“E Sitanan di Mas Bieu Ku Nos Konosé di Tekstonan Bíbliko”

BINTISINKU aña pasá, arkeólogonan israelí a hasi un deskubrimentu espektakular. Den un kueba ku tabata ser usá komo santana na barika di e Vaye di Hinom na Yerusalèm, nan a haña dos ròl chikí di plata ku tekstonan bíbliko skirbí riba nan. E ròlnan tabata data di e tempu promé ku Babilonia a destruí Yerusalèm na aña 607 promé ku nos era. E tekstonan tabata sita parti di e bendishonnan ku tin pará na Numbernan 6:24-26. Dios su nòmber personal, Yehova, a aparesé vários biaha riba ámbos ròl. Ekspertonan a deskribí e inskripshonnan komo “e ophetonan di mas bieu ku nos konosé di e mundu di antigwedat ku ta dokumentá pasashinan for di e Beibel hebreo.”

Sin embargo, algun erudito a kuestioná e fecha i a argumentá ku e ròlnan tabata skirbí den siglo 2 promé ku nos era. Un di e faktornan ku a hiba na e desakuerdo aki tabata ku debí na e kalidat di e promé potrètnan ku a saka di e ròlnan masha chikí aki, no tabata posibel pa hasi un eksaminashon profundo di e detayenan. Pa resolvé e desakuerdo tokante e fecha, un tim di akadémiko a hasi un estudio nobo. Nan a usa e teknologianan di mas moderno riba tereno di fotografia i imágennan komputerisá pa produsí potrètnan digital di resolushon haltu di e ròlnan aki. Resientemente nan a publiká e resultadonan di e análisisnan nobo aki. Na ki konklushon e tim di akadémiko a yega?

Na promé lugá, nan a enfatisá ku e datonan arkeológiko ta apoyá un fecha promé ku e eksilio pa Babilonia. Nan opservashonnan paleográfiko—es desir, e manera di determiná e fecha di algu skirbí a base di e forma, estilo, posishon, sekuensia i direkshon di e lèternan—ta señalá na e mesun periodo, kual ta fin di siglo 7 promé ku nos era. Anto por último, ora konsiderá e ortografia, es desir, e estudio di spèling di palabra, e tim aki a konkluí: “E datonan ortográfiko den e plakatnan [ròlnan] ta konsistente ku e evidensia arkeológiko i paleográfiko pa loke ta e fecha di e inskripshonnan.”

E revista Bulletin of the American Schools of Oriental Research a resumí e análisis di e ròlnan di plata ei, konosí tambe komo e inskripshonnan di Ketef Hinnom, asin’aki: “Pues nos por rekonfirmá e konklushon ku mayoria erudito a yega na dje ku e inskripshonnan hañá riba e plakatnan aki ta konserbá e sitanan di mas bieu ku nos konosé di tekstonan bíbliko.”

[Rekonosementu pa Potrèt na página 32]

Kueba: Pictorial Archive (Near Eastern History) Est.; inskripshonnan: Potrèt © Museo di Israel, Yerusalèm; kortesia di Israel Antiquities Authority