Rekohiendo Kosnan den Shelu i Kosnan Riba Tera

“Ta segun su gustu . . . pa rekohé tur kos huntu atrobe den e Kristu, e kosnan den shelu i e kosnan riba tera.”—EFESIONAN 1:9, 10, NW.

1. Kiko ta Yehova su “gustu” pa shelu i tera?

PAS UNIVERSAL! Esei ta e propósito glorioso di Yehova, “e Dios di pas.” (Hebreonan 13:20) El a inspirá apòstel Pablo pa skirbi ku Su “gustu” ta “pa rekohé tur kos huntu atrobe den e Kristu, e kosnan den shelu i e kosnan riba tera.” (Efesionan 1:9, 10, NW) Kiko presis e verbo tradusí den e versíkulo aki komo ‘rekohé huntu atrobe’ ta indiká? E eksperto riba tereno di idioma bíbliko, J. B. Lightfoot a remarká: “E ekspreshon ta indiká henter e armonia di universo, kual lo no bai kontené partinan inkompatibel i ku ta kousa desunion mas, sino mas bien tur parti lo konsentrá i ta uní den Kristu. Piká i morto, tristesa i frakaso i sufrimentu, lo stòp di eksistí.”

“Kosnan den Shelu”

2. Ken ta “e kosnan den shelu” ku tin ku ser rekohé?

² Apòstel Pedro a resumí e maravioso speransa ku kristiannan berdadero tin ora el a skirbi: “Segun su promesa nos ta sperando shelunan nobo i un tera nobo, den kual ta biba hustisia.” (2 Pedro 3:13) E “shelunan nobo” primintí aki ta referí na e outoridat gubernamental nobo, e Reino Mesiániko. “E kosnan den shelu” ku Pablo a menshoná den su karta na e Efesionan mester ser rekohé òf reuní ‘den Kristu.’ Nan ta e kantidat limitá di hende skohé pa goberná ku Kristu den shelu. (1 Pedro 1:3, 4) E 144.000 kristiannan ungí aki a ser “kumprá for di tera,” “kumprá for di entre hende,” pa ta ko-heredero ku Kristu den su Reino selestial.—Revelashon 5:9, 10; 14:3, 4; 2 Korintionan 1:21; Efesionan 1:11; 3:6.

3. Den ki sentido por ser bisá ku ungínan ta ‘sintá den e lugánan selestial’ miéntras ku ainda nan ta riba tera?

³ Kristiannan ungí ta nase di nobo mediante e spiritu santu pa bira yunan spiritual di Yehova. (Juan 1:12, 13; 3:5-7) Siendo ku Yehova ta adoptá nan komo su “yunan,” nan ta bira ruman di Hesus. (Romanonan 8:15; Efesionan 1:5) Komo tal, miéntras nan ta riba tera ainda, Beibel ta bisa ku nan ‘a lanta i a sinta huntu ku Kristu Hesus den e lugánan selestial.’ (Efesionan 1:3; 2:6) Nan ta okupá e posishon spiritual elevá aki pasobra nan a “wòrdu seyá ku e spiritu santu di promesa, [ku] ta e garantia di [nan] herensia,” reservá pa nan den shelu. (Efesionan 1:13, 14; Kolosensenan 1:5) Esakinan pues ta “e kosnan den shelu,” di kua mester a rekohé òf reuní e kantidat total ku Yehova a predeterminá.

E Rekohementu Ta Kuminsá

4. Na ki tempu i kon e rekohementu di “e kosnan den shelu” a kuminsá?

⁴ Di akuerdo ku Yehova su “atministrashon,” òf manera di manehá kosnan, e rekohementu di “e kosnan den shelu” mester a kuminsá “n’e límite kompletu di e tempu señalá.” (Efesionan 1:10, NW) E debido tempu ei a yega na Pentekòste di aña 33 di nos era. Riba e dia ei, spiritu santu a ser dramá riba e apòstelnan i un grupo di disipel ku a konsistí di hende hòmber i hende muhé. (Echonan 1:13-15; 2:1-4) Esaki a duna prueba ku e aliansa  nobo a drenta na vigor, markando asina nasementu di e kongregashon kristian i di e nashon nobo di Israel spiritual, “e Israel di Dios.”—Galationan 6:16; Hebreonan 9:15; 12:23, 24.

