‘Bai i Hasi Disipel, i Batisá Nan’
‘Bai i Hasi Disipel, i Batisá Nan’
“Bai i hasi tur e nashonnan disipel di mi, i batisá nan . . . , i siña nan pa kumpli ku tur loke mi a ordená boso.”—Mateo 28:19, 20.
1. Ki desishon e nashon di Israel a tuma na pia di Seru Sinaí?
RÒNT di 3.500 aña pasá, henter un nashon a hasi un promesa solèm na Dios. Pará na pia di Seru Sinaí, e israelitanan a deklará públikamente: ‘Tur loke Yehova a bisa, nos lo hasi!’ For di e momento ei en adelante, Israel a bira un pueblo dediká na Dios, su “tesoro pekuliar,” es desir, su propiedat spesial. (Eksodo 19:5, 8; 24:3) Ku gran antisipashon nan a spera di haña Dios su protekshon i di biba pa generashon tras di generashon den un tera ku “tin lechi i miel na abundansia.”—Levítiko 20:24.
2. Ki relashon ku Dios hende por tin awe?
2 Sin embargo, manera salmista Asaf a rekonosé, e israelitanan “no a warda e aliansa di Dios, i a nenga di kana den su lei.” (Salmo 78:10) Nan no a kumpli ku e promesa solèm ku nan antepasadonan a hasi na Yehova. Ku tempu, e nashon a pèrdè e relashon úniko ei ku nan tabatin ku Dios. (Eklesiastés 5:4; Mateo 23:37, 38) P’esei Dios “a dirigí su atenshon n’e nashonnan p’e saka for di nan un pueblo pa su nòmber.” (Echonan 15:14, NW) Anto den e último dianan aki, e ta reuniendo huntu “un multitut grandi ku ningun hende no por . . . konta, di tur nashon i tur tribu i pueblo i lenga.” Yen di goso e multitut ei ta rekonosé: “Salbashon ta di nos Dios, kende ta sintá riba e trono, i di e Lamchi.”—Revelashon 7:9, 10.
3. Ki pasonan un hende mester dal p’e por tin un relashon personal ku Dios?
3 Pa un hende por ta entre esnan ku tin e relashon presioso ei ku Dios, e mester hasi un dedikashon na Yehova i simbolisá esei públikamente dor di batisá den awa. Hasiendo esaki e ta obedesé e mandamentu ku Hesus personalmente a duna su disipelnan: “Bai i hasi tur e nashonnan disipel di mi, i batisá nan den nòmber di e Tata i di e Yu i di e spiritu santu, i siña nan pa kumpli ku tur loke mi a ordená boso.” (Mateo 28:19, 20) E israelitanan a skucha Moisés ora ku el a lesa “e buki di aliansa.” (Eksodo 24:3, 7, 8) Pues, nan tabata na haltura di nan obligashonnan pa ku Yehova. Awe ta meskos, promé ku un hende dal e paso di boutismo ta esensial p’e tin un konosementu eksakto di e boluntat di Dios manera nos ta hañ’é den su Palabra, Beibel.
4. Kiko un hende mester hasi p’e kualifiká pa boutismo? (Inkluí e kuadro ariba.)
4 Ta bisto ku Hesus tabata ke pa su disipelnan tin un fundeshi sólido pa nan fe promé ku nan a batisá. El a instruí su siguidónan no solamente pa bai i hasi disipel sino tambe pa ‘siña nan kumpli ku tur loke el a ordená.’ (Mateo 7:24, 25; Efesionan 3:17-19) P’esei, personanan ku ta kualifiká pa boutismo por lo general a studia Beibel pa lunanan òf asta un òf dos aña, di manera ku nan desishon no ta unu tumá lihé ni sin ku nan ta bon informá. Na e okashon di boutismo mes, esnan ku ta bai batisá ta kontestá “sí” riba dos pregunta fundamental. Siendo ku Hesus a enfatisá ku ‘nos Sí mester ta Sí, nos Nò, Nò,’ lo ta bon pa nos tur pa repasá kuidadosamente kiko e dos preguntanan aki di boutismo ta nifiká.—Mateo 5:37.
Repentimentu i Dedikashon
5. Kua dos paso fundamental e promé pregunta di boutismo ta enfatisá?
5 E promé pregunta di boutismo ta puntra e kandidato si el a repentí di su manera di biba anterior i a dediká su bida na Yehova pa hasi su boluntat. E pregunta aki ta enfatisá dos paso sumamente importante ku un persona mester dal promé ku boutismo, esta, repentimentu i dedikashon.
6, 7. (a) Dikon repentimentu ta nesesario pa tur kandidato pa boutismo? (b) Ki kambionan un hende mester hasi despues ku el a repentí?
