Historia di Bida

Determiná pa Sirbi Yehova

SEGUN E RELATO DI RAIMO KUOKKANEN

Na aña 1939, Segundo Guera Mundial a kuminsá na Europa, i Union Soviétiko a ataká mi pais natal, Finlandia. Mi tata a bai bringa den e ehérsito finlandes. Poko despues, avion di guera ruso tabata tira bòm riba e stat kaminda nos tabata biba, i mi mama a manda mi bai biba serka mi wela na un área mas safe.

NA AÑA 1971, mi tabata sirbi komo misionero na Uganda, Ost Afrika. Un dia, segun ku mi tabata prediká di kas pa kas, yen di hende morto spantá a kore pasa mi forbei. Mi a tende zonidu di bala i mi a saka kareda kue direkshon di kas. Ora e tiramentu a yega mas serka, mi a bula den un roi ku tabatin kantu di kaminda. Segun ku bala tabata skeiru riba mi kabes, mi a gatia den e roi bai mi kas.

Mi no por a hasi muchu kos pa evitá e efektonan di Segundo Guera Mundial, pero pakiko ami ku mi kasá lo tabata dispuesto pa riska nos bida i pasa den disturbionan sivil na Ost Afrika? E kontesta ta estrechamente ligá ku nos determinashon pa sirbi Yehova.

Un Simia di Determinashon Ta Ser Plantá

Mi a nase na aña 1934 na Helsinki, Finlandia. Mi tata tabata fèrfdó, i un dia e mester a fèrf e edifisio ku a akomodá e sukursal di Testigunan di Yehova na Finlandia. E Testigunan a kont’é tokante nan reunionnan di kongregashon. Ora el a yega kas, el a konta mi mama tokante e reunionnan ei. Mi mama no a asistí n’e  reunionnan e tempu ei, pero despues el a kuminsá kòmbersá tokante tópikonan bíbliko ku un kolega ku tabata Testigu. No a dura hopi ku Mama a tuma na serio loke el a siña, i na 1940 el a batisá komo un Testigu di Yehova.

Djis promé ku esei, mi wela a tuma mi na su kas den kunuku kaminda mi a keda te na fin di Segundo Guera Mundial. For di Helsinki, mi mama a kuminsá skirbi su mama i su ruman muhé mas chikitu tokante loke Testigunan di Yehova tabata kere. Nan tur dos a mustra interes i tabata kompartí ku mi loke nan a siña. Representantenan biahero di Testigunan di Yehova tabata bishitá Wela su kas i tabata animá nos, pero ainda ami no tabata determiná pa sirbi Dios.

Entrenamentu Ku A Yuda Mi Sirbi Dios

Ora ku guera a kaba na 1945, mi a bai bèk Helsinki, i Mama a kuminsá hiba mi e reunionnan di Testigunan di Yehova. Tin biaha na lugá di bai reunion mi tabata bai sine. Pero despues Mama tabata konta mi tokante e diskurso ku el a tende na reunion, i bes tras bes el a enfatisá e mesun punto: Armagedón ta hopi serka. Mi a bira konvensí di esei i a stòp di falta reunion. Segun ku mi apresio pa bèrdat bíbliko a krese, mi deseo pa partisipá den tur e aktividatnan di e kongregashon tambe a krese.

Un kos ku mi tabata gusta hopi ta di asistí na asamblea i kongreso. Na 1948, mi a asistí na e kongreso di distrito ku tabatin serka di kas di mi wela, kaminda mi tabata pasando mi fakansi grandi. Un amigu di mi tabata bai batisá na e kongreso ei, i el a invitá mi pa hasi meskos. Mi a bis’é ku mi no a bin ku zuèmbruk, pero el a sugerí ku ora e kaba di batisá, lo mi por a usa su zuèmbruk. Mi a bai di akuerdo kuné i asina mi a batisá dia 27 di yüni 1948, tempu ku mi tabatin 13 aña.

Despues di e kongreso, algun amigu di mi mama a kont’é ku mi a batisá. Ora nos a topa otro, e kier a sa dikon mi a tuma un paso asina importante sin konsultá kuné. Mi a splik’é ku mi a komprondé e siñansanan básiko di Beibel i ku mi tabata sa ku mi ta responsabel na Yehova pa mi komportashon.