5. Dikon Yehova a krea un “nashon” nobo pa remplasá Israel karnal?

⁵ E aliansa di Lei ku Dios a sera ku Israel karnal no a produsí “un reino di saserdotenan i un nashon santu” ku lo a sirbi pa semper den shelu. (Eksodo 19:5, 6) Hesus a bisa e lidernan religioso hudiu: “E reino di Dios lo wòrdu kitá for di boso, i duná na un nashon ku sí ta hasié produsí fruta.” (Mateo 21:43) E nashon ei, Israel spiritual, ta konsistí di kristiannan ungí ku a ser inkluí den e aliansa nobo. Apòstel Pedro a skirbi na esakinan: “Boso ta un rasa skohí, un saserdosio real, un nashon santu, un pueblo pekuliar, pa boso por proklamá e alabansanan di esun ku a yama boso for di skuridat na su lus maravioso; pasobra un tempu boso no tabata un pueblo, ma awor boso ta e pueblo di Dios.” (1 Pedro 2:9, 10) Pues e pueblo di Israel karnal no tabata e pueblo ku Yehova tabatin un pakto kuné mas. (Hebreonan 8:7-13) Manera Hesus a profetisá, e privilegio di ser un parti di e Reino Mesiániko a ser kitá for di nan i duná na e 144.000 miembronan di Israel spiritual.—Revelashon 7:4-8.

Inkluí den e Aliansa di Reino

6, 7. Ki pakto òf aliansa spesial Hesus a sera ku su rumannan engendrá pa spiritu santu, i kiko esaki ta nifiká pa nan?

⁶ Durante e anochi ku Hesus a instituí e Konmemorashon òf Memorial di su morto, el a bisa su fiel apòstelnan: “Boso ta esnan ku a keda na mi lado den mi pruebanan; i meskos ku mi Tata a laga un reino pa mi, mi ta laga pa boso [òf, “mi ta sera un pakto ku boso, meskos ku mi Tata a sera un pakto ku mi, pa un reino,” NW], pa boso kome i bebe na mi mesa den mi reino, i boso lo sinta riba trononan pa husga e diesdos tribunan di Israel.” (Lukas 22:28-30) Aki Hesus a referí na un pakto òf aliansa spesial ku el a sera ku su 144.000 rumannan engendrá pa spiritu santu, kendenan lo a keda “fiel te na morto” i asina demostrá ku nan ta ‘vensedó.’—Revelashon 2:10; 3:21.

⁷ Personanan di e grupo limitá aki ta renunsiá tur speransa di biba pa semper riba tera komo hende di karni i wesu. Nan lo reina huntu ku Kristu den shelu, i sinta riba trono pa husga humanidat. (Revelashon 20:4, 6) Laga nos analisá awor otro tekstonan bíbliko ku ta apliká solamente na e ungínan aki i ku ta mustra dikon e “otro karnénan” no ta tuma di e emblemanan di Memorial.—Juan 10:16.

8. Kiko e ungínan ta indiká dor di tuma di e pan? (Wak e kuadro na página 23.)

⁸ E ungínan lo sufri meskos ku Kristu a sufri i nan ta dispuesto pa someté nan mes na un morto manera esun di Hesus. Pablo, siendo parti di e grupo di ungí, a deklará ku e tabata prepará pa hasi kualke sakrifisio afin ku lo e por ‘gana Kristu i por konos’é, i konosé e poder di su resurekshon i e komunion di su sufrimentunan.’ Sí, Pablo tabata dispuesto pa ‘bira semehante na dje den su morto,’ es desir, muri mesun morto kuné. (Filipensenan 3:8, 10) Hopi kristian ungí a soportá den nan kurpa di karni “e tratamentu mortífero duná na Hesus.”—2 Korintionan 4:10, NW.

