Bo Ta Kòrda?

Bo a disfrutá di e edishonnan resien di E Toren di Vigilansia? Wèl, wak si bo por kontestá e siguiente preguntanan:

• Kua ta algun motibu ku tin asina tantu maldat awe?

Un di e kousanan di maldat ta hende su inklinashon pa hasi malu. (Génesis 8:21) Un otro motibu ta ku mayoria hende no tin konosementu eksakto di e boluntat di Dios. Ademas Satanas, e originadó di maldat, ta sigui mete den asuntunan humano.—1/1, página 4-6.

• Ki efektonan positivo por resultá di un bon palabra duná na ora? (Proverbionan 12:25)

E por edifiká konfiansa den e persona ku nos ta papia kuné, enkurash’é i motiv’é, i tambe krea den dje un sintimentu di logro i aseptashon. Ademas, segun ku nos ta buska oportunidat pa elogiá otro hende, esei ta yuda nos mira e bon den nan.—1/1, página 16-17.

• Kiko tabatin den e arka di aliansa?

E tabatin e dos tablanan di piedra di e Lei i tambe un tiki mana. Despues di e rebelion di Koré, a pone e bara di Aaron den e Arka pa sirbi komo un testimonio kontra e generashon di e tempu ei. (Hebreonan 9:4) Kisas nan a saka e bara i e mana for di e Arka promé ku e dedikashon di e tèmpel di Salomon.—15/1, página 31.

• Dikon e hudiunan den tempu di Nehemias tabatin ku trese palu na e tèmpel?

E Lei di Moisés no a rekerí pa duna ofrenda di palu. Pero den tempu di Nehemias tabatin mester di un suministro kontinuo di palu pa por a kima sakrifisio riba altar.—1/2, página 11.

• Kiko e Fragmento di Muratori ta?

E ta parti di un manuskrito na latin. Originalmente e teksto a ser redaktá na griego rònt di fin di siglo 2 di nos era. E ta e kánon, òf lista konsiderá konfiabel, di mas bieu ku ta eksistí di e bukinan di e Skritura Griego Kristian. Tambe e ta duna komentario riba e bukinan ei i nan respektivo eskritornan.—15/2, página 13-14.

• Dikon Reina Vasti a keda nenga di bin serka rei?

Beibel no ta bisa su motibu. Algun erudito ta pensa ku e reina a nenga di obedesé pasobra e no kier a degradá su mes dilanti di e huéspetnan burachi di rei. Òf por ta ku e reina, ku di aparensia tabata masha bunita, en realidat no tabata sumiso, i asina el a pone un mal ehèmpel pa e otro esposanan den e Imperio di Persia.—1/3, página 9.

• Kon e reskate ta perkurá liberashon?

Hesus su sakrifisio por libra nos di piká heredá i tambe di e efektonan mortal di piká. (Romanonan 6:23) E sakrifisio aki ta libra kristiannan berdadero di un mal konsenshi. Anto dor di ehersé fe den e reskate, nos por ser librá di miedu relashoná ku nos posishon dilanti Dios. (1 Juan 2:1)—15/3, página 8.

• Kiko nos por siña for di e prohibishon den e Lei pa no herebé un yu di kabritu den lechi di su mama? (Eksodo 23:19)

E akto aki lo por tabata un rito pagano pa laga áwaseru kai. (Levítiko 20:23) Dios a perkurá e lechi di un mama di kabritu pa alimentá e yu i pa yud’é krese. Kushinando e yu den e lechi ei lo a demostrá un menospresio pa e relashon ku Dios a establesé entre mayor i yu. E lei kontra esaki a demostrá Dios su kompashon i ternura.—1/4, página 31.