Tabata un Goso i un Reto pa Lanta Ocho Yu den e Kamindanan di Yehova
Historia di Bida
Tabata un Goso i un Reto pa Lanta Ocho Yu den e Kamindanan di Yehova
SEGUN E RELATO DI JOYCELYN VALENTINE
Na 1989 mi esposo a bai afó pa traha. El a primintí di manda plaka pa mi por a kria mi ocho yunan. Simannan a pasa sin ku mi a tende nada di dje. Lunanan a pasa i ainda nada di mi kasá. Mi tabata konsolá mi mes bisando, ‘Asina kosnan drecha p’e, e ta bini kas.’
SIN plaka pa kria mi famia, mi a bira desesperá. Durante e hopi anochinan ku mi a pasa sin drumi, mi tabata puntra mi mes sin por a kaba di kere: ‘Kon e por hasi un kos asina ku su famia?’ Ku tempu mi a bin aseptá e realidat kruel ku mi esposo a bandoná nos. Awe, un 16 aña despues ku el a bai laga nos, ainda e no a bolbe bèk. Komo resultado di esei, mi a haña mi ta lanta mi yunan sin yudansa di un kasá. Esaki tabata un reto, pero ora mi mira kon mi yunan a skohe pa e kamindanan di Yehova, esei ta duna mi hopi goso. Ma promé ku mi konta kon kosnan a sigui ku nos komo famia, laga mi konta boso kon mi mes a lanta.
En Buska di Guia di Beibel
Mi a nase na 1938 riba e isla karibeño di Jamaica. Ounke mi tata nunka no tabata miembro di un iglesia, e tabata konsiderá su mes un hende temeroso di Dios. Anochi hopi bes e tabata pidi mi pa lesa p’e for di e buki bíbliko di
Salmo. Den poko tempu mi por a ripití hopi salmo for di kabes. Mi mama tabata miembro di un iglesia lokal, i de bes en kuando e tabata hiba mi misa.Loke nos tabata tende na e reunionnan ei ta ku Dios ta tuma bon hende den shelu i kima mal hende pa semper den fièrnu. Tambe nan tabata bisa ku Hesus ta Dios i ku e ta stima mucha. Mi tabata basta konfundí i mi tabatin miedu di Dios. Mi tabata puntra mi mes: ‘Kon un Dios ku ta stima nos por torturá hende den kandela?’
E idea di fièrnu tabata duna mi pesadia. Ku tempu, mi a tuma un kurso di Beibel via korespondensia di Iglesia Atventista di Shete Dia. Nan a siña mi ku mal hende lo no ser tormentá pa semper, sino mas bien lo kaba na shinishi den vlam di kandela. Esaki a zona mi mas rasonabel, i mi a kuminsá asistí na nan sirbishinan religioso. Pero mi tabata haña nan siñansanan konfuso, i loke mi a siña no a korigí mi punto di bista eróneo riba moralidat.
E tempu ei, por lo general hende tabata aseptá ku fornikashon ta malu. Pero ami, meskos ku hopi otro hende, a kere ku ta solamente hende ku ta tene relashon seksual ku vários partner ta fornikadó. Pues, dos persona no kasá ku a limitá nan aktividat seksual na otro no tabata kometé piká. (1 Korintionan 6:9, 10; Hebreonan 13:4) E kreensia ei tabata un di e motibunan pakiko mi a haña seis yu sin kasa.
Mi Progreso Spiritual
Na 1965, Vaslyn Goodison i Ethel Chambers a bin biba den e komunidat di Bath, no muchu leu for di esun di nos. Nan tabata pionero, òf predikadó di tempu kompletu di Testigunan di Yehova, i un dia nan a papia ku mi tata. El a aseptá nan oferta di un estudio di Beibel. Si mi tabata na kas ora nan a bini, nan tabata papia ku mi tambe. Ounke mi tabata deskonfiá Testigunan di Yehova bastante, mi a disidí di studia Beibel ku nan pa proba nan ku nan ta robes.
