“Un Drama Simbóliko” Ku Ta di Balor pa Nos

KI DIFÍSIL lo tabata pa komprondé e pleno nifikashon di sierto pasashinan bíbliko si otro partinan di Beibel no a klarifiká nan pa nos! Nos por aseptá relatonan históriko den e Palabra di Dios manera nan ta. Pero algun di nan ta kontené bèrdatnan mas profundo ku no ta bisto mesora. Un ehèmpel ta e relato di dos muhé den e kas di patriarka Abraham. Apòstel Pablo a yama e relato “un drama simbóliko.”—Galationan 4:24, NW.

E drama aki ta meresé nos atenshon pasobra e realidatnan ku e ta representá ta di importansia fundamental pa tur hende ku ta deseá di haña e bendishon di Yehova Dios. Promé ku nos bai analisá dikon ta asina, laga nos konsiderá e sirkunstansianan ku a motivá Pablo pa revelá e nifikashon di e drama.

Tabatin un problema entre e kristiannan di promé siglo na Galasia. Algun di nan tabata masha estrikto den “warda dianan i lunanan i temporadanan i añanan,” kosnan ku e Lei di Moisés a manda. E personanan aki tabata pretendé ku kreyentenan mester a obedesé e Lei pa nan tin Dios su aprobashon. (Galationan 4:10; 5:2, 3) Sin embargo, Pablo tabata sa ku tal práktikanan no tabata nesesario pa kristiannan. Pa proba esaki, el a referí na un relato konosí pa tur hende di antesedente hudiu.

Pablo a rekordá e galationan ku Abraham, tata di e nashon hudiu, a prokreá Ismael i Isaak. El a haña Ismael ku e muhé esklabo Hagar, i Isaak el a haña ku e muhé liber Sara. E kristiannan na Galasia ku tabata promové obedensia na e Lei di Moisés, sin duda tabata konosé e relato kon Sara na promé instante tabata steril i ku el a duna su kriá Hagar na Abraham p’e haña un yu na lugá di Sara. Tambe nan lo tabata sa ku unabes Hagar a sali na estado di Ismael, el a kuminsá despresiá su shon, Sara. Pero, manera  Dios a primintí, Sara finalmente a duna lus na Isaak den su behes. Mas despues, Abraham a manda Hagar ku Ismael bai pasobra Ismael a maltratá Isaak.—Génesis 16:1-4; 17:15-17; 21:1-14; Galationan 4:22, 23.

Dos Muhé, Dos Aliansa

Pablo a duna splikashon di e personahenan di e “drama simbóliko” aki. El a skirbi: “E muhénan aki ta dos aliansa, ún prosedente di Seru Sinaí, ku ta haña yu pa sklabitut; esaki ta Hagar. . . . I ta korespondé na e Yerusalèm djawor, pasobra e ta den sklabitut ku su yunan.” (Galationan 4:24, 25) Hagar a representá Israel literal, ku tabatin Yerusalèm komo su kapital. E nashon hudiu tabata mará na Yehova pa medio di e pakto òf aliansa di Lei ku a ser inougurá na Seru Sinaí. Bou di e aliansa di Lei, e israelitanan konstantemente a ser rekordá ku nan tabata katibu di piká i tabatin mester di redenshon.—Jeremias 31:31, 32; Romanonan 7:14-24.

Ta ken “e muhé liber” Sara ku su yu hòmber, Isaak, a representá anto? Pablo a indiká ku Sara, e “muhé steril,” a simbolisá Dios su esposa, esta, e parti selestial di Dios su organisashon. E muhé selestial aki tabata steril den e sentido ku promé ku Hesus a bin na mundu e no tabatin “yunan” ungí pa spiritu santu riba tera. (Galationan 4:27; Isaias 54:1-6) Sin embargo, na Pentekòste di aña 33 di nos era, spiritu santu a ser dramá riba un grupo di hende hòmber i muhé kendenan di e manera ei a nase di nobo komo yunan di e muhé selestial aki. Dios a adoptá e yunan ku e organisashon aki a produsí komo su yunan i nan a bira ko-heredero ku Hesukristu bou di un aliansa nobo. (Romanonan 8:15-17) Apòstel Pablo, siendo un di e yunan aki, por a skirbi: “E Yerusalèm djariba ta liber; e ta nos mama.”—Galationan 4:26.

