Bo Ta Manera un Palu di Lagani Auna?

DEN un pueblo den e kunukunan di Port Moresby, Papua Nueva Guinea, dos predikadó tabata regresando kas despues ku nan a kaba di prediká. Riba kaminda, nan a mira un bunita palu. E hòmber di mas edat a bisa: “Ata, un lagani auna!” Ku kara pa e hòmber mas yòn, el a agregá: “E nòmber ei ta nifiká ‘palu di tur aña.’ Distinto di hopi otro palu di e zona tropikal, tur aña e ta pèrdè su blachinan i ta parse di ta morto. Sin embargo, ora awa yobe, ta komo si fuera e ta biba bèk, e ta floria i bria den tur su splendor atrobe.”

Nos por siña un lès for di e lagani auna, òf palu di flamboyan, manera e ta ser yamá. Segun algun eksperto, e ta ser kontá entre e sinku palunan di flor di mas bunita na mundu. Ounke e ta pèrdè su flornan i su blachinan durante sekura, e palu ta mantené un reserva di awa. Su raisnan ta fuerte i por krese rònt di baranka ku ta hundu den tera. Dor di esaki e ta ankra su mes kontra bientu fuerte. Ku poko palabra, e ta bona dor di saka lo máksimo for di sirkunstansianan difísil.

Nos tambe por haña nos mes den sirkunstansianan ku ta pone e kalidat di nos fe na prueba. Kiko lo yuda nos perseverá? Meskos ku e palu di lagani auna, nos por apsorbá i mantené un reservá di e awa di bida di e Palabra di Dios. Nos tambe mester pega fuertemente na ‘nos baranka,’ Yehova, i na su organisashon. (2 Samuel 22:3) Berdaderamente, e palu di flamboyan òf lagani auna ta un bon rekordatorio ku si nos probechá di e provishonnan ku Yehova ta hasi disponibel, asta den un ambiente desfaborabel nos por mantené nos fortalesa i bunitesa spiritual. Hasiendo esei, nos lo “heredá e promesanan” ku el a hasi, inkluyendo esun di bida eterno.—Hebreonan 6:12; Revelashon 21:4.