Un Atministrashon pa Kumpli ku Dios Su Propósito

“[Dios] ta obra tur kos segun e konseho di su boluntat.” —Efesionan 1:11.

1. Dikon tur kongregashon di Testigunan di Yehova lo reuní dia 12 di aprel 2006?

DJARASON anochi, 12 di aprel 2006, rònt di 16 mion hende lo reuní pa konmemorá e Sena di Señor. Na kada lugá di reunion lo tin un mesa drechá ku pan sin zürdeg, representando e kurpa di Kristu, i biña kòrá, simbolisando su sanger ku el a drama. Kasi na final di e diskurso ku ta splika e nifikashon di e Konmemorashon di Hesus su morto lo pasa e emblemanan aki entre tur esnan presente. Promé ta pasa e pan, kaba e biña. Den relativamente poko kongregashon di Testigunan di Yehova, un òf mas persona presente lo tuma di e emblemanan. Sin embargo, den mayoria kaso ningun persona presente lo tuma for di nan. Dikon ta solamente un par di kristian, esta, esnan ku tin speransa di biba den shelu, ta tuma di nan, miéntras ku e mayoria, esta, esnan ku tin e speransa di biba pa semper riba tera, no ta tuma di nan?

2, 3. (a) Kon Yehova a efektuá e proseso di kreashon segun su propósito? (b) Ku ki propósito Yehova a krea e tera i humanidat?

² Yehova ta un Dios di propósito. Ora di kumpli ku su propósito, e ta “obra tur kos segun e konseho di su boluntat.” (Efesionan 1:11) Promé, el a krea su Yu unigénito. (Juan 1:1, 14; Revelashon 3:14) Despues, mediante e Yu aki, Yehova a krea un famia di yunan spiritual i ku tempu e universo material, lokual a inkluí e tera i hende riba dje.—Jòb 38:4, 7; Salmo 103:19-21; Juan 1:2, 3; Kolosensenan 1:15, 16.

³ Yehova no a krea e tera komo un tipo di lugá pa tèst hende pa determiná si nan ta kualifiká pa ser agregá na su famia di yunan spiritual den shelu, manera hopi iglesia di kristiandat ta siña. El a krea tera ku un propósito spesífiko na mente, esta, “pa e wòrdu habitá.” (Isaias 45:18) Dios a krea tera pa hende i hende pa tera. (Salmo 115:16) Henter e planeta lo mester a bira un paradeis, yená ku hende hustu, kendenan lo a kultiv’é i kuid’é. Ningun momento so Dios no a ofresé e promé pareha humano e speransa di ku tempu nan lo a bai shelu.—Génesis 1:26-28; 2:7, 8, 15.

Yehova Su Propósito Ta Ser Kuestioná

4. Kon Yehova su manera di ehersé soberania a ser kuestioná na komienso di humanidat su historia?

⁴ Un yu spiritual di Dios a rebeldiá i tabata determiná pa stroba Yehova su propósito, hasiendo asina mal uso di e don di boluntat liber ku Dios a dun’é. El a perturbá e pas di tur esnan ku amorosamente ta someté nan mes na Yehova su soberania. Satanas a pone e promé pareha kuminsá kana den e kaminda di independensia for di Dios. (Génesis 3:1-6) E no a nenga ku Yehova tin poder, pero sí el a  kuestioná Yehova su manera di ehersé soberania i komo tal Yehova su derecho di goberná. Pues, e kuestion fundamental relashoná ku Yehova su soberania a lanta aki riba tera, na komienso di humanidat su historia.

5. Kua kuestion sekundario a lanta, i komo resultado e fieldat di ken mas a ser kuestioná?

⁵ Tin un kuestion sekundario ku Satanas a lanta den e tempu di Jòb ku ta estrechamente ligá ku e kuestion prinsipal di soberania universal. Satanas a kuestioná e motibu pakiko Yehova su kriaturanan ta someté nan mes na Yehova i ta sirbié. Satanas a insinuá ku nan tabata hasi esei pa motibunan egoista i ku si pone nan na prueba, nan lo a bira kontra Dios. (Jòb 1:7-11; 2:4, 5) Ounke e kuestion aki a lanta en konekshon ku un sirbidó humano di Yehova, e ta enbolbé tambe e yunan spiritual di Dios, i asta Yehova su Yu unigénito.

