Historia di Bida

Yehova A Yuda Mi Hañ’é

SEGUN E RELATO DI FLORENCE CLARK

Mi tabata tene man di mi esposo ku tabata gravemente malu. Siendo anglikano, mi a resa pidi Dios pa mi esposo por rekuperá, i mi a primintí Dios ku si e no muri, lo mi buska Dios te ora mi hañ’é. E ora ei lo mi pertenesé na dje.

MI A nase komo Florence Chulung dia 18 di sèptèmber 1937, den e Komunidat Aborígeno Oombulgurri den e region alehá di Kimberley Plateau den Wèst Oustralia.

Mi tin masha grato rekuerdo di mi infansia, un tempu felis i sin niun preokupashon. Na e sentro di misionero di un misa, mi a siña un par di kos básiko tokante Dios i Beibel, pero ta mi mama tabata esun ku a siña mi prinsipionan kristian. E tabata lesa Beibel pa mi regularmente, i for di chikí mi a desaroyá un amor pa siña tokante Dios. Tambe mi tabata atmirá un tanta di mi ku tabata un misionero di su misa. Den mi kurason mi tabata sa ku lo mi kier a sigui den su pasonan.

Nos komunidat, konosí anteriormente komo Mishon Forrest River, tabatin areglo pa duna edukashon di klas un pa klas sinku. Mi tabata bai skol tur mainta pa dos ora so. Esaki a nifiká ku mi formashon eskolar tabata basta limitá, loke a preokupá mi tata. E tabata ke pa su yunan tin un mihó edukashon, p’esei el a disidí di bandoná Oombulgurri i muda nos famia pa e stat chikitu di Wyndham. E dia ku nos a bai tabata un dia tristu pa mi, pero na Wyndham mi por a bai skol henter dia pa e siguiente kuater añanan, for di 1949 te ku 1952. Mi ta masha  gradisidu ku mi tata a hasi posibel ku mi por a haña e edukashon ei.

Mama tabata traha pa e dòkter lokal, i ora ku mi a kaba skol na edat di 15 aña, e dòkter aki a ofresé mi un trabou komo verplegster na e hospital di Wyndham. Gustosamente mi a asept’é, pasobra e tempu ei tabata masha difísil pa haña trabou.

Algun aña despues mi a topa Alec, un hòmber blanku, kuidadó di bestia. Nos a kasa na 1964 den e stat chikitu di Derby, kaminda mi tabata asistí regularmente na e Iglesia Anglikano. Un dia Testigunan di Yehova a yama na mi porta. Mi a bisa nan ku definitivamente mi no tabata interesá i a pidi nan pa no pasa mas. Sin embargo, un kos ku nan a bisa mi a intrigá mi: Dios tabatin un nòmber personal, Yehova.

“Bo Mes No Por Hasi Bo Orashon?”

Na 1965 bida a kuminsá bira masha difísil. Mi kasá a haña tres aksidente basta serio; dos ku su kabai i un ku su outo. Afortunadamente, el a rekuperá di e leshonnan aki i a bai traha atrobe. Pero poko despues, el a bolbe haña un aksidente ku su kabai. E biaha aki, el a sufri leshonnan grave na su kabes. Ora mi a yega hospital, e dòkter a bisa mi ku mi kasá lo no skapa. Mi a keda hopi kibrá. Un verplegster a pidi e pastor katóliko lokal pa bin wak mi, pero e di: “Aworakí nò. Lo mi bin mañan!”

Mi tabata ke e pastor na mi lado pa resa ku mi i mi a bisa e sùr esaki. E di: “Ta ki falta bo? Bo mes no por hasi bo orashon?” Pues mi a kuminsá resa na e imágennan di e misa pidiendo nan yudansa, pero enbano. Tabata parse ku mi kasá tabata muriendo. Mi a pensa: ‘Kon mi ta hasi si mi kasá muri?’ Mi tabata preokupá tambe pa mi tres yunan, Christine, Nanette i Geoffrey. Ki klase di bida nan lo tin sin un tata? Felismente, tres dia despues mi kasá a rekobrá konosementu, i el a sali for di hospital dia 6 di desèmber 1966.