Mi Determinashon Ta Krese

E rumannan den kongregashon a yuda mi fortalesé mi determinashon pa sirbi Yehova. Nan tabata kompañá mi den sirbishi di kas pa kas i kasi tur siman nan tabata duna mi parti den reunion. (Echonan 20:20) Na edat di 16 aña mi a duna mi promé diskurso públiko. Poko despues, mi a ser nombrá komo sirbidó di estudio di Beibel den nos kongregashon. Tur e aktividat spiritual ei a yuda mi madurá, pero ainda mi tabatin ku vense mi miedu di hende.

E tempu ei, nos tabata anunsiá e diskurso públiko di e kongreso di distrito ku bòrchinan grandi. Kada un di e bòrchinan aki a konsistí di dos pankarta konektá ku strèp ku a pasa over di e persona su skouder i ku a tapa e parti dilanti i patras di su kurpa. P’esei tabatin hende ku a yama nos sèntwich.

Un biaha, mi tabata pará na skina di un kaya ketu ku mi bòrchi di sèntwich ora ku mi a mira un grupo di mi kompañeronan di klas ta bin stret den mi direkshon. Segun ku nan a pasa mi, e manera ku nan a wak mi a pone mi kremp di miedu. Mi a pidi Yehova den orashon pa duna mi kurashi i a keda para ketu ku e bòrchi. E echo ku mi a vense miedu di hende e tempu ei a prepará mi pa e tèst mas grandi di mantené neutralidat kristian.

Ku tempu, gobièrnu a duna òrdu pa ami ku un kantidat di otro Testigu hóben mèldu pa servisio militar. Nos a bai na e base militar manera nan a ordená nos, pero respetuosamente nos a nenga di bisti unifòrm. E ofisialnan a detené nos, i poko despues un korte a sentensiá nos na seis luna di prizon. Ademas, nan a enkarselá nos pa e ocho lunanan ku nos lo mester a pasa den servisio militar. Di manera ku nos a pasa un total di 14 luna den prizon debí na nos posishon neutral.

Den e baraknan di prizon, nos tabata reuní huntu tur dia pa konsiderá Beibel. Durante e lunanan ei, hopi di nos a lesa e Beibel kompletu  dos biaha. Ora nos a terminá nos sentensia, mayoria di nos a sali for di prizon mas determiná ku nunka pa sirbi Yehova. Te ku awe, hopi di esnan ku tabata den e grupo ei di Testigunan hóben ta sirbi Yehova fielmente.

Despues ku mi a sali prizon, mi a bolbe bai biba serka mi mayornan. Poko despues, mi a sera konosí ku Veera, un Testigu seloso, resien batisá. Nos a kasa na 1957.

Un Anochi Ku A Kambia Nos Bida

Un anochi nos tabata di bishita serka algun ruman ku ta karga responsabilidat na sukursal, i un di nan a puntra nos si nos lo tin gana di bai den e trabou di sirkuito. Despues di a hasi orashon henter anochi, mi a bèl sukursal i a bisa nan ku sí. Aseptando e ministerio di tempu kompletu a nifiká ku mi mester a legumai mi trabou ku tabata paga bon, pero nos tabata determiná pa pone e Reino na promé lugá den nos bida. Mi tabatin 23 aña i Veera tabatin 19 aña, ora ku nos a kuminsá ku e trabou biahero na desèmber 1957. Durante tres aña nos a disfrutá di bishitá i animá e kongregashonnan di e pueblo di Yehova na Finlandia.

Den e último parti di aña 1960, mi a haña un invitashon pa e Skol Bíbliko di Galaad di Watchtower na Brooklyn, New York. Nos tres di Finlandia lo mester a asistí na un kurso spesial di dies luna pa haña entrenamentu di e manera ku un sukursal ta funshoná. Nos esposanan a keda Finlandia i a traha na sukursal.

Djis promé ku e kurso a terminá, nan a pidi mi pa pasa na e ofisina di Nathan H. Knorr, kende e tempu ei tabata supervisá e obra mundial di Testigunan di Yehova. Ruman Knorr a ofresé ami ku mi kasá un asignashon komo misionero na e Repúblika di Malagasia, konosí awor komo Madagascar. Mi a skirbi Veera pa puntr’é si e ta haña ku nos mester aseptá e asignashon ei, i mesora el a kontestá: “Sí.” Ora mi a regresá Finlandia, umbes nos a kuminsá prepará nos mes pa bai biba na Madagascar.

