Pueblonan Isolá di Bolivia Ta Tende Bon Nobo

NOS tabata un grupo di mas o ménos 20 persona ku a bini huntu na oriya di un riu, antisipando ansiosamente un biahe di un dia ku nos ta bai subi ku e riu i bishitá pueblitonan mas ariba. Nos ta na pia di Andes, kaminda e riu Beni ta yega na e yanuranan inmenso di e kuenka di Amazona. E lugá ta un presiosidat.

Pero nos no ta turista. Algun di nos ta hendenan lokal; vários di nos a bini for di statnan leu pa biba aki na Rurrenabaque, un pueblito bunita ku hopi palu tur na flor, kas ku dak di palu di maishi i kayanan riba kua de bes en kuando ta pasa un motosaikel ku ta sirbi komo taksi. Pakiko nos ta hasiendo e biahe aki?

Loke ta sosodiendo aki ta típiko di loke ta tumando lugá den hopi otro parti di Bolivia. Testigunan di Yehova ku ta bini di stat i otro paisnan ta hibando e bon nobo di e Reino di Dios n’e pueblitonan.—Mateo 24:14.

Bolivia ta situá den kurason di Suramérika. Na teritorio, e pais ta dos biaha mas grandi ku Fransia, pero e tin poko mas ku un désimo parti di su poblashon. Mayoria habitante di Bolivia ta biba sea den e statnan i pueblonan minero na halturanan impreshonante òf den e sentronan di agrikultura di e vayenan. Sin embargo, den e áreanan tropikal mas abou, mondinan inmenso ta pone ku hopi pueblo ta keda isolá.

Den añanan ’50 i ’60 di siglo pasá, misioneronan yen di kurashi manera  Betty Jackson, Elsie Meynberg, Pamela Moseley i Charlotte Tomaschafsky a enkabesá e obra den hopi pueblo isolá. Nan a siña hende sinsero e bèrdat di Beibel i a yuda establesé kongregashonnan chikitu. Durante añanan ’80 i ’90, tabatin un oumento di seis biaha mas tantu Testigu di Yehova, prinsipalmente den e statnan. Awor tin kongregashon den tur parti di e stat. Bo por haña nan den e distritonan próspero, kaminda hende ta traha den komplehonan di ofisina di vários piso, ta biba den manshonnan elegante i hasi kompra den supermerkado. Pero tambe tin kongregashonnan den e barionan mas pafó, kaminda hende ta biba den hùtnan di klenku, ta hasi kompra den marshenan na aire liber i ta bisti nan trahenan tradishonal kolorido. Pero kiko por ser hasí pa yuda mas hende den áreanan isolá yega na konosé Yehova?

Nan A Sakrifiká e Komodidat di Bida di Stat

Durante e último dos dékadanan, hopi boliviano a muda for di e pueblonan minero i di interior di e pais bai e statnan. No ta usual ku un hende ta disidí di muda den e direkshon kontrali, esta, di stat pa pueblo. Hopi pueblo tin solamente un telefòn i nan tin koriente pa un par di ora so pa dia. E Testigunan ku ta biba den e pueblonan chikitu aki kisas ta mira nan rumannan spiritual solamente na kongresonan anual, i biahamentu pa kongreso por ta karu, peligroso i agotador. Skolnan den e pueblo aki ta ofresé solamente enseñansa básiko. Kiko anto ta motivá un kantidat di Testigu di Yehova pa muda di stat pa bai biba den pueblo?

No hopi tempu pasá Luis a bisa: “Mi tabatin e oportunidat pa sigui un karera den e stat di La Paz. Pero semper mi mayornan a papia di e trabou di hasi disipel komo e karera di mas deseabel. P’esei mi a sigui un kurso kòrtiku den métodonan di konstrukshon. Durante un fakansi na Rurrenabaque, mi a ripará ku e hendenan ta ansioso pa skucha e bon nobo. Ora mi a mira kon tiki ruman hòmber tabatin einan, mi a sinti mi obligá pa bin yuda. Awor mi ta kondusiendo 12 estudio di Beibel. Por ehèmpel, mi ta studia ku un yònkuman i su kasá ku tin kuater yu. E yònkuman tabata bebe pisá i hunga plaka, pero el a stòp ku tur esei i el a kuminsá papia ku su amigunan di loke e ta siñando tokante Yehova. Semper e ta prepará su lès. Ora e mester bai kap palu den mondi pa tres òf kuater dia largu, e ta sinti su mes malu pasobra e no kier pèrdè nada. Ora mi mira nan tur na reunionnan kristian, mi ta sinti ku e sakrifisio pa a bini aki tabata bale la pena.”

