Imitá Yehova Su Pasenshi

‘Yehova no ta tarda ku su promesa . . . ma e tin pasenshi.’—2 Pedro 3:9.

1. Ki regalo inkomparabel Yehova a ofresé hende?

YEHOVA a ofresé nos algu ku ningun otro hende no por ofresé nos. Algu sumamente atraktivo i balioso, sin embargo no ta un kos ku nos por kumpra ni traha pa gan’é. Loke e ta ofresé nos ta e regalo di bida eterno, lokual pa mayoria di nos ta nifiká biba pa semper riba un tera transformá den un paradeis. (Juan 3:16) Ki un delisia esei lo ta! E kosnan ku ta kousa asina tantu tristesa lo no t’ei mas: konflikto, violensia, pobresa, kriminalidat, malesa i asta morto. Hende lo biba den pas i union perfekto bou di e gobernashon amoroso di e Reino di Dios. Nos ta anhelá e Paradeis ei sinfin!—Isaias 9:6, 7; Revelashon 21:4, 5.

2. Dikon Yehova no a eliminá e mundu di Satanas ainda?

² Yehova tambe ta spera ansiosamente riba e tempu ku lo e establesé Paradeis riba tera. Esei ta asina pasobra Yehova ta stima hustisia i rektitut. (Salmo 33:5) E no tin ningun goso den mira un mundu indiferente òf ku ta kontra di su prinsipionan hustu, un mundu ku ta rechasá su outoridat i ta persiguí su pueblo. Sin embargo, tin motibunan válido pakiko e no a aktua ainda pa eliminá e mundu malbado di Satanas. E motibunan ei ta enserá kuestionnan moral ku tin keber ku su soberania. Yehova, den su manera di resolvé e kuestionnan aki, a desplegá un kualidat ku ta atraé nos na dje, un kualidat ku awe hopi hende no tin, esta, pasenshi.

3. (a) Kiko ta nifikashon di e palabranan griego i hebreo tradusí komo “pasenshi” den Beibel? (b) Ki preguntanan nos lo bai konsiderá?

³ Tin un palabra griego den Beibel ku literalmente ta nifiká “largura di spiritu òf di estado emoshonal” i pues ku frekuensia e ta ser tradusí tambe komo “gran pasenshi” i “pasenshi.” Un parti integral di e palabra “pasenshi” tantu na griego komo na hebreo ta enserá e idea di toleransia i tarda pa rabia. Kon Yehova su pasenshi ta benefisiá nos? Ki lèsnan nos por siña for di e pasenshi i perseveransia di Yehova i di su sirbidónan fiel? Kon nos sa ku Yehova su pasenshi tin límite? Laga nos mira.

Konsiderá Yehova Su Pasenshi

4. Kiko apòstel Pedro a skirbi relashoná ku Yehova su pasenshi?

⁴ Apòstel Pedro a skirbi relashoná ku Yehova su pasenshi: “No laga di ripará esun echo aki, stimánan, ku pa Señor ún dia ta meskos ku mil aña, i mil aña meskos ku ún dia. Señor no ta tarda ku su promesa manera algun tin esaki pa tardansa, ma e tin pasenshi pa ku boso, i no kier pa ningun hende bai pèrdí, ma pa tur bin na repentimentu.” (2 Pedro 3:8, 9) Tuma nota di dos punto ku a keda ekspresá den e versíkulonan aki ku por yuda nos komprondé Yehova su pasenshi.

5. Kon Yehova su punto di bista di tempu ta influensiá loke e ta hasi?

⁵ E promé punto ta ku Yehova no ta mira tempu manera nos ta mir’é. Pa Esun ku ta biba pa semper, mil aña ta manera un dia. E no ta ser kontrolá òf preshoná dor di tempu, pero e no ta slow pa aktua tampoko. Yehova su sabiduria no tin límite, pues e sa presisamente kua ta e mihó tempu pa aktua na benefisio di tur esnan enbolbí, i ku pasenshi e ta warda pa e dia ei yega. Sin embargo, nos no mester konkluí ku Yehova no tin kunes ku e sufrimentu ku su sirbidónan kisas ta  eksperensiá durante e tempu ku e ta warda pa aktua. E ta un Dios di “miserikòrdia tierno,” e personifikashon di amor. (Lukas 1:78; 1 Juan 4:8) E tin e poder pa deshasí, kompletamente i permanentemente, di tur daño kousá pa e sufrimentu temporal ku el a permití.—Salmo 37:10.