Mi tabata hasi hopi pregunta durante e estudio, i e Testigunan tabata kontestá nan tur ku uso di Beibel. Ku nan yudansa mi a bin haña sa ku e mortonan ta inkonsiente i ku nan no ta sufri den fièrnu. (Eklesiastés 9:5, 10) Mi a siña tambe tokante e speransa di bida eterno den Paradeis riba tera. (Salmo 37:11, 29; Revelashon 21:3, 4) Ounke mi tata a stòp di studia Beibel, mi a kuminsá asistí na e reunionnan di e kongregashon lokal di Testigunan di Yehova. E forma pasífiko i ordená den kua nan tabata tene e reunionnan ei a laga mi siña mas tokante Yehova. Tambe mi a asistí na e asambleanan di sirkuito i kongresonan di distrito, esta, reunionnan mas grandi ku e Testigunan ta selebrá. Tur e instrukshon bíbliko aki a desaroyá den mi un deseo fuerte pa adorá Yehova den un forma aseptabel. Pero mi tabatin un opstákulo.
E tempu ei, mi tabata biba akompañá ku e tata di tres di mi seis yunan. Mi a siña den Beibel ku Dios ta kondená relashon seksual pafó di matrimonio, i mi konsenshi a kuminsá molestiá mi. (Proverbionan 5:15-20; Galationan 5:19) Segun ku mi amor pa e bèrdat a krese, mi a anhelá pa kambia mi bida na armonia ku e lei di Dios. Finalmente, mi a tuma un desishon. Mi a bisa mi kompañero di bida ku sea nos ta kasa òf nos ta kibra e relashon. Ounke mi kompañero di bida no a aseptá mi kreensianan, nos a kasa ofisialmente dia 15 di ougùstùs 1970, sinku aña despues ku e Testigunan a papia ku mi pa promé biaha. Na desèmber di aña 1970 mi a simbolisá mi dedikashon na Yehova mediante boutismo bou di awa.
Pa loke ta sirbishi di vèlt, hamas lo mi lubidá e promé dia ku mi a sali pa prediká. Mi tabata nervioso i mi no tabata sa kon pa kuminsá un kòmbersashon over di Beibel. Eigenlijk, mi a haña un alivio ora e promé doño di kas a kaba nos kòmbersashon mesora. Pero, djis despues mi no tabatin nèrvio mas. Na fin di e dia ei mi tabata masha kontentu ya ku mi a
papia brevemente ku vários hende tokante Beibel i a laga algun di nos publikashonnan basá riba Beibel serka nan.Mi A Mantené Mi Famia Spiritualmente Fuerte
Pa 1977 mi a haña dos yu mas. Awor mi tabatin ocho. Mi tabata determiná pa hasi mi bèst pa yuda mi famia sirbi Yehova. (Josué 24:15) P’esei mi a traha duru pa kondusí un estudio regular di Beibel ku mi famia. Tin biaha, debí na kansansio, mi tabata kabishá miéntras un di e muchanan tabata lesa un paragraf na bos haltu, i e muchanan tabatin ku lanta mi. Pero kansansio físiko nunka a stroba nos di studia Beibel komo famia.
Tambe, hopi biaha mi tabata hasi orashon ku mi yunan. Asina ku nan tabatin sufisiente edat, mi a siña nan hasi orashon na Yehova riba nan mes. Mi a hasi sigur ku kada un di nan a hasi un orashon personal promé ku nan a bai drumi. Mi tabata hasi orashon ku kada yu ku tabata muchu yòn pa hasi orashon.
Na promé instante mi esposo no tabata ke pa mi bai reunion di kongregashon ku e muchanan. Sin embargo, ora el a realisá ku ta é lo tabatin ku wak e muchanan ora mi a bai reunion, e no a protestá muchu mas. Anochi, e tabata gusta sali bai serka su amigunan, pero e idea di bai ku ocho yu huntu kuné no a sint’é bon! Despues, asta el a kuminsá yuda mi prepará e muchanan pa bai Salòn di Reino.
Pronto e muchanan a kustumbrá bai tur e reunionnan di kongregashon i partisipá den e sirbishi públiko. Durante nan fakansi di zomer, hopi bes nan tabata sali den e trabou di prediká huntu ku e pioneronan, òf predikadónan di tempu kompletu, den e kongregashon. Esaki a yuda mi yunan desaroyá un amor di kurason pa e kongregashon i pa e trabou di prediká.—Mateo 24:14.