9. Kua kurpa e pan di Memorial ta representá?

⁹ Ora Hesus a instituí e Sena di Señor, el a bisa: “Esaki ta mi kurpa.” (Marko 14:22) El a referí na su kurpa literal ku pronto nan lo a bati i laga tur na sanger. Pan sin zürdeg tabata un símbolo apropiá di e kurpa ei. Dikon? Pasobra den Beibel, zürdeg por nifiká piká òf maldat. (Mateo 16:4, 11, 12; 1 Korintionan 5:6-8) Hesus tabata perfekto, i su kurpa humano tabata sin piká. Lo el a ofresé e kurpa perfekto ei komo un sakrifisio di propisiashon es desir, di rekonsiliashon. (Hebreonan 7:26; 1 Juan 2:2) E akto ei lo a benefisiá  tur kristian fiel, sea ku nan tabatin e speransa di bida den shelu òf bida eterno den un paradeis riba tera.—Juan 6:51.

10. Den ki manera esnan ku ta bebe di e biña di Memorial ‘ta partisipá den e sanger di Kristu’?

¹⁰ Relashoná ku e biña ku kristiannan ungí ta bebe di dje na Memorial, Pablo a skirbi: “E kopa di bendishon ku nos ta bendishoná, no ta un komunion [“partisipashon,” NW] e ta den e sanger di Kristu?” (1 Korintionan 10:16) Den ki manera esnan ku bebe di e biña ta ‘partisipá den e sanger di Kristu’? Nan sigur no ta partisipá dor di perkurá e sakrifisio di reskate, ya ku nan mes tin mester di redenshon. Pa medio di nan fe den e poder di reskatá di e sanger di Kristu, nan pikánan ta ser pordoná i nan ta ser deklará hustu pa bida den shelu. (Romanonan 5:8, 9; Tito 3:4-7) Ta a base di e balor di Kristu su sanger dramá ku e 144.000 ko-herederonan di Kristu ta ser “santifiká,” apartá, limpiá di piká pa nan ta e “santunan.” (Hebreonan 10:29; Daniel 7:18, 27; Efesionan 2:19) Sí, ta ku su sanger dramá Kristu “a kumpra pa Dios hende for di tur tribu i lenga i pueblo i nashon. I . . . a hasi nan bira un reino i saserdotenan pa nos Dios; i nan lo reina riba tera.”—Revelashon 5:9, 10.

11. Kiko e ungínan ta indiká dor di bebe di e biña di Memorial?

¹¹ Ora ku Hesus a inisiá e Konmemorashon di su morto, el a entregá e kopa di biña na su fiel apòstelnan i a bisa nan: “Boso tur bebe for di dje; pasobra esaki ta mi sanger di e aliansa, ku ta wòrdu dramá pa hopi pa pordon di piká.” (Mateo 26:27, 28) Meskos ku pa medio di e sanger di toro i kabritu e aliansa di Lei entre Dios i e nashon di Israel a bira válido, asina pa medio di Hesus su sanger e aliansa nobo ku Yehova lo a sera ku Israel spiritual lo a bira válido, kuminsando na Pentekòste di aña 33. (Eksodo 24:5-8; Lukas 22:20; Hebreonan 9:14, 15) Dor di bebe e biña ku ta simbolisá e “sanger di e aliansa,” e ungínan ta indiká ku nan a ser inkluí den e aliansa nobo i ta risibiendo su benefisionan.

