos bon ku nos a hasi. Elogio por animá nos tambe pa sigui komportá nos mes na un manera ekselente.
Elogio sinsero i bon meresí ta un regalo ku nos tur por duna. Ora ku bondadosamente nos dun’é na un persona, e por nifiká mas pa e persona ei ku nos hamas lo realisá.
[Kuadro/Plachi na página 18]
Un Karta Ku A Toka Su Kurason
Un superintendente biahero ta kòrda kla-kla un okashon ku e i su esposa a regresá nan alohamentu despues di a pasa un dia di wenter hopi friu den sirbishi di vèlt. El a konta: “Mi esposa tabata sinti friu i tabata desanimá, i el a bisa mi ku e ta sinti ku e no por sigui mas. E di ku mi: ‘Lo ta muchu mas mihó pa nos sirbi den e sirbishi di tempu kompletu ku un kongregashon, keda na un lugá i kondusí nos propio estudionan di Beibel.’ Mi a posponé tumamentu di un desishon dor di bis’é ku nos lo sigui ku e trabou pa e restu di e siman i wak kon e ta sinti na final. Si ainda e kier a bandoná e trabou biahero, lo mi respetá su sintimentu. E mesun dia ei, nos a pasa pòstkantor i a haña un karta for di sukursal ku tabata dirigí na dje personalmente. E karta tabatin elogio sinsero pa e esfuerso ku e ta hasi den sirbishi di vèlt i pa su perseveransia, i a rekonosé kon difísil e por ta pa drumi tur siman den un otro kama. El a keda asina konmoví pa e elogio ei ku nunka mas e no a papia di bandoná e trabou biahero. De echo, vários biaha el a animá ami pa sigui ora ku mi tabata pensa pa stòp.” E pareha aki a keda den e trabou biahero pa kasi 40 aña.
[Plachi na página 17]
Ken den bo kongregashon meresé elogio?
[Plachi na página 19]
Mucha ta bona ora nan haña atenshon amoroso i elogio