Ken Ta e Kristiannan Berdadero?

“KRISTIANISMO ta eksistí solamente kaminda e rekuerdo di Hesukristu ta bibu den teoria i práktika.” (On Being a Christian) Ku e palabranan ei, e teólogo suiso Hans Küng a establesé un bèrdat mas kla ku di dia: Berdadero kristianismo ta eksistí solamente kaminda hende sinsero ta praktiká e siñansanan di Hesus.

Awor kiko nos por bisa di hende òf institushonnan ku ta pretendé di ta siguidó di Kristu pero ku en realidat no ta praktiká su siñansanan? Hesus mes a bisa ku hopi lo pretendé di ta kristian. Nan lo referí na vários kos ku nan a hasi pa mustra ku nan a sirbié, bisando: “Nos no a profetisá den bo nòmber, i den bo nòmber a saka demoño, i den bo nòmber a  hasi hopi milager?” Pero kon Hesus lo reakshoná? Su kontesta ta mustra kiko e ta pensa di nan: “Nunka mi no a konosé boso; bai for di mi, boso ku ta hasi inikidat.”—Mateo 7:22, 23.

Esaki ta un spièrtamentu serio pa ‘hasidónan di inikidat’ ku ta pretendé di ta siguidó di Hesus! Laga nos konsiderá dos kondishon fundamental ku hende tin ku kumpli kuné pa Hesus por rekonosé nan komo kristian berdadero, i no rechasá nan komo hasidó di inikidat.

“Si Boso Tin Amor Un pa Otro”

Un di e kondishonnan di Hesus ta esaki: “Un mandamentu nobo mi ta duna boso, pa boso stima otro, i meskos ku ami a stima boso, pa boso tambe stima otro. Na esaki tur hende lo sa ku boso ta mi disipel, si boso tin amor un pa otro.”—Juan 13:34, 35.

Hesus ta rekerí pa su siguidónan tin berdadero amor pa otro i pa e restu di humanidat. Hopi kristian a kumpli ku e rekisito ei durante e siglonan despues ku Hesus a biba riba tera. Pero kiko di mayoria religion ku a pretendé di representá Kristu? Nan historia ta karakterisá pa amor? Sigur ku nò. Mas bien, nan tabata na kabes di numeroso bataya- i konfliktonan den kua sanger di hende inosente a ser dramá.—Revelashon 18:24.

Te ainda esei ta e kaso. Nashonnan ku ta pretendé di ta kristian a hiba delantera den e matansanan ku a karakterisá e dos gueranan mundial di siglo 20. Mas resien, miembronan di e asina yamá iglesianan kristian tabata na kabes di e atrosidatnan i intento di genosidio ku a tuma lugá na Ruanda na 1994. E eks-arsobispu anglikano Desmond Tutu a skirbi: “Esnan ku a lanta kontra otro i kometé e barbaridatnan sangriente aki tabata hende di e mesun religion. Mayoria tabata kristian.”

“Si Boso Keda den Mi Palabra”

Hesus a duna un di dos rekisito fundamental pa kristianismo berdadero, ora el a bisa: “Si boso keda den mi palabra, boso ta berdaderamente disipelnan di mi, i boso lo konosé e bèrdat, i e bèrdat lo hasi boso liber.”—Juan 8:31, 32.

Hesus ta ferwagt di su siguidónan pa nan keda den su palabra, esta, pa nan pega na su siñansanan. Na lugá di esei, maestronan religioso ku a pretendé di sigui Kristu “pokopoko pero sigur a adoptá konseptonan griego,” segun e teólogo Küng. Nan a remplasá e siñansanan di Hesus ku entre otro ideanan manera inmortalidat di alma, kreensia den purgatorio, adorashon di Maria i un klase di klero—ideanan ku nan a fia for di religion- i filósofonan pagano.—1 Korintionan 1:19-21; 3:18-20.