12. Kon e ungínan ta ser batisá den Kristu su morto?

¹² E ungínan ta ser rekordá di un kos mas dor di tuma di e emblemanan. Hesus a bisa su  disipelnan fiel: “E kopa ku ami ta bebe, boso lo bebe; i boso lo wòrdu batisá ku e boutismo ku kual ami ta wòrdu batisá.” (Marko 10:38, 39) Apòstel Pablo mas despues a menshoná ku kristiannan lo wòrdu “batisá den [Kristu] su morto.” (Romanonan 6:3) E ungínan ta hiba un bida di sakrifisio. Nan morto ta un morto di sakrifisio pasobra nan ta renunsiá kualke speransa di bida eterno riba tera. E boutismo di e kristiannan ungí aki den Kristu su morto ta keda kompletá ora ku despues ku nan a muri fielmente, nan ser resusitá komo kriaturanan spiritual pa “reina” huntu ku Kristu den shelu.—2 Timoteo 2:10-12; Romanonan 6:5; 1 Korintionan 15:42-44, 50.

Tumando di e Emblemanan

13. Dikon e personanan ku tin e speransa terenal no ta tuma di e emblemanan di Memorial, pero dikon tòg nan ta asistí na Memorial?

¹³ Pues, ora un hende tuma di e pan ku e biña ku ta pasa durante di Memorial esei ta enserá tur loke nos a kaba di konsiderá. Ta mas ku klaru anto ku lo ta inapropiá pa personanan ku tin un speransa terenal tuma di e emblemanan. Esnan ku un speransa terenal ta komprondé ku nan no ta miembro ungí di e kurpa di Kristu, tampoko nan no ta den e aliansa nobo ku Yehova a sera ku esnan ku lo goberná huntu ku Hesukristu. Ya ku “e kopa” ta representá e aliansa nobo, ta solamente e personanan den e aliansa nobo ta tuma di e emblemanan. Esnan ku ta antisipá bida eterno komo hende perfekto riba tera bou di e Reino no ta ser batisá den Hesus su morto ni nan no ta yamá pa goberná huntu kuné den shelu. Si nan mester tuma di e emblemanan, esei lo ta nifiká algu ku no ta bèrdat den nan kaso. P’esei nan no ta tuma di e emblemanan, maske nan ta asistí sí na e Memorial komo opservadónan respetuoso. Nan ta gradisidu pa tur loke Yehova a hasi pa nan pa medio di su Yu, inkluso pa e echo ku el a ekstendé pordon na nan a base di Kristu su sanger dramá.

14. Kon e ungínan ta ser fortalesé spiritualmente dor di tuma di e pan ku e biña?

¹⁴ E seyamentu final di e kantidat relativamente chikitu di kristiannan yamá pa reina ku Kristu den shelu ta serka di ser kompletá. Tanten ku e ungínan no yega na fin di nan bida ku nan ta bai sakrifiká, nan ta ser fortalesé spiritualmente dor di tuma di e emblemanan di Memorial. Nan ta sinti un laso di union ku nan otro rumannan ungí komo miembro di e kurpa di Kristu. Ora nan tuma di e pan ku e biña, nan ta ser rekordá di nan responsabilidat di keda fiel te na morto.—2 Pedro 1:10, 11.

Rekohiendo “Kosnan Riba Tera”

15. Ken a ser rekohé na e banda di e kristiannan ungí?

¹⁵ For di meimei di dékada di 1930, un kantidat kresiente di “otro karnénan” a pone nan mes na e banda di e ungínan. E “otro karnénan” aki no ta forma parti di e “tou chikitu” i nan speransa ta bida eterno riba tera. (Juan 10:16; Lukas 12:32; Zakarias 8:23) Nan a bira e kompañeronan leal di e rumannan di Kristu, dunando nan yudansa balioso den e trabou di prediká “e evangelio aki di e reino” komo un testimonio na tur nashon. (Mateo 24:14; 25:40) Dor di hasi esei, nan tin e oportunidat ku Kristu lo husga nan faborablemente komo su “karnénan” i lo pone nan na su “man drechi” di aprobashon ora ku e bin pa husga e nashonnan. (Mateo 25:33-36, 46) Dor di pone fe den Kristu su sanger, nan lo ta  parti di e “multitut grandi” ku lo sobrebibí “e gran tribulashon.”—Revelashon 7:9-14.