6. Kiko nos no mester konkluí tokante Dios, i dikon nò?

⁶ Naturalmente no ta fásil pa warda riba algu ku bo ta anhelá. (Proverbionan 13:12) P’esei, ora hende no ta kumpli umbes ku loke nan primintí, otro hende kisas ta konkluí ku nan no tin intenshon di kumpli ku nan promesa. Lo no ta sabí pa pensa esei di Dios! Si nos ekibokadamente ta mira Dios su pasenshi komo tardansa, e ora ei segun ku tempu ta pasa nos fásilmente por kuminsá duda i bira desanimá, i nos ta kore e riesgo di bira spiritualmente floho. Loke por ta asta pió ta ku nos por ser engañá dor di esnan ku anteriormente Pedro a spièrta pa tene kuidou ku nan, esta, bofonadónan òf hende sin fe. E personanan ei ta bisa na forma di bofon: “Unda e promesa di su binida ta? Pasobra desde ku e tatanan a muri, tur kos ta keda meskos ku nan tabata for di prinsipio di kreashon.”—2 Pedro 3:4.

7. Kon Yehova su pasenshi ta konektá ku su deseo pa hende repentí?

⁷ Un di dos punto ku nos por saka for di e palabranan di Pedro ta ku Yehova tin pasenshi pasobra e ke pa tur hende bin na repentimentu. Esnan ku kabesuramente ta nenga di bira for di nan mal kamindanan lo ser ehekutá na man di Yehova. Sin embargo, Dios no tin plaser den e morto di e malbado. Mas bien, e ta alegrá pa mira hende repentí, bira bèk for di nan mal kamindanan i sigui biba. (Ezekiel 33:11) Ta p’esei e tin pasenshi i ta manda su sirbidónan bai prediká e bon nobo den henter e tera, di manera ku hende por haña tur oportunidat pa sigui biba.

8. Kon Dios su pasenshi ta bisto den su trato ku e nashon di Israel?

⁸ E pasenshi di Dios ta bisto tambe den su trato ku e antiguo nashon di Israel. Pa siglonan largu el a soportá nan desobedensia. Pa medio di su profetanan, el a urgi e nashon bes tras bes: “Bira for di boso mal kamindanan i warda mi mandamentunan, mi statutonan, konforme henter e lei ku mi a ordená boso tatanan, i ku mi a manda pa boso pa medio di mi sirbidónan, e profetanan.” Ku ki  resultado? Lamentablemente, “nan no a skucha.”—2 Reinan 17:13, 14.

9. Kon Hesus su pasenshi a reflehá e pasenshi di su Tata?

⁹ Por último, Yehova a manda su Yu, kende a hasi tur su posibel pa purba konvensé e hudiunan ku nan mester rekonsiliá nan mes ku Dios. Hesus su pasenshi a reflehá perfektamente e pasenshi di su Tata. Hesus, sabiendo ku djis nan lo a mat’é, tòg a lamentá: “O Yerusalèm, Yerusalèm, abo ku ta mata e profetanan i ta piedra esnan ku ta wòrdu mandá serka dje! Kuantu biaha mi no tabata kier a hunta bo yunan, manera un galiña ta hunta su puitunan bou di su alanan, i boso no tabata kier.” (Mateo 23:37) E palabranan konmovedor aki no ta palabranan di un hues masha severo ku ta ansioso pa kastigá hende, sino mas bien palabranan di un amigu amoroso ku tin pasenshi ku hende. Hesus, meskos ku su Tata den shelu, tabata ke pa e hendenan repentí i asina skapa huisio desfaborabel. Algun di nan a reakshoná faborablemente riba e spièrtamentunan di Hesus i a skapa e huisio teribel ku a bin riba Yerusalèm na aña 70 di nos era.—Lukas 21:20-22.

10. Den ki manera Dios su pasenshi a benefisiá nos?

¹⁰ Dios su pasenshi no ta un kos realmente maravioso? Apesar di e magnitut di desobedensia humano, Yehova a duna kada un di nos, huntu ku miónes di otro hende, e oportunidat pa siña konos’é i aseptá e speransa di salbashon. P’esei Pedro a skirbi e rumannan kristiannan: “Konsiderá e pasenshi di nos Señor komo salbashon.” (2 Pedro 3:15) Nos no ta gradisidu ku Yehova su pasenshi a duna nos e oportunidat pa haña e kaminda di salbashon? Nos ta pidié den orashon p’e sigui tene pasenshi ku nos segun ku nos ta sirbié kada dia?—Mateo 6:12.

11. Un komprondementu di Yehova su pasenshi lo motivá nos pa hasi kiko?

¹¹ Unabes nos komprondé dikon Yehova ta tene pasenshi, esei ta yuda nos warda ku pasenshi riba e salbashon ku lo e trese. Nunka nos lo konkluí ku e ta tarda pa kumpli ku su promesanan. (Lamentashon 3:26) Segun ku nos ta sigui pidi den orashon pa e Reino di Dios bin, nos ta konfia ku Dios sa kua ta e mihó tempu pa kontestá e orashon ei. Ademas, nos ta sinti nos motivá pa imitá Yehova dor di mustra mesun pasenshi kuné den nos trato ku nos rumannan i ku e hendenan ku nos ta prediká na dje. Nos tampoko no ke pa ningun bai destruí sino mas bien ta deseá pa nan repentí i kompartí nos speransa di bida eterno.—1 Timoteo 2:3, 4.

