Kon Bon Lo Vense Malu

Rei David tabata un bon hende. E tabatin un amor profundo pa Dios, un set pa hustisia i un stimashon pa hende humilde. Tòg, e mesun bon rei aki a kometé adulterio ku e esposa di un di su hòmbernan di konfiansa. I despues ku David a haña sa ku e esposa, Bètsabé, a sali na estado di dje, el a traha un plan pa laga mata su esposo. Anto pa purba tapa su malechonan, el a kasa ku Bètsabé.—2 Samuel 11:1-27.

TA OPVIO ku hende tin e kapasidat pa hasi hopi kos bon. Dikon anto nan ta kulpabel di asina tantu maldat? Beibel ta identifiká vários motibu básiko. E ta mustra tambe kon Dios, pa medio di Kristu Hesus, lo eliminá maldat di unabes pa semper.

Inklinashon pa Hasi Malu

Rei David mes a identifiká un di e motibunan pakiko hende ta hasi malu. Despues ku su malechonan a sali na kla, el a aseptá tur responsabilidat pa su akshonnan. Anto yen di remordimentu el a skirbi: “Mira, den inikidat mi a wòrdu formá, i den piká mi mama a konsebí mi.” (Salmo 51:5) Nunka tabata e propósito di Dios pa mamanan konsebí yunan ku lo kometé piká. Sin embargo, ora Eva i despues Adam a skohe pa rebeldiá kontra Dios, nan no tabata kapas mas pa produsí yu sin piká. (Romanonan 5:12) Segun ku hende imperfekto a oumentá na kantidat, a bira bisto ku nan inklinashon ta pa hasi malu, ya ku Génesis 8:21 ta bisa ku “e intenshon di kurason di hende ta malu for di su hubentut.”

Ora hende no dominá e inklinashon aki, e ta resultá den “inmoralidat, . . . hostilidat,  bringamentu, yalursheit, rabiamentu, pleitamentu, desakuerdo, doktrina falsu, envidia” i otro komportashon destruktivo ku Beibel ta deskribí komo “obranan di karni.” (Galationan 5:19-21) Den e kaso di Rei David, el a sede na debilidat karnal i a kometé fornikashon, lokual a resultá den konfliktonan serio. (2 Samuel 12:1-12) Lo e por a resistí su inklinashon inmoral. Pero, dor di keda pensa riba su deseo pa haña Bètsabé, David a sigui e patronchi ku e disipel Santiago a deskribí despues: “Kada un ta wòrdu tentá ora ku e wòrdu atraí i sedusí dor di su mes pashon. Anto ora pashon konsebí, e ta duna lus na piká; i ora piká keda kumplí, e ta produsí morto.”—Santiago 1:14, 15.

E matansanan masal, violashonnan seksual i plùndermentu menshoná den e artíkulo anterior ta ehèmpelnan ekstremo di loke ta sosodé ora hende aktua a base di nan mal deseonan.

Maldat pa Motibu di Ignoransia

E eksperensia di apòstel Pablo ta resaltá un di dos motibu pakiko hende ta hasi malu. Pa e tempu ku Pablo a muri, e tabatin e reputashon di un hòmber mansu i kariñoso. Sin ningun interes personal, el a hasi hopi esfuerso pa sirbi su rumannan kristian. (1 Tesalonisensenan 2:7-9) Pero mas promé den su bida, tempu ku e tabata konosí komo Saulo, e tabata “yen di menasa i gustu pa mata” kontra e mesun grupo aki. (Echonan 9:1, 2) Pakiko Pablo a konsentí ku e maldat ku a ser kometé kontra e promé kristiannan i asta a partisipá den esaki? El a bisa: ‘Pasobra mi a aktua den ignoransia.’ (1 Timoteo 1:13) Sí, anteriormente Pablo tabatin “un selo pa Dios, ma no segun konosementu.”—Romanonan 10:2.

Meskos ku Pablo, hopi hende sinsero a kometé maldat pa motibu ku nan no tin konosementu eksakto di e boluntat di Dios. Por ehèmpel, Hesus a spièrta su siguidónan: “E ora ta bin ku ken ku mata boso lo kere ku e ta ofresé sirbishi na Dios.” (Juan 16:2) Testigunan di Yehova djawe sa di eksperensia ki sierto e palabranan aki di Hesus ta. Den hopi pais nan a ser persiguí i asta matá dor di hende ku ta pretendé di sirbi Dios. Ta bon kla anto ku e selo mal dirigí ei no ta agradá e Dios berdadero.—1 Tesalonisensenan 1:6.