 Juana ta un mayor soltero. E ta bisa: “Mi tabata traha komo kriá di kas na La Paz. Ora mi yu hòmber tabata chikitu, mi a drenta e sirbishi di tempu kompletu den stat. Dia mi a bishitá Rurrenabaque un biaha, mi a realisá kuantu mas lo mi por a hasi dor di muda bin aki. Pues nos a bini, i mi a haña un trabou komo kriá. Na prinsipio tabata difísil pa soportá e kalor i e insektonan. Pero ya nos tin shete aña aki kaba. Mi por kondusí hopi estudio di Beibel pa siman i hopi studiante ta demostrá nan apresio dor di asistí na e reunionnan.” Juana ku su yu hòmber ta den e grupo ku ta subi ku e riu bai ariba den e boto. Bo ta bonbiní pa kompañá e grupo.

Subiendo ku e Riu

Segun ku nos ta subiendo, rumbo pa e pasashi smal entre e serunan, e motor di e boto ta hasi bastante bochincha. Un grupo di lora ta grita, komo si fuera pa protestá kontra nos presensia. E awanan trubel prosedente di e serunan ta bini abou ku hopi forsa, pero esun ku ta na timon sa bon kon pa dirigí e boto p’e bai kontra koriente. Na mitar di e mainta nos ta desembarká na un pueblito. Ei nos ta topa un superintendente di e Kongregashon di Rurrenabaque, i e ta mustra nos unda pa prediká.

E hendenan ta risibí nos hospitalariamente, sea bou di e sombra di un palu òf paden di un kas trahá di bambu kubrí ku blachi di palma. Despues di un ratu nos ta mira un pareha yòn ta pèrs kaña den un artefakto di palu trahá lokalmente. Djus ta basha den un kònchi di koper. Mas lat nan lo herebé e djus te ora e bira un stropi maron ku nan por bende den e pueblo. Nan ta invitá nos pa drenta den nan kas i nan ta hasi hopi pregunta tokante Beibel.

Nos ta sigui subi ku e riu, predikando di un pueblito pa otro. Hopi hende ta keda masha kontentu ora nan tende loke Beibel ta bisa tokante fin na enfermedat i morto. (Isaias 25:8; 33:24) Aki, kaminda no tin muchu kuido médiko, mayoria famia a pasa den e eksperensia amargo di pèrdè un yu. E bida di dependé solamente di loke nan planta i piska ta duru i insigur. Pues, hopi ta haña e promesa di Dios registrá na Salmo 72 tokante un gobièrnu ku lo eliminá pobresa masha interesante. Pero, bo ta kere ku personanan interesá ku ta biba na lugánan isolá asina lo hasi e esfuerso pa asistí na reunionnan kristian? Eric ku Vicky, dos sirbidó di tempu kompletu na Santa Rosa, un kareda di  tres ora mas aleu den e kuenka di Amazona, tambe a hasi nan mes e pregunta ei.

E Personanan Interesá Lo Bini?