Ounke mi kasá a rekuperá remarkablemente bon, el a keda ku daño selebral. El a pèrdè un parti di su memoria i tabata mas inkliná na violensia i kambio di beis. E tabatin difikultat pa trata ku e muchanan i tabata bira masha agresivo si nan no reakshoná manera hende grandi. Tabata difísil pa kuid’é. Mi tabatin ku hasi kasi tur kos p’e. Asta mi a siñ’é lesa i skirbi atrobe. E tenshon di atendé kuné plùs ku mi otro debernan di kas a afektá mi, i mi a haña un inzinking. Shete aña despues di mi kasá su aksidente, nos a disidí di separá pa un tempu pa mi por a rekuperá mi salú.

Ami ku e muchanan a muda bai zùit na e stat Perth. Promé ku nos a muda, mi ruman muhé a kuminsá studia Beibel ku Testigunan di Yehova na Kununurra, un pueblito den parti Wèst di Oustralia. El a mustra mi un plachi den e buki E berdad cu ta hiba na bida eterna, * ku ta mustra e promesa bíbliko di e tera transformá den un paradeis. For di e buki aki el a mustra mi tambe ku Dios tin un nòmber, Yehova, i esaki a atraé mi. Komo ku nunka mi misa no a siña mi e kosnan aki, mi a disidí ku lo mi bèl e Testigunan di Yehova ora mi establesé mi mes na Perth.

Sin embargo, mi a vasilá un poko pa tuma kontakto ku nan. Anto un anochi, un hende a primi bèl di porta. Mi yu hòmber a bai wak ta ken i a kore bin bèk serka mi, bisando: “Mami, e hendenan ku bo ta bisa ku bo tin ku bèl ta akinan.” Mi tabata un tiki sorprendí i mi di kuné: “Bisa nan mi no t’ei!” Pero el a kontestá: “Mami, bo sa ku mi no tin mag di gaña.” M’a sinti mi malu ora mi yu a bisá mi asina i a disidí di bai porta. Segun ku mi a kumindá e bishitantenan, mi a ripará ku nan a keda wak mi un poko konfundí. Logá, nan a bin pa papia ku un otro persona, pero el a muda. Mi a invitá nan bin paden i a  bombardiá nan ku pregunta i a haña kontesta satisfaktorio for di Beibel.

E siguiente siman, mi a kuminsá studia Beibel regularmente ku e Testigunan, usando e buki E berdad cu ta hiba na bida eterna. E estudio a bolbe lanta mi amor pa siña tokante Dios. Dos siman despues mi a asistí na e Konmemorashon di e morto di Kristu Hesus. Mi a kuminsá asistí na reunion tur djadumingu, i no a tarda hopi ku mi a kuminsá asistí tambe na e reunionnan den siman. Tambe mi a kuminsá kompartí ku otro hende loke mi tabata siña. Mi a ripará ku yuda otro hende siña bèrdatnan bíbliko a mehorá mi salú mental i emoshonal. Seis luna despues mi a batisá na un kongreso di distrito na Perth.

Segun ku mi konosementu di Beibel a oumentá, mi a bin komprondé Yehova su punto di bista di e santidat di matrimonio, inkluso e prinsipio bíbliko ku tin na 1 Korintionan 7:13, ku ta bisa: “Un muhé ku tin un esposo ku no ta un kreyente, i e ta bai di akuerdo pa biba huntu kuné, e no mester manda su esposo bai.” E teksto bíbliko aki a motivá mi pa bai bèk serka Alec.