Tempu di Prueba
Pa haña poko mas entrada p’e famia, mi esposo a kuminsá biaha bai afó pa buska trabou. E tabata bai laga e famia pa periodonan largu pero tabata bini bèk regularmente. Pero na 1989, el a bai i no a bolbe mas. Manera mi a menshoná anteriormente, e pèrdida di mi kasá tabata un sla duru pa mi. Hopi anochi mi Isaias 54:4 i 1 Korintionan 7:15 a duna mi pas mental i e forsa pa dal bai den bida. Den e kongregashon kristian, famia- i amigunan tambe a apoyá mi emoshonalmente i materialmente. Mi ta masha gradisidu na Yehova i su pueblo pa nan yudansa.
tabata yora i hasi orashon ferviente na Yehova pa haña konsuelo i perseveransia, i mi a sinti ku el a kontestá mi orashonnan. Tekstonan maneraNos a haña nos ku mas prueba. Un di mi yu muhénan a ser ekspulsá for di e kongregashon pa motibu di kondukta no-bíbliko. Mi ta stima tur mi yunan masha hopi, pero mi lealtat na Yehova ta bini na promé lugá. Pues durante e tempu ei, ami ku mi otro yunan tabata sigui e instrukshon estrikto di Beibel enkuanto kon pa trata ku personanan ekspulsá. (1 Korintionan 5:11, 13) Nos a risibí hopi krítika di hende ku no tabata komprondé nos posishon. Sin embargo, despues ku mi yu muhé a ser restorá den e kongregashon, su esposo a bisa mi ku nos posishon firme pa prinsipionan di Beibel a impreshon’é. Awor e ta sirbi Yehova huntu ku su famia.
Konfrontá ku Problema Finansiero
Ora mi esposo a bai laga nos, mi no tabatin un entrada fiho ni e famia no tabata risibí su sosten finansiero mas. E situashon aki a siña nos pa keda kontentu ku un bida simpel i pa duna mas balor na rikesa spiritual ku na empeñonan material. Segun ku e yunan a siña stima i yuda otro, nan a hala sera mas ku otro. Ora esnan mas grandi a kuminsá traha, di nan mes nan tabata yuda nan rumannan mas chikitu. Mi yu muhé mayó, Marseree, a yuda su ruman muhé menor, Nicole, kaba ku su skol sekundario. Ademas, ami por a manehá un toko chikitu. E poko entrada ku mi tabata haña for di dje a yuda mi perkurá pa algun di nos nesesidatnan material.
Nunka Yehova no a bandoná nos. Un biaha mi a bisa un ruman muhé kristian ku debí na nos situashon finansiero nos lo no por a asistí na e kongreso di distrito. El a kontestá mi: “Ruman Val, ora bo tende ku lo tin un kongreso, kuminsá prepará! Yehova ta proveé pa bo.” Mi a sigui su konseho. Yehova a proveé, i el a sigui hasi esei. Nunka nos famia a pèrdè un asamblea òf un kongreso pa falta di plaka.
Na 1988, orkan Gilbert a dal Jamaica, i nos a bandoná nos kas en buska di refugio den un lugá mas sigur. Ora e bientunan a baha un tiki, ami ku mi yu hòmber a sali for di e área di refugio pa bai wak kiko a sobra di loke un tempu tabata nos kas. Segun ku nos tabata buska den e ruinanan, mi a mira algu ku mi kier a purba skapa. Diripiente e bientunan a lanta atrobe, pero ainda mi tabatin e kos den mi man. “Mami, pone e televishon abou. Ta esposa di Lòt Mami ta anto?” (Lukas 17:31, 32) E komentario ei di mi yu hòmber a yuda mi haña mi sano huisio bèk. Mi a benta e televishon papa muhá di áwaseru abou, i nos tur dos a kore bai na un lugá mas sigur.
Aworakí mi ta tembla ora mi kòrda kon mi a riska mi bida pa un televishon. Pero ora mi pensa riba e komentario ku mi yu hòmber a hasi na e okashon ei ku a mustra mi kon alerto e ta den sentido spiritual, mi kurason ta yena ku goso. Dor di e entrenamentu bíbliko ku el a risibí di e kongregashon kristian, e por a yuda mi evitá di perhudiká mi mes físikamente i tal bes spiritualmente.