Maestronan religioso a introdusí tambe e doktrina ineksplikabel di Trinidat, elevando Hesus na un posishon ku nunka el a pretendé di tin. Ku e doktrina ei, nan a stroba hende di adorá esun na ken Hesus semper a dirigí atenshon, esta, su Tata, Yehova. (Mateo 5:16;  6:9; Juan 14:28; 20:17) Hans Küng a skirbi: “Ora Hesus ta papia di Dios, e kier men e Dios antiguo di e patriarkanan Abraham, Isaak i Jakòb, ku ta Yahweh . . . Pa [Hesus], e ta e úniko i e solo Dios.” Kuantu hende awe ta relashoná e Dios i Tata di Hesus mesora ku Yahweh, òf Yehova, manera su nòmber ta ser skirbí na papiamentu?

Lidernan religioso a desviá kompletamente for di Hesus su mandamentu pa keda neutral den asuntunan polítiko. Den tempu di Hesus, Galilea “tabata e sentro di nashonalismo étniko,” segun e eskritor Trevor Morrow. Hopi hudiu patriótiko a usa arma pa lucha pa libertat polítiko i religioso. Hesus a manda su disipelnan pa bai mete den e luchanan ei? Nò. Al kontrario, el a bisa nan: “Boso no ta di mundu.” (Juan 15:19; 17:14) Sin embargo, en bes di keda neutral, lidernan di iglesia a desaroyá loke e eskritor irlandes Hubert Butler a deskribí komo “siñansanan di iglesia ku tin un toke militante i polítiko.” E ta bisa mas aleu: “Kristianismo polítiko ta kasi semper tambe kristianismo militarisá. I ora hefenan di estado i lidernan religioso yega na un akuerdo, semper ta sosodé ku Iglesia ta bendishoná e ehérsitonan militar di estado a kambio di sierto privilegionan.”

Maestronan Falsu Ta Nenga Hesus

Apòstel Pablo a spièrta tokante un alehamentu for di berdadero kristianismo. El a bisa ku despues di su morto, “lobo brabu” for di entre hende ku a yama nan mes kristian lo a “papia kosnan pèrvèrso, pa desviá e disipelnan i hasi nan bai nan tras.” (Echonan 20:29, 30) Públikamente nan lo a “profesá ku nan konosé Dios, ma ku nan echonan nan [lo a] neng’é.” (Tito 1:16) Apòstel Pedro tambe a spièrta ku maestronan falsu lo a “introdusí na skondí herehianan [òf sektanan] destruktivo, asta nengando e shon ku a kumpra nan.” El a bisa ku nan mal kondukta lo a pone hende ‘blasfemá e kaminda di e bèrdat.’ (2 Pedro 2:1, 2) Hende ku ta nenga Kristu den e forma aki, segun e erudito griego W. E. Vine, ta “nenga e Tata i e Yu dor di bai kontra nan fe i dor di plama siñansa malisioso.”

Kon Hesus lo reakshoná si hende ku ta pretendé di ta su disipel deliberadamente no “keda den [su] palabra” ni kumpli ku otro rekisitonan ku el a trese dilanti? El a spièrta: “Ken ku nenga mi dilanti di hende, esei mi tambe lo nenga dilanti di mi Tata ku ta den shelu.” (Mateo 10:33) Klaru ku Hesus no ta nenga un persona ku ta faya apesar di su deseo sinsero di keda fiel na dje. Por ehèmpel, ounke apòstel Pedro a nenga Hesus tres biaha, el a repentí i a ser pordoná. (Mateo 26:69-75) Sin embargo, Hesus ta nenga persona- òf institushonnan ku ta resultá di ta manera lobo bistí na karné—ku ta pretendé di sigui Kristu pero ku deliberadamente i persistentemente ta rechasá su siñansanan. Relashoná ku e maestronan falsu ei, Hesus a bisa: “Na nan fruta boso lo konosé nan.”—Mateo 7:15-20.