6. Kon Yehova a duna prueba di ta fiel na su propósito i na su nòmber?

⁶ Yehova, siendo fiel na su propósito i na e nifikashon di su nòmber, a hasi su mes un Profeta i un Salbadó. * El a bisa Satanas: “Lo mi pone enemistat entre abo i e muhé, i entre bo simia i su simia; e lo heridá bo kabes, i abo lo heridá su hilchi di pia.” (Génesis 3:15) Yehova lo a kontestá e kuestion ku Satanas a lanta i duna e desendientenan di Adam e speransa di haña liberashon i bida pa medio di e Simia di e “muhé,” esta, e parti selestial di Yehova su organisashon.—Romanonan 5:21; Galationan 4:26, 31.

“E Sekreto Sagrado di Su Boluntat”

7. Ki propósito Yehova a revelá mediante apòstel Pablo?

⁷ Apòstel Pablo a splika masha bunita den su karta na e kristiannan na Efeso kon Yehova ta atministrá kosnan pa kumpli ku su propósito. Pablo a skirbi: “El a duna nos di konosé e sekreto sagrado di su boluntat. Esei ta segun su gustu ku el a proponé den su mes pa un atministrashon n’e límite kompletu dje tempu señalá, esta, pa rekohé tur kos huntu atrobe den e Kristu, e kosnan den shelu i e kosnan riba tera.” (Efesionan 1:9, 10, NW) Yehova su propósito glorioso ta pa perkurá un universo uní, habitá pa kriaturanan ku amorosamente ta someté nan mes na su soberania. (Revelashon 4:11) Di e manera ei Dios su nòmber lo ser santifiká, lo keda demostrá ku Satanas ta un mentiroso i Dios su boluntat lo keda kumplí “na tera meskos ku den shelu.”—Mateo 6:10.

8. Kiko e palabra tradusí komo “atministrashon” ta nifiká?

⁸ Yehova su “gustu,” òf propósito, lo a kumpli pa medio di “un atministrashon.” Pablo a usa aki un palabra ku literalmente ta nifiká “maneho di un kas.” E ta referí, no na un gobièrnu, manera e Reino Mesiániko, sino na  un manera di manehá kosnan. * E manera maravioso ku Yehova lo atministrá kosnan pa kumpli ku su propósito a enserá un “sekreto sagrado” ku lo a keda revelá progresivamente atraves di siglonan.—Efesionan 1:10; 3:9, NW, nota na pia di página.

9. Kon Yehova progresivamente a revelá e sekreto sagrado di su boluntat?

⁹ Pa medio di un seri di aliansa òf pakto, Yehova gradualmente a revelá kon su propósito relashoná ku e Simia òf Desendiente primintí den Edén lo a kumpli. Yehova su promesa inkluí den e aliansa ku el a sera ku Abraham a revelá ku e Simia primintí lo bin na tera via Abraham su desendensia i ku lo e ta e medio ku ta hasi posibel pa “tur e nashonnan di e tera” bendishoná nan mes. E aliansa ei a duna di komprondé tambe ku lo tin otro hende asosiá ku e parti prinsipal di e simia. (Génesis 22:17, 18) E aliansa di Lei ku Yehova a sera ku e nashon di Israel karnal a revelá su propósito di tin “un reino di saserdotenan.” (Eksodo 19:5, 6) E aliansa ku David a mustra ku e Simia lo ta e Kabes di un Reino pa semper. (2 Samuel 7:12, 13; Salmo 89:3, 4) Unabes e aliansa di Lei a guia e hudiunan na e Mesias, Yehova a revelá mas faseta di e kumplimentu di su propósito. (Galationan 3:19, 24) E hendenan ku lo mester ta asosiá ku e parti prinsipal di e simia lo forma e “reino di saserdotenan” ku a ser profetisá. Ademas, lo a inkluí nan den “un aliansa nobo” komo e “Israel” nobo, un Israel spiritual.—Jeremias 31:31-34; Hebreonan 8:7-9. *

10, 11. (a) Kon Yehova a revelá e Simia primintí? (b) Dikon Dios su Yu unigénito a bin na tera?

 ¹⁰ Na armonia ku e atministrashon di Dios su propósito, e tempu a yega pa e Simia primintí aparesé riba tera. Yehova a manda angel Gabriel bisa Maria ku lo e duna lus na un yu hòmber ku e mester yama Hesus. E angel a bisa Maria: “E lo ta grandi i lo wòrdu yamá Yu di e Haltísimo; i Señor Dios lo dun’é e trono di su tata David; i e lo reina riba e kas di Jakòb pa semper, i su reino lo no tin fin.” (Lukas 1:32, 33) Pues, identidat di e Simia primintí a keda revelá.—Galationan 3:16; 4:4.

