“Un Testimonio na Tur Nashon”

“Boso lo ta mi testigunan . . . te na e parti mas alehá di mundu.”—ECHONAN 1:8.

1. Na ki tempu i na unda e disipelnan a tende e profesia di Mateo 24:14 pa promé biaha?

E PALABRANAN di Hesus ku ta pará skirbí na Mateo 24:14 ta asina konosí ku hopi di nos sa nan for di kabes. I ki un profesia realmente remarkabel esei ta! Imaginá bo kiko e disipelnan lo mester a pensa ora ku nan a tend’é pa promé biaha! Tabata aña 33 di nos era. E disipelnan tabatin rònt di tres aña huntu ku Hesus, i awor nan a bin Yerusalèm huntu kuné. Nan a mira su milagernan i a skucha su siñansanan. Ounke nan tabatin goso den e bèrdatnan presioso ku Hesus a siña nan, nan tabata sa bon-bon ku no ta tur hende a kompartí nan goso. Hesus tabatin enemigunan poderoso i ku hopi influensia.

2. Ki peliger- i retonan e disipelnan lo a konfrontá?

² Kuater disipel a kai sinta huntu ku Hesus riba Seru di Oleifi i a skucha ku sumo atenshon segun ku el a papia tokante e peliger- i retonan ku nan lo konfrontá. Mas promé, Hesus a bisa nan ku lo e ser matá. (Mateo 16:21) Awor el a splika ku nan tambe lo eksperensiá oposishon kruel i violento. El a bisa: “Nan lo entregá boso na tribulashon i lo mata boso, i tur nashon lo odia boso pa kousa di mi nòmber.” Pero esei no tabata tur kos. Profetanan falsu lo gaña hopi hende. Otro hende lo trompeká i lo traishoná otro i odia otro. Lo tin asta hende, de echo “hopi hende,” ku lo laga nan amor pa Dios i pa su Palabra fria.—Mateo 24:9-12.

3. Dikon e palabranan di Hesus na Mateo 24:14 ta realmente sorprendente?

³ Tabata despues di a menshoná e sirkunstansianan negativo ei ku Hesus a hasi un deklarashon ku lo mester a straña su disipelnan. E di: “E evangelio aki di e reino lo wòrdu prediká den henter mundu komo un testimonio na tur nashon, i e ora ei e fin lo yega.” (Mateo 24:14) Sí, e trabou ku Hesus a kuminsá den Israel, esta, di “duna testimonio di e bèrdat,” lo sigui i ekspandé rònt mundu. (Juan 18:37) Esei tabata un profesia realmente sorprendente! Pa ekstendé e obra ei na “tur nashon” so kaba lo tabata un reto; pa hasi esei miéntras ku “tur nashon lo odia” nan, lo no tabata nada otro ku un milager. Realisashon di e tarea inmenso aki lo a engrandesé no solamente Yehova su supremasia i poder, sino tambe su amor, miserikòrdia i pasenshi. Ademas, e obra ei lo duna su sirbidónan e oportunidat di demostrá nan fe i deboshon.

4. Ken a haña e tarea pa kumpli ku e trabou di prediká, i ki konsuelo Hesus a duna nan?

⁴ Hesus no a laga su disipelnan keda den ningun duda ku nan tabatin un trabou sumamente importante pa hasi. Promé ku el a subi na shelu el a aparesé na nan i a bisa: “Boso lo risibí poder ora spiritu santu bin riba boso, i boso lo ta mi testigunan na Yerusalèm i na henter Hudea i Samaria, i te na e parti mas alehá di mundu.” (Echonan 1:8) Klaru ku pronto mas hende lo djòin nan. Pero tòg e kantidat di disipel tabata tiki. Ki un gran konsuelo lo mester tabata pa nan di sa ku Dios su poderoso spiritu santu lo kapasitá nan pa kumpli ku e asignashon divino aki!

