“Mantené Boso Huisio Kompletamente”

“E hende simpel ta kere tur kos, ma e hòmber prudente ta wak bon unda e ta bai.”—PROVERBIONAN 14:15.

1, 2. (a) Kiko Lòt su eksperensia na Sodoma ta siña nos? (b) Kiko e ekspreshon “mantené boso huisio” ke men?

ORA ku Abraham a laga pa Lòt skohe promé ki parti di e tera e tabata ke, Lòt su bista a kai riba un region ku tabatin hopi awa i tabata ‘manera e hòfi di Yehova.’ Esei lo mester a parse e lugá ideal pa Lòt establesé su famia, ya ku el “a skohe pa su mes henter e vaye di Hordan” i a pone su kampamentu serka di Sodoma. Sin embargo, aparensia ta engañoso, pasobra djis eibanda tabata biba “e hòmbernan di Sodoma [kendenan] tabata masha malbado mes i pekadónan kontra SEÑOR.” (Génesis 13:7-13) Manera kosnan a desaroyá, Lòt ku su famia a sufri pèrdida teribel. Ku tempu, e ku su yu muhénan a haña nan ta biba den un kueba. (Génesis 19:17, 23-26, 30) Loke na prinsipio a parse asina bon den su bista, a resultá nèt lo kontrario.

² E relato di loke a pasa ku Lòt ta kontené un lès pa sirbidónan di Dios awe. Ora nos tin ku tuma sierto desishonnan, nos mester ta alerta pa posibel peliger i vigilá pa no laga e promé impreshon di algu engañá nos. P’esei ta na su lugá ku e Palabra di Dios ta urgi nos: “Mantené boso huisio kompletamente.” (1 Pedro 1:13, NW) E palabra griego tradusí aki komo “mantené boso huisio,” literalmente ta nifiká “sea sobrio.” Segun e erudito bíbliko R.C.H. Lenski, e sobriedat ei ta referí na “un estado mental trankil i stabil ku ta evaluá i kalkulá kosnan korektamente i di e manera ei ta hasi posibel ku nos por tuma e desishon korekto.” Laga nos konsiderá algun situashon ku ta rekerí pa nos mantené nos huisio.

Kon pa Evaluá un Oportunidat pa Drenta den Negoshi

3. Dikon ta nesesario pa nos ta kouteloso ora un persona ofresé nos un oportunidat pa drenta den negoshi?

³ Suponé ku un persona di bon reputashon ofresé bo un oportunidat pa drenta den negoshi, kisas e persona tambe ta un adoradó di Yehova. E ta masha entusiasmá ku e prospektonan pa éksito i ta animá bo pa aktua lihé ya asina bo no ta pèrdè e chèns. Kisas bo ta kuminsá imaginá kaba kon esaki lo trese un mihó bida pa bo i pa bo famia. Podisé bo ta asta rasoná ku esaki lo duna bo chèns pa dediká mas tempu na aktividatnan spiritual. Sin embargo, Proverbionan 14:15 ta spièrta: “E hende simpel [“sin eksperensia,” NW] ta kere tur kos, ma e hòmber prudente ta wak bon unda e ta bai.” Hopi biaha, den e emoshon ku ta kompañá komienso di un negoshi nobo, hende no ta realisá kon grandi e riesgo di pèrdè nan invershon ta. Tambe nan sa pasa por haltu di e echo ku kos por bai malu òf ta keda sin konsiderá plenamente ku ora bo ta hasi negoshi tin hopi faktor impredisibel. (Santiago 4:13, 14) Den un situashon asina, ta masha nesesario pa bo mantené bo huisio kompletamente!