Esun Ku A Originá Maldat

Hesus a identifiká e motibu prinsipal pakiko ta eksistí maldat. Dirigiendo su mes na e lidernan religioso ku tabatin intenshon di mat’é, el a bisa nan: “Boso ta di boso tata e Diabel, i boso kier hasi e deseonan di boso tata. E tabata un matadó for di prinsipio.” (Juan 8:44) Pa motibunan egoista, Satanas a tenta Adam ku Eva pa rebeldiá kontra Dios. E rebeldia ei a trese piká i tambe morto pa henter humanidat.

E karakter asesino di Satanas a bira bisto tambe den loke el a hasi ku Jòb. Ora Yehova a dun’é pèrmit pa pone e integridat di Jòb na prueba, Satanas no a keda satisfecho ku djis kita Jòb su poseshonnan. El a kousa morto di su dies yunan tambe. (Jòb 1:9-19) Den  dékadanan resien, maldat a oumentá notablemente debí na imperfekshon i ignoransia di hende i tambe komo resultado di e echo ku Satanas ta mete mas i mas den asuntunan humano. Beibel ta revelá ku Diabel a “wòrdu tirá abou riba tera, i su angelnan a wòrdu tirá abou huntu kuné.” E mesun profesia ei a predisí ku eksaktitut ku e presensia di Satanas aki bou lo a produsí un “ai di tera” nunka bisto. Ounke Satanas no por obligá hende pa hasi malu, e ta un eksperto den “gaña henter mundu.”—Revelashon 12:9, 12.

Eliminashon di e Inklinashon pa Hasi Malu

Pa por kaba ku maldat pa semper for di sosiedat humano, mester eliminá hende su inklinashon natural pa hasi malu, su falta di konosementu eksakto i e influensia di Satanas. Na promé lugá, kon hende su inklinashon natural di hasi piká por wòrdu eliminá for di su kurason?

No tin ningun siruhano humano ni remedi ku hende a inventá ku por logra esei. Pero Yehova Dios sí a perkurá un kura pa piká heredá i imperfekshon pa tur esnan ku ta dispuesto pa asept’é. Apòstel Juan a skirbi: “E sanger di Hesus . . . ta limpia nos di tur piká.” (1 Juan 1:7) Ora e hòmber perfekto Hesus a ofresé su bida boluntariamente, el a ‘karga nos pikánan den su kurpa na e staka, pa nos, siendo morto pa piká, por a biba pa hustisia.’ (1 Pedro 2:24) Hesus su morto komo sakrifisio lo eliminá e efektonan di Adam su maldat. Pablo ta deklará ku Kristu Hesus a bira un “reskate pa tur hende.” (1 Timoteo 2:6) Sí, e morto di Kristu a habri kaminda pa humanidat kompletu bolbe haña e perfekshon ku Adam a pèrdè.

Pero kisas bo ta puntra: ‘Si e morto di Hesus di un 2.000 aña pasá a hasi posibel pa humanidat bolbe haña perfekshon, pakiko maldat i morto ta eksistí te ainda?’ E kontesta riba e pregunta ei por yuda eliminá e di dos kousa di maldat, esta, hende su ignoransia di e propósitonan di Dios.

Konosementu Eksakto Ta Stimulá Loke Ta Bon

Ora un persona sinsero haña konosementu eksakto di loke Yehova i Hesus ta hasiendo awor pa eliminá maldat, esaki probablemente lo evitá ku e ta konsentí inkonsientemente ku maldat i, pió ainda, “bringa kontra Dios.” (Echonan 5:38, 39) Yehova Dios ta dispuesto pa pasa por haltu e malechonan ku e persona aki a yega di kometé den su ignoransia. Papiando den Atenas, apòstel Pablo a bisa: “Dios, pasando por alto e tempunan di ignoransia, awor ta deklará na hende ku tur hende na tur kaminda mester repentí, pasobra el a fiha un dia den kual e lo husga mundu ku hustisia pa medio di un hòmber, kende el a apuntá, dunando prueba na tur hende dor di lant’é for di e mortonan.”—Echonan 17:30, 31.

