Pregunta di Lektor

Kiko nos por siña for di e prohibishon ku tin na Eksodo 23:19: “No herebé un yu di kabritu den lechi di su mama”?

E mandamentu aki di e Lei di Moisés ta aparesé tres biaha den Beibel, i e por yuda nos komprondé Yehova su punto di bista di loke ta moralmente korekto, su kompashon i su ternura. E ta enfatisá tambe Yehova su odio kontra adorashon falsu.—Eksodo 34:26; Deuteronomio 14:21.

Herebé un yu di kabritu òf di otro bestia den lechi di su mama lo tabata kontra Yehova su areglo òf lei di naturalesa. Dios a perkurá e lechi di mama pa alimentá e yu i pa yud’é krese. Si kushiná e yu den lechi di su propio mama esei lo a demostrá, segun e palabranan di un erudito, “un menospresio di e relashon ku Dios a establesé i santifiká entre mayor i yu.”

Ademas, tin eksperto ta kere ku e akto di herebé un yu di kabritu den lechi di su mama lo por tabata un rito pagano pa laga áwaseru kai. Si esei tabata e kaso, e prohibishon lo a sirbi pa protehá e israelitanan for di e práktikanan religioso kruel i sin sentido di e nashonnan rònt di nan. E Lei di Moisés spesífikamente a prohibí e israelitanan di kana den e kustumbernan di e nashonnan ei.—Levítiko 20:23.

Por último, e lei en partikular aki ta demostrá Yehova su kompashon i ternura. De echo, e Lei tabatin un kantidat di mandamentu similar ku a prohibí krueldat kontra bestia i tambe otro leinan ku a prevení kosnan ku a bai kontra naturalesa. Por ehèmpel, den e Lei tabatin mandamentu ku a prohibí pa sakrifiká un bestia a ménos ku el a keda por lo ménos shete dia serka su mama, no por a mata un bestia ku su krio riba e mesun dia, i no tabatin mag di kue un mama huntu ku su webunan òf su yunan for di un nèshi.—Levítiko 22:27, 28; Deuteronomio 22:6, 7.

Pues, ta bisto ku e Lei no tabata simplemente un sèt di mandamentu i prohibishon kompliká. Un di e benefisionan di e Lei ta ku su prinsipionan ta yuda inkulká den nos un sensibilidat moral haltu ku realmente ta reflehá Yehova su kualidatnan maravioso.—Salmo 19:7-11.

[Rekonosementu pa Potrèt na página 31]

© Timothy O’Keefe/Index Stock Imagery