Kon pa Kumpli ku e Rekisitonan pa Boutismo Kristian

“Kiko ta stroba pa mi wòrdu batisá?”—ECHONAN 8:36.

1, 2. Kon Felipe a kuminsá un kòmbersashon ku un funshonario di Etiopia, i kiko ta duna prueba di e inklinashon spiritual di e hòmber aki?

UN PAR di aña despues di e morto di Hesus, un funshonario di gobièrnu tabata biahando den direkshon zùit riba e kaminda for di Yerusalèm pa Gaza. E tabatin su dilanti un biahe agotador den garoshi. Un biahe ku lo a abarká un distansia di podisé mas ku 1.500 kilometer. E hòmber deboto aki a biaha for di Etiopia te Yerusalèm pa adorá Yehova. Riba e kaminda largu pa kas, e tabata hasiendo bon uso di su tempu dor di lesa e Palabra di Dios; esaki tabata prueba di su fe. Yehova a tuma nota di e hòmber sinsero aki, i pa medio di un angel el a dirigí disipel Felipe pa bai prediká na dje.—Echonan 8:26-28.

² Tabata fásil pa Felipe kuminsá un kòmbersashon kuné pasobra e funshonario di Etiopia tabata lesa na bos haltu, manera tabata e kustumber den e tempu ei. Pues, Felipe por a tende ku e tabata lesando for di e ròl di Isaias. Un simpel pregunta di Felipe a lanta e hòmber su interes: “Bo ta komprondé loke bo ta lesa?” Esaki a hiba na un kòmbersashon tokante Isaias 53:7 i 8. Despues di esei, Felipe a “predik’é” e bon nobo tokante Hesus.—Echonan 8:29-35.

3, 4. (a) Dikon Felipe a batisá e hòmber di Etiopia mesora? (b) Ki preguntanan nos lo bai konsiderá awor?

³ Den un korto tempu, e etiopio a komprondé e papel ku Hesus ta hunga den Dios su propósito, i tambe ku ta nesesario pa bira un disipel batisá di Kristu. Ora el a mira un lugá ku  tabatin sufisiente awa el a puntra Felipe: “Kiko ta stroba pa mi wòrdu batisá?” Klaru ku esaki tabata un sirkunstansia spesial. Aki tabata trata di un hòmber di fe ku ya kaba tabata adorá Dios komo un prosélito hudiu. Probablemente lo a dura basta promé ku e haña un otro chèns di batisá. Mas importante ainda, e hòmber aki a komprondé kiko Dios a rekerí di dje, i e kier a kumpli kuné kompletamente. Felipe gustosamente a bai di akuerdo ku su petishon, i despues di a ser batisá e etiopio “a sigui su kaminda, regosihando.” Sin duda el a bira un predikadó entusiasmá di e bon nobo den su pais.—Echonan 8:36-39.

⁴ Nos no mester konsiderá dedikashon i boutismo komo algu di ménos importansia ni dal e pasonan ei sin pensa bon promé. Pero di otro banda, e ehèmpel di e funshonario di Etiopia ta mustra ku tabatin okashonnan ku hende a batisá poko despues ku nan a tende e bèrdat di e Palabra di Dios. * Pues, ta na su lugá pa konsiderá e siguiente preguntanan: Kon un hende mester prepará pa boutismo? Te na ki grado mester tuma edat di un persona na kuenta? Ki progreso spiritual mester ta bisto promé ku un persona batisá? Mas ku tur kos, dikon Yehova ta rekerí pa su sirbidónan dal e paso aki?

Un Promesa Solèm

5, 6. (a) Kon e pueblo di Dios den pasado a reakshoná riba Yehova su amor? (b) Ki relashon íntimo ku Dios nos por tin unabes nos batisá?

⁵ Despues ku Yehova a libra e israelitanan for di Egipto, el a ofresé pa aseptá nan komo su “tesoro pekuliar,” òf propiedat spesial, pa stima nan, protehá nan i hasi nan “un nashon santu.” Pero, pa e pueblo por a haña e bendishonnan ei nan mester a reakshoná riba Dios su amor na un manera konkreto. Nan a hasi esaki dor di bai di akuerdo pa hasi ‘tur loke Yehova a bisa’ i sera un pakto kuné. (Eksodo 19:4-9) Den promé siglo, Hesus a manda su siguidónan hasi disipel di hende di tur nashon, i esnan ku a aseptá su siñansa a ser batisá. Un bon relashon ku Dios a dependé di fe den Hesukristu, siguí despues pa boutismo.—Mateo 28:19, 20; Echonan 2:38, 41.

