“Konta Nos Mas!”

NA E stat Nezlobnaya, Rusia, un klas di skol sekundario tabata studia e obranan di e outor ruso Mikhail Bulgakov durante lès di literatura. Entre e obranan literario tabatin un novela ku ta deskribí Hesukristu den un manera denigrante, miéntras e ta presentá Satanas komo un héroe. Despues di a papia di e buki ku e klas, e dosente a duna e klas un prufwèrk basá riba e novela aki. Sin embargo, un di e alumnonan, un Testigu di Yehova di 16 aña ku yama Andrey, kortesmente a pidi pa no lag’é traha e prufwèrk ei pasobra su konsenshi no ta permitié studia e tipo di literatura aki. El a ofresé pa na lugá di e prufwèrk e skirbi un òpstèl den kua lo e splika kon e ta mira Hesukristu. E dosente a bai di akuerdo.

Andrey a splika den su òpstèl ku ounke e ta respetá opinion di otro hende, el a deskubrí ku e mihó manera pa siña tokante Hesus ta dor di lesa un di e kuater relatonan di Evangelio. Hasiendo esei, “bo ta siña tokante Hesus su bida i siñansanan a base di loke testigunan okular a konta.” Andrey a agregá: “Un otro faktor preokupante ta e manera ku Satanas ta ser deskribí. Tin hende kisas ta haña prèt pa lesa un buki den kua Satanas ta un héroe, pero pa ami sí no.” El a splika ku en realidat Satanas ta un kriatura spiritual malbado i poderoso ku a rebeldiá kontra Dios, i a trese maldat, aflikshon i sufrimentu pa humanidat. Andrey a konkluí su òpstèl asin’aki: “Mi no ta kere ku lesamentu di e novela aki lo benefisiá mi. Klaru ku mi no tin nada kontra di Bulgakov komo eskritor. Pero personalmente, mi ta preferá di lesa Beibel pa siña e bèrdat históriko tokante Hesukristu.”

Andrey su dosente a keda asina kontentu ku e òpstèl ku el a pidié prepará un spreekbeurt tokante Hesukristu. Gustosamente Andrey a bai di akuerdo pa hasi esei. Durante nan siguiente lès di literatura, Andrey a presentá su informe dilanti di henter e klas. El a splika dikon e ta haña ku Hesus ta e hòmber di mas importante ku a yega di biba. Kaba el a lesa un kapítulo tokante Hesus su morto for di e buki bíbliko di Mateo. Komo ku e tempu asigná pa su spreekbeurt tabata kabando, Andrey kier a konkluí su presentashon, pero su kompañeronan di klas a insistí: “Konta nos mas! Kiko a pasa despues?” Pues, el a sigui lesa for di e relato di Mateo tokante Hesus su resurekshon.

Ora ku Andrey a terminá, su kompañeronan di klas a hasié hopi pregunta tokante Hesus i Yehova. Andrey a konta: “Mi a hasi orashon pidi Yehova duna mi sabiduria, i el a kontestá mi orashon. Mi por a kontestá tur e preguntanan ku nan a hasi!” Despues di e lès, Andrey a duna su dosente un ehemplar di e buki E homber mas importante cu hamás a biba, * i e dosente a asept’é ku smak. Andrey a komentá: “El a duna mi un bon punto pa mi spreekbeurt i a elogiá mi pasobra mi tin mi propio konvikshonnan i mi no tin bèrgwensa di nan. Tambe el a bisa mi ku e ta di akuerdo ku algun di mi kreensianan.”

Andrey ta masha kontentu ku el a disidí di sigui su konsenshi bíblikamente entrená dor di no lesa informashon ku ta desonrá Yehova i su Yu, Hesukristu. E posishon firme ei no solamente a proteh’é pa e no ser afektá dor di puntonan di bista no-bíbliko, sino tambe a habri e oportunidat maravioso ku e por a kompartí bèrdatnan bíbliko sumamente importante ku otro hende.

[Nota]