Kon Bo Por Tuma Desishon di Akuerdo ku Dios Su Boluntat?

UN HÒMBER na Merka a bai banko ku un chèk di 25.000 dòler. Su intenshon tabata pa depositá e sèn riba un kuenta di spar mará na plaso fiho. Sin embargo, e bankero a konseh’é pa invertí e sèn riba bolsa di balor, splikando ku riba plaso largu e bolsa nunka ta pèrdè su balor. E hòmber a disidí di sigui e konseho di e bankero. Pero poko despues di esei, su invershon a pèrdè gran parti di su balor.

E eksperensia aki ta ilustrá ku no ta fásil pa tuma desishonnan sabí. Kiko di vários desishon ku nos ta konfrontá den bida? Hopi desishon por nifiká e diferensia entre éksito òf frakaso—i tardi òf trempan—entre bida òf morto. Pues, kon nos por tin e konfiansa ku nos ta tumando desishonnan sabí?

“Esaki Ta e Kaminda”

Tur dia, nos tin ku disidí kiko lo kome, kiko lo bisti, unda lo bai, etcetera. Algun desishon por parse insignifikante, sin embargo nan por tin konsekuensianan serio. Por ehèmpel, e desishon di sende un sigaria pa promé bes, por hiba na e kustumber di sigui huma pa bida largu. Nunka nos no mester balotá e importansia di desishonnan ku por parse chikitu.

Unda nos por akudí pa haña guia ora di tuma desishon, asta esnan aparentemente insignifikante? Lo ta un kos maravioso si nos por tabatin un konsehero konfiabel pa konsehá nos ora nos ta konfrontá un desishon difísil! Bo por haña un konsehero asina. Un buki antiguo ku tin un mensahe pa nos tempu ta bisa lo siguiente: “Bo orea lo tende un palabra tras di bo ta bisa: ‘Esaki ta e kaminda, kana den dje,’ ki ora ku boso bira na man drechi òf na man robes.” (Isaias 30:21) Ken a ekspresá e palabranan aki? I kon nos por ta sigur ku su guia ta konfiabel?

Nos ta haña e garantia ei den Beibel. Un buki ku miónes di hende a studia i a bin realisá ku e ta inspirá dor di Yehova Dios, e Kreadó. (2 Timoteo 3:16, 17) Yehova sa kon nos ta trahá, pues e ta e mihó fuente di guia. Tambe e por mira loke ta bai pasa den futuro, siendo ku e “ta deklará e fin for di prinsipio, i for di tempunan antiguo, kosnan ku no a wòrdu hasí ainda, bisando: ‘Mi propósito lo wòrdu establesí.’” (Isaias 46:10) P’esei un salmista a ekspresá su konfiansa den e Palabra di Yehova asin’aki: “Bo palabra ta un lampi pa  mi pia i un lus pa mi kaminda.” (Salmo 119:105) Sin embargo, kon Yehova ta yuda nos nabegá atraves di e awanan turbulento di e mundu djawe? Kon nos por tuma desishon di akuerdo ku Dios su boluntat?

Apliká Prinsipionan Bíbliko

Yehova Dios a duna kristiannan prinsipionan divino pa yuda nan tuma desishonnan sano. Siña prinsipionan bíbliko i apliká nan ta meskos ku siña un idioma i us’é. Unabes bo ta dominá e idioma, bo sa ki ora un hende a kometé un eror gramatikal pasobra loke e ta bisa no ta zona bon. Kisas bo no por bisa spesífikamente ta kiko ta robes den su deklarashon, pero bo sa sí ku e ta robes. Ora bo siña prinsipionan bíbliko i sa kon pa apliká nan korektamente den bo bida, lo bo sa por lo general ki ora un sierto desishon no ta bon, esta, ku e no ta na armonia ku e prinsipionan di Dios.

Konsiderá por ehèmpel e desishon ku un yònkuman tin ku tuma ora di skohe un stail di kabei. No tin un mandamentu bíbliko ku spesífikamente ta kondená sierto stail di kabei. Sin embargo, konsiderá un prinsipio bíbliko. Apòstel Pablo a skirbi: “Mi kier pa hende muhé dòrna nan mes ku bistí apropiá, desente i moderá, no ku kabei tur na flègtu i oro òf pèrla òf bistí kostoso, sino mas bien ku bon obra, manera ta pas pa muhénan ku ta teme Dios.” (1 Timoteo 2:9, 10) Aki Pablo a skirbi tokante hende muhé, pero e prinsipio ta apliká tantu pa hende hòmber komo hende muhé. Kiko ta e prinsipio? Nos aparensia mester reflehá sano huisio, e mester ta desente i moderá. Pues e yònkuman por puntra su mes: ‘Mi stail di kabei ta moderá, di tal manera ku e ta pas pa un kristian?’

