Kiko Lo Yuda Bo Komprondé Beibel?

“BO A skonde e kosnan aki pa sabínan i inteligentenan i a revelá nan na mucha chikitu.” (Lukas 10:21) E palabranan aki ku Hesus a dirigí na su Tata selestial ta indiká ku pa nos por komprondé Beibel, nos mester tin e aktitut korekto. E sabiduria di Yehova ta keda bisto den e echo ku el a perkurá un buki ku ta hende humilde i dispuesto pa siña so por ègt komprondé.

Pa mayoria di nos no ta fásil pa ta humilde. Nos tur tin e tendensia pa ta orguyoso. Ademas, nos ta biba den “e último dianan,” rondoná pa hende ku ta ‘stimadó di nan mes, kabesura i hinchá ku orguyo.’ (2 Timoteo 3:1-4) E aktitutnan aki ta stroba nos di komprondé e Palabra di Dios, i lamentablemente nos tur ta wòrdu influensiá den un òf otro manera dor di hende ku ta manifestá e karakterístikanan aki. Kon anto bo por haña e aktitut korekto pa komprondé Beibel?

Prepará Bo Kurason i Mente

Esdras, un lider di e pueblo di Dios di antigwedat, a “dediká [“prepará,” NW] su kurason pa studia e lei di SEÑOR.” (Esdras 7:10) Den ki manera nos por prepará nos kurason? Pa kuminsá, nos mester tin un punto di bista korekto di e Skritura. Apòstel Pablo a skirbi su rumannan kristian: “Ora boso a risibí for di nos e palabra di Dios su mensahe, boso a asept’é no komo palabra di hende, ma pa loke e ta berdaderamente, e palabra di Dios.” (1 Tesalonisensenan 2:13) Ounke Dios a usa hende pa skirbi e Skritura, loke nan a skirbi ta di orígen divino. Ora nos rekonosé e echo importante ei, nos lo ta mas dispuesto pa aseptá loke nos ta lesa.—2 Timoteo 3:16.

Un otro manera pa prepará nos kurason ta mediante orashon. Siendo ku ta pa medio di spiritu santu Dios a inspirá hende pa skirbi Beibel, ku yudansa di e mesun spiritu ei nos lo por komprondé e mensahe di Beibel. Nos tin ku pidi Dios e yudansa ei. Tuma nota ku e salmista tambe kier a haña e yudansa ei, ya ku el a skirbi: “Duna mi komprondementu, pa mi por warda bo lei i kumpli kuné ku henter mi kurason.” (Salmo 119:34) Nos tin ku pidi Dios p’e duna nos no solamente e kapasidat mental pa komprondé su Palabra sino tambe e aktitut di kurason ku lo permití nos asept’é. Pa nos por komprondé Beibel, nos mester ta dispuesto pa aseptá loke ta bèrdat.

Segun ku bo ta meditá pa haña e aktitut korekto, pensa kon un estudio di Beibel por yuda bo. Nos tin hopi bon motibu pa lesa e Palabra di Dios, pero e motibu di mas importante ta ku  lesamentu di Beibel ta yuda nos hala serka Dios. (Santiago 4:8) Ora nos lesa kon Yehova ta reakshoná bou di diferente sirkunstansia, kuantu e ta balorá hende ku ta stim’é i kon e ta trata ku esnan ku ta bira lomba p’e, nos ta komprondé ki klase di persona e ta. Semper nos motibu primordial pa lesa Beibel mester ta pa konosé Dios mihó i asina fortalesé nos relashon kuné.

Loke Por Stroba Nos di Haña e Aktitut Korekto

Kiko por stroba nos di komprondé e Palabra di Dios? Un di e strobansanan ei ta un sintimentu di lealtat mal dirigí. Por ehèmpel, tal bes bo ta duna hopi balor na e kreensia- i opinionnan di sierto personanan. Sin embargo, kiko lo bo hasi si e personanan aki no ta realmente apoyá òf balorá e bèrdat di e Palabra di Dios? Bou di e sirkunstansianan ei, por ta difísil pa komprondé loke Beibel ta siña realmente. P’e motibu ei Beibel ta animá nos pa saminá kuidadosamente loke nos a ser siñá.—1 Tesalonisensenan 5:21.

Maria, mama di Hesus a hañ’é den un situashon difísil asina. El a lanta ku e tradishon hudiu. El a kumpli ku e Lei di Moisés kuidadosamente i sin duda e tabatin e kustumber di bai snoa. Despues el a bin rekonosé ku e manera ku su mayornan a siñ’é adorá Dios no tabata aseptabel mas pa Dios. Konsekuentemente, Maria a aseptá Hesus su siñansa i tabata entre e promé miembronan di e kongregashon kristian. (Echonan 1:13, 14) Ku esaki e no tabata faltando rèspèt pa su mayornan òf nan tradishonnan; mas bien, el a demostrá su amor pa Dios. Si nos ke saka benefisio for di Beibel, e ora ei meskos ku Maria, nos tambe mester ta mas leal na Dios ku na hende.