¹¹ Yehova su Yu unigénito lo a bin na tera i ser poné na prueba te na e límite. E kontesta perfekto riba e kuestion di Satanas lo tabata den Hesus su man. Lo el a keda fiel na su Tata? Esaki a enserá un sekreto sagrado. Mas despues apòstel Pablo a splika e papel di Hesus: “E sekreto sagrado dje deboshon piadoso aki ta ser rekonosé komo grandi: ‘El a ser manifestá den karni, a ser deklará hustu den spiritu, a aparesé na angel, a ser prediká entre e nashonnan, a ser keré den mundu, a ser risibí ariba den gloria.’” (1 Timoteo 3:16, NW) Sí, Hesus pa medio di su integridat inkebrantabel te na morto a duna un kontesta definitivo riba e kuestion ku Satanas a lanta. Pero otro detayenan di e sekreto sagrado a keda pendiente pa ser revelá.

“E Sekreto Sagrado di e Reino di Dios”

12, 13. (a) Menshoná un faseta di “e sekreto sagrado di e reino di Dios.” (b) E echo ku Yehova a skohe un kantidat limitá di hende pa bai shelu a enserá kiko?

¹² Durante un di su giranan di predikashon na Galilea, Hesus a indiká ku e sekreto sagrado tabata estrechamente ligá ku su Reino Mesiániko. El a bisa su disipelnan: “Ta duná na boso pa komprondé e sekretonan sagrado di e reino di shelu [“reino di Dios,” Marko 4:11].” (Mateo 13:11, NW) Un aspekto di e sekreto ei tabata ku Yehova lo a skohe un “tou chikitu” di 144.000 hende pa ta huntu ku su Yu komo parti di e simia, pa reina huntu kuné den shelu.—Lukas 12:32; Revelashon 14:1, 4.

¹³ Siendo ku hende a ser kreá pa biba riba tera, Yehova lo mester a produsí ‘kriaturanan nobo’ pa asina algun hende por a bai shelu. (2 Korintionan 5:17) Papiando komo un di esnan skohé pa kompartí e speransa selestial eksepshonal aki, apòstel Pedro a skirbi: “Bendishoná sea e Dios i Tata di nos Señor Hesukristu, kende, segun su gran miserikòrdia, a hasi nos nase di nobo den un speransa bibu pa medio di e resurekshon di Hesukristu for di e mortonan, pa optené un herensia ku ta inkoruptibel i sin mancha i ku lo no marchitá, ku ta reservá den shelu pa boso.”—1 Pedro 1:3, 4.

14. (a) Kon hende no-hudiu tabata enbolbí den “e sekreto sagrado di e reino di Dios”? (b) Kon bin nos por komprondé e ‘kosnan profundo aki di Dios’?

¹⁴ Un otro faseta di e sekreto sagrado relashoná ku e futuro gobièrnu di Reino tabata Dios su boluntat pa inkluí hende no-hudiu entre e kantidat chikitu di hende ku lo haña e yamada pa reina huntu ku Kristu den shelu. Pablo a splika e faseta aki di Yehova su “atministrashon” òf manera di manehá e kumplimentu di su propósito: “Den otro generashonnan [e sekreto] no a wòrdu hasí konosí na e yunan di hende, manera el a wòrdu revelá awor na su apòstelnan i profetanan santu den spiritu: ku e paganonan ta ko-herederonan i miembronan di e mesun kurpa, i ko-partisipantenan di e promesa den Kristu Hesus pa medio di e evangelio.” (Efesionan 3:5, 6) Komprondementu di e parti aki di e sekreto sagrado a keda revelá na e ‘apòstelnan santu.’ Asina tambe awe, si no tabata pa e yudansa di e spiritu santu, nos lo no a komprondé e ‘kosnan profundo aki di Dios.’—1 Korintionan 2:10; 4:1; Kolosensenan 1:26, 27.

15, 16. Dikon Yehova a skohe e gobernantenan pa reina huntu ku Kristu for di entre humanidat?