4. Kon nos por ‘wak bon unda nos ta bai’ ora di evaluá un proposishon di negoshi?

⁴ Un persona prudente ta analisá un proposishon di negoshi kuidadosamente promé ku e tuma un desishon. (Proverbionan 21:5) Hopi biaha tal análisis ta revelá peligernan skondí. Pensa riba e siguiente senario: Un persona ta buskando plaka pa fia en konekshon ku su plannan di negoshi i ta ofresé bo un ganashi grandi si bo fi’é e fondonan. E oferta kisas ta zona  atraktivo, pero kiko ta e riesgonan? E persona ta bai di akuerdo pa paga e plaka bèk kon ku para ku e negoshi, òf e ta paga bèk dependiendo di si e negoshi tin éksito? Ku otro palabra, bo por afòrt pa pèrdè bo plaka si e negoshi frakasá? Lo bo por puntra tambe: “Dikon e ta buska pa fia plaka serka hende privá? Akaso bankonan ta konsiderá ku e negoshi ta algu muchu riskante?” Dor di tuma tempu pa pensa riba e riesgonan, bo ta haña chèns di evaluá e proposishon na un manera realístiko.—Proverbionan 13:16; 22:3.

5. (a) Ki paso sabí Jeremias a tuma ora el a kumpra un tereno? (b) Dikon ta bon pa dokumentá tur areglo di negoshi den un akuerdo formal por eskrito?

⁵ Ora ku profeta Jeremias a kumpra un tereno serka su primu ku tambe tabata un adoradó di Yehova, Jeremias a hasi un nota por eskrito di e transakshon dilanti di testigunan. (Jeremias 32:9-12) Awe, un persona sabí tambe lo hasi sigur ku tur areglo di negoshi ku e sera, inkluso esnan ku miembronan di famia i rumannan den fe, ta ser dokumentá den un akuerdo formal por eskrito. * Si nos tin un akuerdo skirbí ku palabranan kla i bon prepará, esei ta yuda evitá mal komprondementu i ta protehá e unidat. Di otro banda, hopi biaha ora problema di negoshi surgi entre sirbidónan di Yehova, ta pasobra no tabatin un akuerdo skirbí. Lamentablemente, e tipo di problemanan ei por resultá den doló di kurason, renkor i asta por pone hende pèrdè nan spiritualidat.

6. Dikon nos tin ku vigilá kontra golosidat?

⁶ Nos mester vigilá tambe kontra golosidat. (Lukas 12:15) E prospekto di haña ganashi grandi por siega un persona pa e riesgonan di un negoshi inkonfiabel. Asta algun ruman ku tabatin privilegionan ekselente den e sirbishi di Yehova a kai den e trampa aki. E Palabra di Dios ta spièrta nos: “Laga boso karakter ta liber di amor pa plaka i sea kontentu ku loke boso tin.” (Hebreonan 13:5) Ora un kristian ta pensa pa drenta den un negoshi, e mester puntra su mes: ‘Ta realmente nesesario pa mi enbolbé mi mes den esaki?’ Un bida simpel ku ta konsentrá riba nos adorashon di Yehova lo protehá nos di “tur sorto di maldat.”—1 Timoteo 6:6-10.

Retonan Ku Kristiannan Soltero Ta Konfrontá

7. (a) Ki reto hopi kristian soltero ta konfrontá? (b) Kon nos skohementu di un kasá ta enserá lealtat na Dios?

⁷ Hopi sirbidó di Yehova ta anhelá pa kasa pero nan no a haña un persona apropiá ainda. Den algun pais, tin un preshon sosial fuerte pa kasa. Sin embargo, tin kisas masha tiki oportunidat pa topa un posibel kasá. (Proverbionan 13:12) Pero kristiannan ta rekonosé ku ta un asuntu di lealtat na Yehova pa obedesé e mandamentu bíbliko pa kasa “basta ta den Señor.” (1 Korintionan 7:39) Pa para firme kontra e preshonnan i tentashonnan ku nan ta konfrontá, kristiannan soltero tin ku mantené nan huisio kompletamente.