5. Kiko e disipelnan no tabata sa tokante e trabou di duna testimonio?

⁵ E disipelnan tabata sa ku nan mester a prediká e bon nobo i ‘hasi disipel di hende di tur nashon.’ (Mateo 28:19, 20) Pero nan no tabata sa kon kabal e testimonio lo tabata ni  ki ora e fin lo bin. Nos tampoko no sa. Esakinan ta kosnan ku ta Yehova so ta disidí. (Mateo 24:36) Unabes Yehova ta satisfecho ku e grado ku e testimonio a ser duná, lo e trese un fin na e mundu malbado aki. Ta e ora ei numa kristiannan lo ripará ku e trabou di prediká a sosodé te na e grado ku Yehova tabata ke. E disipelnan den promé siglo lo no por a imaginá nan e magnitut di e testimonio ku lo a ser duná den e tempu di fin aki.

E Testimonio Duná den Promé Siglo

6. Kiko a sosodé na Pentekòste di aña 33 i poko despues?

⁶ Den promé siglo, e trabou di prediká e Reino i di hasi disipel a produsí resultadonan asombroso. Riba e dia di Pentekòste di aña 33, rònt di 120 disipel tabata den un kamber ariba na Yerusalèm. Dios a drama su spiritu santu riba nan, apòstel Pedro a duna un diskurso motivador ku a splika e nifikashon di e milager aki, i rònt di 3.000 hende a bira kreyente i a ser batisá. Esei tabata apénas e prinsipio. Apesar di esfuersonan desididu di parti di e lidernan religioso pa para e predikashon di e bon nobo, ‘tur dia Yehova tabata agregá na e disipelnan esnan ku tabata wòrdu salbá.’ Den poko tempu, “e kantidat di e hòmbernan a bira komo sinku mil.” Despues di esei, “konstantemente tabata bin mas i mas hende aserka ku tabata kere den Señor, multitutnan di hòmber i muhé.”—Echonan 2:1-4, 8, 14, 41, 47; 4:4; 5:14.

7. Dikon e kombertimentu di Cornelio tabata un desaroyo signifikativo?

⁷ Aña 36 a mira un otro desaroyo signifikativo: kombertimentu i boutismo di Cornelio, un hòmber no-hudiu. Ora di dirigí apòstel Pedro na e hòmber temeroso di Dios aki, Yehova a indiká ku Hesus su mandamentu pa ‘hasi disipel di hende di tur nashon’ no tabata limitá na hudiunan den vários pais. (Echonan 10:44, 45) Kiko tabata e reakshon di esnan ku tabata hiba delantera? Ora e apòstelnan i ansianonan na Hudea a ripará ku mester a hiba e bon nobo na e paganonan tambe—esta na hende no-hudiu—nan a glorifiká Dios. (Echonan 11:1, 18) Miéntras tantu, e trabou di prediká a sigui duna fruta entre e hudiunan. Algun aña despues, posiblemente rònt di aña 58, tabatin aparte di e kreyentenan no-hudiu, ‘míles entre e hudiunan ku a kere.’—Echonan 21:20.

8. Kon e bon nobo ta influensiá personanan individual?

⁸ Ounke e oumento den kantidat di hende entre e kristiannan di promé siglo ta impreshonante, nunka nos no mester lubidá e personanan individual ku e sifranan ei ta representá. E mensahe bíbliko ku nan a tende tabata poderoso. (Hebreonan 4:12) El a kambia drástikamente e bida di esnan ku a asept’é. Hende a kuminsá hiba un bida moralmente limpi, a bisti e personalidat nobo i a wòrdu rekonsiliá ku Dios. (Efesionan 4:22, 23) Ta meskos awe. Anto tur esnan ku  aseptá e bon nobo tin e speransa maravioso di biba pa semper.—Juan 3:16.