⁶ E relatonan bíbliko aki ta mustra ku Yehova ta bendishoná esnan ku solemnemente ta primintí di sirbié i ta kumpli ku nan promesa. Pa kristiannan, dedikashon i boutismo ta pasonan nesesario ku ta hiba na Yehova su bendishon. Nos ta determiná pa kumpli ku su normanan i buska su guia. (Salmo 48:14) Yehova na su turno ta kue nos man tene, na moda di papia, i ta dirigí nos den e kaminda ku nos mester kana.—Salmo 73:23; Isaias 30:21; 41:10, 13.

7. Dikon dedikashon i boutismo mester ta un desishon personal?

⁷ Loke tin ku motivá nos pa dal e pasonan aki mester ta amor pa Yehova i e deseo di sirbié. Ningun persona no mester batisá djis pasobra un hende ta bis’é ku el a studia sufisiente kaba òf pasobra su amigunan ta bai batisá. Naturalmente, mayornan i otro kristiannan maduro por enkurashá un persona pa pensa riba dedikashon i boutismo. Por ehèmpel, apòstel Pedro a urgi e hendenan ku a skuch’é na Pentekòste pa nan “batisá.” (Echonan 2:38) Sin embargo, nos dedikashon ta un asuntu personal, i ningun otro hende no por hasié pa nos. E desishon di hasi Dios su boluntat ta un desishon ku nos mes mester tuma.—Salmo 40:8.

Preparashon Adekuá pa Boutismo

8, 9. (a) Dikon boutismo di beibi no ta na armonia ku e Skritura? (b) Ki progreso spiritual hóbennan lo mester a hasi promé ku nan batisá?

⁸ Muchanan por hasi un dedikashon basá riba konosementu? E Skritura no ta duna un edat mínimo pa boutismo. Sin embargo, un beibi sigur no por a bira kreyente, ehersé fe òf hasi un dedikashon na Dios. (Echonan 8:12) Relashoná ku e kristiannan di promé siglo, historiadó Augustus Neander a deklará den su  buki General History of the Christian Religion and Church (Historia General di e Religion i Iglesia Kristian): “Na prinsipio ta adultonan so tabata haña boutismo, pasobra hende tabatin e kustumber di mira boutismo i fe komo dos kos estrechamente ligá ku otro.”

⁹ Den kaso di hóbennan, tin di nan na un edat relativamente yòn por komprondé kosnan básiko tokante Dios i su propósito i kultivá un deseo pa aktua na armonia ku loke Dios ta rekerí, miéntras ku otronan ta tuma mas tempu pa hasi esei. Sin embargo, promé ku un hóben batisá e mester tin un relashon personal ku Yehova, un konosementu eksakto di e kosnan fundamental di e Skritura, i un komprondementu bon kla di kiko dedikashon ta enserá, meskos ku den kaso di adultonan.

10. Ki pasonan un persona mester dal promé ku dedikashon i boutismo?

¹⁰ Hesus a instruí su disipelnan pa siña hende nobo tur e kosnan ku el a ordená. (Mateo 28:20) Pues promé ku tur kos, hende nobo tin ku haña un konosementu eksakto di e bèrdat, lokual na su turno lo yuda nan desaroyá fe den Yehova i den su Palabra. (Romanonan 10:17; 1 Timoteo 2:4; Hebreonan 11:6) Anto ora ku bèrdat bíbliko toka un persona su kurason, esei ta motiv’é pa repentí i bira for di su estilo di bida anterior. (Echonan 3:19) Por último, e persona ta yega na un punto kaminda e ke dediká su mes na Yehova i ser batisá, manera Hesus a manda.

11. Dikon ta importante pa nos partisipá ku regularidat den e trabou di prediká promé ku boutismo?

¹¹ Un otro paso importante den e progreso rumbo pa boutismo ta di partisipá den e predikashon di e bon nobo di e Reino. Esaki ta e trabou di mas importante ku Yehova a asigná su pueblo durante e último dianan aki. (Mateo 24:14) Pues asina publikadónan no-batisá por tin e goso di papia tokante nan fe ku otro hende. Tumando parti den e obra aki ta prepará nan tambe pa sigui partisipá ku regularidat i selo den sirbishi di vèlt despues di nan boutismo.—Romanonan 10:9, 10, 14, 15.

Tin Algu Ta Stroba Bo di Batisá?