8. Bou di ki preshon un mucha muhé sulamita a hañ’é, i kon rumannan muhé kristian awe lo por konfrontá un reto similar?

⁸ Den e Kantika di Salomon, un humilde mucha muhé di kunuku ku ta ser yamá e sulamita ta atraé e atenshon di rei. E rei ta purba sedusié ku un despliegue impreshonante di rikesa,  prestigio i enkanto, ounke ku e mucha muhé ta enamorá kaba di un yònkuman. (Kantika di Salomon 1:9-11; 3:7-10; 6:8-10, 13) Si abo ta un mucha muhé kristian, kisas bo tambe a atraé un persona su atenshon, pero un atenshon ku bo no ta deseá. Un persona na bo trabou, podisé un hende den un posishon di outoridat, ta kuminsá duna bo hopi kòmplimènt, ta hasi bo fabor, i ta buska tur chèns p’e ta huntu ku bo. Tene kuidou ku tal atenshon ku ta laga bo sinti bon. Ounke no ta tur biaha un persona asina su intenshonnan ta romántiko òf inmoral, hopi biaha sí nan ta. Meskos ku e mucha muhé sulamita, sea manera “un muraya.” (Kantika di Salomon 8:4, 10) Rechasá aserkamentu romántiko indeseá na un manera firme. Laga bo koleganan sa for di prinsipio ku bo ta un Testigu di Yehova, i probechá di tur oportunidat pa duna nan testimonio. Esei lo sirbi komo un protekshon pa bo.

9. Menshoná algun peliger di drenta den un relashon ku un hende deskonosí via Internet. (Wak tambe e kuadro na página 25.)

⁹ Un kos ku ta birando hopi popular ta websitenan riba Internet diseñá pa yuda personanan soltero haña un kasá. Tin hende ta mira esakinan komo un manera pa siña konosé hende ku di otro forma nan lo no a topa. Sin embargo, ta un berdadero peliger pa drenta siegamente den un relashon ku un persona deskonosí. Riba Internet por ta difísil pa distinguí kiko ta bèrdat i kiko ta falsu. (Salmo 26:4) No ta tur hende ku ta pretendé di ta un sirbidó di Yehova, di bèrdat ta esei. Ademas, buskamentu di pareha via Internet, por pone un laso fuerte desaroyá masha lihé, i esei por nubla bo huisio. (Proverbionan 28:26) Sea ta via Internet òf usando otro medio, no ta sabí pa kultivá un relashon íntimo ku un persona ku nos no sa muchu kos di dje.—1 Korintionan 15:33.

10. Kon otro rumannan por animá kristiannan soltero?

¹⁰ Yehova “ta yen di kompashon” pa su sirbidónan. (Santiago 5:11) E sa ku kristiannan ku ta soltero debí na sirkunstansia ta konfrontá retonan ku tin biaha ta desanimá nan, i e tin masha apresio pa nan lealtat. Kon otro rumannan por animá esnan soltero? Nos mester elogiá nan ku regularidat pa nan obedensia i spiritu di sakrifisio propio. (Huesnan 11:39, 40, NW) Tambe nos por inkluí nan ora nos ta hasi areglonan pa tene asosiashon edifikante. Bo a hasi esei últimamente? Ademas, nos por hasi orashon pa nan, pidiendo Yehova pa yuda nan mantené nan stabilidat spiritual i haña goso den sirbié. Mediante nos interes sinsero, laga nos demostrá  ku nos ta apresiá e rumannan leal aki meskos ku Yehova ta apresiá nan.—Salmo 37:28.

Kon pa Trata ku Problema ku Salú

11. Ki retonan problema serio ku salú ta kousa?

¹¹ Ki un gran angustia nos ta sinti ora ku nos òf un ser kerí ta konfrontá problema serio ku salú! (Isaias 38:1-3) Miéntras ku nos ta purba haña un tratamentu efektivo, ta masha importante pa nos pega na prinsipionan bíbliko. Por ehèmpel, kristiannan ta hasi sigur di obedesé Beibel su mandamentu pa apstené di sanger. Tambe nan ta evitá kualke prosedura di diagnostiká malesa òf kualke terapia ku tin keber ku spiritismo. (Echonan 15:28, 29; Galationan 5:19-21) Sin embargo, pa hende ku no tin un entrenamentu médiko por ta hopi konfuso i abrumador pa evaluá e opshonnan di tratamentu ku tin. Kiko por yuda nos mantené nos huisio kompletamente?