Anto kua prinsipio útil un hóben por saka for di e siguiente palabranan di disipel Santiago? “Adúlteranan, boso no sa ku amistat ku mundu ta enemistat pa ku Dios? P’esei, ken ku kier ta amigu di mundu ta hasi su mes enemigu di Dios.” (Santiago 4:4) Kristiannan ta odia e idea di ser un amigu di mundu, lokual ta nifiká enemistat ku Dios. E stail di kabei ku e yònkuman su pareunan ta preferá lo lag’é parse un amigu di Dios òf un amigu di mundu? E yònkuman ku ta pensando riba e asuntu di stail di kabei por usa e tipo di prinsipionan ei basá riba Beibel pa tuma un desishon sabí. Sí, prinsipionan bíbliko ta yuda nos tuma desishon. Anto ora nos kustumbrá tuma desishon basá riba prinsipionan bíbliko, ta bira mas fásil pa yega na konklushonnan sabí ku lo no tin konsekuensianan negativo.

Nos por haña hopi prinsipio den e Palabra di Dios. Klaru ku kisas nos lo no haña un teksto ku ta apliká spesífikamente na nos situashon. Sin embargo, nos por lesa tokante algun persona ku a obedesé Dios su guia i tokante  otronan ku a ignorá Dios su spièrtamentu. (Génesis 4:6, 7, 13-16; Deuteronomio 30:15-20; 1 Korintionan 10:11) Lesando e relatonan ei i analisando e resultadonan, nos lo saka afó prinsipionan divino ku por yuda nos tuma desishonnan ku ta agradá Dios.

Wak por ehèmpel un kòmbersashon kòrtiku ku Hesukristu tabatin ku apòstel Pedro. E hòmbernan ku tabata kobra e belasting di tèmpel a puntra Pedro: “Boso maestro no ta paga e belasting di tèmpel?” Pedro a kontestá: “Sí.” Poko despues, Hesus a puntra Pedro: “Ken e reinan di tera ta kobra tributo òf belasting: nan yu hòmbernan òf stranheronan?” Ora Pedro a kontestá: “Stranheronan,” Hesus a bis’é: “Kier men e yunan ta liber anto. Ma pa nos no ofendé nan, bai laman, tira anzue i kohe e promé piská ku bin ariba. I ora bo habri su boka, lo bo haña un moneda. Kohe esei duna nan pa mi i pa bo.” (Mateo 17:24-27) Ki prinsipionan nos por saka for di e relato aki?

Dor di hasi un seri di pregunta, Hesus a yuda Pedro komprondé ku siendo ku E ta e Yu di Dios, e no tin ku paga belasting. Ounke Pedro na promé instante no a komprondé e punto ei, Hesus bondadosamente a yud’é komprondé. P’esei, ora otro hende kometé un eror, nos mester disidí, meskos ku Hesus, pa trata nan ku kompashon en bes di kondená nan òf mustra nan riba nan eror na un manera severo.

Pedro por a mira e ora ei e motibu pa paga e belasting, esta, pa no ofendé otro hende. Esaki tambe ta otro prinsipio ku nos por siña for di e relato aki. Tuma na kuenta e konsenshi di otro hende ta mas importante ku insistí pa hasi algu ku ta den nos derecho pero ku lo ofendé otro hende.

Kiko ta motivá nos pa tuma desishonnan ku lo mustra rèspèt pa e konsenshi di otro hende? Amor pa nos próhimo. Hesukristu a siña nos ku e úniko mandamentu mas importante ku stima nos próhimo meskos ku nos mes, ta di stima Dios ku henter nos alma. (Mateo 22:39) Sin embargo, nos ta bibando den un mundu ku ta promové egoismo, i komo hende pekaminoso nos ta inkliná pa ta egoista. Pues, pa un persona stima su próhimo meskos ku su mes, e tin ku renobá su mente, esta, kambia su manera di pensa.—Romanonan 12:2.

Hopi hende a kambia nan manera di pensa, i nan ta tuma na kuenta e konsenshi di otro hende ora di tuma desishon, sea ku ta desishonnan grandi òf chikitu. Pablo a skirbi: “Boso a wòrdu yamá pa libertat, rumannan; solamente, no usa boso libertat komo un oportunidat pa e karni, ma laga un sirbi otro pa medio di amor.” (Galationan 5:13) Kon nos por aktua na armonia ku e teksto aki? Konsiderá e kaso di un ruman muhé hóben ku a muda pa un pueblo pafó di stat pa yuda hende siña tokante e Palabra di Dios. Segun ku e tabata papia ku e hendenan, el a bin realisá ku su pañanan a bira e tópiko di kòmbersashon, ounke a base di normanan  di stat su pañanan tabata moderá. Su manera di bisti i peña tabata moderá, sin embargo el a disidí di bisti paña ménos kolorido, ménos na moda, “pa e palabra di Dios no wòrdu desonrá.”—Tito 2:5.