E orkan a destruí nos kas i nos pertinensianan, i tambe el a kaba ku nos ánimo.
Despues nos rumannan kristian a yega. Nan a animá nos pa enfrentá e pèrdida aki ku konfiansa den Yehova i pa keda aktivo den sirbishi, i nan a yuda nos rekonstruí nos kas. E trabou amoroso ei, sin interes personal, ku boluntarionan Testigu di Jamaica i di eksterior a hasi, a konmové nos profundamente.Nos A Pone Yehova na Promé Lugá
Despues ku mi di dos yu, Melaine, a kaba skol, el a sirbi komo pionero. Despues el a aseptá un invitashon pa sirbi komo pionero den un otro kongregashon, lokual a nifiká ku lo e tabatin ku kita for di trabou. Ounke e trabou ei a permitié yuda nos famia bon den sentido finansiero, nos a konfia ku Yehova lo a perkurá pa nos, basta kada un di nos a pone interesnan di Reino na promé lugá. (Mateo 6:33) Despues, mi yu hòmber Ewan tambe a risibí un invitashon pa sirbi komo pionero. E tabata apoyá e famia finansieramente, pero nos a insistí p’e aseptá e invitashon i a dese’é e bendishon di Yehova. Nunka mi a desanimá mi yunan di amplia nan sirbishi di Reino, i e sobrá di nos ku a keda kas nunka a falta e nesesidatnan básiko di bida. Mas bien, nos goso a oumentá, i tin biaha, nos por a yuda otronan den nesesidat.
Awe, ta un gran goso pa mira mi yunan “kana den e bèrdat.” (3 Juan 4) Un di mi yu muhénan, Melaine, ta kompañando su esposo aktualmente den e sirbishi biahero komo superintendente di sirkuito. Mi yu muhé Andrea i su esposo ta sirbi komo pioneronan spesial, i e ta kompañá su kasá ora e ta bishitá e kongregashonnan komo superintendente di sirkuito supstituto. Mi yu hòmber Ewan i su kasá ta sirbi komo pioneronan spesial, i e ta ansiano di kongregashon. Un otro yu muhé, Ava-Gay, ta traha huntu ku su kasá na e sukursal di Testigunan di Yehova na Jamaica. Jennifer, Genieve i Nicole ta sirbi huntu ku nan esposonan i yunan komo miembronan aktivo den nan respektivo kongregashonnan. Marseree ta biba huntu ku mi, i aworakí nos dos ta asistí na Kongregashon Port Morant. Mi bendishonnan ta grandi, pasobra tur mi ocho yunan ta sigui adorá Yehova.
Atraves di añanan mi a kuminsá haña problemanan ku salú. Awor mi ta lucha ku reumatismo di artrítis, pero ainda mi ta disfrutá di mi sirbishi komo pionero. Pero pa algun tempu kaba a bira difísil pa mi kana den mi bisindario pasobra e ta yen di seru. Tabata hopi duru pa mi sali den sirbishi. Mi a purba kore un baiskel i a haña ku esei ta mas fásil ku kana. P’esei mi a kumpra un baiskel segunda mano i a kuminsá us’é. Na prinsipio no tabata fásil pa mi yunan mira nan mama ku artrítis kore baiskel. Pero nan tabata masha kontentu di mira mi sigui prediká manera mi kurason a deseá.
Mi ta sinti hopi goso ora mi mira hende ku mi a studia Beibel kuné aseptá e bèrdat di Beibel. Semper mi ta pidi Yehova yuda henter mi famia keda fiel na dje atraves di e tempu di fin aki i pa eternidat. Mi ta alabá i ta gradisí Yehova, e Gran ‘Skuchadó di orashon,’ pa a permití mi enfrentá e reto di lanta mi ocho yunan den su kamindanan.—Salmo 65:2.
[Plachi na página 10]
Ku mi yunan, nan kasánan i mi nietunan
[Plachi na página 12]
Awor mi ta sali den sirbishi riba baiskel