Berdadero Prosperidat den e Mundu Nobo di Dios

DAVID, * un esposo i tata kristian, a muda bai Merka, sigur di su mes ku el a hasi esei pa bienestar di su famia. Ounke e no kier a bai laga su kasá i yunan atras, e tabata konvensí ku si e tabatin mas plaka, lo e por a perkurá un mihó bida pa nan tur. Pues el a aseptá un invitashon di su famianan na New York i a haña un trabou hopi lihé einan.

Pero segun ku lunanan tabata pasa, David su optimismo a kuminsá mengua. Práktikamente e no tabatin tempu mas pa aktividatnan spiritual i dado momento kasi el a pèrdè fe den Dios. Ta te despues ku el a kai den un tentashon inmoral el a bin realisá finalmente den ki situashon e tabata. Su enfoke riba prosperidat material pokopoko pero sigur a aleh’é for di loke realmente tabata importante p’e. E mester a hasi kambio.

Meskos ku David, tur aña hopi hende ta emigrá for di paisnan pober ku e speransa di drecha nan kondishon ekonómiko. Pero hopi bes, for di un punto di bista spiritual, nan ta  paga karu pa esei. Algun a puntra nan mes: ‘Un kristian por buska rikesa material i a la bes ser riku pa ku Dios?’ Eskritornan popular i lidernan religioso ta bisa ku esei ta posibel. Pero manera David i otro personanan a bin realisá, pa bo logra esun sin pèrdè e otro por ta hopi difísil.—Lukas 18:24.

Plaka No Ta Algu Malu

Plaka naturalmente ta un invento humano. Meskos ku hopi otro invento, riba su mes e no ta nada malu. De echo, e ta djis un medio di interkambio, i ora us’é na un manera adekuá, e por sirbi un bon propósito. Por ehèmpel, Beibel ta rekonosé ku “plaka ta protekshon,” foral kontra problemanan relashoná ku pobresa. (Eklesiastés 7:12) Aparentemente, por lo ménos pa algun hende, “plaka ta e kontesta pa tur kos.”—Eklesiastés 10:19.

E Skritura ta kondená flohera i ta boga pa trabou duru. Nos tin ku perkurá pa nos famianan yegá, i si nos tin algu èkstra, nos tin “algu pa kompartí ku esun ku ta den nesesidat.” (Efesionan 4:28; 1 Timoteo 5:8) Ademas, Beibel no ta promové un bida di rechasá tur komodidat; al kontrario, e ta animá nos pa disfrutá di nos poseshonnan. E ta bisa nos pa “risibí [nos] rekompensa” i gosa di e frutanan di nos trabou. (Eklesiastés 5:18-20) De echo, den Beibel tin vários ehèmpel di hòmber- i muhénan fiel ku tabata riku.

Hòmbernan Fiel Ku Tabata Riku

Abraham, un fiel sirbidó di Dios, a akumulá tounan grandi di bestia, hopi plata i oro, i un famia grandi di sientos di kriá. (Génesis 12:5; 13:2, 6, 7) E hòmber hustu Jòb tambe tabatin hopi rikesa. Su rikesa tabata konsistí di bestia, kriá, oro i plata. (Jòb 1:3; 42:11, 12) Asta segun normanan djawe e hòmbernan aki tabata riku, pero nan tabata riku pa ku Dios tambe.

Apòstel Pablo ta yama Abraham e ‘tata di tur esnan ku tin fe.’ Abraham no tabata ni pichiri ni muchu pegá na loke e tabatin. (Romanonan 4:11; Génesis 13:9; 18:1-8) Di igual manera, Dios mes a deskribí Jòb komo “perfekto [“sin kulpa,” NW] i rekto.” (Jòb 1:8) Semper e tabata kla pa yuda hende pober i afligí. (Jòb 29:12-16) Tantu Abraham komo Jòb a konfia den Dios i no den nan rikesa.—Génesis 14:22-24; Jòb 1:21, 22; Romanonan 4:9-12.

Rei Salomon ta un otro ehèmpel. Komo heredero di e trono di Dios na Yerusalèm, Dios a bendishon’é no solamente ku sabiduria, sino tambe ku rikesa abundante i gloria. (1 Reinan 3:4-14) Pa e mayor parti di su bida, e tabata fiel. Pero ora Salomon a bira hende grandi su “kurason no tabata kompletamente dediká na SEÑOR.” (1 Reinan 11:1-8) Realmente, su eksperensia tristu ta ilustrá algun di e trampanan  komun di prosperidat material. Laga nos konsiderá un par.

Trampanan di Prosperidat

E peliger di mas serio ta esun di bira un stimadó di plaka i loke plaka por kumpra. Rikesa ta lanta un hamber insasiabel den algun hende. Salomon, na kuminsamentu di su reinado, a tuma nota di e tendensia aki den hende. El a skirbi: “Esun ku ta stima plaka lo no keda satisfecho ku plaka, ni esun ku ta stima abundansia, ku su entrada. Esaki tambe ta banidat.” (Eklesiastés 5:10) Despues, tantu Hesus komo Pablo a spièrta kristiannan tokante e amor engañoso aki.—Marko 4:18, 19; 2 Timoteo 3:2.