6 Dikon un persona mester repentí promé ku e batisá? Apòstel Pablo ta splika: “Nos tur tambe tabata biba ántes . . . den e pashonnan di nos karni.” (Efesionan 2:3) Promé ku nos a haña un konosementu eksakto di e boluntat di Dios, nos tabata biba na armonia ku mundu, segun e norma- i balornan di mundu. Nos manera di biba tabata kontrolá pa e dios di e mundu aki, Satanas. (2 Korintionan 4:4) Sin embargo, despues ku nos a siña e boluntat di Dios, nos a tuma e desishon firme ku nos ‘no ta biba mas konforme e pashonnan di hende, sino konforme e boluntat di Dios.’—1 Pedro 4:2.
7 E manera nobo di biba aki ta trese hopi benefisio. Riba tur kos, e ta habri e kaminda pa nos por tin un relashon presioso ku Yehova, lokual David a kompará ku un invitashon pa ta den Dios su “tabernakel” i riba su “seru santu.” Esaki en bèrdat ta un privilegio grandi. (Salmo 15:1) Yehova lógikamente lo no a invitá ken ku ta, sino solamente esnan “ku ta kana den rektitut i ta hasi hustisia, i ta papia bèrdat den [nan] kurason.” (Salmo 15:2) Dependiendo di nos sirkunstansia promé ku nos a siña e bèrdat, kisas nos lo tin ku hasi sierto kambionan pa nos por aktua di akuerdo ku e rekisitonan den e teksto bíbliko aki. E kambionan aki lo por ta tantu den nos kondukta komo den nos personalidat. (1 Korintionan 6:9-11; Kolosensenan 3:5-10) Loke ta motivá nos pa hasi e kambionan ei ta repentimentu, es desir, un duele profundo pa e manera ku nos tabata biba na ántes i un determinashon firme pa agradá Yehova. Esaki ta hiba na un kambio kompletu, nos ta kombertí, ke men, nos ta bandoná un estilo di bida egoista i mundano, i ta sigui un rumbo ku ta agradá Dios.—Echonan 3:19.
8. Kon nos ta hasi nos dedikashon, i ki konekshon e tin ku boutismo?
8 E di dos parti di e promé pregunta di boutismo ta puntra e kandidatonan si nan a dediká nan mes na Yehova pa hasi su boluntat. Dedikashon ta un paso esensial ku mester tuma lugá promé ku boutismo. Nos ta hasié den un orashon kaminda nos ta ekspresá e deseo sinsero di entregá òf dediká nos bida na Yehova mediante Kristu. (Romanonan 14:7, 8; 2 Korintionan 5:15) Yehova ta bira e ora ei nos Shon i Doño, i meskos ku den kaso di Hesus, pa nos ta un delisia pa hasi Dios su boluntat. (Salmo 40:8; Efesionan 6:6) Ta un biaha so nos ta hasi e promesa solèm aki na Yehova. Sin embargo, komo ku nos ta hasi nos dedikashon den privá, riba e dia di boutismo nos ta hasi un deklarashon públiko ora nos kontestá e preguntanan di boutismo. Asina nos ta laga tur hende sa ku nos a hasi e dedikashon solèm aki na nos Tata selestial.—Romanonan 10:10.
9, 10. (a) Hasimentu di Dios su boluntat ta enserá kiko? (b) Kon asta funshonarionan nazi a rekonosé nos dedikashon?
9 Sigui Hesus su ehèmpel den hasimentu di Dios su boluntat ta enserá kiko? Hesus a bisa su disipelnan: “Si un hende kier bin mi tras, lag’é nenga su mes i tuma su staka di tormento i sigui mi kontinuamente.” (Mateo 16:24, NW) Aki Hesus a spesifiká tres kos ku nos tin ku hasi. Promé, nos tin ku “nenga” nos mes. Ku otro palabra, nos ta rechasá òf bisa nò na nos inklinashonnan egoista i imperfekto i ta obedesé Dios su konseho i instrukshon. Di dos, nos tin ku ‘tuma nos staka di tormento.’ Den tempu di Hesus, un staka di tormento tabata un símbolo di bèrgwensa i sufrimentu. Komo kristian, nos ta aseptá e echo ku tin biaha nos tin ku sufri pa motibu di e bon nobo. (2 Timoteo 1:8) Meskos ku Kristu, nos no ta “hasi kaso di bèrgwensa,” ounke mundu kisas ta hasi bofon di nos òf ta reprochá nos. Nos ta keda felis di sa ku nos ta agradá Dios. (Hebreonan 12:2) Por último, nos ta sigui Hesus “kontinuamente.”—Salmo 73:26; 119:44; 145:2.