Di Regreso na Derby

Mi a yega Derby bèk dia 21 di yüni 1979, despues di tabata separá pa mas ku sinku aña for di mi kasá. Klaru ku mi tabatin sintimentunan miksto i tabata puntra mi mes kon lo e reakshoná riba mi regreso. Pa mi sorpresa, e tabata kontentu ku mi a bolbe bèk serka dje, ounke e tabata un poko desepshoná ku mi a bira un Testigu di Yehova. Mesora el a sugerí pa mi kuminsá bai su misa, esun ku ántes mi tabata asistí na dje promé ku mi a bai Perth. Mi a splik’é ku mi no por hasi esei. Mi a hasi mi bèst pa respetá su posishon komo kabes di kas i pa ser un bon esposa kristian. Mi a purba papia kuné tokante Yehova i su promesanan maravioso pa futuro, ma e no a mustra ningun interes.

Pero ku tempu Alec, no solamente a aseptá mi estilo nobo di bida sino tambe a kuminsá yuda mi finansieramente di manera ku mi por a asistí na kongreso i asamblea, i tambe na e reunionnan semanal. Mi a keda masha gradisidu ora ku el a kumpra un outo pa mi usa den e ministerio kristian. Den e parti alehá aki di Oustralia un outo ta un poseshon masha balioso. Hopi biaha rumannan hòmber i muhé, inkluso e superintendente di sirkuito, tabata keda drumi vários anochi na nos kas. Esaki a yuda Alec siña konosé vários Testigu, i parse ku el a gusta nan kompania.

Mi A Sinti Mi Manera Ezekiel

Mi tabata gusta e bishitanan di e rumannan, pero mi tabatin un reto mi dilanti. Mi tabata e úniko Testigu den e stat di Derby. E kongregashon di mas serka tabata na Broome, 220 kilometer leu. Pues mi a disidí di hasi mi bèst pa plama e bon nobo. Ku Yehova su yudansa, mi a organisá mi mes i a kuminsá duna testimonio di kas pa kas. Mi a haña e tarea ei difísil, pero mi a keda rekordá mi mes di e palabranan aki di apòstel Pablo: “Pa tur kos mi tin e forsa den birtut di esun ku ta duna mi poder.”—Filipensenan 4:13, NW.

E klero lokal no tabata masha kontentu ku mi aktividat, spesialmente mi predikashon na hende aborígen meskos ku mi. Nan a purba intimidá mi i stòp mi aktividat di prediká. Nan oposishon simplemente a hasi mi mas determiná pa sigui, i ku regularidat mi tabata hasi orashon na Yehova pa yuda mi. Hopi bes mi tabata kòrda e palabranan di animashon  ku Yehova a duna Ezekiel: “Mira, mi a hasi bo kara mes duru ku nan kara, i bo frenta mes duru ku nan frenta. Manera djamanta, mas duru ku piedra, mi a hasi bo frenta. No tene miedu di nan, ni desmayá den nan presensia.”—Ezekiel 3:8, 9.

Na vários okashon, dos hòmber ku a pertenesé na un grupo di iglesia tabata aserká mi ora mi tabata hasi kómpras. Nan tabata hasi bofon di mi na bos haltu i ku hopi bochincha, den un intento pa hala atenshon di e otro hendenan ku tabata kumpra kos. Mi tabata ignorá nan. Un biaha, nèt ora ku mi tabata hasiendo un rebishita serka un persona interesá, e pastor di e iglesia lokal a bin i a akusá mi di no ta kere den Hesus. El a ranka e Beibel for di mi man, sagudié den mi kara i push’é bèk den mi man. Mi a wak e stret den su kara, anto suavemente pero firme mi a sita Juan 3:16 i a sigur’é ku mi tin fe den Hesus. El a keda pasmá pa e manera yen di konfiansa ku mi a kontestá i el a kana bai sin bisa un pia di palabra.

Mi tabata gusta prediká na e aborígennan den e área di Derby. Un pastor katóliko lokal a purba stroba mi di papia ku e hendenan di un sierto komunidat, pero el a ser transferí. Pues tòg mi por a hiba e mensahe di Beibel pa nan. Semper mi kier a bira un misionero meskos ku mi tanta, i awor mi tabata hasi trabou di misionero, yudando otro hende siña tokante e Palabra di Dios. Hopi di e hendenan aborígen a reakshoná bon riba mi predikashon, i mi a kuminsá vários estudio di Beibel.