¹⁵ Beibel ta bisa ku e “144.000” ku ta ser  mirá pará huntu ku “e Lamchi” riba Seru Sion selestial “a wòrdu kumprá for di tera,” “kumprá for di entre hende komo e promé frutanan pa Dios i pa e Lamchi,” Kristu Hesus. (Revelashon 14:1-4) Yehova a skohe su promé yu selestial pa bira e parti prinsipal di e simia primintí den Edén. Pero dikon el a skohe e sosionan di Kristu for di entre humanidat? Apòstel Pablo a splika ku e kantidat limitá aki a ser “yamá segun [Yehova] su propósito,” “segun e gustu di su boluntat.”—Romanonan 8:17, 28-30; Efesionan 1:5, 11, NW; 2 Timoteo 1:9.

¹⁶ Yehova su propósito ta pa santifiká su nòmber ku ta grandi i santu, i vindiká su soberania universal. Mediante Yehova su “atministrashon” òf manera inkomparablemente sabí di manehá kosnan, el a manda su Yu primogénito na tera, kaminda el a ser poné na prueba te na morto. Ademas, Yehova a disidí ku e Reino Mesiániko di su Yu lo inkluí hende ku tambe a sostené Su soberania te na morto.—Efesionan 1:8-12, NW; Revelashon 2:10, 11.

17. Dikon nos por ta kontentu ku Kristu i su ko-gobernantenan un tempu a biba komo hende?

¹⁷ Yehova a demostrá gran amor pa e desendientenan di Adam dor di laga su Yu bin na tera i dor di skohe for di entre humanidat esnan ku lo ta ko-heredero ku su Yu den e gobièrnu di Reino. Kon otro hendenan ku a duna prueba di ta fiel na Yehova, for di Abel en adelante, por a benefisiá di esei? Siendo ku hende imperfekto ta nase katibu di piká i morto, lo mester kura nan den sentido spiritual i físiko i hasi nan perfekto, di akuerdo ku Yehova su propósito original pa humanidat. (Romanonan 5:12) Pa tur hende ku ansiosamente ta spera di haña bida eterno riba tera ta un gran konsuelo pa sa ku nan Rei lo mustra amor i komprenshon na nan meskos ku el a demostrá esei na su disipelnan durante su ministerio riba tera. (Mateo 11:28, 29; Hebreonan 2:17, 18; 4:15; 7:25, 26) Loke tambe ta trankilisá nan mashá ta ku e personanan ku lo reina huntu ku Kristu komo rei i saserdote den shelu, un tempu tabata hende hòmber i muhé di fe kendenan mes tambe a lucha ku debilidatnan personal i a eksperensiá e situashonnan difísil di bida meskos ku nos.—Romanonan 7:21-25.

Yehova Su Propósito Infalibel

18, 19. Dikon e palabranan di Pablo na Efesionan 1:8-11 ta mas kla pa nos awor, i kiko nos lo konsiderá den e siguiente artíkulo?

¹⁸ Awor nos por komprondé mas mihó e nifikashon di e palabranan di Pablo ku nos ta haña na Efesionan 1:8-11 [NW] ku el a dirigí na e kristiannan ungí. El a bisa ku Yehova a duna di konosé na nan “e sekreto sagrado di su boluntat,” ku nan tabata “asigná komo heredero” huntu ku Kristu, i ku nan tabata “predeterminá segun e propósito di esun ku ta dirigí tur kos konforme ku e manera ku su boluntat ta konsehá.” Nos ta ripará ku tur esaki ta pas den Yehova su maravioso “atministrashon” di kosnan pa kumpli ku su propósito. Esaki tambe ta yuda nos komprondé dikon ta solamente un par di kristian ku ta asistí na e Sena di Señor ta tuma di e emblemanan.

¹⁹ Den e siguiente artíkulo, nos lo mira kiko e Memorial òf Konmemorashon di Kristu su morto ta nifiká pa e kristiannan ku tin e speransa selestial. Tambe nos lo siña dikon e miónes di hendenan ku ta spera di biba pa semper riba tera mester ta sumamente interesá den loke e Memorial ta simbolisá.

[Nota]

Komo Repaso

• Dikon Yehova a krea e tera i pone hende riba dje?

• Dikon tabata nesesario pa Yehova su Yu unigénito ser poné na prueba riba tera?

• Dikon Yehova a skohe e gobernantenan ku lo reina huntu ku Kristu for di entre humanidat?

[Preguntanan di Estudio]