10 Un punto interesante ta ku asta algun opositor ta rekonosé e dedikashon ku Testigunan di Yehova a hasi na Dios pa sirbié eksklusivamente. Por ehèmpel, na e kampo di konsentrashon di Buchenwald den tempu di Alemania nazi, Testigunan ku a nenga di renunsiá nan fe mester a firma e siguiente deklarashon imprimí: “Ainda mi ta un fiel Studiante di Beibel i nunka lo mi no kibra e huramentu ku mi a hasi na Yehova.” Esaki sigur ta ekspresá bon kla e aktitut di tur fiel sirbidó dediká di Dios!—Echonan 5:32.
Identifiká Komo un Testigu di Yehova
11. Ki privilegio e persona ku batisá ta haña?
11 E di dos pregunta di boutismo ta puntra e kandidato, na promé lugá, si e ta komprondé ku su boutismo ta sirbi pa identifik’é públikamente komo un Testigu di Yehova. Despues di su boutismo, e ta bira un minister ordená ku ta karga e nòmber di Yehova. Esaki ta un gran privilegio i a la bes un responsabilidat serio. Tambe e persona batisá ta bin na remarke pa haña salbashon eterno, basta ku e keda fiel na Yehova.—Mateo 24:13.
12. Ki obligashon ta bin ku e onor di karga e nòmber di Yehova?
12 Un kos ta sigur, ta un onor ekstraordinario di por karga e nòmber di e Dios todopoderoso, Yehova. Profeta Mikeas a bisa: “Tur e pueblonan ta kana kada un den e nòmber di su dios, ma pa loke ta nos, nos sí lo kana den e nòmber di [“Yehova,” NW] nos Dios pa semper i semper.” (Mikeas 4:5) Sin embargo, e onor aki ta bin ku un obligashon. Nos tin ku hasi esfuerso pa hiba nos bida na un manera ku ta trese onor na e nòmber ku nos ta karga. Manera Pablo a rekordá e kristiannan na Roma, si un hende no ta praktiká loke e ta prediká, e nòmber di Dios lo ser “blasfemá,” es desir, lo pèrdè su bon reputashon.—Romanonan 2:21-24.
13. Dikon sirbidónan dediká di Yehova tin e responsabilidat di duna testimonio tokante nan Dios?
13 Ora un persona bira un Testigu di Yehova, e ta aseptá tambe e responsabilidat di duna testimonio tokante su Dios. Yehova a invitá e nashon di Israel ku tabata dediká na dje pa nan ta su testigunan afin di duna testimonio di su Divinidat eterno. (Isaias 43:10-12, 21) Pero e nashon no a kumpli ku e responsabilidat aki, i ku tempu nan a pèrdè Yehova su aprobashon kompletamente. Awe, kristiannan berdadero ta orguyoso di por tin e privilegio di duna testimonio tokante Yehova. Nos ta hasi esei pasobra nos stim’é i ta anhelá pa su nòmber ser santifiká. Kon nos por keda ketu ora ku nos sa e bèrdat tokante nos Tata selestial i su propósito? Nos ta sinti meskos ku apòstel Pablo ora el a bisa: “Ta mi obligashon; pasobra ai di mi si mi no prediká evangelio!”—1 Korintionan 9:16.
14, 15. (a) Ki papel Yehova su organisashon ta hunga den nos kresementu spiritual? (b) Ki perkurashonnan tin disponibel pa yuda nos spiritualmente?
14 E di dos pregunta di boutismo ta rekordá e kandidato tambe di su responsabilidat di koperá ku Yehova su organisashon dirigí pa spiritu santu. No ta nos so ta sirbi Dios, i nos tin mester di e yudansa, sosten i animashon di “henter e asosiashon di rumannan.” (1 Pedro 2:17, NW; 1 Korintionan 12:12, 13) Dios su organisashon ta hunga un papel sumamente importante den nos kresementu spiritual. E ta perkurá un abundansia di publikashon bíbliko ku ta yuda nos krese den konosementu eksakto, ku ta yuda nos aktua sabí ora ku nos ta konfrontá problema i ademas ta yuda nos kultivá un relashon íntimo ku Dios. Meskos ku un mama ku ta hasi sigur ku su yu ta bon alimentá i kuidá, asina “e esklabo fiel i prudente” ta perkurá un abundansia di kuminda spiritual oportuno di manera ku nos por mehorá nos relashon ku Yehova.—Mateo 24:45-47; 1 Tesalonisensenan 2:7, 8.