Kon abo lo a reakshoná si bo hañá bo konfrontá ku un desishon tokante bo areglo personal òf un otro asuntu di gustu personal? Bo por tin sigur ku Yehova lo keda kontentu ora ku bo desishonnan ta reflehá ku bo ta interesá den e konsenshi di otro hende.

Mira Asuntunan Riba Término Largu

Fuera di prinsipionan bíbliko i e konsenshi di otro hende, kiko mas nos por konsiderá ora di tuma desishon? Hiba un estilo di bida kristian ta difísil, meskos ku kana den un kaminda smal, yen di baranka. Sin embargo, Dios ta duna kristiannan hopi libertat denter di e límitenan ku el a pone. (Mateo 7:13, 14) Nos tin ku konsiderá ki efekto nos desishonnan lo tin riba nos bienestar spiritual, mental, emoshonal i físiko den futuro.

Suponé ku bo tabatin pensá di aseptá un trabou. Podisé no tin nada inmoral ni inapropiá ku e trabou riba su mes. Lo bo por asistí na reunion- i kongresonan kristian. Bo salario lo ta mas di loke hamas bo a soña. E doño di trabou ta duna hopi balor na bo abilidat i lo ke usa bo pleno potensial. Ademas, bo gusta e tipo di trabou ei. Tin algu ku mester stroba bo di aseptá e oferta? Wèl, kiko si bo ta mira di antemano ku tin chèns ku lo bo bai stima e trabou ei? Nan ta bisa bo ku nan lo no obligá bo traha overtaim. Pero pa terminá un proyekto, bo mes lo ta dispuesto pa hasi mas esfuerso di loke ta nesesario? Akaso e trahamentu di overtaim lo sosodé ku frekuensia? Esei lo por kita bo for di bo famia i ku tempu asta for di aktividatnan spiritual ku definitivamente bo no mester pèrdè?

Wak kon Jim a tuma un desishon grandi relashoná ku su empleo. El a traha inkansablemente i a bai hopi dilanti den e kompania. Ku tempu, el a bira direktor di e kompania den Oriente, direktor ehekutivo di nan filial na Merka i un miembro di e hunta di direktiva di e kompania su aktividatnan na Europa. Sin embargo, ora a surgi un krísis ekonómiko na Hapon, el a realisá kon enbano tabata pa kore tras di plaka i poder. E plaka ku el a traha asina duru p’e a disparsé rápidamente. El a sinti ku su bida tabata falta un propósito. El a puntra su mes: ‘Kiko lo mi ta hasiendo aki dies aña?’ E ora ei el a realisá ku su kasá i su yunan sí tabata enfoká riba metanan mas signifikativo den bida. Atraves di añanan, nan a asosiá ku Testigunan di Yehova. Jim tambe kier a sinti e felisidat i satisfakshon ku su famia tabata disfrutá di dje. El a kuminsá studia Beibel.

No a tarda hopi ku Jim por a mira ku su estilo di bida tabata strob’é di hiba un bida ku propósito komo un kristian. Komo ku konstantemente e tabata biaha entre Asia, Merka i Europa, e no tabatin sufisiente tempu pa studia Beibel ni asosiá ku rumannan den fe. E mester a tuma un desishon: ‘Lo mi sigui hiba e bida ku mi a biba durante e último 50 añanan, òf lo mi sigui tras di un manera di biba nobo?’ Despues di a hasi orashon tokante e asuntu, el a konsiderá ki efekto su desishon lo tin riba término largu. Anto el a disidí di renunsiá for di tur su puestonan ku eksepshon di unu, ya asina e por tabatin tempu pa aktividatnan spiritual. (1 Timoteo 6:6-8) Su desishon a hasié mas felis, i a dun’é e oportunidat di ta okupá ku aktividatnan kristian.

Sea ku bo desishonnan ta grandi òf chikitu, nan ta importante. Un desishon ku bo tuma awe por nifiká e diferensia entre éksito òf frakaso, asta bida òf morto den futuro. Bo por tuma desishon sabí si bo tuma na kuenta prinsipionan bíbliko, tambe e konsenshi di otro hende i ki efekto riba término largu bo akshon lo tin. Tuma desishon di akuerdo ku Dios su boluntat.

[Plachi na página 13]

Desishonnan aparentemente insignifikante por tin konsekuensianan serio

[Plachi na página 14]

Kon prinsipionan bíbliko lo por yud’é tuma un desishon sabí?

[Plachi na página 15]

Hesus a papia ku Pedro ku kompashon