Lamentablemente, hopi hende ta duna masha poko balor na e bèrdat di Beibel. Algun ta sinti nan satisfecho ku nan tradishonnan religioso ku ta basá riba siñansanan inkorekto. Otronan ta mustra falta di rèspèt pa e bèrdat den loke nan ta papia i nan manera di biba. P’esei, pa bo aseptá e bèrdat di Beibel, bo tin ku hasi sierto sakrifisio: kisas bo amigunan, bisiñanan, koleganan di trabou i asta bo famianan ta bai kontra bo. (Juan 17:14) No opstante, e hòmber sabí a skirbi: “Kumpra bèrdat, i no bend’é.” (Proverbionan 23:23) Si bo ta balorá e bèrdat, Yehova lo yuda bo komprondé Beibel.

Otro kos ku por stroba un hende di komprondé e mensahe di Beibel ta ora e no ta dispuesto pa apliká loke esaki ta bisa. Hesus a bisa su disipelnan: “Boso sí a haña komprondementu di e sekretonan di reino di shelu, ma nan no. Pasobra kurason di e pueblo aki a bira duru, nan a tapa nan orea.” (Mateo 13:11, 15, BPK) Mayoria hende ku Hesus a prediká na dje no kier a skucha ni no tabata dispuesto pa kambia. En kambio, e komersiante biahero di Hesus su ilustrashon sí tabata kompletamente diferente! Ora el a haña un pèrla di gran balor, mesora e komersiante a bende tur loke e tabatin pa kumpr’é. Komprondementu di e bèrdat di Beibel mester ta mesun presioso pa nos.—Mateo 13:45, 46.

E Desafio di Ta Dispuesto pa Siña

Un desafio grandi pa komprondé Beibel ta esun di ta dispuesto pa siña. Kisas ta difísil pa un hende aseptá ideanan nobo for di un persona ku ta parse di tin un nivel di bida inferior na esun di dje. Pero e apòstelnan di Hesukristu “no tabata hòmber[nan] eduká ni siñá.” (Echonan 4:13) Splikando e motibu di esei, apòstel Pablo a skirbi: “Konsiderá boso yamada, rumannan, ku no tabatin hopi hende sabí segun karni, ni hopi hende poderoso, ni hopi hende noble; ma Dios a skohe e kosnan bobo di mundu pa brongosá e sabínan.” (1 Korintionan 1:26, 27) Si bo ta haña ku ta difísil pa mustra humildat ora un persona di ménos rekurso ta siña bo algu, kòrda ku é ta djis un medio ku Dios ta usa pa siña bo. Akaso tin un onor mas grandi ku esun di ser siñá dor di Yehova, nos “Magnífiko Instruktor”?—Isaias 30:20, NW; 54:13.

 E komandante militar sirio, Naaman, tabata un hende ku tabatin problema pa aseptá instrukshon for di un persona inferior na dje. El a bai bishitá Eliseo, profeta di Yehova, pa buska kura pa su lepra. Pero Eliseo a manda un sirbidó informá Naaman loke Dios a bisa ku e mester a hasi pa e kura. E mensahe i e manera ku el a ser presentá a pone Naaman su humildat na prueba, i p’esei na promé instante el a nenga di obedesé e palabra di e profeta di Dios. Pero despues Naaman a kambia su aktitut i a ser kurá. (2 Reinan 5:9-14) Nos ta enfrentá un desafio similar ora nos ta lesa Beibel. Kisas nos ta siña ku pa nos kura den sentido spiritual i moral, nos tin ku kambia nos manera di biba. Nos lo tin e humildat pa laga un hende siña nos kiko nos tin ku hasi? Ta hende ku ta dispuesto pa siña so por komprondé Beibel.

Un hòmber ku tabata na poder bou di Kandase, reina di e etiopionan, a demostrá un bon aktitut. E tabata regresando Afrika den su garoshi ora e disipel Felipe a kore banda di dje i a aserk’é. Felipe a puntra e hòmber si el a komprondé loke e tabata lesa. E ofisial tabata sufisiente humilde pa respondé: “Kon mi por komprondé, si un hende no guia mi?” Ora el a komprondé e Palabra di Dios, el a batisá. Despues di esei, el “a sigui su kaminda, regosihando.”—Echonan 8:27-39.

Por lo general, Testigunan di Yehova ta hendenan masha komun. Tur siman nan ta kondusí estudionan di Beibel den kasnan di mas ku seis mion hende. Siendo ku Beibel ta siña nos e mihó manera di biba, ta splika di e úniko speransa sigur pa humanidat i ta mustra nos kon nos por konosé Dios, miónes di hende a haña un gran plaser den studia Beibel i komprondé su mensahe. Bo tambe por tin e plaser ei.

[Plachi na página 7]

Naaman tabatin problema pa aseptá instrukshon for di un sirbidó inferior na dje

[Plachi na página 7]

Ora nos ta komprondé Beibel, esei ta alegrá nos kurason