16. Di ken “e kosnan riba tera” lo konsistí, i kon nan tur lo tin e oportunidat di bira “yunan di Dios”?

¹⁶ E seyamentu final di e 144.000 lo habri kaminda pa lòs e “bientunan” di destrukshon kontra Satanas su mal sistema di kosnan riba tera. (Revelashon 7:1-4) Durante e Reinado di Mil Aña di Kristu i su rei- i saserdotenan ko-gobernante, un kantidat grandi no-spesifiká di hende resusitá lo djòin e multitut grandi. (Revelashon 20:12, 13) Nan lo tin e oportunidat di bira siudadano terenal permanente di e Rei Mesiániko, Kristu Hesus. Na fin di e Reinado di Mil Aña, tur e “kosnan riba tera” aki lo ser someté na un último prueba. Esnan ku resultá fiel lo ser adoptá komo ‘yunan terenal di Dios.’—Efesionan 1:10; Romanonan 8:21; Revelashon 20:7, 8.

17. Kon Yehova su propósito lo ser kumplí?

¹⁷ Asina Yehova, pa medio di su “atministrashon” òf manera infinitamente sabí di manehá kosnan, lo a kumpli ku su propósito di “rekohé tur kos huntu atrobe den e Kristu, e kosnan den shelu i e kosnan riba tera.” Tur kriatura inteligente den shelu i riba tera lo a ser rekohé den pas universal, sometiendo nan mes gososamente na e soberania hustu di Yehova, e Gran Kumplidó di Propósito.

18. Kon tantu e ungínan komo nan kompañeronan lo saka benefisio dor di asistí na Memorial?

¹⁸ Riba 12 di aprel 2006, ora ku e kantidat chikitu di ungí reuní huntu ku miónes di nan kompañeronan, e otro karnénan, esei sin duda lo ta algu ku lo fortalesé nan tur su fe. Nan lo tene e Konmemorashon di e morto di Kristu, presis manera Hesus a manda: ‘Sigui hasi esaki na mi rekuerdo.’ (Lukas 22:19) Tur hende ku asistí mester kòrda kiko Yehova a hasi pa nan mediante su Yu stimá, Kristu Hesus.

Komo Repaso

• Kiko ta Yehova su propósito pa kosnan den shelu i pa kosnan riba tera?

• Ken ta “e kosnan den shelu,” i kon nan a ser rekohé?

• Ken ta “e kosnan riba tera,” i ki speransa nan tin?

[Preguntanan di Estudio]

[Kuadro na página 23]

“E Kurpa di Kristu”

Na 1 Korintionan 10:16 i 17, Pablo a menshoná “kurpa” den un sentido spesial den su komentario relashoná ku e pan ku el a dirigí na e rumannan di Kristu ungí ku spiritu santu. El a bisa: “E pan ku nos ta kibra, no ta un komunion e ta den e kurpa di Kristu? Pasobra nos, siendo hopi, ta ún pan i ún kurpa; pasobra nos tur ta tuma parti na esun pan ei.” Ora ku kristiannan ungí ta tuma di e pan di Memorial, nan ta deklará nan union den e kongregashon di ungínan, ku ta manera un kurpa ku tin Kristu komo e Kabes.—Mateo 23:10, NW; 1 Korintionan 12:12, 13, 18.

[Plachinan na página 23]

Dikon ta e ungínan so ta tuma di e pan ku e biña?

[Plachi na página 25]

Mediante Yehova su atministrashon, tur kriatura den shelu i riba tera lo ta uní