Konsiderá e Pasenshi di e Profetanan

12, 13. Di akuerdo ku Santiago 5:10, kon profeta Isaias a demostrá gran pasenshi?

¹² Un análisis di Yehova su pasenshi ta yuda nos apresiá e kualidat ei i a la bes kultiv’é. No ta fásil pa hende imperfekto kultivá pasenshi, pero e ta posibel. Nos ta siña for di e sirbidónan di Dios di pasado. Disipel Santiago a skirbi: “Rumannan, tuma e profetanan ku a papia den e nòmber di Señor komo un ehèmpel di sufrimentu i di pasenshi.” (Santiago 5:10) Ta un konsuelo i animashon pa sa ku otro hende a enfrentá ku éksito e problemanan ku nos tin ku enfrentá.

¹³ Por ehèmpel, profeta Isaias definitivamente tabatin mester di pasenshi den su asignashon. Yehova a indiká esei na dje bisando: “Bai, i bisa e pueblo aki: ‘Sigui skucha, ma no komprondé; sigui mira, ma no ripará.’ Hasi kurason di e pueblo aki insensitivo, hasi nan orea surdu i nan wowo skur, pa nan no mira ku nan wowo, tende ku nan orea, komprondé ku nan kurason, i repentí i wòrdu kurá.” (Isaias 6:9, 10) Apesar ku e pueblo tabata indiferente, Isaias ku pasenshi a sigui deklará Yehova su mensahenan di spièrtamentu durante por lo ménos 46 aña! Den mesun manera, pasenshi lo yuda nos perseverá den nos trabou di prediká e bon nobo, apesar ku hopi hende lo no aseptá e bon nobo.

14, 15. Kiko a yuda Jeremias trata ku kontratempu i desanimashon?

 ¹⁴ Klaru ku segun ku e profetanan tabata kumpli ku nan ministerio, nan no solamente mester a trata ku hende indiferente; nan a asta sufri maltrato na e hendenan su man. Jeremias, por ehèmpel, nan a pone den sepa, ser’é den prizon i tambe tir’é den un renbak. (Jeremias 20:2; 37:15; 38:6) El a sufri e maltrato aki na man di nèt e hendenan ku e kier a yuda. Sin embargo, Jeremias no a bira amargá ni a tuma represaya. Ku pasenshi el a perseverá durante vários dékada.

¹⁵ Persekushon i bofon no a silensiá Jeremias, i tampoko nan no ta silensiá nos awe. Klaru ku de bes en kuando nos por sinti nos desanimá. Jeremias a sintié desanimá. El a skirbi: “E palabra di SEÑOR a bira un reproche i bofon pa mi henter dia.” Anto Jeremias a bisa: “Lo mi no kòrda riba dje, ni papia mas den su nòmber.” Kiko a pasa e ora ei? Bèrdat Jeremias a stòp di prediká? El a sigui bisa: “Esei [e palabra di Dios] ta bira manera kandela den mi kurason, será den mi wesunan; mi ta kansá di ten’é paden, i mi no por mas.” (Jeremias 20:8, 9) Tuma nota ku ora Jeremias a konsentrá riba e bofon ku hende a hasi di dje, el a pèrdè su goso. Ora el a bai meditá riba kon maravioso i importante e mensahe ta, el a haña su goso bèk. Ademas, Yehova tabata ku Jeremias “manera un guerero poderoso,” dunand’e e fortalesa pa proklamá e palabra di Dios ku selo i kurashi.—Jeremias 20:11.

16. Kon nos por mantené goso den nos trabou di prediká e bon nobo?

¹⁶ Profeta Jeremias a haña goso den su trabou? Definitivamente ku sí! El a bisa Yehova: “Bo palabranan a wòrdu hañá i mi a kome nan, i bo palabranan a bira un goso pa mi i e delisia di mi kurason; pasobra mi a wòrdu yamá na bo nòmber, o SEÑOR.” (Jeremias 15:16) Jeremias a alegrá den su privilegio di por a representá e Dios berdadero i prediká su palabra. Nos tambe por alegrá. Es mas, nos ta alegrá, meskos ku e angelnan den shelu, ya ku mundialmente masha hopi hende ta aseptá e mensahe di Reino, ta repentí i ta subi e kaminda ku ta hiba na bida eterno.—Lukas 15:10.