12. Kon un kristian por keda balansá ora e ta konsiderá opshonnan di tratamentu ku tin?

¹² “E hòmber prudente ta wak bon unda e ta bai” dor di hasi investigashon den Beibel i den publikashonnan kristian. (Proverbionan 14:15) Na partinan di mundu kaminda tin masha tiki dòkter i hospital, kisas e úniko tratamentu disponibel ta medisina tradishonal, ku ta hasi uso di remedi di yerba. Si nos tin pensá di sigui tal tratamentu, nos por haña informashon útil den E Toren di Vigilansia na spañó di 15 di aprel 1987, página 26-9. E artíkulo ta spièrta nos pa posibel peligernan. Por ehèmpel, nos lo tin ku buska pa sa lo siguiente: Ta konosí ku e dòkter di yerba ta praktiká spiritismo? E tratamentu ta basá riba e kreensia ku malesa i morto ta ser kousá sea dor di diosnan (òf spiritunan di antepasado) ofendí òf dor di enemigunan ku ta usa bruheria? Ta usa sakrifisio, fórmulanan mágiko òf otro ritonan spiritista den preparashon òf uso di e remedi? (Deuteronomio 18:10-12) Tal investigashon lo yuda nos hasi kaso di e konseho inspirá: “Saminá tur kos; tene duru na loke ta bon.” * (1 Tesalonisensenan 5:21) Esei lo yuda nos keda balansá.

13, 14. (a) Kon nos por demostrá ku nos ta rasonabel den kuidamentu di nos salú físiko? (b) Dikon nos mester ta rasonabel ora nos ta papia tokante asuntunan médiko i di salú ku otro hende?

¹³ Den tur área di bida nos mester ta rasonabel, inkluso den e kuido di nos salú físiko. (Filipensenan 4:5, NW) E echo ku nos ta duna atenshon balansá na nos salú, ta demostrá apresio pa e regalo presioso di bida. Ora nos ta konfrontá problema ku salú, esakinan korektamente meresé nos atenshon. Sin embargo, salú perfekto no ta alkansabel awor sino te ora Dios su tempu yega pa “e kuramentu di e nashonnan.” (Revelashon 22:1, 2) P’esei nos tin ku tene kuidou pa nos no bira asina preokupá ku nos salú físiko ku nos ta pusha un banda nos nesesidatnan spiritual ku ta hopi mas importante.—Mateo 5:3, NW; Filipensenan 1:10, NW.

¹⁴ Tambe nos mester demostrá di ta balansá i rasonabel ora di papia tokante asuntunan médiko i di salú ku otro hende. E tópikonan aki no mester dominá nos kòmbersashon ora nos ta reuní huntu pa asosiashon spiritual na reunion- i asambleanan kristian. Ademas, hopi bes desishonnan den asuntunan médiko ta enserá prinsipionan bíbliko, e hende su konsenshi i su relashon ku Yehova. P’esei lo ta un falta di amor pa imponé nos punto di bista riba un ruman den fe òf preshon’é pa pasa por haltu di loke su  konsenshi ta bis’é. Ounke nos por konsultá ku rumannan maduro den e kongregashon pa haña yudansa, kada kristian mester “karga su mes karga” di responsabilidat ora di tuma desishon, i “kada un di nos lo duna kuenta di su mes na Dios.”—Galationan 6:5; Romanonan 14:12, 22, 23.

