Bo Por Tin e Plaser di Komprondé Beibel

BEIBEL ta kontené e bèrdatnan presioso di Dios. E ta konta nos tokante e propósito di bida, e kousa di sufrimentu humano i e futuro di humanidat. E ta siña nos tambe kon nos por haña felisidat, kon nos por sera amistat i kon nos por resolvé problema. Pero mas importante ku tur esei, e ta siña nos tokante nos Kreadó i Tata selestial, Yehova. E konosementu ei ta yena nos ku goso i nos bida ta haña sentido.

Beibel ta kompará ganamentu di konosementu di Dios ku komementu. Hesus a bisa: “Hende lo no biba di pan so, ma di tur palabra ku ta sali for di boka di Dios.” (Mateo 4:4; Hebreonan 5:12-14) Meskos ku nos tin ku alimentá nos mes ku kuminda nutritivo tur dia pa keda na bida, asina nos tin ku lesa e Palabra di Dios regularmente pa nos benefisiá di Dios su promesa di bida eterno.

Nos ta gusta kome pasobra nos a ser kreá pa disfrutá di kuminda. Na mes momento, esei ta satisfasé un nesesidat básiko. Sin embargo, si nos ke ta felis, nos tin ku satisfasé un otro nesesidat básiko. Hesus a bisa: “Felis ta esnan ku ta konsiente di nan nesesidat spiritual.” (Mateo 5:3, NW) Pues, nos por ta felis pasobra nos por satisfasé e nesesidat ei pa medio di un komprondementu di e Palabra di Dios.

Ta bèrdat ku algun hende ta haña ku no ta fásil pa komprondé Beibel. Por ehèmpel, kisas bo mester di yudansa pa komprondé tekstonan ku ta referí na kustumbernan deskonosí òf ku ta usa ekspreshonnan simbóliko. Ademas, tin profesianan skirbí den un sentido simbóliko ku bo por komprondé  solamente dor di referí na otro tekstonan di Beibel ku tin di haber ku e mesun tópiko. (Daniel 7:1-7; Revelashon 13:1, 2) Apesar di tur esei, bo por bin komprondé Beibel. Kon bo por ta sigur di esei?

Tur Hende Por Tin e Plaser Ei

Beibel ta e Palabra di Dios. Den dje e ta splika nos kiko ta su boluntat. Bo ta kere ku Dios lo perkurá un buki ku ta imposibel pa komprondé òf ku ta hende bon siñá so por komprondé? Klaru ku nò. Esei lo ta un falta di bondat di su parti. Kristu Hesus a bisa: “Suponé ku un tata entre boso, si su yu pidié un piská, lo e dun’é un kolebra? Òf si e pidié un webu, lo e dun’é un skòrpion? Si boso anto, siendo malbado, sa di duna kosnan bon na boso yunan, kuantu mas boso Tata selestial lo duna e spiritu santu na esnan ku pidié!” (Lukas 11:11-13) Pues, bo por ta sigur ku bo tambe por komprondé Beibel i ku si bo pidi Dios sinseramente, lo e perkurá e yudansa ku bo tin mester pa komprondé su Palabra. De echo, asta mucha por komprondé e siñansanan básiko di Beibel!—2 Timoteo 3:15.

Ounke nos tin ku hasi esfuerso pa komprondé Beibel, ta bale la pena hasié pasobra esei por tin un efekto poderoso i edifikante riba nos. Despues di Hesus su resurekshon, el a aparesé na dos di su disipelnan i a papia ku nan tokante profesianan di Beibel. E relato di Lukas ta bisa: “Kuminsando ku Moisés i ku tur e profetanan el a splika nan e kosnan tokante di su mes den tur e Skrituranan.” Ku ki resultado? E anochi ei, ora e disipelnan tabata pensa riba loke nan a siña, nan a bisa otro: “Nos kurason no tabata kima den nos miéntras ku e tabata papia ku nos na kaminda, miéntras ku e tabata splika nos e Skrituranan?” (Lukas 24:13-32) Pa nan, tabata un plaser di por a komprondé e Palabra di Dios pasobra esei a fortalesé nan fe den e promesanan di Dios, i tambe el a duna nan un punto di bista positivo pa ku futuro.

En bes di ta un karga, e proseso di komprondé e Palabra di Dios ta algu interesante i benefisioso, meskos ku ora bo ta disfrutá di un kuminda nutritivo. Kiko bo mester hasi pa haña e komprondementu ei? E siguiente artíkulo ta mustra kon bo por haña plaser den “e konosementu di Dios.”—Proverbionan 2:1-5.

[Plachi na página 4]

Meskos ku un tata amoroso, Yehova ta duna nos spiritu santu pa yuda nos komprondé Beibel