“E Perseveransia di Jòb”

17, 18. Den ki manera Jòb a perseverá, i kiko tabata e resultado?

¹⁷ Despues di a komentá riba e profetanan di pasado, disipel Santiago a skirbi: “Boso a tende di e perseveransia di Jòb i a mira e fin ku Señor tabatin na bista, ku Señor ta yen di kompashon i ta miserikòrdioso.” (Santiago 5:11) E palabra griego tradusí akinan komo “perseveransia” tin un nifikashon similar na e palabra ku Santiago a usa den e versíkulo anterior pa “pasenshi.” Señalando e diferensia entre e dos palabranan un erudito a skirbi: “Esun promé ta pasenshi ora ku hende ta abusá di nos, e último ta e perseveransia balente bou di kosnan ku ta angustiá nos.”

¹⁸ Jòb a eksperensiá angustia profundo. El a sufri ruina finansiero, e morto di su yunan i un malesa doloroso. Tambe e mester a lucha ku e akusashon falsu ku ta Yehova tabata kastig’é.  Jòb no a sufri den silensio; el a lamentá su situashon i asta a bisa indirektamente ku e tabata mas hustu ku Dios. (Jòb 35:2) Sin embargo, nunka el a pèrdè fe ni tampoko kibra su integridat. E no a maldishoná Dios manera Satanas a bisa ku lo el a hasi. (Jòb 1:11, 21) E resultado? Yehova “a bendishoná e último dianan di Jòb mas ku e proménan.” (Jòb 42:12) Yehova a restorá Jòb su salú, hasi su rikesa dòbel i bendishon’é ku un bida felis i satisfecho huntu ku su sernan kerí. Tambe Jòb su fiel perseveransia a yud’é komprondé Yehova mas mihó.

19. Kiko nos ta siña di e echo ku Jòb a perseverá ku pasenshi?

¹⁹ Kiko nos ta siña di e echo ku Jòb a perseverá ku pasenshi? Meskos ku Jòb, nos tambe por sufri di malesa i otro difikultatnan. Kisas nos no ta komprondé bon-bon dikon Yehova ta permití nos pasa dor di un sierto prueba. Sin embargo, di un kos nos por ta sigur: Si nos keda fiel, nos lo ser bendishoná. Yehova, sin faya, ta rekompensá esnan ku ta busk’é ku empeño. (Hebreonan 11:6) Hesus a bisa: “Esun ku a perseverá te na fin lo ta salbá.”—Mateo 10:22; 24:13.

‘E Dia di Yehova Lo Bin’

20. Dikon nos por tin sigur ku e dia di Yehova lo bin?

²⁰ Ounke Yehova ta tene pasenshi, e ta hustu tambe i lo e no tolerá maldat pa semper. Su pasenshi tin límite. Pedro a skirbi: “[Dios] no a spar e mundu antiguo.” Miéntras ku Dios a preservá Noe i su famia, el a trese un diluvio riba e mundu di maldat ei. Yehova a trese huisio riba Sodoma i Gomora tambe i a destruí nan kompletamente. E huisionan aki ta “un ehèmpel” pa e malbadonan di loke lo bin den futuro. Di esaki nos por tin sigur: ‘E dia di Yehova lo bin.’—2 Pedro 2:5, 6; 3:10.

21. Kon nos lo por demostrá nos pasenshi i perseveransia, i ki tópiko nos lo konsiderá den e siguiente artíkulo?

²¹ Pues anto, laga nos imitá Yehova su pasenshi dor di yuda otro hende bin na repentimentu pa asina kisas nan por salba. Laga nos imitá tambe e profetanan dor di deklará e bon nobo ku pasenshi apesar ku e hendenan ku nos ta prediká na dje ta indiferente. Ademas, nos por tin sigur ku Yehova lo bendishoná nos rikamente si nos perseverá apesar di prueba i mantené nos integridat meskos ku Jòb. Nos tin tur motibu pa alegrá den nos ministerio, foral ora ku nos tuma nota kon Yehova a bendishoná abundantemente e esfuersonan di su pueblo pa prediká e bon nobo den henter e mundu. Den e siguiente artíkulo nos lo mira esaki.

Bo Ta Kòrda?

• Dikon Yehova ta tene pasenshi?

• Kiko nos ta siña di e pasenshi di e profetanan?

• Kon Jòb a desplegá perseveransia, i kiko tabata e resultado?

• Kon bin nos sa ku Yehova su pasenshi tin límite?

[Preguntanan di Estudio]

[Plachi na página 18]

Hesus su pasenshi a reflehá perfektamente e pasenshi di su Tata

[Plachinan na página 20]

Kon Yehova a rekompensá Jeremias su pasenshi?

[Plachinan na página 21]

Kon Yehova a rekompensá Jòb su perseveransia?