Yunan di e Dos Muhénan

Segun e relato bíbliko, Ismael a persiguí Isaak. Den mesun manera, durante e promé siglo di nos era, e yunan di Yerusalèm sklabisá a hasi bofon di e yunan di Yerusalèm djariba i a persiguí nan. Pablo a splika: “Meskos ku den e tempunan ayá esun ku a nase segun karni [Ismael] a persiguí esun ku a nase segun spiritu [Isaak], asina ta awor tambe.” (Galationan 4:29) Ora ku Hesukristu a presentá riba tera i a kuminsá anunsiá e Reino, e lidernan religioso hudiu a komportá nan mes  meskos ku Hagar su yu hòmber Ismael a komportá su mes pa ku Isaak, e berdadero heredero di Abraham. Nan a hasi bofon di Hesukristu i a persiguié, evidentemente pasobra nan a konsiderá nan mes komo e heredero legítimo di Abraham i Hesus nan a mira komo e intruso.

Poko promé ku e gobernantenan di Israel natural a laga mata Hesus, el a bisa: “Yerusalèm, Yerusalèm, abo ku ta mata e profetanan i ta piedra esnan ku ta wòrdu mandá serka dje! Kuantu biaha mi no tabata kier a hunta bo yunan, manera un galiña ta hunta su puitunan bou di su alanan, i boso no tabata kier. Mira, boso kas ta keda desolá pa boso!”—Mateo 23:37, 38.

E registro inspirá di susesonan ku a tuma lugá den promé siglo ta mustra ku e nashon karnal representá dor di Hagar no a produsí outomátikamente yunan ku lo tabata ko-heredero ku Hesus. Yehova a rechasá òf kore ku e hudiunan ku orguyosamente a kere ku nan tabatin derecho riba e herensia ei djis pasobra nan a nase den e nashon. Klaru ku algun israelita natural individual sí a bira ko-heredero ku Kristu. Sin embargo, nan a haña e privilegio ei a base di nan fe den Hesus i no djis debí na nan desendensia karnal.

E identidat di un kantidat di e ko-herederonan aki ku Kristu a bira bisto na Pentekòste di aña 33. Segun ku tempu a pasa, Yehova a ungi mas hende komo yunan di Yerusalèm djariba.

Pablo a splika e “drama simbóliko” aki pa ilustrá e superioridat di e aliansa nobo riba e aliansa di Lei di kua Moisés tabata e mediadó. Ningun hende no por a haña Dios su aprobashon dor di hasi e obranan di e Lei di Moisés, pasobra tur hende ta imperfekto i e Lei simplemente a enfatisá nan sklabitut na piká. Sin embargo, manera Pablo a splika, Hesus a bin pa asina “e por a redimí [òf, libra] esnan ku tabata bou di Lei.” (Galationan 4:4, 5) Pues, fe den e balor di Kristu su sakrifisio a hiba na libertat for di e Lei di kondenashon.—Galationan 5:1-6.

E Drama Su Balor pa Nos

Pakiko nos lo mester ta interesá den Pablo su splikashon inspirá di e drama aki? Un motibu ta ku e ta duna nos un komprondementu mas penetrante di nifikashon di kosnan bíbliko ku di otro manera lo a keda vago. E splikashon ta fortalesé nos konfiansa den e unidat i armonia di Beibel.—1 Tesalonisensenan 2:13.

Ademas, e realidatnan simbolisá den e drama aki ta esensial pa nos felisidat den futuro. Si no tabata pa e aparishon di e yunan di Yerusalèm djariba, nos úniko speransa lo tabata sklabitut na piká i morto. Sin embargo, bou di e supervishon amoroso di Kristu i di su ko-herederonan di e promesa ku Dios a hasi na Abraham, “tur e nashonnan di e tera lo ta bendishoná.” (Génesis 22:18) Esaki lo sosodé ora ku nan ser librá pa semper di e efektonan di piká, imperfekshon, tristesa i morto. (Isaias 25:8, 9) Ki un tempu glorioso esei lo ta!

[Plachi na página 11]

E aliansa di Lei a ser inougurá na Seru Sinaí

[Rekonosementu]

Pictorial Archive (Near Eastern History) Est.

[Plachi na página 12]

Kiko ta e nifikashon di e “drama simbóliko” ku apòstel Pablo a menshoná?