Persiguí, Pero Despues Aseptá

ALGUN aña pasá, Santiago ku su kasá, Lourdes, a muda bai e pueblo pintoresko di Huillcapata, Perú, pa kompartí e mensahe di speransa di Beibel ku e hendenan einan. Pero un poko despues, un pastor a bini for di Cuzco i a yama un reunion ku e habitantenan di e pueblo. E pastor a spièrta nan ku e presensia di Testigunan di Yehova lo trese un plaga mortal i kaida pisá di sneu ku lo mata nan bestianan i kaba ku nan kultivonan.

Hopi hende a bai tras di e “profesia” aki, i pa mas ku seis luna ningun habitante no a aseptá e invitashon di Santiago ku Lourdes pa studia Beibel ku nan. Un outoridat di e pueblo ku yama Miguel, e gezaghebber, tabata bai tras di Santiago ku Lourdes riba kaya i manda nan ku piedra. Pero semper nan a komportá nan na un manera kristian i pasífiko.

Ku tempu, algun habitante di e pueblo a aseptá un estudio di Beibel. Asta Miguel a kambia su aktitut. El a kuminsá studia ku Santiago, a stòp di bebe di mas i a bira un persona pasífiko. Ku tempu Miguel, su esposa i dos di su yu muhénan a aseptá e bèrdat di Beibel.

Awe tin un kongregashon progresivo di Testigunan di Yehova den e pueblo aki. Miguel ta kontentu ku mayoria di e piedranan ku el a tira riba Santiago ku Lourdes a hera, i e ta gradisí e pareha pa nan ehèmpel ekselente komo hendenan pasífiko.

[Plachinan na página 32]

E karakter pasífiko di Santiago ku Lourdes (ariba) a kambia Miguel (te na man drechi) su aktitut