“Kiko e Triángulo Püs Ta Nifiká?”

“UN PAR di dia pasá mi a haña un ehemplar di E Toren di Vigilansia serka un Testigu di Yehova,” un ámtenar ku ta traha na ministerio di hustisia na Seul, Repúblika di Korea, a skirbi. El a sigui bisa den su karta: “Lesando e revista mi a haña sa algun punto tokante e persekushon di Testigunan di Yehova bou di e régimennan nazi i komunista. Pero mi tin un pregunta. E potrèt riba portada ta mustra Testigunan di Yehova ku un triángulo püs kabes abou na e banda robes di nan yas. Kiko e triángulo püs ta nifiká?”

Testigunan di Yehova na Alemania bou di e régimen nazi a nenga di bisa e saludo “Heil Hitler,” i nan a mantené un posishon neutral relashoná ku kuestionnan polítiko i militar. Pues, e nazinan a persiguí nan kruelmente, i a enkarselá rònt di 12.000 Testigu pa periodonan di vários durashon den prizon- i kamponan di konsentrashon. Mas o ménos 2.000 di nan a muri, di kua sentenáres pa medio di ehekushon.

Kiko e triángulo püs riba nan unifòrm di prizon a nifiká? E buki Anatomy of the SS State (Struktura di e Estado SS) ta splika: “E vários kategorianan di prezu den e kamponan [nazi] tabatin markanan spesial pa identifiká nan.” “E sistema standarisá di pone marka di identifikashon ku a keda introdusí promé ku e guera tabata konsistí di kose un pida tela triangular riba e unifòrm di kada prezu. E koló a dependé di su kategoria: pa prezunan polítiko, kòrá; pa Testigunan di Yehova, püs; pa antisosialnan, pretu; pa kriminalnan, bèrdè; pa homoseksualnan, ros; pa imigrantenan, blou. Hudiunan mester tabatin fuera di e triángulo di koló, un triángulo hel kosé riba e triángulo di koló di tal manera ku e ta forma e Strea di David di seis punta.”

Profèser John K. Roth a skirbi den su buki Holocaust Politics (Polítika di Holokousto): “Si hende di tur parti kòrda e lès di e triángulo püs, esta, di para firme pa loke ta korekto, esei por protehá nos di kousa un desaster den futuro i e por guia nos pa aktua den un bon manera ku ta meresé e profundo rèspèt di tur hende.” Testigunan di Yehova a produsí un dokumentario ku a keda premiá i ku ta hiba e título Testigunan di Yehova Ta Para Firme Kontra Atake Nazi. Pakiko bo no ta pidi un Testigu di Yehova hasi areglo pa bo por wak e vidio aki?