Pablo tabata sa di eksperensia personal ku Hesus a ser lantá for di morto, pasobra ta Hesus resusitá mes a papia ku Pablo i a stòp e di persiguí e promé kristiannan. (Echonan 9:3-7) Unabes Pablo a risibí konosementu eksakto di e propósitonan di Dios, el a kambia i bira realmente un bon hende ku a imitá Kristu. (1 Korintionan 11:1; Kolosensenan 3:9, 10) Ademas, ku entusiasmo Pablo a prediká “e evangelio aki di e reino.” (Mateo 24:14) Durante e kasi 2.000 añanan desde Hesus su morto i resurekshon, Kristu a selektá for di entre humanidat hende ku, meskos ku Pablo, lo goberná kuné den su Reino.—Revelashon 5:9, 10.

For di den transkurso di siglo pasá te ku aworakí, Testigunan di Yehova ta kumpliendo selosamente ku e tarea ku Hesus a duna nan: “Bai i hasi tur e nashonnan disipel di mi, i batisá nan den nòmber di e Tata i di e  Yu i di e spiritu santu, i siña nan pa kumpli ku tur loke mi a ordená boso.” (Mateo 28:19, 20) Esnan ku ta respondé na e mensahe aki tin e speransa di biba pa semper riba tera bou di e gobièrnu selestial di Kristu. Hesus a bisa: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.” (Juan 17:3) E fabor di mas grandi ku un persona por hasi su próhimo ta di yud’é haña e konosementu aki.

Esnan ku ta aseptá e bon nobo di Reino aki ta desplegá kualidatnan manera “amor, goso, pas, pasenshi, kariño, bondat, fieldat, mansedumbre [i] dominio propio,” apesar di tur e maldat ku ta rondoná nan. (Galationan 5:22, 23) Nan ta imitá Hesus dor di “nunka paga malu ku malu na ningun hende.” (Romanonan 12:17) Kada un di nan ta hasi esfuerso pa “vense malu ku bon.”—Romanonan 12:21; Mateo 5:44.

E Viktoria Final Riba Maldat

Riba nan mes, hamas hende lo por vense e promotor básiko di maldat, Satanas e Diabel. Pero pronto, Yehova lo usa Hesus pa plècha Satanas su kabes. (Génesis 3:15; Romanonan 16:20) Yehova lo dirigí Kristu Hesus tambe pa “garna i pone un fin” na tur sistema polítiko. Hopi di esakinan a kometé tur tipo di maldat atraves di historia. (Daniel 2:44; Eklesiastés 8:9) Durante e dia di huisio binidero aki, tur hende ku “no ta obedesé e evangelio di nos Señor Hesus . . . lo paga e kastigu di pèrdishon eterno.”—2 Tesalonisensenan 1:8, 9; Sofonias 1:14-18.

Unabes Satanas i su apoyadónan ser eliminá, Hesus, for di su posishon den shelu, lo yuda sobrebibientenan restorá tera na su estado original. Kristu lo resusitá tambe tur esnan ku ta digno di e oportunidat pa biba riba e tera restorá. (Lukas 23:32, 39-43; Juan 5:26-29) Ku esei, lo e nulifiká algun di e efektonan di e maldat ku humanidat a sufri.

Yehova lo no fòrsa hende pa obedesé e bon nobo tokante Hesus. Sin embargo, e ta dunando hende e oportunidat pa haña e konosementu ku ta hiba na bida. Ta masha importante pa bo probechá di e oportunidat aki awor! (Sofonias 2:2, 3) Si bo hasi esei, lo bo siña kon pa enfrentá kualke maldat ku ta afligí bo bida aworakí. Lo bo mira tambe kon Kristu lo logra e viktoria final riba maldat.—Revelashon 19:11-16; 20:1-3, 10; 21:3, 4.

[Plachi na página 5]

Saulo a konsentí ku aktonan di maldat pa motibu ku e no tabatin konosementu eksakto

[Plachi na página 7]

E fabor di mas grandi ku un persona por hasi su próhimo ta di yud’é haña konosementu eksakto di Dios