Eric ku Vicky ta di California, Merka, i 12 aña pasá nan a bini Bolivia. Un superintendente biahero a sugerí nan pa muda bai Santa Rosa. Vicky ta bisa: “Tin apénas dos telefòn den e pueblo i no tin akseso na Internet. E lugá tin un naturalesa riku. Hopi bes ora nos bishitá áreanan alehá riba nos motosaikel nos ta mira kaiman, abestrus i kolebra grandi. Pero mas interesante ku bestia ta e hendenan. Nos ta studia Beibel ku famia Vaca, un pareha yòn ku tin kuater yu chikí. Nan ta biba den kareda di 26 kilometer pafó di e pueblo. E tata tabata un buraché, pero awor el a kambia. Tur siman e ta bai Salòn di Reino ku henter su famia i su ruman muhé mas yòn. E ta transportá su kasá i beibi riba e lugá di ekipahe di su baiskel grandi. Su yu di nuebe aña ta bai ku su ruman muhé chikí riba un otro baiskel, i esun di ocho aña ta bai riba su mes baiskel. Ta tuma nan tres ora pa yega reunion.” E famia ta ègt stima Yehova i ta hasi tur esfuerso pa asosiá ku e kongregashon.

Den apénas 18 luna, 3 persona a kualifiká pa boutismo, i rònt di 25 ta bai e Salòn di Reino nobo na Santa Rosa. Ounke tin bastante hende ku kier studia Beibel, hopi tin ku superá opstákulonan formal pa por sirbi Yehova.

E Desafio di Legalisá Matrimonio

Marina ku Osni, misioneronan ku ta sirbiendo den un pueblo isolá pegá ku e frontera entre Bolivia ku Brazil, ta splika ku aki hopi hende no ta mira matrimonio komo un laso permanente. Nan tin vários partner. Osni ta bisa: “Esaki ta un problema ku ta stroba progreso spiritual. Ora hende kier bira kristian berdadero, nan tin ku pasa den un proseso kompliká i kostoso. Algun tin ku regla asuntunan relashoná ku nan partnernan anterior i despues kasa pa lei. No opstante, rekonosiendo ku Beibel ta manda pa registrá matrimonio debidamente, algun a traha realmente duru pa gana e plaka nesesario pa paga e gastunan di gobièrnu.”—Romanonan 13:1, 2; Hebreonan 13:4.

Marina ta konta e eksperensia di Norberto. “Norberto tabata biba ku vários hende muhé promé ku el a bai biba serka un muhé ku tabata panadero. E señora tabata un 35 aña asina mas yòn kuné i tabatin un yu hòmber ku Norberto a kria. Segun ku e mucha tabata krese, Norberto kier tabata un mihó ehèmpel p’e. Pues ora un Testigu a bishitá e panaderia i a ofresé un estudio di Beibel, Norberto a aseptá, ounke e no por a lesa i ya tabatin mas ku 70 aña di edat. Ora Norberto ku su partner a siña tokante e rekisitonan di Yehova, nan a kasa pa lei i despues a batisá. E mucha hòmber a bira un hóben kristian responsabel—eksaktamente loke su tata di kriansa a spera ku lo a sosodé. Norberto a siña lesa, i asta el a duna diskurso na reunionnan di kongregashon. Apesar ku e ta bastante débil pa motibu di su edat, e ta un predikadó entusiasmá di e bon nobo.”

Ku Poder di Yehova Su Spiritu

Hesus a bisa su promé siguidónan: “Boso lo risibí poder ora spiritu santu bin riba boso, i boso lo ta mi testigunan . . . te na e parti mas alehá di mundu.” (Echonan 1:8) Ta un animashon pa mira kon e spiritu di Dios ta motivá hòmber- i muhénan kristian pa muda bai lugánan leu! Por ehèmpel, na 2004 mas o ménos 30 kristian seloso a aseptá asignashonnan temporal pa bai teritorionan isolá komo pionero spesial. Nan ta masha gradisidu pa e ehèmpel  di rònt di 180 stranhero ku a bini Bolivia pa sirbi komo pionero, superintendente di sirkuito, boluntario di Bètel òf misionero. E 17.000 publikadónan di Reino na Bolivia ta kondusí rònt di 22.000 estudio di Beibel den kasnan di hende interesá.

E echo ku tur e rumannan aki ta konsiente ku ta Yehova su spiritu ta guia nan, ta yena nan ku hopi goso. Por ehèmpel, Robert ku Kathy a aseptá un asignashon komo misionero na Camiri. Situá entre seritunan bèrdè pegá ku un riu, semper Camiri tabata un pueblo isolá. Robert ta bisa: “Ta parse ku nos a yega nèt na tempu. Den dos aña, rònt di 40 persona a bira publikadó di e bon nobo.”