15 Yehova su pueblo ta haña na nan reunionnan semanal e entrenamentu i animashon nesesario pa nan por ta fiel Testigunan di Yehova. (Hebreonan 10:24, 25) E Skol di Ministerio Teokrátiko ta siña nos papia den públiko, i e Reunion di Sirbishi ta entrená nos pa presentá nos mensahe na un manera efektivo. Tantu na nos reunionnan komo mediante nos estudio personal di publikashonnan bíbliko, nos por mira kon Yehova su spiritu santu ta obra i ta dirigí su organisashon. Pa medio di e perkurashonnan regular aki, Dios ta spièrta nos pa peligernan ku tin, ta entrená nos pa nos ta ministernan efektivo i ta yuda nos keda spiritualmente lantá.—Salmo 19:7, 8, 11; 1 Tesalonisensenan 5:6, 11; 1 Timoteo 4:13.
E Motibu Tras di e Desishon
16. Kiko ta motivá nos pa dediká nos mes na Yehova?
16 E dos preguntanan di boutismo pues ta rekordá e kandidatonan pa boutismo di e nifikashon di e boutismo den awa i di e responsabilidatnan ku ta bin kuné. Kiko anto mester motivá nan pa tuma e desishon di batisá? Nos ta bira disipelnan batisá pasobra Yehova ta ‘hala’ nos; no pasobra un hende ta fòrsa nos. (Juan 6:44) Siendo ku “Dios ta amor,” e ta goberná universo pa medio di amor, no dor di usa forsa. (1 Juan 4:8) Loke ta hala nos na Yehova ta su kualidatnan bondadoso i e manera ku e ta trata ku nos. Yehova a duna nos su Yu unigénito i ta ofresé nos e mihó futuro ku tin. (Juan 3:16) Nos, na nos turno, ta sinti nos motivá pa ofres’é nos bida, esta, pa dediká nos bida na dje.—Proverbionan 3:9; 2 Korintionan 5:14, 15.
17. Na kiko nos no ta dediká?
17 Nos no ta dediká nos mes na un kousa ni na un obra, sino na Yehova mes. E asignashon òf obra ku Dios tin pa su pueblo lo kambia, pero nan dedikashon na dje ta keda meskos. Por ehèmpel, loke Yehova a bisa Abraham hasi tabata hopi distinto for di loke el a bisa Jeremias hasi. (Génesis 13:17, 18; Jeremias 1:6, 7) Sin embargo, nan tur dos a kumpli ku e tarea spesífiko ku Dios a duna nan pa hasi pasobra nan tabata stima Yehova i kier a hasi su boluntat fielmente. Durante e tempu di fin aki, tur siguidó batisá di Kristu ta hasi esfuerso pa kumpli ku Kristu su mandamentu di prediká e bon nobo di Reino i hasi disipel. (Mateo 24:14; 28:19, 20) Hasiendo e trabou ei di kurason ta un ekselente manera pa demostrá ku nos ta stima nos Tata selestial i ku nos ta realmente dediká na dje.—1 Juan 5:3.
18, 19. (a) Ki deklarashon públiko nos ta hasi mediante nos boutismo? (b) Kiko nos lo konsiderá den e siguiente artíkulo?
18 Sin duda, boutismo ta habri kaminda pa hopi bendishon, pero e no ta un paso ku nos mester dal sin ku promé nos a pensa seriamente riba dje. (Lukas 14:26-33) E ta ekspresá un determinashon ku mester ta mas importante ku tur otro responsabilidat. (Lukas 9:62) Bon mirá, ora nos batisá nos ta hasiendo e deklarashon públiko aki: “E Dios aki ta nos Dios, pa semper i semper; e lo guia nos te na morto.”—Salmo 48:14.
19 E siguiente artíkulo lo analisá mas pregunta ku lo por lanta en konekshon ku boutismo den awa. Akaso tin motibunan válido pa un persona keda sin batisá? Lo mester tuma na kuenta e edat di un persona? Kon tur hende por kontribuí na e dignidat di e okashon di boutismo?
Bo Por Splika?
• Dikon kada kristian tin ku repentí promé ku e batisá?
• Kiko dedikashon na Dios ta enserá?
• Ki responsabilidatnan ta bin ku e onor di karga e nòmber di Yehova?
• Kiko mester motivá nos pa tuma e desishon di batisá?
[Preguntanan di Estudio]
[Kuadro/Plachi na página 22]
E Dos Preguntanan di Boutismo
A base di e sakrifisio di Hesukristu, bo a repentí di bo pikánan i a dediká bo mes na Yehova pa hasi su boluntat?
Bo ta komprondé ku bo dedikashon i boutismo ta identifiká bo komo un Testigu di Yehova den asosiashon ku Dios su organisashon dirigí pa spiritu santu?
[Plachi na página 23]
Dedikashon ta un promesa solèm na Yehova hasí den orashon
[Plachi na página 25]
Nos trabou di prediká ta demostrá nos dedikashon na Dios