Ora Nos Ta Pasa den Sirkunstansianan Difísil

15. Kon sirkunstansianan difísil por afektá nos?

¹⁵ Sirkunstansianan difísil por pone asta sirbidónan leal di Yehova papia òf aktua na un manera ku no ta sabí. (Eklesiastés 7:7) Ora Jòb tabata bou di prueba severo, el a bira un poko desbalansá i Dios mester a korigí su manera di pensa. (Jòb 35:2, 3; 40:6-8) Ounke “Moisés tabata masha humilde, mas ku tur hòmber ku tabatin riba superfisie di tera,” na un okashon el a rabia i papia deskabeyadamente. (Numbernan 12:3; 20:7-12; Salmo 106:32, 33) David a demostrá dominio propio na un manera atmirabel ora ku e no a mata Rei Saul. Pero ora ku Nabal a insult’é i a papia palabranan ofensivo ku su hòmbernan, David a bira furioso i a pèrdè su bon huisio. El a hera di kometé un eror kalamitoso. Ta ora ku Abigail a intervení el a rekobrá su huisio.—1 Samuel 24:2-7; 25:9-13, 32, 33.

16. Kiko por yuda nos evitá di aktua deskabeyadamente?

¹⁶ Nos tambe por konfrontá situashonnan difísil ku kisas ta pone nos aktua sin usa bon huisio. Un kos ku por yuda nos evitá di aktua deskabeyadamente i asina kore kometé un piká, ta di evaluá kuidadosamente e punto di bista di otro hende, manera David a hasi. (Proverbionan 19:2) Ademas, e Palabra di Dios ta konsehá nos: “Rabia, ma no hasi piká; meditá den bo kurason riba bo kama i keda ketu.” (Salmo 4:4) Te asina leu ku ta posibel, ta sabí pa warda te ora nos ta kalmu promé ku nos tuma akshon òf desishon. (Proverbionan 14:17, 29) Nos por akudí na Yehova den orashon ferviente, “i e pas di Dios, ku ta surpasá tur komprondementu, lo warda [nos] kurason i [nos] mente den Kristu Hesus.” (Filipensenan 4:6, 7) E pas aki ku Dios ta duna lo stabilisá nos i yuda nos mantené nos huisio kompletamente.

17. Dikon nos mester dependé riba Yehova pa mantené nos huisio kompletamente?

¹⁷ Apesar di kuantu esfuerso nos hasi pa evitá peliger i aktua sabí, nos tur ta kometé eror. (Santiago 3:2) Nos por ta na punto di dal un paso robes ku por hiba nos na ruina, anto sin ku nos sa mes. (Salmo 19:12, 13) Es mas, komo kriatura humano, nos no tin e kapasidat ni e derecho di dirigí nos propio pasonan sin Yehova su guia. (Jeremias 10:23) P’esei nos por ta hopi gradisidu ku e ta sigurá nos: “Lo mi instruí bo i siña bo e kaminda ku bo tin ku kana; lo mi konsehá bo; mi wowo ta riba bo.” (Salmo 32:8) Sí, ku Yehova su yudansa, nos por mantené nos huisio kompletamente.

[Nota]

Kon Lo Bo Kontestá?

Kon nos por mantené nos huisio

• si nos haña un oferta pa drenta den negoshi?

• ora nos ta buska un kasá?

• ora nos ta konfrontá problema ku salú?

• ora nos ta den sirkunstansianan difísil?

[Preguntanan di Estudio]

[Kuadro na página 25]

Bo Por Konfi’é?

E siguiente spièrtamentunan ta aparesé riba websitenan pa hende soltero:

“Maske nos a hasi tur nos esfuerso, nos no por duna ningun garantia di un persona su berdadero identidat.”

“Nos no ta garantisá ku kualke informashon di e servisio aki ta eksakto, kompletu òf útil.”

“Opinionnan, konseho, deklarashonnan, ofertanan òf otro informashon òf kontenido ku ta ser hasí disponibel via e servisio [aki] ta di nan respektivo outornan . . . i no nesesariamente bo mester konfia loke nan ta bisa.”

[Plachi na página 23]

“E hòmber prudente ta wak bon unda e ta bai”

[Plachinan na página 24, 25]

Kon hende muhé kristian por imitá e mucha muhé sulamita?

[Plachi na página 26]

“Saminá tur kos; tene duru na loke ta bon”