Un Buraché Bisiá na Wega di Plaka Ta Skucha

Hopi hende di e pueblonan aki ta keda impreshoná ku e kambionan ku esnan ku ta studia Beibel a hasi. Por ehèmpel, riba un dia, mas o ménos kuater aña pasá, un buraché ku yama Ariel tabata drumí riba kama pa su wayabá kitá. Ounke su hungamentu di plaka a hasié popular, konstantemente e tabata preokupá ku su debenan enorme, problema di matrimonio i yu muhénan neglishá. Un Testigu di Yehova ku tabata prediká di kas pa kas a interumpí su pensamentunan. Ariel a skucha atentamente segun ku e ruman tabata splika e Skritura. Pronto Ariel a bai riba kama atrobe, pero e biaha aki, pa lesa tokante felisidat den bida di famia, Paradeis i sirbishi na Dios. Despues el a bai di akuerdo pa studia Beibel.

Pa e tempu ku e misioneronan a yega Camiri, e esposa di Ariel ku yama Arminda, tambe tabata studia—pero sin muchu smak. Arminda a bisa: “Mi ta dispuesto pa purba tur kos pa e stòp di bebe. Pero mi ta duda ku esei ta yuda. E ta un kaso pèrdí.” Sin embargo, e estudio di Beibel tabata mas interesante ku Arminda a ferwagt. Den un aña, el a batisá i tabata prediká na su famia. No a dura masha ku vários di su famianan a dediká nan bida na Yehova.

Pa loke ta Ariel, e tabatin un lucha pa stòp di bebe, huma i hunga plaka. E punto krusial a bini ora el a invitá tur su amigunan pa e Memorial di e morto di Hesus. Anto el a bisa den forma desididu: “Esun ku no bin, no ta mi amigu mas. Anto esun ku bin lo mi studia Beibel kuné.” Den e manera ei el a kuminsá tres estudio di Beibel. Asta promé ku Ariel a bira miembro di e kongregashon, el a studia Beibel ku un famia di dje ku a progresá i batisá riba e mesun dia kuné. Arminda ta bisa: “Ta komo si fuera e Ariel di ántes no ta eksistí mas.”

Robert ta informá: “Segun e último konteo, 24 miembro di e famia aki tabata asistí n’e reunionnan regularmente. Dies ta batisá, i ocho ta publikadó no-batisá. Algun hende ku a opservá e kambio den nan kondukta tambe a kuminsá studia Beibel i ta asistiendo na e reunionnan di kongregashon. E asistensia a oumentá for di 100 pa 190. Ami ku Kathy ta kondusiendo mas o ménos 30 estudio di Beibel, i nan tur ta asistí na reunion. Nos ta hopi kontentu di por ta aki.”

Loke ta sosodiendo den e pueblonan isolá di Bolivia ta djis un parti chikitu di un rekohementu mundial ku a ser profetisá den Revelashon kapítulo 7, den kua nos ta lesa kon hende ku lo sobrebibí e tribulashon grandi lo ser rekohé durante “e dia di Señor.” (Revelashon 1:10; 7:9-14) Nunka promé den historia humano miónes di hende di tur nashon a ser uní den adorashon di e úniko Dios berdadero. Ki un evidensia emoshonante ku e promesanan di Dios ta asina serka di kumpli!

[Plachi na página 9]

Betty Jackson

[Plachi na página 9]

Elsie Meynberg

[Plachi na página 9]

Pamela Moseley

[Plachi na página 9]

Charlotte Tomaschafsky, te na man drechi

[Plachi na página 10]

Tur siman famia Vaca ta biaha tres ora riba baiskel pa bai Salòn di Reino

[Plachi na página 10]

Eric ku Vicky a bini pa sirbi kaminda tin nesesidat pa mas publikadó di Reino

[Plachi na página 11]

E hendenan di pueblo ku ta biba banda di riu Beni ta skucha atentamente na e bon nobo

[Plachi na página 12]

Robert ku Kathy ta sirbi komo misionero na Camiri