Ora plaka bira nos interes prinsipal en bes di djis un medio pa yega na sierto kosnan, nos ta bira vulnerabel pa tur tipo di tentashon moral, manera gañamentu, ladronisia i traishon. Hudas Iskariot, un di Kristu su apòstelnan, a traishoná su doño pa apénas 30 pida plata. (Marko 14:11; Juan 12:6) Tin hende ku tin asina tantu amor pa plaka ku nan ta asta laga Dios i bai adorá plaka. (1 Timoteo 6:10) P’esei, semper kristiannan mester purba di ta franko ku nan mes tokante kiko ta nan berdadero motivashon pa yega na mas plaka.—Hebreonan 13:5.

Ademas, buskamentu di rikesa ta presentá peligernan mas sutil. Na promé lugá, ora un hende tin hopi rikesa, e tin e tendensia di konfia den su mes. Hesus a menshoná esaki ora el a referí na “e engaño di rikesa.” (Mateo 13:22) Di igual manera, e eskritor di Beibel Santiago a spièrta kristiannan pa no lubidá riba Dios ni ora nan ta plania nan aktividatnan komersial. (Santiago 4:13-16) Siendo ku plaka por parse di duna nos un midí di independensia, pa esnan ku tin e, semper ta eksistí e peliger di konfia den nan plaka en bes di den Dios.—Proverbionan 30:7-9; Echonan 8:18-24.

Na di dos lugá, manera David (menshoná anteriormente) a bin ripará, hopi bes buskamentu di rikesa ta eksigí asina tantu tempu i energia di un hende ku gradualmente e ta kuminsá alehá for di interesnan spiritual. (Lukas 12:13-21) Otro tentashon ku hende riku ta haña nan kuné konstantemente ta di usa loke nan tin prinsipalmente pa aktividatnan di plaser òf interesnan personal.

Ta Salomon su bida di luho desenfrená a pon’é pèrdè sano huisio i kai den sentido spiritual? (Lukas 21:34) E tabata sa ku Dios a prohibí su pueblo bon kla di kasa ku hende di e nashonnan stranhero. Tòg, na un dado momento e tabatin na tur rònt di 1.000 kasá i konkubina. (Deuteronomio 7:3) Ansioso pa komplasé su esposanan stranhero, el a purba forma un union di fe pa akomodá nan. Manera a ser menshoná anteriormente, pokopoko pero sigur, esei a alehá e kurason di Salomon for di Yehova.

E ehèmpelnan aki ta mustra klaramente ku Hesus su konseho ta verídiko: “Boso no por sirbi Dios i rikesa.” (Mateo 6:24) Pues kon un kristian por enfrentá ku éksito e desafionan ekonómiko ku mayoria hende ta konfrontá awe? Mas importante ainda, ki speransa tin pa un mihó bida den futuro?

Berdadero Prosperidat na Kaminda

Distinto di e patriarkanan Abraham i Jòb i e nashon di Israel, siguidónan di Hesus tin e enkargo pa “hasi tur e nashonnan disipel.” (Mateo 28:19, 20) Pa kumpli ku e enkargo ei nan mester dediká tempu i energia ku di otro manera lo a bai na interesnan di e mundu aki. P’esei, e klave pa éksito ta sinta den hasi loke Hesus a bisa nos pa hasi: “Buska promé e reino di Dios i su hustisia, i tur e kosnan aki lo wòrdu añadí na boso.”—Mateo 6:33.

Despues ku David a hera di pèrdè su famia, su fe i su relashon ku Dios, el a logra haña stabilidat den bida atrobe. Manera Hesus a primintí, ora David a bolbe kuminsá pone estudio di Beibel, orashon i sirbishi na promé lugá den su bida, tur otro kos a kuminsá mehorá. Su relashon ku su kasá i yunan a drecha  gradualmente. El a bolbe haña su goso i felisidat. Ainda e ta traha duru pasobra e no a bira riku. Pero su eksperensia doloroso a siñ’é algun lès balioso.

David a konkluí ku su desishon pa muda bai Merka no tabata esun di mas sabí, i el a determiná pa nunka mas laga plaka dominá su akshonnan. Awor e sa ku e kosnan di mas balioso den bida—un famia amoroso, bon amigu i un relashon ku Dios—no ta kosnan ku por kumpra ku plaka. (Proverbionan 17:17; 24:27, NW; Isaias 55:1, 2) En bèrdat, integridat moral ta muchu mas balioso ku rikesa material. (Proverbionan 19:1; 22:1) Huntu ku su famia, David ta determiná pa sigui pone e kosnan di mas importante na promé lugá.—Filipensenan 1:10, NW.

Esfuersonan humano pa edifiká un sosiedat berdaderamente próspero pero ku tin balornan moral a faya bes tras bes. Sin embargo, Dios a primintí ku su Reino lo perkurá pa un abundansia di e kosnan material i spiritual ku nos tin mester pa por tin un bida felis. (Salmo 72:16; Isaias 65:21-23) Hesus a siña ku pa un hende ta berdaderamente felis, na promé lugá e mester ta konsiente di su nesesidat spiritual. (Mateo 5:3, NW) Pues, sea ku nos ta riku òf pober, e mihó manera ku kualke un di nos por prepará pa e mundu nobo di Dios den futuro serkano ta di pone kosnan spiritual na promé lugá. (1 Timoteo 6:17-19) E mundu ei lo ta un sosiedat berdaderamente próspero tantu den sentido material komo spiritual.

[Nota]

[Plachinan na página 5]

Jòb a konfia den Dios, no den su rikesa

[Plachinan na página 7]

E kosnan di mas balioso den bida no ta kosnan ku por kumpra ku plaka