Angelnan—Ken Nan Ta

E MONARKA di un imperio poderoso no por a kere su bista. Tres hòmber sentensiá na morto den un kandela feros a ser reskatá for di gara di morto! Ken a salba nan? E rei mes a bisa e tres personanan reskatá aki: “Bendishoná sea [boso Dios], kende a manda su angel i a libra su sirbidónan ku a pone nan konfiansa den dje.” (Daniel 3:28) E gobernante babilonio aki di mas ku 2.000 aña pasá tabata testigu di un liberashon efektuá dor di un angel. Miónes di hende den pasado tabata kere den angel. Awe hopi hende no solamente ta kere ku angel ta eksistí sino ta sinti tambe ku di un òf otro manera angelnan tin influensia riba nan. Ken e angelnan ta, i di unda nan a bini?

Segun Beibel, angelnan ta spiritu, meskos ku Dios mes ta un Spiritu. (Salmo 104:4, NW; Juan 4:24) E famia di angel ta grandi, nan ta miónes na kantidat. (Revelashon 5:11) I nan tur ta “poderoso den fortalesa.” (Salmo 103:20) Ounke angelnan ta meskos ku hende den sentido ku nan tin un personalidat i a haña boluntat liber, nan bida no a kuminsá manera hende. De echo, Dios a krea angel hopi tempu promé ku el a krea hende, asta promé ku el a krea planeta Tera. Beibel ta bisa ku ora Dios a “pone fundeshi di mundu . . . e streanan di mardugá [angelnan] tabata kanta huntu, i tur e yu hòmbernan di Dios tabata grita di alegria.” (Jòb 38:4, 7) Siendo ku angelnan ta kreashon di Dios, nan ta ser yamá yunan di Dios.

Pa ki propósito Dios a krea angel? Nan a hunga un papel den historia humano? I si ta asina, kiko nan a yega di hasi? Nan tin influensia riba nos awe? Siendo ku angelnan tin boluntat liber, tin algun di nan ku a sigui den e kaminda di Satanas e Diabel i a hasi nan mes enemigu di Dios? Beibel ta duna kontestanan verídiko riba e preguntanan aki.