12. Kiko kisas ta pone ku algun persona no ke batisá?

¹² Sierto personanan kisas no ke batisá pasobra nan no ta masha dispuesto pa aseptá e responsabilidat ku esei ta trese kuné. Nan ta realisá ku pa nan kumpli ku Yehova su normanan, nan lo tin ku hasi kambionan importante den nan bida. Òf kisas nan tin miedu ku lo ta difísil pa kumpli ku e rekisitonan di Dios despues di boutismo. Tin di nan kisas asta ta rasoná: “Podisé un dia lo mi hasi algu malu i nan ta ekspulsá mi for di e kongregashon.”

13. Den tempu di Hesus, kiko a stroba algun hende di bira su siguidó?

¹³ Tempu ku Hesus tabata riba tera, algun hende a laga interesnan personal i lasonan familiar stroba nan di bira su disipel. Un eskriba a deklará ku lo e sigui Hesus na unda ku Hesus bai. Pero Hesus a splika ku hopi biaha e no tabatin ni sikiera un kaminda pa pasa anochi. Ora Hesus a invitá un otro oyente pa bira su siguidó, e hòmber aki a kontestá ku promé lo e tin ku bai “dera” su tata. Probablemente, el a preferá di keda kas warda te dia ku su tata a muri, ku sigui Hesus i atendé ku e responsabilidat di dera su tata ora ku e tempu a yega di bèrdat. Por último, un di tres persona a bisa ku promé ku e sigui Hesus, e tabatin ku “despedí”  di su hendenan di kas. Hesus a deskribí tal posponementu komo ‘wakmentu patras.’ Pues, ta parse ku hende ku eigenlijk no ke sigui Hesus, semper lo por haña èksküs pa evitá di kumpli ku nan responsabilidat kristian.—Lukas 9:57-62.

14. (a) Kon Pedro, Andres, Santiago i Juan a reakshoná ora Hesus a invitá nan pa bira piskadó di hende? (b) Dikon nos no mester vasilá pa aseptá e yugo di Hesus?

¹⁴ Di otro banda, e ehèmpel di Pedro, Andres, Santiago i Juan ta un kontraste masha grandi. Ora Hesus a invitá nan pa siguié i bira piskadó di hende, Beibel ta deklará ku “mesora nan a laga e redanan para i a siguié.” (Mateo 4:19-22) Dor di tuma mesora e desishon di sigui Hesus, nan a eksperensiá personalmente loke Hesus a bisa nan despues: “Tuma mi yugo riba boso, i siña di mi, pasobra mi ta mansu i humilde di kurason; i boso lo haña sosiegu pa boso alma. Pasobra mi yugo ta suave i mi karga ta lihé.” (Mateo 11:29, 30) Ounke ta bèrdat ku boutismo ta bin ku un yugo di responsabilidat, Hesus ta sigurá nos ku e yugo ei ta suave i tolerabel, un yugo ku lo refreská nos masha hopi.

15. Kon e ehèmpel di Moisés i di Jeremias ta mustra ku nos por konfia ku nos lo haña Yehova su sosten?

¹⁵ Klaru ku ta normal pa sinti ku nos lo no por karga e responsabilidat ku ta bin despues di boutismo. Tantu Moisés komo Jeremias na promé instante a sinti ku nan no tabata kapasitá pa kumpli ku e asignashon ku Yehova a duna nan. (Eksodo 3:11; Jeremias 1:6) Kon Dios a trankilisá nan? El a bisa Moisés: “Lo mi ta ku bo.” El a primintí Jeremias: “Ami ta ku bo pa libra bo.” (Eksodo 3:12; Jeremias 1:8) Nos tambe por tin konfiansa den Dios su sosten. Amor pa Dios i konfiansa den dje por yuda nos vense dudanan persistente tokante si nos lo por aktua di akuerdo ku nos dedikashon. Apòstel Juan a skirbi: “Amor no konosé miedu; ma amor perfekto ta kore ku miedu.” (1 Juan 4:18) Un mucha chikitu kisas tin miedu ora e tin ku kana su so, pero e ta kana ku konfiansa ora e tin man di su tata tené. Asina tambe, si nos ta konfia den Yehova ku henter nos kurason, e ta primintí ku lo e ‘dirigí nos bereanan’ segun ku nos ta kana banda di dje.—Proverbionan 3:5, 6.