Konsiente di Mi Nesesidat Spiritual

Sinku aña largu mi tabata e úniko Testigu di Yehova na Derby. Tabata difísil pa mi keda spiritualmente fuerte sin e animashon di reunionnan regular huntu ku rumannan den fe. Na un okashon mi tabata sinti mi  hopi down, i mi a sali bai dal un buèlta ku outo. Ora mi a bolbe kas, kasi na final di e atardi, tabatin un ruman muhé ku su shete yunan ta warda mi. Nan a bin ku un stòk di literatura pa mi for di e kongregashon Broome, basta kilometer leu. Djei padilanti, e ruman muhé aki, Betty Butterfield, a hasi areglo pa bin Derby un biaha pa luna i pasa wikènt serka mi. Nos tabata bai prediká huntu i despues studia E Toren di Vigilansia huntu na mi kas. Ami, na mi turno, tabata bai Broome un biaha pa luna.

E rumannan di Broome tabata kla pa yuda i de bes en kuando nan por a hasi e biahe largu pa Derby pa yuda mi den sirbishi di vèlt. Nan a urgi tur ruman hòmber òf muhé di otro statnan ku mester a pasa dor di Derby pa nan bishitá mi i partisipá den e ministerio huntu ku mi. E biaheronan aki tambe tabata trese tape di diskursonan públiko pa mi. Algun di nan tabata studia E Toren di Vigilansia huntu ku mi. E bishitanan kòrtiku aki tabata animá mi sinfin.

Mas Yudansa na Kaminda

Durante algun aña, mi a haña mas estímulo di Arthur i Mary Willis, un pareha penshoná di e parti zùit di Wèst Oustralia. Nan tabata bin yuda mi pa tres luna durante e temporada mas fresku di aña. Ruman Willis tabata kondusí mayoria di e reunionnan i tabata hiba delantera den e ministerio di vèlt. Huntu, nos tabata bai e partinan mas alehá di Kimberley Plateau, bishitando ranchonan di baka den e áreanan leu ei. Kada biaha ku e pareha Willis bai kas, mi tabata sinti un bashí grandi den mi bida.

Finalmente, kasi na fin di 1983, mi a haña e grato notisia ku tabatin un famia ta bin biba na Derby. Tabata Danny ku Denise Sturgeon huntu ku nan kuater yu hòmbernan. Despues di nan yegada, nos por a tene reunionnan semanal regularmente i sali huntu den sirbishi di vèlt. Na aña 2001 nos a bira un kongregashon. Awe, Derby tin un kongregashon fuerte di 24 publikadó di Reino, ku dos ansiano i un sirbidó ministerial kendenan ta perkurá bon pa nos nesesidatnan spiritual. Tin biaha nos tin te ku 30 hende na reunion.

Ora mi wak bèk riba e añanan ku a pasa, mi kurason ta yena ku goso ora mi kòrda kon Yehova a yuda mi sirbié. Ounke ku ainda mi kasá no a djòin mi den fe, e ta sigui sostené mi den otro maneranan. Sinku miembro di mi famia djaserka a bira Testigu batisá: mi dos yu muhénan, dos nieta i un subrina. Ademas, vários famia di mi ta studiando Beibel ku e pueblo di Yehova.

Mi ta realmente gradisidu ku Yehova a yuda mi hañ’é. Mi ta determiná pa keda serka dje pa semper.—Salmo 65:2.

[Nota]

[Mapa/Plachinan na página 15]

(Pa e teksto den su formato kompleto, wak e publikashon)

OUSTRALIA

Wyndham

Kimberley Plateau

Derby

Broome

Perth

[Rekonosementu]

Kángaru i “liervogel”: Lydekker; koala: Meyers

[Plachi na página 14]

Trahando komo verplegster na hospital di Wyndham, 1953

[Plachi na página 15]

Kongregashon Derby, 2005