Dios Su Kolaboradónan

9. Ki privilegio i responsabilidat e kristiannan di promé siglo a rekonosé ku nan tabatin?

⁹ E kristiannan di promé siglo no a tuma e mérito pa loke tabata ser lográ. Nan a rekonosé ku nan trabou di prediká tabata ser sostené dor di “e poder di spiritu santu.” (Romanonan 15:13, 19) Yehova tabata esun responsabel pa kresementu spiritual. Na mesun tempu, e kristiannan ei tabata sa ku nan tabatin e privilegio i responsabilidat di ser “Dios su kolaboradónan.” (1 Korintionan 3:6-9) P’esei, na armonia ku Hesus su konseho, nan a hasi tur nan esfuerso den e asignashon ku nan a haña.—Lukas 13:24.

10. Ki esfuerso algun di e kristiannan di promé a hasi pa duna un testimonio na tur nashon?

¹⁰ Pablo, komo “apòstel di e paganonan,” a biaha míles di kilometer riba tera i laman, establesiendo hopi kongregashon den e provinsia romano di Asia i na Gresia. (Romanonan 11:13) Tambe el a biaha bai Roma i posiblemente asta te Spaña. Miéntras tantu apòstel Pedro, konfiá ku “e evangelio na esnan sirkunsidá,” a biaha bai den e otro direkshon pa sirbi na Babilonia, ku e tempu ei tabata un lugá kaminda tabatin hopi hudiu. (Galationan 2:7-9; 1 Pedro 5:13) Entre e tantísimo personanan ku a laborá den e trabou di Señor tabatin muhénan manera Trifena i Trifosa. Beibel ta bisa di un otro muhé ku yama Pérsida, ku el “a traha duru den Señor.”—Romanonan 16:12.

11. Kon Yehova a bendishoná e esfuerso di e disipelnan?

¹¹ Yehova a bendishoná rikamente e esfuerso di e kristiannan ei i di otro trahadónan seloso. Ménos ku 30 aña despues ku Hesus a profetisá ku lo duna un testimonio na tur nashon, Pablo a skirbi ku e “evangelio” a ser “proklamá den henter kreashon bou di shelu.” (Kolosensenan 1:23) Akaso e fin a bin? Den un sentido, sí. El a bin riba e sistema di kosnan hudiu na aña 70 ora ku e ehérsitonan romano a destruí Yerusalèm huntu ku e tèmpel. Sin embargo, Yehova a disidí ku lo mester a duna un testimonio hopi mas grandi promé ku e trese un fin na henter e mundu malbado di Satanas.

E Testimonio Duná Awe

12. Kon na prinsipio e Studiantenan di Beibel a komprondé e mandamentu pa prediká?

¹² Durante e último parti di siglo 19 a restablesé adorashon puru, despues ku apostasia religioso a prevalesé pa un periodo largu. E Studiantenan di Beibel, manera Testigunan di Yehova tabata konosí e tempu ei, a komprondé bon kla e mandamentu pa bai hasi disipel den henter e tera. (Mateo 28:19, 20) Pa aña 1914, tabatin rònt di 5.100 persona ku tabata partisipá diligentemente den e aktividat di prediká, i e bon nobo a yega na 68 pais. Sin embargo, na prinsipio e Studiantenan di Beibel no a kapta e pleno nifikashon di Mateo 24:14. Pa fin di siglo 19, e Beibel, ku ta kontené e bon nobo òf evangelio, a ser tradusí  i imprimí na hopi idioma dor di sosiedatnan di Beibel i distribuí rònt mundu. P’esei durante algun dékada e Studiantenan di Beibel a rasoná ku ya kaba a duna un testimonio na e nashonnan.

13, 14. Ki komprondementu mas kla di Dios su boluntat i propósito a keda presentá den un edishon di E Toren di Vigilansia di 1928?