Goso i Desepshon

Na yanüari 1962 nos a bula bai Antananarivo, kapital di e pais, tur na sombré di lana i ku yas masha diki bistí, ya ku na Finlandia tabata wenter ora ku nos a sali. Den e kayente tropikal di Madagascar, nos a kambia nos estilo di bisti rápidamente. Nos promé kas di misionero tabata un kas chikí ku un solo kuarto. Tabatin un otro pareha misionero einan kaba, pues ami ku Veera tabata drumi den pòrch.

Nos a kuminsá siña franses, un di e idiomanan ofisial di Madagascar. Esaki tabata basta difísil pasobra nos dos no tabata papia e mesun idioma ku nos instruktor, Ruman Carbonneau. E ruman muhé aki a usa ingles pa siña nos franses, pero Veera no tabata papia ingles. Pues, ami tabatin ku tradusí Ruman Carbonneau su instrukshonnan na finlandes pa Veera. Pero despues nos a realisá ku Veera tabata komprondé konseptonan tékniko mas mihó na sueko, pues, mi tabata splik’é e gramátika franses na sueko. Den poko tempu nos a hasi bon progreso den franses i a kuminsá siña malagasia, e idioma lokal.

Mi promé estudio di Beibel na Madagascar tabata ku un hòmber ku tabata papia malagasia so. Mi tabata buska e versíkulonan bíbliko den mi Beibel finlandes, kaba nos a  buska e versíkulonan ei den su Beibel malagasia. Mi no por a dun’é masha splikashon di e tekstonan bíbliko, pero tòg den poko tempu bèrdat bíbliko a krese den e hòmber ei su kurason i el a progresá te na boutismo.

Na 1963, Milton Henschel di e sede di Testigunan di Yehova na Brooklyn a bishita Madagascar. Poko despues, nan a establesé un sukursal nobo na Madagascar, i mi a keda nombrá komo superintendente di sukursal. Esei tabata banda di mi trabou komo superintendente di sirkuito i di distrito. Miéntras tantu, Yehova tabata bendishoná nos rikamente. Di aña 1962 pa 1970, e kantidat di publikadónan di Reino na Madagascar a subi di 85 pa 469.

Un dia na 1970, ora nos a yega kas for di sirbishi di vèlt, nos a haña un nota pegá na nos porta ku a ordená tur misionero di Testigunan di Yehova pa mèldu na e ofisina di minister di asuntunan interno. Einan un funshonario a bisa nos ku gobièrnu a duna òrdu pa nos bandoná e pais inmediatamente. Ora mi a puntr’é ki krímen mi a kometé ku nan mester a deportá mi, e funshonario a bisa: “Señor Kuokkanen, bo no a hasi nada malu.”

Mi di kuné: “Nos tin ocho aña akinan. Esaki ta nos kas. Nos no por lanta bai gewon asina.” Apesar di nos esfuerso, tur e misioneronan mester a sali denter di un siman. Gobièrnu a sera e sukursal, i un Testigu lokal a kuminsá supervisá e trabou di sirbishi. Promé ku nos a bai laga nos rumannan stimá na Madagascar, nos a haña un asignashon nobo: Uganda.

Kuminsando di Nobo

Un par di dia despues ku nos a sali for di Madagascar, nos a yega Kampala, kapital di Uganda. Mesora nos a kuminsá siña luganda, un idioma bunita ku un tono melodioso pero masha difísil pa siña. Otro misioneronan a yuda Veera siña ingles promé, i nos por a prediká ku bon resultado na ingles.

Kampala su klima kayente i húmedo a afektá Veera su salú. Pues, nos a haña un asignashon na Mbarara, un pueblito na Uganda ku tin un klima mas suave. Nos tabata e promé Testigunan einan, i riba nos promé dia den sirbishi, nos a ser bendishoná ku un bon eksperensia. Mi tabata papiando ku un hòmber den su kas ora ku su kasá a sali for di kushina. E señora su nòmber  tabata Margaret, i el a skucha mi presentashon na su kasá. Veera a kuminsá un estudio di Beibel ku Margaret, i el a hasi ekselente progreso spiritual. El a batisá i a bira un publikadó di Reino seloso.

Bringamentu Riba Kaya

Na 1971, guera sivil a pone fin na nos pas na Uganda. Un dia a start un bataya rònt di nos kas di misionero na Mbarara. Ta e dia ei mi a pasa dor di loke mi a deskribí na komienso di e relato aki.

