Nos Tin Mester di un Mesias?

KISAS bo ta hasi bo mes e pregunta: “Nos tin mester di un Mesias?” Sí, ta rasonabel pa bo puntra bo mes si un Mesias lo tin berdadero efekto riba bo.

Algun hende, kende nan opinion kisas bo ta respetá, lo sigurá bo ku esei ta mas kla ku di dia: Meskos ku tur otro hende, definitivamente abo tambe tin mester di un Mesias. Un eksperto den lei hudiu den e promé siglo a skirbi tokante e Mesias: “[E] ta konfirmashon di tur promesa ku Dios a hasi.” Asina el a resaltá e papel klave ku e Mesias ta hunga den e propósito di nos Kreadó pa bendishoná tur nashon di tera. (2 Korintionan 1:20, BPK) E funshon di e Mesias ta asina importante ku tur profesia di Beibel ta drei rònt di su binida i bida riba tera. Den un manual ku miónes di hende a usa durante e último 70 añanan, Henry H. Halley a deklará: “E Tèstamènt Bieu a ser skirbí pa krea ekspektativa pa e Binida di [e Mesias] i pa habri kaminda p’e.” Pero su binida ta nesesario? Pakiko lo bo mester ta interesá den dje?

De echo, e palabra “Mesias” ta nifiká “E Ungí” i e ta e ekivalente di e término bon konosí “Kristu.” Esun Aki, na kende e Encyclopædia Britannica, Edishon di 1970, ta referí komo “e mayor reskatadó,” mester a bini pa motibu di e aktonan di gran falta di rèspèt di parti di e promé pareha humano, Adam ku Eva. Nan a ser kreá perfekto, ku e speransa maravioso di biba pa semper den Paradeis. Pero nan a pèrdè e speransa ei. Un angel rebelde, kende a bira konosí komo Satanas e Diabel, a insinuá ku nan Kreadó tabata muchu estrikto i ku lo tabata mihó pa nan mes disidí loke tabata bon i loke tabata malu.—Génesis 3:1-5.

Eva a ser engañá i a kere e mentira ei. Adam, kende aparentemente a duna mas balor na e kompañerismo di su esposa ku lealtat na Dios, a bira kómplise den e rebelion ei ku Diabel a instigá. (Génesis 3:6; 1 Timoteo 2:14) Ku nan akshonnan, nan a desperdisiá e chèns di biba pa semper den kondishonnan di paradeis. Ademas di esei, nan a laga e herensia di piká i morto komo konsekuensia pa nan yunan ku no a nase ainda.—Romanonan 5:12.

Nos Kreadó, Yehova, a determiná mesora kiko lo mester a bira e medio pa eliminá e mal efektonan di e seri di susesonan ku e rebelion a okashoná. Lo el a logra un rekonsiliashon pa medio di loke despues a bira un prinsipio legal den e Lei di Moisés: bida pa bida. (Deuteronomio 19:21; 1 Juan 3:8) Mester a kumpli ku e prinsipio legal aki pa asina kualke desendiente desafortuná di Adam ku Eva por risibí bida eterno den un paradeis  riba tera un dia, manera tabata e propósito di e Kreadó pa e famia humano. Esaki ta hiba nos n’e Mesias.

Den su sentensia kontra Diabel, Yehova Dios a deklará den e promé profesia di Beibel: “Lo mi pone enemistat entre abo i e muhé, i entre bo simia i su simia; e lo heridá bo kabes, i abo lo heridá su hilchi di pia.” (Génesis 3:15) Un erudito di Beibel a remarká ku “e relato di e promesanan relashoná ku e Mesias den e Skritura ta kuminsá ku e deklarashon [aki].” Un otro a remarká ku e Mesias ta e instrumento di Dios ku “lo eliminá henter e kalamidat di e kaimentu den piká,” i na mesun momento trese bendishon pa humanidat.—Hebreonan 2:14, 15.

Sin embargo, lo bo ta konsiente ku aworakí sigur humanidat no ta bendishoná. Al kontrario, ta reina un gran desesperashon. P’esei, The World Book Encyclopedia ta bisa ku “ainda hopi hudiu ta spera binida di un Mesias” i ku lo e “korigí loke ta robes i derotá e enemigunan di e pueblo.” Pero Beibel ta bisa ku e Mesias a bini kaba. Tin motibu pa kere loke Beibel ta bisa? E siguiente artíkulo lo kontestá esei.