¹³ Pokopoko, Yehova a duna su pueblo un komprondementu mas kla di su boluntat i propósito. (Proverbionan 4:18) E Toren di Vigilansia di 1 di desèmber 1928, a bisa: “Akaso nos por bisa ku [e] distribushon di Beibel a efektuá e predikashon profetisá di e evangelio di e reino? Definitivamente ku nò! Apesar di e distribushon aki di Beibel ainda ta nesesario pa Dios su grupo chikitu di testigunan riba tera imprimí literatura ku ta splika Dios su [propósito] i bishita e kasnan kaminda a laga e Beibelnan aki. Si no hasi esaki, e hendenan ta keda ignorante di e echo ku e gobièrnu Mesiániko a keda establesí den nos tempu.”

¹⁴ E edishon ei di E Toren di Vigilansia a sigui bisa mas aleu: “Na 1920, . . . Studiantenan di Beibel a yega na un komprondementu korekto di e profesia di nos Señor na Mateo 24:14. E ora ei nan a realisá ku ‘e evangelio aki’ ku mester a ser prediká den henter mundu komo un testimonio na e hendenan no-hudiu òf na tur nashon, no tabata e evangelio di un reino ku tin ku bin ainda sino e evangelio ku ta deklará ku e Rei Mesiániko a kuminsá ku su reinado riba tera.”

15. Kon e trabou di duna testimonio a ekspandé desde e dékada di 1920?

¹⁵ E “grupo chikitu di testigunan” ei den e dékada di 1920 no a keda chikitu. Den e dékadanan ku a sigui, nan a identifiká “un multitut grandi” di ‘otro karné’ i a kuminsá trese nan huntu. (Revelashon 7:9; Juan 10:16) Awe tin rònt di 6.613.829 proklamadó di e bon nobo den 235 pais. Ki un kumplimentu maravioso di profesia! Nunka promé “e evangelio aki di e reino” a ser prediká na asina un gran eskala. Nunka promé tabatin asina tantu sirbidó fiel di Yehova riba tera.

16. Kiko a ser lográ den e aña di sirbishi ku a pasa? (Wak e rapòrt na página 27-30.)

¹⁶ Huntu, e inmenso multitut aki di Testigunan a traha duru durante e aña di sirbishi 2005. Nan a dediká mas ku mil mion ora na proklamashon di e bon nobo den 235 pais. Nan a hasi miónes di rebishita, i a kondusí miónes di estudio di Beibel. E trabou aki a ser efektuá dor di Testigunan di Yehova ku a duna libremente di nan tempu i rekurso pa kompartí e Palabra di Dios ku otro hende. (Mateo 10:18) Yehova, pa medio di su poderoso spiritu santu, ta sigui kapasitá su sirbidónan pa kumpli ku su boluntat.—Zakarias 4:6.

Trahando Duru pa Duna un Testimonio

17. Kon e pueblo di Yehova ta reakshonando riba e palabranan di Hesus tokante predikashon di e bon nobo?

¹⁷ Ounke kasi 2.000 aña a pasa desde ku Hesus a bisa ku e bon nobo lo ser prediká, e selo ku Dios su pueblo tin pa e trabou no a  mengua. Nos sa ku dor di perseverá den hasi loke ta bon, nos ta reflehá Yehova su kualidatnan di amor, miserikòrdia i pasenshi. Meskos ku Yehova, nos no ke pa ningun hende bai pèrdí ma pa nan repentí i wòrdu rekonsiliá ku Yehova. (2 Korintionan 5:18-20; 2 Pedro 3:9) Siendo ferviente ku e spiritu di Dios, Testigunan di Yehova ta sigui proklamá e bon nobo selosamente te na e finnan di tera. (Romanonan 12:11) Komo resultado, hende na tur parti ta aseptando e bèrdat i ta ahustá nan mes na Yehova su guia amoroso. Konsiderá un par di ehèmpel.

18, 19. Kua eksperensianan bo por konta di algun hende ku a reakshoná faborablemente riba e bon nobo?