Apòstelnan Ta Muri i Apostasia Ta Lanta Kabes

Na ki tempu kristiannan falsu a kuminsá nenga Kristu? Esei tabata djis despues di su morto. E mes a spièrta ku rápidamente Satanas e Diabel lo a sembra “yerba shimaron,” òf kristiannan falsu, den e “trigu,” òf kristiannan berdadero, ku Hesus a planta durante su ministerio. (Mateo 13:24, 25, 37-39) Apòstel Pablo a spièrta ku maestronan engañoso tabata aktivo kaba den su tempu. El a bisa ku e motibu fundamental pakiko nan a desviá for di e siñansanan di Hesukristu tabata nan falta di berdadero “amor pa e bèrdat.”—2 Tesalonisensenan 2:10.

Tanten ku e apòstelnan di Hesukristu tabata na bida, e apostasia aki no a haña chèns di desaroyá. Sin embargo, despues di nan morto, lidernan religioso ku tabata usa “tur poder i señalnan i maravianan falsu i . . . tur e  engaño di inikidat” pa engañá hopi, a alehá mas i mas hende for di e bèrdatnan ku Hesus i su apòstelnan a siña. (2 Tesalonisensenan 2:3, 6-12) E filósofo ingles Bertrand Russell ta skirbi ku den poko tempu e kongregashon kristian original a ser kambiá den un organisashon religioso ku “lo a laga Hesus i asta Pablo keda babuká.”

Berdadero Kristianismo Restorá

E echonan ta papia pa nan mes. Desde e morto di e apòstelnan, hopi kos ku a tuma lugá den nòmber di kristianismo no a reflehá e siñansanan di Kristu. Pero esei no kier men ku Hesus a faya ku su promesa di ta ku su siguidónan “te na fin di mundu.” (Mateo 28:20) Nos por ta sigur ku for di dia el a bisa e palabranan ei, tabatin personanan fiel entre ken “e rekuerdo di Hesukristu [tabata] bibu den teoria i práktika.” Hesukristu a kumpli ku su palabra di apoyá e personanan ei segun ku nan a hasi esfuerso pa demostrá e amor ku ta identifiká kristiannan berdadero i pa keda leal na e bèrdatnan ku el a siña.

Ademas, Hesus a primintí ku den e último dianan di e sistema di kosnan aki, e lo a reuní su disipelnan fiel den un kongregashon kristian fásil pa identifiká i ku e lo a usa pa kumpli ku su boluntat. (Mateo 24:14, 45-47) Aktualmente mes e ta usando e kongregashon ei pa rekohé “un multitut grandi” di hòmber, muhé i mucha “di tur nashon i tur tribu i pueblo i lenga,” i ta uni nan bou di su liderato den “ún tou” bou di “ún wardadó.”—Revelashon 7:9, 14-17; Juan 10:16; Efesionan 4:11-16.

P’esei, sali for di kualke institushon òf organisashon ku a desonrá e nòmber di Kristu i difamá kristianismo durante e último dos mil añanan. Sino, manera Hesukristu a bisa apòstel Juan, lo bo por “risibí di [nan] plaganan” ora Dios ehekutá su huisio riba nan den futuro serkano. (Revelashon 1:1; 18:4, 5) Sea determiná pa ta entre esnan tokante ken profeta Mikeas a papia ora el a bisa ku “den e último dianan” adoradónan berdadero—personanan ku ta pega na berdadero kristianismo—lo skucha e instrukshonnan di Dios i “kana den su bereanan” di adorashon puru restorá. (Mikeas 4:1-4) Gustosamente e editornan di e revista aki lo yuda bo identifiká e adoradónan berdadero ei.

[Plachinan na página 5]

Pakiko kristiannan berdadero no ta bai guera?

[Rekonosementu]

Sòldánan, na banda robes: U.S. National Archives photo; vlammenwerper, banda drechi: U.S. Army Photo

[Plachinan na página 7]

E kondishonnan fundamental ku Hesus a pone pa kristiannan berdadero ta “[mustra] amor un pa otro” i “keda den mi palabra”