Veera tabata den e kas di misionero kaba ora ku mi a yega despues di a gatia basta un pida den e roi, for di bista di e sòldánan. Den un skina di e kas, nos a traha un “fòrti” di matras i muebel. Un siman largu nos a keda paden, purbando di haña informashon for di radio. Tabatin biaha ku bala tabata dal kontra muraya segun ku nos tabata skonde den nos fòrti. Anochi nos no tabata sende lus, pa hende no sa ku nos tabata den e kas. Un biaha, sòldánan a bin na porta i a grita. Nos a keda ketu-ketu, hasiendo orashon na Yehova silensiosamente. Despues ku e bringamentu a pasa, nos bisiñanan a bin i a gradisí nos ku nan a keda sano i salvo. Segun nan, ta Yehova a protehá nos tur, i nos tabata di akuerdo ku nan.

E situashon a keda trankil te ora ku un mainta nos a tende na radio ku gobièrnu di Uganda a prohibí e aktividat di Testigunan di Yehova. E anunsiadó a bisa ku tur Testigu di Yehova mester bai bèk na nan religion anterior. Mi a purba rasoná ku funshonarionan gubernamental pero sin éksito. Despues mi a bai na e ofisina di Presidente Idi Amin i a pidi pa haña un sita kuné. E resepshonista a bisa mi ku e presidente ta drùk. Mi a bai bèk hopi biaha, pero nunka mi no a logra papia ku e presidente. Finalmente, na yüli 1973 nos tabatin ku bandoná Uganda.

Un Aña Ta Para Bira Dies

Ora ku nos mester a bai laga nos rumannan stimá di Uganda, nos a bolbe sinti e mesun tristesa ku ora nos a ser deportá for di Madagascar. Promé ku nos a kuminsá ku nos asignashon nobo na Senegal, nos a bai Finlandia. Einan, nos asignashon na Senegal a ser kanselá, i nos a tende ku nos mester keda Finlandia. Tabata parse ku nos trabou komo misionero a terminá. Na Finlandia, nos a sirbi komo pionero spesial i despues nos a bai atrobe den e trabou di sirkuito.

Pa aña 1990, oposishon kontra e obra na Madagascar a mengua, i e sede na Brooklyn a sorprendé nos dor di puntra nos si nos lo kier a bai einan pa un aña. Nos kier a bai pero nos tabata konfrontá dos reto grandi. Mi tata tabata di edat avansá i tabatin mester di kuido, i ademas Veera a sigui ku problema ku su salú. E morto di mi tata na novèmber 1990 a hasi mi tristu, pero Veera su salú a mehorá, i esei a duna nos speransa di regresá na e trabou di misionero. Nos a regresá Madagascar na sèptèmber 1991.

Nos asignashon na Madagascar tabata pa un aña, pero el a dura dies. Durante e tempu ei, e kantidat di publikadónan a oumentá di 4.000 pa 11.600. Mi a disfrutá masha hopi di sirbi komo misionero. Sin embargo, tabatin biaha ku mi a sinti mi desanimá, pensando ku podisé mi tabata neglishá e nesesidatnan físiko i emoshonal di mi kerido esposa. Pero Yehova a duna nos tur dos e fortalesa pa sigui padilanti. Finalmente, na aña 2001 nos a regresá Finlandia, kaminda nos ta trahando na sukursal. Ainda nos ta hopi seloso den nos trabou pa sostené e Reino di Dios, i te ainda nos ta disfrutá di nos dushi rekuerdonan di Afrika. Nos ta determiná pa hasi e boluntat di Yehova na unda ku e asigná nos.—Isaias 6:8.

[Mapa na página 12]

(Pa e teksto den su formato kompleto, wak e publikashon)

FINLANDIA

EUROPA

[Mapa na página 14]

(Pa e teksto den su formato kompleto, wak e publikashon)

AFRIKA

MADAGASCAR

[Mapa na página 15]

(Pa e teksto den su formato kompleto, wak e publikashon)

AFRIKA

UGANDA

[Plachi na página 14]

Dia ku nos a kasa

[Plachi na página 14, 15]

Di trabou di sirkuito na Finlandia, 1960 . . .

. . . pa trabou di misionero na Madagascar, 1962

[Plachi na página 16]

Ami ku Veera awe