Un Okashon Digno di Rèspèt

16. Dikon boutismo ta enserá baimentu kompletamente bou di awa?

¹⁶ Normalmente, promé ku e akto di boutismo mes tin un diskurso bíbliko ku ta splika e importansia di boutismo kristian. Na final di e diskurso aki, e oradó ta pidi e kandidatonan pa hasi un deklarashon públiko di nan fe dor di kontestá e dos preguntanan di boutismo. (Romanonan 10:10; wak e kuadro na página 22.) Kaba ta bai batisá e kandidatonan den awa, di akuerdo ku e patronchi ku Hesus mes a pone.  Beibel ta mustra ku despues ku Hesus a batisá, el a “sali for di awa.” (Mateo 3:16; Marko 1:10) Pues ta bisto ku Juan Boutista a hinka Hesus kompletamente bou di awa. * E baimentu kompletamente bou di awa ta simbolisá e kambio drástiko ku nos a hasi den nos bida; ta komo si fuera nos a muri pa ku nos forma anterior di biba i a kuminsá un bida nobo den e sirbishi di Dios.

17. Kon tantu e kandidatonan pa boutismo komo e opservadónan por kontribuí na e dignidat di e okashon?

¹⁷ Boutismo ta un okashon serio i a la bes gososo. Beibel ta indiká ku Hesus tabata hasiendo orashon ora ku Juan a batis’é den Riu Hordan. (Lukas 3:21, 22) Na armonia ku Hesus su ehèmpel, kandidatonan pa boutismo awe mester komportá nan mes ku rèspèt. Anto komo ku Beibel ta urgi nos pa bisti desente den nos bida diario, kuantu mas nos tin ku obedesé e konseho aki riba e dia di nos boutismo! (1 Timoteo 2:9) Opservadónan tambe por demostrá e debido rèspèt dor di skucha ku atenshon na e diskurso di boutismo i dor di para wak e boutismo na un manera ordená.—1 Korintionan 14:40.

Bendishonnan Ku Disipelnan Batisá Ta Disfrutá di Dje

18, 19. Ki privilegio i bendishon boutismo ta trese kuné?

¹⁸ Unabes nos a dediká nos mes na Dios i a batisá, nos ta bira parti di un famia úniko. Na promé lugá, Yehova ta bira nos Tata i nos Amigu. Promé ku nos a batisá, nos tabata alehá for di Dios; awor nos a rekonsiliá kuné. (2 Korintionan 5:19; Kolosensenan 1:20) Mediante e sakrifisio di Kristu, nos a hala serka Dios i e ta hala serka nos. (Santiago 4:8) Profeta Malakias a deskribí kon Yehova ta presta atenshon i ta skucha e hendenan ku ta usa i karga su nòmber, i e ta inkluí nan nòmber den su buki di memoria. Dios ta bisa: “Nan lo ta di mi . . . i lo mi spar nan manera un hòmber ta spar su mes yu hòmber ku ta sirbié.”—Malakias 3:16-18.

¹⁹ Tambe boutismo ta hasi posibel ku nos por bira parti di un hermandat mundial. Ora ku apòstel Pedro a puntra kiko ta e bendishonnan ku e disipelnan di Kristu lo haña pa e sakrifisionan ku nan a hasi, Hesus a primintí: “Tur hende ku a bandoná kasnan òf ruman hòmbernan òf ruman muhénan òf tata òf mama òf yunan òf kunukunan pa kousa di mi nòmber, lo risibí hopi bes mas tantu, i lo heredá bida eterno.” (Mateo 19:29) Añanan despues, Pedro a skirbi tokante “rumannan den henter mundu.” Pedro personalmente a eksperensiá e sosten i bendishon di un hermandat amoroso, i nos tambe por eksperensi’é.—1 Pedro 2:17; 5:9.

20. Ki speransa maravioso boutismo ta duna nos?

²⁰ Ademas, Hesus a indiká ku esnan ku siguié lo “heredá bida eterno.” Sí, dedikashon i boutismo ta duna nos e speransa di “gara loke ta bida berdadero,” esta, bida eterno den Dios su mundu nobo. (1 Timoteo 6:19) Tin un fundeshi mas mihó ku nos lo por edifiká pa nos mes i pa nos famia? E speransa maravioso aki lo kapasitá nos pa ‘kana den e nòmber di Yehova nos Dios pa semper i semper.’—Mikeas 4:5.

[Nota]

Bo Por Splika?

• Kon nos mester reakshoná riba Yehova su amor, i dikon?

• Ki progreso spiritual mester tuma lugá promé ku boutismo?

• Dikon nos no mester laga miedu di frakasá òf ser indispuesto pa aseptá responsabilidat stroba nos di batisá?

• Ki bendishonnan úniko disipelnan batisá di Hesukristu por disfrutá di dje?

[Preguntanan di Estudio]

[Plachi na página 26]

“Kiko ta stroba pa mi wòrdu batisá?”

[Plachinan na página 29]

Boutismo ta un okashon serio i a la bes gososo