Pakiko Akudí na Beibel pa Haña Guia?

“Tur Skritura ta inspirá pa Dios i ta útil pa siñansa, pa reprendementu, pa korekshon.”—2 Timoteo 3:16.

NA UNDA bo ta akudí pa haña guia den bo bida? Awe tin un superabundansia di konseho disponibel riba kasi tur tópiko ku bo por imaginá. Pero tòg hopi hende ta akudí na e skrituranan antiguo di Beibel pa haña guia.

Sin embargo, mayoria hende ta konsiderá Beibel komo di poko balor, spesialmente den e era aki di informashon i di teknologia moderno. Algun edukadó i sientífiko respetá ta di opinion ku Beibel no ta konta mas. Akaso nan tin rason? Tumando na kuenta e tantísimo fuentenan di guia ku tin awe, dikon un hende lo mester akudí na Beibel?

Un Buki Ku Ta Kontené e Bèrdat

Na un okashon Hesukristu tabata sosegá banda di un pos i e tabatin un kòmbersashon ku un señora samaritano. El a bisa e señora: “Dios ta spiritu, i esnan ku ta ador’é mester adorá den spiritu i bèrdat.” (Juan 4:24) E palabranan aki ta mustra ku tin un forma di adorashon ku ta aseptabel pa Dios. Pa nos adorá Dios ku bèrdat, nos adorashon mester ta na armonia ku loke Dios a revelá tokante su mes den Beibel. E Palabra di Dios ta kontené e bèrdat.—Juan 17:17.

Sin embargo, tin hopi religion ku ta deklará ku nan ta kere den Beibel, i tòg ta parse ku kada un ta siña un kos diferente. Komo resultado, tin hopi konfushon enkuanto kiko Beibel ta siña realmente. Hesus ta Dios, òf e ta Yu di Dios? Tin bida despues di morto òf nò? Fièrnu ta un lugá ku ta eksistí di bèrdat kaminda hende ta ser tormentá despues di morto? Satanas ta un persona ku ta eksistí di bèrdat? Kiko ser un kristian ta nifiká? Dios ta realmente interesá den kiko nos ta hasi i kiko nos ta pensa? Amor berdadero ta un motibu válido pa tene relashon seksual promé ku kasa? Ta malu pa bebe bebida alkohóliko? Vários religion ta pretendé ku nan ta siña e bèrdat tokante e asuntunan aki. Pero doktrinanan religioso hopi bes ta na konflikto ku otro. Nan tur no por ta bèrdat.—Mateo 7:21-23.

Kon anto bo por haña sa e bèrdat tokante Dios i e forma di adorashon ku ta agrad’é? Suponé ku bo haña sa ku bo mester hasi un operashon pa drecha un problema médiko serio. Kiko lo bo hasi? Si ta posibel, lo bo keda buska te ora bo haña e mihó siruhano ku tin pa e tipo di operashon ei. Lo bo analisá su kredensialnan i su eksperensia, drenta den kontakto kuné i papia kuné. Por último, despues ku bo keda konvensí a base di evidensia ku e ta e mihó ku tin, lo bo pone bo konfiansa den dje i lag’é operá bo. Otro hende kisas tin un otro opinion di dje. Pero bo fe den e siruhano aki awor ta bon fundá.

Den mesun manera, si bo hasi un análisis onesto i kabal di e evidensia ku tin, bo por desaroyá fe den Dios i den Beibel. (Proverbionan 2:1-4) Ora di buska kontesta riba preguntanan tokante ki tipo di adorashon ta aseptabel pa Dios, bo tin un chòis. Bo por akudí na hende su siñansa- i opinionnan ku ta na konflikto ku otro, òf bo por konsiderá e punto di bista di Beibel.

Eksakto i Práktiko

Un análisis kuidadoso di Beibel lo duna bo basta prueba ku “tur Skritura ta inspirá  pa Dios i ta útil.” * (2 Timoteo 3:16, 17) Por ehèmpel, Beibel tin masha hopi profesia detayá. Anto historia ta duna prueba di nan kumplimentu. (Isaias 13:19, 20; Daniel 8:3-8, 20-22; Mikeas 5:2) Ounke Beibel no ta un buki di instrukshon sientífiko, e ta sientífikamente eksakto. E ta kontené echonan tokante naturalesa i salú ku a ser skirbí míles di aña promé ku sientífikonan por a yega na mesun konklushon.—Levítiko 11:27, 28, 32, 33; Isaias 40:22.

Ademas, Beibel ta yuda nos tuma desishonnan sabí. E tin un abundansia di konseho práktiko relashoná ku bida di famia, nos bienestar físiko i emoshonal, negoshi i otro asuntunan di bida diario. Proverbionan 2:6 i 7 ta bisa: “SEÑOR ta duna sabiduria; for di su boka ta sali konosementu i komprondementu. E ta warda sabiduria sano pa esnan ku ta rekto.” Dor di akudí na Beibel pa haña guia, bo por entrená bo mente “pa diserní loke ta bon i loke ta malu.”—Hebreonan 5:14.

Tambe e Palabra di Dios ta yuda nos komprondé e propósito di bida. (Juan 17:3; Echonan 17:26, 27) E ta splika e nifikashon di e kondishonnan mundial. (Mateo 24:3, 7, 8, 14; 2 Timoteo 3:1-5) Dios ta mustra nos den su Palabra kon lo e eliminá maldat for di riba tera i hasi posibel pa humanidat gosa di salú perfekto i bida eterno.—Isaias 33:24; Daniel 2:44; Revelashon 21:3, 4.

Miónes di hende a eksperensiá personalmente ku Beibel di bèrdat ta un fuente konfiabel di sabiduria práktiko.

[Nota]

BO A YEGA DI PUNTRA BO MES?

• Ki forma di adorashon ta aseptabel pa Dios?—Juan 4:24.

• Kiko bo mester hasi pa benefisiá di e sabiduria di Dios?—Proverbionan 2:1-4.

• Den ki manera Beibel ta un fuente di sabiduria práktiko?—Hebreonan 5:14.