¹⁸ Charles tabata un kunukero den parti wèst di Kenia. Na aña 1998 el a bende mas ku 8.000 kilo di tabako i a haña un sertifikado ku a nombr’é e Mihó Kunukero di Tabako. Rònt di e tempu ei el a kuminsá studia Beibel. Poko despues el a bin realisá ku un persona enbolbí den produkshon di tabako ta violá Hesus su mandamentu di stima bo próhimo. (Mateo 22:39) Ora ku Charles a yega na e konklushon ku ‘e mihó kunukero di tabako’ tabata en realidat ‘e mihó matadó,’ el a sprùit su matanan di tabako ku venenu. El a hasi progreso, te el a dediká su mes i a batisá i awor e ta un pionero regular i un sirbidó ministerial.

¹⁹ No tin duda ku Yehova ta sagudiendo e nashonnan pa medio di e testimonio mundial ku ta ser duná, anto hende—e rikesa òf kosnan deseabel di e nashonnan—ta biniendo serka dje. (Hageo 2:7) Pedro, kende ta biba na Portugal, a drenta un seminario tempu ku e tabatin 13 aña. Su meta tabata pa bira un misionero i siña hende Beibel. Sin embargo, despues di un tempu kòrtiku el a bandoná e seminario pasobra den e lèsnan nan tabata siña masha tiki di Beibel. Seis aña despues, e tabata studia sikologia na un universidat na Lisboa. E tabata biba serka su tanta ku tabata Testigu di Yehova, i e tanta a anim’é pa studia Beibel. Na e tempu ei, Pedro no tabata sa sigur si Dios ta eksistí, ni e no por a disidí si e mester tuma un estudio di Beibel òf nò. El a papia ku su profesor di sikologia tokante hende indesiso. E profesor a bis’é ku un di e prinsipionan di sikologia ta bisa ku hende ku no por tuma desishon tin e inklinashon di ta outodestruktivo. E ora ei Pedro a disidí di aseptá un estudio di Beibel. El a batisá resientemente i awor e mes ta kondusí estudio di Beibel ku otro hende.

20. Dikon nos por ta kontentu ku testimonio na e nashonnan ta ser duná na asina un gran eskala?

²⁰ Ainda nos no sa te kon leu testimonio lo ser duná na e nashonnan, tampoko nos no sa e dia ni e ora ku e fin lo bin. Úniko kos ku nos sa ta ku lo e ta pronto. Nos ta kontentu ku e predikashon di e bon nobo hasí na asina un gran eskala ta solamente un di e tantísimo indikashonnan ku e tempu ta serka pa e Reino di Dios remplasá gobièrnunan humano. (Daniel 2:44) Kada aña ku pasa, miónes di hende ta haña e oportunidat di reakshoná riba e bon nobo, i esaki ta glorifiká nos Dios, Yehova. Laga nos ta determiná pa keda fiel i pa huntu ku nos rumannan rònt mundu nos keda okupá den e trabou di duna testimonio na tur nashon. Hasiendo esei, nos lo salba tantu nos mes komo esnan ku skucha nos.—1 Timoteo 4:16.

Bo Ta Kòrda?

• Dikon Mateo 24:14 ta un profesia asina remarkabel?

• Ki esfuerso e kristiannan di promé siglo a hasi pa prediká, i ku ki resultado?

• Kon e Studiantenan di Beibel a bin komprondé ku ta nesesario pa duna testimonio na tur nashon?

• Kiko ta impreshoná bo ora ku bo konsiderá e aktividat di e pueblo di Yehova den e aña di sirbishi ku a pasa?

[Preguntanan di Estudio]

 [Tabèl na página 27-30]

RAPÒRT DI AÑA DI SIRBISHI 2005 DI TESTIGUNAN DI YEHOVA MUNDIALMENTE

 (Wak e edishon imprimí di e revista akí)

[Mapa/Plachinan na página 25]

Pablo a biaha míles di kilometer riba tera i laman afin di prediká e bon nobo

[Plachi na página 24]

Yehova a dirigí Pedro pa bai prediká na Cornelio i su famia